Sapta 38

Olsem Wanem Long Mi Long Bihain?

“OL I toktok long tromoi ol bom nuklia na mi pret long samting bai kamap bihain.” Wanpela yangpela bilong Jemani i tok olsem taim em i toktok wantaim nambawan bilong gavman long Jemani.

Ating yu tu yu tingting planti long pait nuklia bai kamap na bai yu bagarap, olsem na taim yu tingim i stap bilong yu long bihain, yu pret na bel bilong yu i no stap isi. Wanpela yangpela i tingim dispela samting na em i tok: “Bilong wanem bai mi wok strong long kisim gutpela mak long skul? Bai ol i tromoi ol bom nuklia, na graun wantaim olgeta man bai bagarap.” Wanpela lain i bin skelim tingting bilong sampela sumatin bilong skul, na ol manki i tok, namba wan samting ol i pret long en, em ol i pret long pait nuklia bai kamap. Ol yangpela meri i tok, namba wan samting ol i pret long en, em ol i pret long papamama bilong ol bai dai, na namba tu samting, em ol i pret long pait nuklia bai kamap.

Tasol i no pait nuklia tasol inap bagarapim graun. I gat ol narapela samting tu, olsem ol man i kamap planti tumas na ol i pas pas, na ol marasin nogut na pipia samting i wok long bagarapim win na wara na graun, na i gat ol narapela samting tu i mekim na i olsem graun i laik bagarap. Wanpela dokta (B. F. Skinner) em i tingim dispela samting na em i tok, ‘Ol dispela samting i mekim na ating bihain bai ol man i pinis long graun.’ Na bihain em i tok, ‘Mi tingting planti. Yumi no inap stretim ol dispela hevi.’

Em nau, ol saveman i lukim ol samting i wok long i go nogut long graun na ol i pilim olsem bihain bai graun i bagarap. Olsem na planti yangpela i ting, i no gat wanpela gutpela samting bai painim ol long bihain, na ol i tingting: “Mobeta ‘yumi kaikai na dring, long wanem, tumora bai yumi dai.’ ” (1 Korin 15:32) Tru tumas, sapos yu mas wetim ol bikman bilong politik na ol saveman bilong graun i stretim ol dispela hevi, bai yu wet nating tasol, long wanem ol i no inap stretim. Olsem Baibel i tok long Jeremaia 10:​23, “Mipela man i no inap bosim wokabaut bilong mipela yet.”

Ol man i no gat save long bosim wokabaut bilong ol na bosim dispela graun, na i no wok bilong ol long mekim, long wanem God i no bin givim dispela wok long ol. Olsem na maski ol i wok strong long stretim ol hevi, ol dispela wok bai lus nating. Jeremaia i save long dispela na em i beten askim Jehova long stretim dispela samting. Em i tok: “[Jehova], yu ken stretim mipela, tasol yu no ken hatim mipela. Nogut yu belhat long mipela na yu bagarapim mipela tru.” (Jeremaia 10:24) Olsem na God yet bai stiaim ol samting i kamap bihain. Orait yumi laik save, wanem samting tru bai kamap bihain?

Laik Bilong God long Dispela Graun​—na i Stap Bilong Yu long Bihain

Taim God i wokim pinis namba wan man na meri, em i tokim tupela: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.” (Stat 1:28) Olsem na tupela inap tingting long sindaun long gutpela ples paradais em bai kamap long olgeta hap bilong graun.

Tasol namba wan man na meri i bikhet long God na tupela i no laik i stap aninit long em. Olsem Solomon i tok: “God i bin makim rot bilong ol manmeri, na ol i no hatwok long bihainim. Tasol ol yet i kamapim planti kain tingting na pasin, na dispela i mekim wokabaut bilong ol i [hatwok] tumas.” (Saveman 7:29) Ol dispela kain kain tingting ol man i bin kisim bilong bosim wokabaut bilong ol, dispela i bin mekim nogut long ol man na dispela graun. Olsem na planti hevi i painim ol man bilong nau, na ol i tingting planti long i stap bilong ol long bihain.

Orait olsem wanem? God i givim baksait pinis long dispela graun na em i larim ol man i mekim nogut long graun na bihain olgeta samting long graun na olgeta man tu bai bagarap? Nogat tru! God i no inap mekim olsem. Baibel i tok, “Em i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.” Olsem na olgeta samting God i tokaut pinis long mekim long dispela graun, ol dispela samting bai kamap tru!​—Aisaia 45:18; 55:​10, 11.

Tasol wanem taim bai God i truim dispela tok bilong em? Na em bai mekim olsem wanem? Kaunim Luk sapta 21. Long dispela hap bilong Baibel Jisas i mekim wanpela tok profet na em i kolim ol dispela bikpela hevi i wok long painim ol man bilong nau, olsem: Ol bikpela pait bilong olgeta hap, ol bikpela guria, ol sik nogut, kaikai i sot, pasin nogut i go bikpela long olgeta hap. Ol dispela samting i kamap ol i makim wanem samting? Jisas yet i tokaut long dispela, em i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis. . . . Taim yupela i lukim ol dispela samting i kamap, yupela i ken save, kingdom bilong God i kam klostu pinis.”​—Luk 21:​10, 11, 28, 31.

Dispela Kingdom tasol inap pinisim ol hevi bilong graun na givim gutpela sindaun long yu long bihain. Dispela Kingdom em i wanpela gavman, na long rot bilong dispela gavman bai God i bosim graun. Dispela Kingdom o gavman bai daunim ol man i wok long bosim graun na em yet bai bosim graun. (Daniel 2:44) God bai “bagarapim ol man i bin bagarapim graun,” na em bai lukautim dispela graun na ol man tu, na bai ol dispela man nogut i no ken bagarapim ol man na ol i no ken bagarapim dispela graun.​—Kamapim Tok Hait 11:18; Saveman 1:4.

Kingdom bilong God bai bosim graun, olsem na isi isi olgeta hap bilong graun bai kamap gutpela ples paradais. Olgeta samting long graun bai wok gut wantaim, na ol man na animal tu bai stap gut wantaim. (Aisaia 11:​6-9) Pait na ol samting bilong pait bai pinis olgeta. (Buk Song 46:​8, 9) Ol pasin nogut na pasin raskol, na hangre, na ol man i no gat haus, na sik​—na dai tu​—ol dispela samting tu bai pinis olgeta. Olgeta man bilong graun bai “sindaun gutpela tumas na amamas i stap.”​—Buk Song 37:​10, 11; 72:16; Aisaia 65:​21, 22; Kamapim Tok Hait 21:​3, 4.

‘Skelim’ Ol Tok Promis Bilong God

Laip i stap oltaim long gutpela ples paradais​—yu yet yu inap kisim dispela gutpela sindaun long bihain! Tru ating dispela tok i gutpela long yau bilong yu, tasol ating yu hatwok long lusim wanpela bilip i tok olgeta gutpela man i save go long heven, o yu no bilip tumas long tok bilong Baibel. Na sampela yangpela insait long lain Witnes Bilong Jehova, sampela taim bilip bilong ol tu i no strong na i olsem ol i laik lusim bilip. Yangpela meri Misel, em papamama bilong em i Witnes na em i go bikpela insait long dispela lotu. Em i bilip nating olsem tok bilong Baibel i tru, olsem em i bilip olsem tulait i kam bihain long tudak. Orait wanpela taim em i tingting​—‘I gat wanem as na mi bilip long tok bilong Baibel?’ Misel i stori long dispela na em i tok: “Ating mi bin bilip long tok bilong Baibel long wanem papamama i save bilip long en.”

Baibel i tok: “Man i no bilip long God, em i no inap bihainim laik bilong God.” (Hibru 11:6) Bilip i no wanpela samting yu kisim long papamama. Nogat. Sapos yu laik kisim gutpela sindaun long bihain, orait yu yet yu mas wok long kisim bilip, na dispela bilip bilong yu i mas i gat as bilong en​—yu mas bilip tru olsem “olgeta gutpela samting God i promis pinis long givim yumi na yumi wet long kisim, em bai yumi kisim tru.” (Hibru 11:1) Olsem Baibel i tok, yu mas “skelim gut olgeta tok na pasin,” olsem bai yu ken save dispela tok o pasin i stret na yu ken bilip long en.​—1 Tesalonaika 5:21.

Yu Yet Yu Mas Save, Tok Bilong Baibel i Tru

Ating pastaim yu mas save tru long bel bilong yu olsem “spirit bilong God yet i bin kamapim olgeta tok i stap long buk bilong God” olsem Baibel. (2 Timoti 3:16) Olsem wanem yu inap save tru long dispela? God I Gat Olgeta Strong, em wanpela tasol inap kolim ol samting bai kamap bihain. Baibel i tok, ‘Taim wanpela samting i no kamap yet, em i save tokaut long dispela samting bai i kamap na bai i go pinis olsem wanem.’ (Aisaia 43:9; 46:10) Na planti taim em i save mekim dispela kain tok long Baibel. Kaunim ol tok profet i stap long Baibel long Luk 19:​41-44 na Luk 21:​20, 21, em i toktok long Jerusalem i mas bagarap. O yu ken kaunim ol tok profet i stap long Aisaia 44:​27, 28 na Aisaia 45:​1-4 i toktok long Babilon i mas bagarap. Ol samting ol dispela tok profet bilong Baibel i kolim, ol i kamap tru​—ol samting i bin kamap bipo i kamapim long ples klia dispela samting! Yangpela meri i gat 14 krismas, nem bilong em Janin, em i tok: “Mi skelim sampela tok profet bilong Baibel na mi kirap nogut​—Baibel i kolim stret ol samting i mas kamap bihain.”

I gat planti as na yu ken bilip tru long ol tok bilong Baibel, olsem: Ol samting i bin kamap bipo i stret wantaim ol stori bilong Baibel, na Baibel i no save giaman, na Baibel i tokaut stret na i no haitim sampela popaia ol man bilong God i bin mekim, na olgeta tok bilong en i stret wantaim​—narapela tok i no pait wantaim narapela tok. Tasol olsem wanem yu inap save, ol tok em ol Witnes Bilong Jehova i mekim bilong kamapim klia tok bilong Baibel, em i stret o nogat? Bipo aposel Pol i autim tok bilong Baibel long ol lain bilong Beria, tasol ol i no bilip nating long ol dispela tok Pol i givim long ol​—“long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.”​—Aposel 17:11.

Mipela laik kirapim yu tu long kisim save long ol tok bilong Baibel. I gat wanpela buk i kamapim klia ol dispela tok bilong Baibel; nem bilong dispela buk em Tru Tru Baibel i Tok Wanem? (ol Witnes Bilong Jehova i wokim). Sapos papamama bilong yu i Witnes Bilong Jehova, ating ol inap bekim sampela askim bilong yu long tok bilong Baibel. Wanpela yangpela meri, em Janel, em i tok, ‘Sapos yu hatwok long bilipim sampela tok bilong Baibel, yu mas tok stret long papamama. Sapos yu gat sampela askim, orait kamapim long tupela na ol i ken bekim ol askim bilong yu na helpim yu.’ (Sindaun 15:22) Sapos yu mekim olsem, orait bihain bai yu pilim tru olsem Jehova i bin mekim gut long ol Witnes bilong em na em i givim gutpela save long ol long ol tok i tru bilong Baibel!

Yangpela man Prentis em i tok: “Sampela taim mi lukim ol samting i kamap long nau na mi bel hevi. Olsem na mi save kaunim sampela tok bilong Baibel olsem Kamapim Tok Hait 21:​4, na dispela tok bilong Baibel i helpim mi long tingim ol gutpela samting bai kamap bihain.” Em nau, sapos yu bilip tru long ol tok promis bilong God long Baibel, orait yu tu yu inap tingim ol gutpela samting bai kamap bihain. Bai yu amamas long wetim ol dispela gutpela samting i kamap, na yu no bel hevi na tingting planti long ol samting bilong bihain. Sapos yu gat dispela strongpela bilip, orait long nau bai yu no stap nating tasol​—‘bai yu bungim planti gutpela samting bilong helpim yu long bihain, na bai yu kisim dispela laip em i laip tru.’​—1 Timoti 6:19.

Tasol sapos yu laik kisim dispela “laip tru,” yu mas mekim wanem? Yu mas lainim tok bilong Baibel na bilip long en na em tasol, o i gat sampela samting moa yu mas mekim? Orait, lukim Sapta 39.

Toktok Wantaim long Ol Dispela Askim

◻ Taim ol yangpela i tingim i stap bilong ol long bihain, planti ol i pret long wanem samting?

◻ Pastaim tru God i gat wanem laik long dispela graun? Olsem wanem yumi ken save tru, God i no senisim laik bilong em?

◻ Kingdom i gat wanem wok long kamapim laik bilong God long dispela graun?

◻ Bilong wanem yu yet yu mas skelim ol tok bilong Baibel bambai yu ken save, tok bilong en i tru? Yu ken mekim olsem wanem?

◻ Olsem wanem yu ken bilip tru olsem spirit bilong God i bin kamapim olgeta tok bilong Baibel?

[Rait long pes 306]

‘Mi tingting planti. Yumi no inap stretim ol dispela hevi.’​—Wanpela dokta i tok olsem, em B. F. Skinner

[Piksa long pes 307]

Man bilong wokim dispela graun em i no inap larim ol man i bagarapim graun olgeta

[Piksa long pes 309]

Yu yet yu bin skelim ol tok bilong Baibel na nau yu bilip olsem olgeta tok bilong en i tru?