Bilip na i Stap Bilong Yu Long Bihain
“Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru.”—HIBRU 11:1.
1. Klostu olgeta man i laik bai wanem kain taim i ken kamap?
YU SAVE tingting long ol samting bilong bihain? Klostu olgeta man i save mekim olsem. Ol i laik bai gutpela taim i ken kamap na ol man bai stap bel isi, ol i no pret long wanpela samting, ol i gat gutpela sindaun, ol i gat gutpela wok na ol gutpela samting i ken kamap long wok bilong ol, no gat sik, na ol i ken i stap longtaim. Ating olgeta lain i bin kamap bipo ol i laik kisim ol dispela samting. Na long dispela taim nau bilong planti hevi, ol man i gat bikpela laik moa yet long kisim ol dispela samting.
2. Wanpela bikman i tok wanem long ol samting bai kamap bihain?
2 Nau yumi stap klostu long yia 2000, olsem na yu ting i gat rot na bai yu ken save long ol samting bai kamap bihain? Inap 200 yia samting bipo, wanpela bikman bilong Amerika, em Patrik Henri, em i kolim wanpela rot. Em i tok: “Bilong save long ol samting bai kamap bihain, yumi mas skelim ol samting i bin kamap bipo; mi no save long narapela rot.” Dispela tingting i makim olsem ol samting ol man i bin mekim bipo inap helpim yumi long save long i stap bilong yumi long bihain. Planti man i wanbel long dispela tingting.
Ol Samting i Bin Kamap Bipo
3. Wanem ol samting i bin kamap bipo na dispela i givim tingting long yumi long ol samting bai kamap bihain?
3 Sapos ol samting bai kamap bihain i wankain olsem ol samting i bin kamap bipo, dispela i no inap strongim bel bilong yumi, a? Tingim ol lain i bin kamap bipo. Yu ting i stap bilong ol lain bilong bihain i wok long kamap gutpela na winim i stap bilong ol lain i bin kamap paslain long ol? Nogat, long wanem, maski ol man i bin wet inap planti tausen yia long ol samting bai kamap gutpela, na maski ol lain long sampela hap ol i wok long kisim planti nupela samting bilong skin, long olgeta taim bipo na i kam inap nau, i gat pasin bilong daunim ol man nating na mekim nogut long ol, pasin raskol, bagarapim man, ol bikpela pait, ol lain i stap rabis. Ol narapela narapela bikpela hevi na bagarap i bin painim ol man bilong dispela graun, na bikpela as bilong dispela em wok bilong ol man long bosim graun. Baibel i tok stret olsem: “[Ol] bikman i wok long daunim ol arapela manmeri na mekim nogut long ol.”—Saveman 8:9.
4, 5. (a) Taim yia 1900 i kamap, i gat wanem as na ol man i bilip olsem ol gutpela samting bai kamap? (b) Wanem samting i kamap na tingting bilong ol long gutpela taim bai kamap em i pinis?
4 Ol samting nogut ol man i bin mekim long bipo, ol dispela pasin i wok long kamap gen—tasol em i kamap bikpela moa yet na kamapim ol bikpela bagarap moa. Dispela taim nau yumi stap long en i kamapim klia tru dispela samting. Olsem wanem? Ol lain i bin tingim ol popaia ol man i bin mekim long bipo na dispela i givim tingting long ol na ol i abrusim ol dispela pasin? Taim yia 1900 i kamap, planti man i bilip strong olsem gutpela taim bai kamap, long wanem, gutaim i bin i stap inap planti yia liklik, na ol samting bilong wok bisnis na saiens na skul i bin kamap gutpela moa yet. Wanpela profesa bilong yunivesiti i tok, long yia 1900 samting ol man i ting olsem pait i no inap kamap moa, long wanem, ‘nau ol man i gat save na ol i sindaun gut.’ Wanpela man bipo em i praim-minista bilong Briten em i kamapim tingting ol man i bin holim long dispela taim. Em i tok: “Mipela i ting olgeta samting bai wok long kamap gutpela moa. Mama i bin karim mi long taim bilong ol man i gat dispela kain tingting.” Tasol em i tok moa olsem: “Wantu tasol, long moningtaim bilong wanpela de long 1914, dispela tingting long gutpela taim bai kamap em i pinis.”
5 Em nau, long dispela taim bipo ol i bilip olsem ol samting bai kamap gutpela long bihain, tasol i no longtaim bihain long yia 1900 na ol man i kamapim wanpela bikpela bagarap tru, winim olgeta bagarap ol i bin kamapim paslain long en—em Namba Wan Pait Bilong Olgeta Hap. Bilong helpim yumi long save olsem em i wanpela pait nogut tru, tingim samting i bin kamap long 1916, taim ol soldia bilong Briten i kirapim pait long ol soldia bilong Jemani klostu long wara Som long Frans. Insait long sampela aua tasol, 20,000 soldia bilong Briten i bagarap na planti soldia bilong Jemani tu ol i bagarap. Namba Wan Pait i stap 4-pela yia na i bagarapim klostu 10 milion soldia na planti milion manmeri i no insait long ami. Inap sampela yia, lain manmeri long Frans ol i go liklik, long wanem, planti man tumas i bin bagarap long pait. Planti wok bisnis na ol samting bilong mani i bagarap, na dispela i mekim na long 1930 samting i gat bikpela hevi bilong mani i kamap long olgeta hap bilong graun. Olsem na i gat as na sampela man i bin tok, taim Namba Wan Pait i kirap, long dispela taim ol man bilong graun i kamap longlong!
6. Bihain long Namba Wan Pait, ol samting i kamap gutpela?
6 Ol manmeri i bin stap long dispela taim bipo, yu ting ol i bin wetim kain taim olsem i kamap? Nogat tru. Ol samting ol i bilip na wet long en i lus olgeta; na dispela pait i no kamapim sampela gutpela samting long bihain, nogat. Inap 21 yia tasol bihain long Namba Wan Pait, olsem long 1939, ol man i kamapim wanpela bikpela bagarap i nogut moa—em Namba 2 Pait Bilong Olgeta Hap. Dispela pait i bagarapim 50 milion man, meri, pikinini. Ol i tromoi planti bom moa yet na pinisim planti bikpela taun. Long wanpela pait i bin kamap long taim bilong Namba Wan Pait, sampela tausen soldia i bagarap insait long sampela aua tasol, tasol long taim bilong Namba 2 Pait, tupela bom atom tasol i bagarapim 100,000 manmeri wantu tasol! Samting planti man i ting em i nogut moa na i winim dispela, em ol Natsi i bin kilim i dai planti milion manmeri insait long ol banis kalabus.
7. Olsem wanem long ol samting i bin kamap insait long taim bilong yumi?
7 Sampela ripot i tok, sapos yumi bungim ol pait i kamap namel long sampela kantri, na ol pait i kamap insait long ol kantri, na ol manmeri em ol gavman bilong ol yet i bin kilim ol i dai, orait yumi ken tok, insait long taim bilong yumi inap olsem 200 milion manmeri ol i bin bagarap long ol dispela rot. Wanpela ripot i tok, inap 360 milion i bin bagarap. Tingim samting nogut tru bilong en—bikpela pen, krai, bel hevi, na sindaun bilong planti manmeri i bagarap olgeta! Na tu, long olgeta de inap olsem 40,000 manmeri, em planti ol i pikinini, ol i save dai, long wanem, ol i stap rabis na ol i kisim bagarap long dispela. Na long olgeta de, ol i save kilim i dai 120,000 pikinini long rot bilong rausim bel. Na inap olsem wan bilion manmeri ol i stap rabis, olsem na ol i no inap kisim kaikai inap long ol i ken mekim wok bilong ol long olgeta de. Olsem Baibel i tok profet, ol dispela samting i makim olsem yumi stap long “taim bilong las de” bilong dispela taim nogut.—2 Timoti 3:1-5, 13; Matyu 24:3-12; Luk 21:10, 11; KTH 6:3-8.
Ol Man i No Inap Stretim
8. I gat wanem as na ol bikman bilong graun i no inap stretim ol hevi bilong ol man?
8 Nau yumi stap klostu long yia 2000, na ol samting i bin kamap long taim bilong yumi, em yumi ken bungim wantaim ol samting i bin kamap long bipo. Dispela i skulim yumi long wanem samting? Em i skulim yumi olsem: Ol bikman bilong graun i no bin stretim ol bikpela hevi bilong ol man, na nau ol i no stretim, na bihain tu bai ol i no ken stretim. Ol i no save long rot bilong kamapim kain sindaun olsem yumi laikim long bihain, maski ol i gat bikpela laik long mekim olsem. Tasol sampela bikman i no gat dispela laik; ol i gat laik long kisim bikpela namba na strong bilong kamapim biknem bilong ol yet na kisim planti mani samting, na i no bilong helpim ol narapela.
9. I gat wanem as na yumi ken ting ol saveman bilong saiens ol i no save long rot bilong stretim ol hevi?
9 Orait, ating ol saveman bilong saiens i save long rot bilong stretim ol hevi? Sapos yumi skelim ol samting i bin kamap bipo, bai yumi tok nogat. Ol saientis bilong gavman i bin tromoi bikpela mani na taim na strong long kamapim ol marasin nogut tru bilong bagarapim planti man, na ol narapela kain samting nogut bilong pait. Olgeta kantri wantaim, em sampela i no gat planti mani samting, ol i save tromoi 700 bilion dola long olgeta yia long ol samting bilong pait! Na tu, ol wok bilong saiens i gat hap asua long ol marasin i bin bagarapim win, graun, wara, na kaikai.
10. Bilong wanem yumi no ken bilip olsem long rot bilong ol skul bilong graun i stap bilong ol man bai kamap gutpela long bihain?
10 Olsem wanem? Yumi inap bilip olsem ol bikpela skul bilong graun bai skulim ol yangpela long bihainim ol stretpela lo, na tingim gut ol narapela, na laikim tru ol man, na long dispela rot i stap bilong yumi bai kamap gutpela long bihain? Nogat. Ol i skulim ol long pasin bilong kisim ol bikpela wok na kisim planti mani. Ol i no kirapim ol man long wok gut wantaim—ol i kirapim ol long resis wantaim ol narapela long kisim ol samting. Na ol skul i no lainim ol yangpela long bihainim stretpela pasin. Planti ol i orait long ol yangpela i stap fri long mekim maritpasin long laik bilong ol yet, na dispela pasin i mekim na planti yangpela meri tru i save kisim bel, na ol sik bilong pamuk i wok long go bikpela moa.
11. Ol bikpela kampani i save mekim wanem na yumi no ken bilip olsem ol bai kamapim gutpela taim long bihain?
11 Yu ting ol bikpela kampani bilong graun bai kirap wantu tasol long lukautim gut graun bilong yumi na mekim pasin sori long ol man na wokim ol samting inap helpim ol tru na i no bilong kisim winmani tasol? Ating nogat. Na yu ting ol bai pinis long kamapim ol piksa nogut long televisen i gat pait na bagarapim man na pasin pamuk long en, em ol samting i save bagarapim tingting bilong ol man na ol yangpela tu? Em tu ating nogat, long wanem, nau long dispela taim planti program i mekim na televisen i kamap olsem wanpela hul i gat ol stingpela samting nogut long en, olsem pasin pamuk, na pait na bagarapim man.
12. Olsem wanem long ol samting bilong sik na i dai?
12 Na narapela samting tu, ol dokta i no inap pinisim sik na dai, maski ol i gat laik tru long mekim. Olsem: Taim Namba Wan Pait i pinis, ol i no inap pasim bikpela sik ol i kolim bikpela sik kus bilong Spen; long olgeta hap bilong graun, inap 20 milion manmeri ol i bin dai long dispela sik. Long nau, sik bilong klok, sik kensa, na ol narapela kain sik nogut i save bagarapim man, ol i go bikpela tru. Na ol dokta i no pinisim sik AIDS. Long Novemba 1997 ol i kamapim wanpela ripot bilong Yunaitet Nesen i tok, sik AIDS i go bikpela tru. Planti milion manmeri i dai pinis long rot bilong dispela sik. Long 1996, 3 milion manmeri moa i kisim jem bilong sik AIDS.
Tingting Bilong Ol Witnes Bilong Jehova Long Bihain
13, 14. (a) Ol Witnes Bilong Jehova i gat wanem tingting long i stap bilong ol man long bihain? (b) I gat wanem as na ol man bilong graun i no inap kamapim gutpela taim?
13 Ol Witnes Bilong Jehova i bilip olsem i stap bilong ol man bai i gutpela tru long bihain! Tasol ol i no bilip olsem dispela gutpela taim bai kamap long wok bilong ol man bilong graun. Ol i wetim Man bilong wokim yumi, em God Jehova, long mekim olsem. Em i save long i stap bilong ol man long bihain, na em bai gutpela tru! Na em i save tu olsem ol man bilong graun i no inap kamapim gutpela taim olsem. Em yet i bin wokim ol, olsem na em i save gut long ol samting ol i no inap mekim. Long Baibel God i tokaut klia olsem taim em i wokim ol man, em i no inapim ol long bosim gut ol yet na i no gat wok long God i soim rot long ol, nogat. Inap longtaim pinis God i bin larim ol man i bosim ol yet na em yet i no soim rot long ol, na dispela i kamapim klia olsem ol i no inap tru. Wanpela man bilong raitim buk em i tokaut olsem: “Ol man i bin traim kain kain pasin bilong bosim graun, tasol wok bilong ol i lus nating.”
14 Long Jeremaia 10:23, spirit holi i kirapim dispela profet long tok olsem: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” Na Song 146:3 i tok: “Ol king na ol man bilong graun i no inap kisim bek yu. Olsem na nogut yu bilip long ol.” Na Baibel i givim tok lukaut long yumi olsem yumi no ken bilip long yumi yet, long wanem, olsem Rom 5:12 i tok, taim mama i karim yumi, yumi gat sin. Jeremaia 17:9 i tok: “Bel bilong olgeta man i save tingting oltaim long mekim pasin giaman.” Olsem na Sindaun 28:26 i tok: “Sapos man i ting, save bilong em yet inap helpim em long mekim olgeta samting, orait em i no gat gutpela tingting. Tasol sapos man i bihainim pasin bilong gutpela tingting, em bai i stap gut.”
15. Yumi inap kisim we gutpela tingting bilong soim rot long yumi?
15 Orait yumi ken kisim we dispela gutpela tingting? “Sapos yu laik kisim gutpela tingting, orait pastaim yu mas aninit long Bikpela. . . . Na sapos yu laik kisim gutpela save, orait pastaim yu mas save gut long em.” (Sindaun 9:10) Jehova tasol i gat dispela gutpela tingting em inap soim rot long yumi nau long dispela taim nogut bilong pret. Na em i bin wokim rot bambai yumi ken kisim dispela gutpela tingting bilong em—dispela rot em Baibel, em i bin kamapim bilong soim rot long yumi.—Sindaun 2:1-9; 3:1-6; 2 Timoti 3:16, 17.
Wok Bos Bilong Ol Man Long Bihain
16. Husat i bin makim wanem samting bai kamap bihain?
16 Orait, Baibel i tok wanem long ol samting bai kamap bihain? Em i tok, ol samting bai kamap bihain i no olsem piksa bilong ol samting ol man i bin mekim bipo, nogat. Olsem na tingting bilong Patrik Henri i kranki. God Jehova yet i mas tingim wanem samting bai kamap long dispela graun na ol man long bihain—i no ol man i mas tingim. Laik bilong God bai kamap long graun—i no laik bilong wanpela man o wanpela lain bilong dispela graun, nogat. “Man i save tingting long mekim planti kain samting. Tasol samting Bikpela i tingting long mekim, dispela tasol bai i kamap.”—Sindaun 19:21.
17, 18. Wanem laik bilong God long dispela taim bilong yumi?
17 Wanem laik bilong God long dispela taim bilong yumi? Laik bilong em i olsem: Em i laik pinisim ol lain bilong dispela graun, em ol i save bagarapim nabaut ol man na mekim pasin pamuk na olkain pasin olsem. Dispela wok bilong ol man long bosim graun inap planti tausen yia, klostu nau bai em i pinis, na God bai putim gavman bilong em yet bilong bosim graun. Tok profet long Daniel 2:44 i tok: “Taim ol dispela king [long taim bilong yumi] i stap yet God bai i kirapim wanpela kingdom [long heven] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” Dispela Kingdom bai pinisim tu ol wok nogut bilong Satan, em samting ol man bilong graun i no inap mekim. Wok bilong em long bosim dispela graun bai pinis i go inap oltaim oltaim.—Rom 16:20; 2 Korin 4:4; 1 Jon 5:19.
18 Tingim: Dispela gavman bilong heven bai pinisim tru olgeta king na gavman bilong ol man. God i no ken larim ol man bilong graun i bosim ol man. Long heven, ol man insait long Kingdom bilong God ol bai bosim olgeta wok ol man i mekim long graun, na dispela bai helpim gut ol man. (KTH 5:10; 20:4-6) Long graun, ol man i stap gut long God bai ol i bihainim gut ol tok bilong stiaim ol, i kam long Kingdom bilong God. Em dispela gavman Jisas i bin skulim yumi long beten askim God long en, taim em i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10.
19, 20. (a) Baibel i tok wanem long ol samting bilong Kingdom? (b) Kingdom bai mekim wanem bilong helpim ol man?
19 Ol Witnes Bilong Jehova i bilip long Kingdom bilong God. Em dispela “nupela skai” aposel Pita i toktok long en: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Na “nupela graun” em nupela lain manmeri dispela “nupela skai,” olsem Kingdom bilong God, bai bosim. God i tokim aposel Jon long dispela samting long rot bilong wanpela driman, na Jon i tok: “Mi lukim nupela skai na nupela graun i stap. Namba wan skai na namba wan graun i go pinis olgeta. . . . [God] bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:1, 4.
20 Tingim: Dispela nupela graun bai i gat stretpela pasin tasol i stap long en. Olgeta lain i save mekim pasin i no stret, God bai i rausim ol taim em i kamapim wanpela bikpela wok bilong em, em pait bilong Armagedon. (KTH 16:14, 16) Tok profet long Sindaun 2:21 na 22 i tok olsem: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em.” Na Song 37:9 i tok promis olsem: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.” Ating yu laik tru long i stap long gutpela taim olsem, a?
Bilip Long Ol Tok Promis Bilong Jehova
21. I gat wanem as na yumi inap bilip long ol tok promis bilong Jehova?
21 Olsem wanem? Yumi inap bilip long ol tok promis bilong Jehova? Harim wanpela tok Jehova i mekim long maus bilong profet bilong em, Aisaia: “Yupela i mas tingim ol samting mi bin mekim bipo, long wanem, mi wanpela tasol mi God, na i no gat narapela god . . . olsem mi i stap. Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok. Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim dispela samting.” Na laspela hap bilong ves 11 i tok: “Mi tok pinis long mekim dispela ol samting, na bai mi mekim ol i kamap olsem mi tok. Ol samting mi makim pinis bilong mekim, em bai mi mekim.” (Aisaia 46:9-11) Tru tumas, yumi inap bilip tru long Jehova na ol tok promis bilong em, i olsem ol dispela tok promis i kamap tru pinis. Baibel i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.”—Hibru 11:1.
22. Bilong wanem yumi ken bilip olsem Jehova bai kamapim tru ol tok promis bilong em?
22 Ol man i gat pasin daun ol i save kamapim dispela kain bilip, long wanem, ol i save God bai truim ol dispela tok promis bilong em. Song 37:29, i tok: “Ol stretpela man bai i kisim graun God i givim ol, na bai ol i stap oltaim long en.” Olsem wanem? Yumi inap bilip long dispela tok? Yumi inap, long wanem, Hibru 6:18 i tok: “God i no inap tru long giaman.” Tasol tru God em i Papa bilong graun na bai em inap givim long ol man i gat pasin daun? Kamapim Tok Hait 4:11 i tok: “Long laik bilong yu yet yu bin mekim olgeta samting i kamap, na nau dispela olgeta samting i stap.” Olsem na Song 24:1 i tok: “Dispela graun wantaim olgeta samting i stap long en, em olgeta i bilong Bikpela tasol.” Jehova i bin wokim dispela graun, na em i Papa bilong en, na long laik bilong em yet em i givim long ol man i bilip long em. Bilong strongim bilip bilong yumi long dispela samting, stori i kam bihain bai soim olsem wanem Jehova i bin truim ol tok promis em i bin mekim long lain bilong em long bipo na long nau tu, na i gat wanem as na yumi ken bilip tru olsem em bai mekim long bihain.
Sampela Tok Bilong Tingim Gen
◻ Olsem wanem long ol samting ol man i bin wet long en insait long planti tausen yia?
◻ Bilong wanem yumi no ken bilip long ol man bai kamapim gutpela taim?
◻ Wanem laik bilong God long ol samting bai kamap bihain?
◻ Bilong wanem yumi ken bilip olsem God bai truim ol tok promis bilong em?
[Piksa long pes 10]
Baibel i tok stret olsem: “Mipela man i no inap bosim wokabaut bilong mipela yet.”—Jeremaia 10:23
[Kredit Lain]
Bom: U.S. National Archives photo; ol pikinini i no gat kaikai: WHO/OXFAM; ol refyuji: UN PHOTO 186763/J. Isaac; Mussolini na Hitler: U.S. National Archives photo