Bilip Strong Olsem Jehova Bai Kamapim Tru Laik Bilong Em
“Ol stretpela man bai i kisim graun . . . na bai ol i stap oltaim long en.”—SONG 37:29.
JEHOVA i wokim Adam na Iv i gutpela olgeta, em tupela tumbuna papamama bilong yumi. Sapos ol i bihainim ol lo bilong God tupela inap i stap oltaim long graun. (Stat 1:26, 27; 2:17) Em i putim tupela long gutpela ples paradais. (Stat 2:8, 9) Na em i tok: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Ol pikinini bilong ol bai gutpela olgeta, na bai ol i go pulap long paradais i kamap long olgeta hap. Pastaim tru ol man i gat gutpela i stap! Olgeta samting God i wokim em “i gutpela.”—Stat 1:31.
2 Tasol long nau ol man i no i stap gutpela na ol i no amamas, na dispela pasin i stap long graun inap sampela tausen yia pinis. God i no laik bai kain pasin olsem i kamap. Planti hevi nogut tru i bin kamap, na nau olsem Baibel i tok pinis, ol i kamap nogut moa yet. (2 Timoti 3:1-5, 13) Orait, olsem wanem yumi ken bilip strong olsem klostu nau bai Jehova i kamapim tru laik bilong em bilong pastaim? O yumi mas karim hevi yet na wet longtaim moa?
Wanem As Bilong Hevi?
3 Ol man i kisim stretpela save long Baibel, ol i save i gat wanem as na Jehova i larim ol hevi i stap. Na ol i save long ol samting em bai mekim bilong stretim. Baibel i tok, namba wan tumbuna papamama bilong yumi i mekim wok nogut long strong God i givim long ol bilong tingim wanem rot ol i laik bihainim. (Lukim 1 Pita 2:16.) Sori tru, tupela i bihainim rot bilong bikhet long God. (Stat, sapta 2 na 3) Pasin bikhet bilong tupela i kamapim sampela bikpela askim, olsem: I stret Nambawan Bikpela King i ken bosim ol man? Em inap bosim ol gut? O ol inap sakim em na bosim gut ol yet? Gutpela rot bilong stretim tok, em olsem: God i mas larim ol man i traim save bilong ol long bosim graun inap planti handet handet yia. Ol samting i kamap long dispela rot bai kamapim klia olsem ol inap sakim Man bilong wokim ol na bosim gut ol yet o nogat.
4 Taim Adam na Iv i lusim God, em i no helpim ol moa long i stap gutpela olgeta. Ol i wok long bagarap. Ol i gat sin, na ol i wok long i go lapun, na bihain ol i dai. Yumi kisim ol dispela samting nogut long Adam na Iv, long wanem, yumi pikinini bilong ol. (Rom 5:12) Sampela tausen yia pinis ol man i bin bosim graun na wanem samting i kamap? Ol samting i bagarap. Saveman 8:9 i tok stret olsem: “Sampela bikman i wok long daunim ol arapela manmeri na mekim nogut long ol.”
5 Ol samting i kamap insait long ol dispela tausen yia i kamapim klia olsem sapos ol man i sakim Man bilong wokim ol, ol i no inap bosim gut graun. Spirit holi i givim tingting long Jeremaia na em i raitim tok long Baibel, olsem: “Bikpela, mi save, mipela man i no inap bosim wokabaut bilong mipela yet.”—Jeremaia 10:23; Lo 32:4, 5; Saveman 7:29.
Laik Bilong God i No Senis
6 Pasin nogut na hevi i pulap long graun insait long ol tausen yia ol man i bin i stap long en, olsem na ating God i senisim laik na tingting bilong em? Baibel i tok: “Bikpela tasol em i God. Em i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) God i wokim graun bilong ol man i ken i stap long en, na laik bilong em i no senis.
7 Jehova i laik bai ol man i ken i stap long graun, na em i gat narapela laik tu: Em i laik bai graun i kamap paradais, na ol gutpela man i stap amamas ol i ken i stap long en. Olsem na Baibel i tok, bihain bai “nupela graun” i kamap, em ol stretpela manmeri i stap long graun, “na stretpela pasin tasol bai i stap.” (2 Pita 3:13) Na long Kamapim Tok Hait 21:4, Baibel i tok, long dispela nupela taim bihain God “bai i mekim drai wara i stap long ai bilong olgeta [man],” na ol manmeri bai i no i dai moa, o bel hevi moa, o krai moa, o kisim pen gen. Olsem na Jisas inap kolim dispela nupela graun olsem “Paradais.”—Luk 23:43, Baibel New World Translation.
8 Jehova i gat olgeta strong na olgeta save na em i bin wokim skai na graun, olsem na i no gat wanpela man inap pasim em long kamapim laik bilong em. Em yet i tok: “Tru tumas, samting mi tingting pinis long mekim, em bai mi mekim.” (Aisaia 14:24) Olsem na taim God i tok, em bai mekim graun i kamap paradais i gat ol man i gutpela olgeta i stap long en, dispela samting i mas kamap. Jisas i tok: “Ol man i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5; lukim tu Song 37:29.) Yumi ken save, truim bilong dispela tok promis i mas kamap. Yumi ken givim bel olgeta long bilip olsem, na redi long i dai tu bilong helpim dispela tok.
Ol i Bilip Strong Long Jehova
9 Planti bilipman long bipo, ol i bin givim bel olgeta long ol samting God i laik mekim long graun, long wanem, ol i bilip tru olsem em bai mekim ol dispela samting. I gat sampela samting ol i no save long en, tasol ol i bilip strong long Jehova na givim bel olgeta long bihainim laik bilong em. Olsem Abraham. Em i stap 2,000 yia paslain long Krais, long taim ol i no kirap yet long raitim Baibel. Em i bilip strong olsem Jehova bai truim ol tok promis bilong Em. Ating tumbuna bilong em, Siem, i bin lainim em long God, na Noa i bin lainim Siem. God i tokim Abraham long lusim gutpela ples Ur long Kaldia na go long wanpela ples nogut em i no save long en, em Kenan. Abraham i bilip strong long Jehova, olsem na em i go. (Hibru 11:8) Bihain Jehova i tokim em: “Bai mi mekim ol lain tumbuna bilong yu i kamap bikpela lain tru.”—Stat 12:2.
10 Taim Abraham i kamap papa bilong Aisak, nau wanem samting i kamap? Jehova i tokim Abraham, long Aisak tasol bai ol lain tumbuna pikinini bilong em i kamap bikpela lain. (Stat 21:12) Tasol bihain gen Jehova i tokim Abraham long kilim i dai Aisak olsem ofa, bilong traim bilip bilong Abraham. (Stat 22:2) Abraham i bilip tru long Jehova na em i kirap mekim ol samting bilong bihainim tok bilong em. Em i kisim naip na i laik kilim Aisak, tasol God i salim ensel na pasim em long mekim.—Stat 22:9-14.
11 Bilong wanem Abraham i redi tru long bihainim tok? Hibru 11:17-19 i tok: “Taim God i traim Abraham, na i tokim Abraham olsem em i mas kilim dispela wanpela pikinini bilong en olsem ofa, orait Abraham i bilip long God na i givim Aisak long God. Abraham i tingting olsem, ‘Sapos Aisak i dai, maski, God em inap long kirapim em bek.’ Olsem na tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat.” Rom 4:20, 21, i mekim wankain tok: “Abraham i ting long dispela promis [bilong God] na em i no tubel . . . Bilip bilong en i strongim em. Em i . . . save pinis olsem, God em inap mekim olsem em i bin promis long mekim.”
12 Abraham i bilip long God na kisim gutpela pe: Em i kisim bek Aisak, na long Aisak lain bilong em i kamap “bikpela lain tru.” Na em i kisim narapela blesing tu. Abraham i “bihainim tok,” olsem na God i tokim Abraham: “Long tumbuna pikinini bilong yu mi bai mekim gut long olgeta lain manmeri.” (Aposel 3:25; Stat 22:18) Dispela bai kamap olsem wanem? King bilong Kingdom bilong God long heven bai kamap long lain bilong Abraham. Dispela Kingdom bai pinisim graun nogut bilong Satan. (Daniel 2:44; Rom 16:20; KTH 19:11-21) Bihain bai Kingdom i bosim graun na kamapim Paradais long olgeta hap. Na ol manmeri bilong “olgeta lain,” em ol i bihainim laik bilong God, bai ol i stap gutpela olgeta oltaim oltaim. (1 Jon 2:15-17) Abraham i no save tumas long Kingdom, tasol em i bilip strong na wetim Kingdom i kamap.—Hibru 11:10.
13 Bihain, olsem namel long yia 1650 na 1550 samting paslain long Krais, Jop i stap long hap nau yumi kolim Arebia. Em tu i stap long taim ol i no kirap yet long raitim Baibel. Jop em i “gutpela man tru na i no gat asua long ai bilong God. Em i save lotu na aninit long God, na . . . em i no save mekim wanpela pasin nogut.” (Jop 1:1) Taim Satan i givim sik nogut long Jop, dispela man “i no mekim wanpela tok nogut long God.” (Jop 2:10) Jop i bilip strong long God. Em i no save i gat wanem as na hevi i painim em, tasol em i bilip tru long God na ol tok promis bilong em.
14 Jop i save, maski em i dai, God inap kirapim em na bai em i stap laip gen long bihain. Em i makim olsem long taim em i tok: “God, i gutpela sapos yu haitim mi long ples bilong ol man i dai pinis . . . Na yu ken makim wanpela taim bilong tingim mi gen. . . . Olsem na bai yu singautim mi na bai mi lusim dispela ples.” (Jop 14:13-15) Jop i gat bikpela pen, tasol em i kamapim bilip bilong em, em i bilip tru long Jehova em i Nambawan Bikpela King. Em i tok strong long em i stap stret long God na em bai stap olsem “i go inap taim [em i] dai.”—Jop 27:5.
15 Inap 600 yia bihain long Jop na 1,000 yia paslain long taim Jisas i kam long graun, Devit i kamapim bilip bilong em long nupela taim. Em i raitim song na em i tok: “Ol manmeri i bilip na wetim Bikpela i helpim ol, bai ol i stap gut long graun bilong ol. I no longtaim na bai ol man nogut i lus olgeta. . . . Ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap. Ol stretpela man bai i kisim graun God i givim ol, na bai ol i stap oltaim long en.” Devit i no tubel liklik, olsem na em i tok: “Yu mas bilip tru long God . . . Yu mas amamas long Bikpela, na em bai i givim yu ol samting yu laikim tru.”—Song 37:3, 4, 9-11, 29.
16 Ol gutpela man na meri long bipo i olsem “bikpela klaut,” na ol i bilip na wet long kisim laip oltaim long graun. Ol dispela witnes bilong Jehova i bilip tru long ol tok promis bilong em, maski ol man i kilim ol i dai. Ol man i bin mekim nogut long planti na kilim i dai planti. Tasol ol i holimpas bilip “bai ol i [ken] kisim laip i gutpela moa.” Gutpela moa olsem wanem? Long wanem, taim God i kirapim bek ol long nupela taim, ol inap kisim laip i stap oltaim oltaim.—Jon 5:28, 29; Hibru 11:35; 12:1.
Ol Witnes Kristen i Bilip Strong Long God
17 Long taim bilong ol aposel, lain Kristen i kamap nupela, na Jehova i givim sampela save moa long ol long Kingdom na wok bilong en long bosim graun. Spirit bilong em i kirapim aposel Jon long raitim tok olsem lain bilong mekim wok king wantaim Krais long Kingdom bilong heven em inap 144,000. Em ol gutpela wokboi bilong God em i “baim bek ol namel long olgeta manmeri bilong graun.” (KTH 7:4; 14:1-4) Bai ol i “stap king” wantaim Krais long heven na bosim graun. (KTH 20:4-6) Ol Kristen bilong pastaim i bilip strong tru olsem Jehova bai kamapim laik bilong em long dispela Kingdom bilong heven na long dispela graun em Kingdom bai bosim. Olsem na ol i redi long i dai tu bilong holimpas bilip bilong ol. Na planti ol i mekim olsem.
18 Long nau klostu 5 milion Witnes Bilong Jehova i stap na ol tu i bilip strong long God na ol tok promis bilong em. Ol i givim laip bilong ol long em, na ol i gat Baibel olgeta bilong strongim bilip bilong ol. (2 Timoti 3:14-17) Ol dispela Witnes Bilong Jehova long nau i bihainim pasin bilong ol disaipel bilong Jisas long pastaim, em ol i tok: “Mipela i mas bihainim tok bilong God tasol.” Ol i tingim tok bilong ol man i namba tu. (Aposel 5:29) Ol man i bin mekim nogut long planti Witnes long nau. Ol i kilim i dai sampela, long wanem, ol i holimpas bilip. Sampela i gat sik, o birua i painim ol, o ol i lapun, na ol i dai. Tasol olsem ol gutpela witnes long bipo, ol tu i bilip strong long God, long wanem, ol i save em bai kirapim bek ol long nupela taim.—Jon 5:28, 29; Aposel 24:15; KTH 20:12, 13.
19 Ol Witnes Bilong Jehova i bilong olgeta lain, na ol i amamas tru God i bin bungim ol i stap olsem bikpela lain brata, olsem Baibel i bin tok profet long bipo. (Aisaia 2:2-4; KTH 7:4, 9-17) Na Jehova i kirapim ol long autim tok long olgeta hap bilong bringim i kam ol narapela man i gat gutpela bel na em i ken belgut long ol na lukautim ol. (Sindaun 18:10; Matyu 24:14; Rom 10:13) Olgeta i bilip tru long Jehova; ol i save, klostu nau bai em i kamapim gutpela nupela taim.—Lukim 1 Korin 15:58; Hibru 6:10.
20 Ol tok profet bilong Baibel i makim olsem dispela graun bilong Satan i stap long las taim bilong en klostu 80 yia pinis, kirap long yia 1914. Las de i klostu. (Rom 16:20; 2 Korin 4:4; 2 Timoti 3:1-5) Olsem na ol Witnes Bilong Jehova i strongim bel, long wanem, ol i save, klostu nau bai Kingdom bilong God i kirap bosim tru olgeta samting long graun. God bai pinisim pasin nogut nau i stap long graun na kamapim stretpela nupela taim, na long dispela rot em bai pinisim taim nogut i bin i stap long graun inap planti handet handet yia pinis.—Sindaun 2:21, 22.
21 Bihain, inap long olgeta taim bai God i kamapim sori bilong em, em i laikim tru yumi. Em bai givim ol blesing long yumi na ol bai stretim tru ol hevi yumi bin karim. Planti gutpela samting bai painim yumi long nupela taim, na bai yumi no tingim moa ol hevi bilong bipo. Yumi amamas long save, long dispela taim Jehova bai “givim kaikai samting long olgeta inap long ol i stap gut.”—Song 145:16; Aisaia 65:17, 18.
22 Long nupela taim, ol gutpela manmeri bai lukim truim bilong Rom 8:21: “God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru.” Na bai ol i lukim truim bilong beten em Jisas i lainim ol disaipel long en: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Olsem na yu mas bilip strong long Jehova, long wanem, em i no inap giaman na em i tok promis olsem, ‘Ol stretpela man bai kisim graun na stap oltaim long en.’—Song 37:29.
Bai Yu Bekim Olsem Wanem?
◻ Wanem laik bilong Jehova long ol man na dispela graun?
◻ Bilong wanem God i larim ol hevi i stap long graun?
◻ Ol bilipman long bipo i mekim wanem na dispela i makim olsem ol i bilip strong long Jehova?
◻ I gat wanem as na ol wokboi bilong God long nau i bilip strong long em?
[Askim Bilong Stadi]
1. Wanem laik bilong Jehova long ol man na dispela graun?
2. Ol hevi bilong ol man i mekim na yumi gat wanem ol askim?
3. Bilong wanem God i no pinisim wantu pasin bikhet bilong ol man?
4, 5. (a) Ol man i sakim wok bos bilong Jehova na wanem samting i bin kamap? (b) Sampela tausen yia i go pinis na nau wanem samting i kamap ples klia?
6, 7. (a) Ol samting i kamap insait long ol tausen yia ol man i bin stap long graun i kirapim Jehova long senisim laik bilong em o olsem wanem? (b) Jehova i gat wanem narapela laik?
8. Olsem wanem yumi ken bilip olsem Jehova bai kamapim tru laik bilong em?
9. Abraham i mekim wanem na dispela i kamapim klia olsem em i bilip strong long Jehova?
10, 11. Olsem wanem na Abraham i redi long kilim dispela wanpela pikinini bilong em, Aisak, olsem ofa?
12. Abraham i bilip na em i kisim wanem gutpela pe?
13, 14. I gat wanem as na Jop i bilip strong long God?
15. Devit i tok wanem na em i kamapim klia olsem em i bilip tru long ol samting Jehova i laik mekim?
16. Ol witnes i olsem “bikpela klaut” ol i bilip na wetim wanem samting?
17. Ol Kristen bilong pastaim i bilip strong long Jehova o olsem wanem?
18. Olsem wanem ol Witnes Bilong Jehova long nau i bihainim pasin bilong ol wanlain bilong ol long bipo?
19, 20. Yumi save ol tok profet bilong Baibel i makim wanem samting i mas kamap long taim bilong yumi?
21. Maski yumi gat ol hevi long nau, i gat wanem as na yumi ken amamas?
22. Bilong wanem yumi mas bilip strong long Jehova?
[Piksa long pes 16]
God i wokim ol man bilong i stap amamas oltaim long Paradais long graun
[Piksa long pes 18]
Abraham i bilip tru long strong bilong Jehova long kirapim bek ol man i dai pinis