Wanem Samting Tru Bai Painim Yu long Bihain?
MASKI yu yangpela yet o yu lapun, maski yu gat planti samting o yu stap rabis, maski yu gat sik o nogat, tasol yu gat taim bihain—em dispela hap taim i go long taim yu dai. Ol samting nau yu i as bilong ol samting bai painim yu long dispela hap taim bilong bihain. Olsem na nau yu mas tingim gut dispela bihain na ol samting yu laik mekim.
Yu gat dispela hap taim moa, tasol bikpela samting em olsem: Bai yu mekim wanem long dispela hap taim? Yu tingting long mekim wanem ol samting long bihain? Wanpela saveman i tok: ‘Yumi olgeta yumi mas tingim taim bihain, long bai yumi stap long en i go inap long taim yumi dai.’
Yu Ting Olsem Wanem long Bihain?
Bilong wanem planti manmeri ol i no tingim gut taim bihain? I gat planti as bilong dispela. Sampela em olsem:
▪ Ol i tingting planti long ol samting i painim ol long nau, olsem na ol i no tingting long bihain.
▪ Ol manmeri bilong nau i gat wanpela tingting, olsem: ‘Kisim amamas nau, no ken tingim tumora.’
▪ Sampela i ting ol i no inap senisim ol samting bai painim ol long bihain. Ol i ting God i makim pinis na ol i no inap abrusim.
▪ Planti ol i les, ol i pilim olsem ol samting i no kamap gutpela, olsem na ol i no tingting long sampela samting ol i laik mekim long bihain.
Tasol olsem wanem long ol manmeri ol i save tingim ol samting ol i laik mekim long bihain? Ating ol i no tingim samting tru ol i laik mekim na ol samting i no kamap olsem ol i bin ting long en na bihain ol i bel hevi. Sapos tingting na wok bilong ol man i as bilong ol samting ol i tingting long en, orait ating ol narapela kain samting bai kamap. Wanpela saveman bilong bipo em i stori long tingting bilong ol man na em i tok: “O Jehova, mi save tru, ol man bilong graun ol i no inap stiaim wokabaut bilong ol. I no wok bilong man long bosim wokabaut bilong em.”—Jeremaia 10:23, NW.
Sapos i hatwok long man i bosim wokabaut bilong em yet, olsem wanem bai em i bosim gut wokabaut bilong ol narapela man? Em i no inap mekim. Long wanem i gat tupela samting i save stiaim tingting bilong ol man na dispela tupela samting i kranki. Wanpela em ol pasin yumi kisim long papamama na i stap long skin bilong yumi taim mama i karim yumi; na wanpela em tingting bilong ol manmeri yumi stap namel long ol. Ol gavman na lotu na bisnis na ol narapela man ol i save wok long subim yumi long bihainim tingting bilong ol. Na wanem samting i kamap? Ol samting yumi tingting long mekim long bihain i no kamap tru. Wok bilong yumi i lus nating.—Rom 5:12;1 Jon 5:19.
Olsem: Ating yu tingting long givim gutpela skul long ol pikinini bilong yu na yu ting dispela bai helpim ol long bihain. Tasol planti yangpela manmeri i bin winim bikpela skul, ol i no gat wok. O ating yu tingting long wok strong nau long kisim mani bambai yu inap i stap gutpela long bihain. Tasol oltaim pe bilong ol samting i go antap na mani yumi bungim pinis i no gat strong moa. O ating yu tingting long yu bai pinis wok na kisim pinis mani bilong yu, na bai yu inap i stap gutpela na i stap amamas i go inap long taim yu dai. Tasol planti manmeri i gat dispela kain tingting, i dai o narapela samting i pasim ol long kisim dispela gutpela sindaun. O ating yu ting olsem tumora bai ol samting i kamap gutpela. Tasol ol samting i no kamap olsem.
Tingting Stret long Bihain
Ating yu laik save, ‘Mi ken mekim wanem na bai mi inap i stap gutpela long bihain na dispela samting i ken kamap tru?’ Ating tok bilong John Galsworthy, wanpela man i bin kisim Nobel Prais, em inap helpim yu na bekim dispela askim. Em i tok: “Sapos yu no tingting long bihain, bai yu no inap i stap long bihain.” Olsem na pastaim yu mas tingim gut ol samting inap kamap long bihain. Na yu mas tingting olsem: ‘Mi laik kamap wanem kain man o meri? Mi laik mekim wanem long bihain?’ Na bihain yu mas kirap mekim ol samting bambai yu inap mekim ol dispela samting yu tingting long mekim.
Taim yu tingting long bihain, yu mas tingim tu ol tok bilong Baibel. Long wanem Baibel inap helpim yu long save long sampela samting ating yu no save em bai kamap long bihain. Baibel i kolim stret ol samting bai kamap long bihain. Em inap kolim ol dispela samting, long wanem God Jehova yet em i As bilong ol tok bilong en. Jehova i tok: “Taim samting i save kirap nupela, long dispela taim Mi save kolim ol samting bai kamap bihain; long bipo tru Mi bin tokaut long ol samting i no bin kamap yet.” (Aisaia 46:10, NW) Olsem na sapos yumi kisim save long ol samting God i laik mekim na yumi save long ol samting dispela bai mekim long yumi, bai yumi bihainim gutpela rot, a? Olsem bai ol samting yumi tingting long en bai kamap tru. Orait, God i tok profet olsem wanem long ol samting bai kamap long bihain na yumi mas save long en? Yumi inap stretim ol samting yumi tingting long mekim long bihain bambai i stret wantaim ol samting God i tok em bai mekim?