Jehova i Truim Ol Tok Promis Em i Bin Mekim Long Ol Man i Stap Gut Long Em
“Olgeta samting God i tok pinis long mekim, tru tumas bai em i mekim.”—HIBRU 10:23.
1, 2. Bilong wanem yumi ken bilip tru long ol tok promis bilong Jehova?
JEHOVA i laik bai ol wokboi bilong em i kisim strongpela bilip long em na long ol tok promis bilong em na holim strong dispela bilip. Man i gat dispela kain bilip em inap bilip tru na wetim Jehova i truim ol tok promis bilong em. Baibel i tok: “Bikpela I Gat Olgeta Strong i mekim wanpela strongpela tok olsem, ‘Tru tumas, samting mi tingting pinis long mekim, em bai mi mekim.’ ”—Aisaia 14:24.
2 Dispela tok, “Bikpela I Gat Olgeta Strong i mekim wanpela strongpela tok,” i makim olsem em i tok tru antap long em bai truim ol tok promis bilong em. Olsem na Baibel inap tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Taim yumi bilip long Jehova na larim gutpela tingting bilong em i soim rot long yumi, rot yumi save bihainim bai bringim yumi long laip i stap oltaim, long wanem, gutpela tingting bilong God “i olsem diwai bilong givim laip.”—Sindaun 3:18; Jon 17:3.
Long Bipo i Gat Pasin Bilong Bilip Tru
3. Noa i mekim wanem bilong kamapim klia olsem em i bilip tru long Jehova?
3 Ol samting Jehova i bin mekim bilong helpim ol man i bilip tru i kamapim klia olsem em i save truim ol tok promis bilong em. Olsem: Inap olsem 4,400 yia i go pinis God i tokim Noa, olgeta manmeri i stap long taim bilong em ol bai bagarap long bikpela tait wara em bai kamap long olgeta hap bilong graun. Em i tokim Noa long wokim wanpela traipela sip bambai sampela man na animal i ken abrusim bagarap. Orait Noa i mekim wanem? Hibru 11:7 i tokim yumi: “Noa i bilip long God, na God i toksave long em long samting bai i kamap bihain, em samting Noa i no lukim yet. Orait em i bilipim tok bilong God na em i wokim wanpela sip. Na em wantaim meri pikinini bilong en ol i go insait long sip na ol i stap gut, na ol i no bagarap.” I gat wanem as na Noa i bilip long samting i no bin kamap bipo, em samting em “i no lukim yet”? Long wanem, em i save long ol samting God i bin mekim long ol man long bipo, olsem na em i save, olgeta samting God i tok long mekim, ol i save kamap tru. Olsem na Noa i bilip olsem dispela Tait Wara tu bai kamap.—Stat 6:9-22.
4, 5. Bilong wanem Abraham i bilip tru long Jehova?
4 Narapela man i bilip tru, em Abraham. Klostu 3,900 yia i go pinis, God i tokim Abraham long kilim pikinini bilong em Aisak olsem ofa—Abraham wantaim Sara i gat dispela wanpela pikinini tasol. (Stat 22:1-10) Orait Abraham i mekim wanem? Hibru 11:17 i tok: “Taim God i traim Abraham, na i tokim Abraham olsem em i mas kilim dispela wanpela pikinini bilong en olsem ofa, orait Abraham i bilip long God na i givim Aisak long God.” Tasol taim Abraham i redi pinis long kilim pikinini bilong em, ensel bilong Jehova i pasim em. (Stat 22:11, 12) Tasol olsem wanem na Abraham inap tingting long mekim kain pasin olsem? Long wanem, olsem Hibru 11:19 i tok, “Abraham i tingting olsem, ‘Sapos Aisak i dai, maski, God em inap long kirapim em bek.’ ” Tasol Abraham i no bin lukim wanpela man i dai pinis em i kirap bek, na paslain long em i no gat stori bilong wanpela man i bin mekim olsem. Orait olsem wanem Abraham inap bilip olsem man i dai pinis em inap kirap bek?
5 Tingim samting i bin painim Sara. Em i gat 89 krismas taim God i tok promis long tupela bai i gat wanpela pikinini man. Bel bilong Sara i lusim pinis strong bilong karim pikinini. (Stat 18:9-14) God i kamapim bek dispela strong long bel bilong em na em i karim Aisak. Orait Abraham i save, sapos God inap kamapim bek dispela strong long bel bilong Sara long karim pikinini, Em inap kamapim bek Aisak sapos em i mas mekim olsem. Rom 4:20, 21 i tok long Abraham olsem: “God i bin promis long mekim ol dispela samting, na Abraham i ting long dispela promis na em i no tubel na em i no lusim bilip. Nogat. Bilip bilong en i strongim em. Em i litimapim nem bilong God na em i save pinis olsem, God em inap mekim olsem em i bin promis long mekim.”
6. Josua i tok wanem bilong kamapim klia olsem em i bilip tru long Jehova?
6 Nau tingim samting i bin kamap olsem 3,400 yia i go pinis. Long olgeta taim long i stap bilong em, Josua i lukim olsem em inap bilip tru long God. Orait taim em i winim pinis wan handet krismas em i kamapim as na em i bilip tru long God. Em i tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.”—Josua 23:14.
7, 8. Long taim bilong ol aposel, ol Kristen i stap gut long God ol i mekim wanem na ol i abrusim bagarap? Bilong wanem ol i mekim olsem?
7 Inap 1,900 yia i go pinis, planti manmeri i gat pasin daun ol i kamapim klia olsem ol i bilip tru. Ol i lukim truim bilong ol tok profet bilong Baibel na ol i save Jisas em i Mesaia na ol i bilip long ol tok em i skulim ol man long en. Ol i lukim ol samting i kamap na ol i save long ol tok bilong Ol Skripsa Hibru, olsem na ol i bilip long ol tok bilong Jisas. Olsem na taim Jisas i tokim ol disaipel bilong em olsem strafe bilong God bai painim Judia na Jerusalem, long wanem, ol Juda i no stap gut long Em, ol dispela manmeri i gat pasin daun ol i bilip long dispela tok bilong Jisas. Na taim em i tokim ol long ol samting ol i mas mekim bilong abrusim bagarap, ol i mekim olsem.
8 Jisas i tokim ol bilipman, taim ol ami i banisim Jerusalem, ol i mas ranawe. Orait, long yia 66 C.E. ol ami bilong Rom i kam pait long Jerusalem. Tasol wanpela samting i mekim na ol Rom i kirap lusim Jerusalem. Em nau, dispela em i taim bilong ol Kristen i mas lusim dispela taun, long wanem, Jisas i bin givim dispela mak long ol: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap. Na ol man i stap ausait long taun, ol i no ken i go insait long en.” (Luk 21:20, 21) Ol man i bilip tru ol i lusim Jerusalem na ol ples i stap klostu na ol i ranawe i go na ol i abrusim bagarap na i stap gut.
Samting i Painim Ol Man i No Bilip
9, 10. (a) Ol bikman bilong lotu i mekim wanem na dispela i kamapim klia olsem ol i no bilip long Jisas? (b) Ol i no bilip, na wanem samting i painim ol?
9 Ol man i no bilip tru ol i mekim wanem? Ol i no ranawe taim ol i gat rot. Ol i ting ol bikman bilong ol bai lukautim ol na ol i no ken bagarap. Tasol ol dispela bikman wantaim lain bilong ol, ol i lukim pinis ol samting Jisas i bin mekim na ol inap save em i Mesaia. Olsem na bilong wanem ol i no bilip long ol tok bilong em? Long wanem, bel bilong ol i nogut. Dispela i bin kamap ples klia taim Jisas i kirapim bek Lasarus na ol i lukim planti manmeri nating ol i kam long em. Jon 11:47, 48 i tok: “Ol bikpris wantaim ol Farisi ol i singautim ol kaunsil i kam bung na ol i tokim ol olsem, ‘Bai yumi mekim wanem? Dispela man [Jisas] i save wokim planti mirakel. Sapos yumi larim em i mekim dispela kain pasin, orait bai olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.’ ” Orait ves 53 i tok: “Long dispela de tasol ol bikman i stat long wokim toktok bilong painim rot bilong kilim Jisas i dai.”
10 Tingim dispela gutpela mirakel tru Jisas i bin wokim—Lasarus i lusim matmat na i kirap bek! Tasol ol bikman bilong lotu i laik bai ol i mas kilim Jisas i dai long dispela wok em i mekim. Na taim ol i tingting long kilim i dai Lasarus, dispela tu i kamapim long ples klia olsem ol i man nogut tru. “Ol bikpris i wokim toktok long kilim Lasarus tu i dai, long wanem, planti Juda i ting long samting Jisas i bin mekim long Lasarus, na ol i lusim ol bikpris na ol i bilip long Jisas.” (Jon 12:10, 11) Nau tasol Lasarus i kirap bek long matmat na ol dispela pris i laik bai em i mas i dai gen! Ol i no tingim laik bilong God o i stap bilong ol manmeri. Ol i tingim ol yet tasol, na ol i tingim bikpela namba bilong ol, olsem strong ol i holim. “Ol i laikim tumas bai ol man i litimapim nem bilong ol. Ol i no laik bai God i litimapim nem bilong ol.” (Jon 12:43) Tasol ol i kisim nogut long dispela pasin bilong ol, olsem ol i no bilip. Long yia 70 C.E., ol ami bilong Rom i kam bek na ol i bagarapim ples bilong ol na lain bilong ol, na kilim i dai planti bilong ol.
Pasin Bilong Bilip Long Nau
11. Bihain liklik long yia 1900, olsem wanem sampela i bin kamapim klia olsem ol i bilip tru?
11 Long taim bilong yumi tu i gat planti man na meri i bilip tru. Olsem: Bihain liklik long yia 1900, klostu olgeta man i ting gutpela taim tru bai kamap. Tasol long dispela taim ol man i bilip long Jehova ol i wok long tokaut olsem klostu nau na wanpela taim nogut tru bai kamap, winim olgeta taim bipo. Baibel i tok profet long dispela samting long Matyu sapta 24, 2 Timoti sapta 3, na long sampela hap moa. Ol samting ol dispela bilipman i bin tokaut long en i kamap tru, kirap long 1914 taim Namba Wan Pait Bilong Olgeta Hap i kirap. “Taim bilong las de” em Baibel i tok profet long en, i kirap pinis, em taim bilong “planti hevi nogut tru.” (2 Timoti 3:1) Olsem wanem ol wokboi bilong Jehova i save long tok tru bilong dispela samting na ol narapela man i no save long en? Long wanem, olsem Josua i bin mekim, ol tu i bilip olsem olgeta tok bilong Jehova bai kamap tru, na i no gat wanpela tok bai i popaia.
12. Long nau, ol wokboi bilong Jehova ol i bilip tru long wanem tok promis bilong em?
12 Long nau, olgeta wokboi bilong Jehova i bilip na wet long em, ol i stap long olgeta hap bilong graun na ol i olsem 6 milion. Ol i lukim ol samting i kamap bilong truim ol tok profet bilong God na ol i save, klostu nau God bai pinisim ol lain bilong dispela graun, em ol i save bagarapim nabaut ol man na mekim pasin pamuk samting. Olsem na ol i bilip tru olsem taim i klostu pinis na ol bai lukim tok bilong 1 Jon 2:17 i kamap tru, em i tok: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” Ol wokboi bilong Jehova ol i bilip tru olsem em bai truim dispela tok promis.
13. Yu inap bilip long Jehova i go inap long wanem mak?
13 Yu inap bilip long Jehova i go inap long wanem mak? Yu inap putim laip bilong yu long han bilong em! Sapos yu mekim wok bilong em na long dispela as ol i kilim yu i dai, em bai kirapim yu bek na givim gutpela sindaun moa yet long yu! Jisas i strongim yumi olsem: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Olsem wanem? Yu save long wanpela dokta, o man bilong politik, o saveman bilong saiens, o bisnisman, o narapela man em inap mekim olsem? Nogat, a? Ol samting ol i bin mekim bipo i kamapim klia olsem ol i no inap mekim dispela samting. Jehova tasol inap, na em bai mekim!
Ol Man i Stap Gut Long God Ol Bai Kisim Gutpela Sindaun Tru
14. Olsem Baibel i tok promis, ol man i stap gut long God ol bai kisim wanem kain sindaun i gutpela tru?
14 Jisas i makim olsem nupela graun em Kingdom bilong God bai bosim em bai kamap tru. Em i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Dispela i strongim tok promis bilong God i stap long Song 37:29: “Ol stretpela man bai i kisim graun God i givim ol, na bai ol i stap oltaim long en.” Na taim Jisas i laik i dai na wanpela man bilong mekim pasin nogut i tokaut olsem em i bilip long Jisas, Jisas i tokim em: “Mi tok tru long yu nau, bai yu stap wantaim mi long Paradais.” (Luk 23:43, NW) Jisas i stap King long Kingdom bilong God, na em bai tingim dispela man na em bai lusim matmat na kirap bek na i stap long graun, na bai em i gat rot bilong i stap oltaim long dispela Paradais. Long nau, ol manmeri i bilip long Kingdom bilong Jehova ol inap tingting long i stap long Paradais long taim “[God] bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:4.
15, 16. Olsem wanem na long nupela taim ol man bai stap bel isi tru?
15 Orait yumi ken putim tingting bilong yumi i go long dispela nupela taim. Yu ken tingting olsem yumi stap pinis long en. Kwiktaim yumi lukim olsem ol manmeri long olgeta hap ol i amamas na ol i sindaun gut wantaim na i stap bel isi tru. Ol i amamas long i stap long taim olsem Aisaia 14:7 i stori long en: “Nau olgeta hap graun i ken i stap bel isi gen, na olgeta manmeri i ken singaut amamas.” I gat wanem as na ol i stap olsem? Lukim dua bilong ol haus—i no gat lok long en. I no gat wok long ol lok, long wanem, i no gat pasin raskol, no gat pasin bilong bagarapim man. Dispela i stret wantaim tok bilong Baibel, em i tok: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Maika 4:4.
16 Na i no gat pait moa, long wanem, long dispela nupela taim i gat tambu long pait. Ol i bin brukim olgeta samting bilong pait na wokim ol samting bilong gutaim long en. Em nau, tok bilong Aisaia 2:4 i kamap tru olgeta, em i tok: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” Na yumi bin ting dispela kain pasin bai kamap. I gat wanem as na yumi bin ting olsem? Long wanem, planti manmeri i stap long dispela nupela taim ol i bin lain long mekim olsem taim ol i stap yet long olpela graun na ol i bin mekim wok bilong God.
17. Ol man bai kisim wanem kain sindaun aninit long Kingdom bilong God?
17 Na narapela samting tu yu lukim, i no gat sampela lain i stap rabis. I no gat sampela lain i sindaun long ol pipia haus nogut o i pasim ol brukpela pipia laplap o i no gat ples slip. Olgeta manmeri ol i gat gutpela haus na gutpela klinpela graun i gat ol naispela diwai na plaua samting. (Aisaia 35:1, 2; 65:21, 22; Esekiel 34:27) Na i no gat hangre, long wanem, God i truim pinis tok promis bilong em, em i tok bai i gat planti kaikai inap tru long olgeta man. “Planti rais na wit samting i ken kamap long ol gaden bilong ol manmeri.” (Song 72:16) Tru tumas, Kingdom bilong God bai soim rot long ol na ol bai kamapim wanpela gutpela paradais tru long olgeta hap bilong graun, olsem God i laik mekim long Iden bipo.—Stat 2:8.
18. Long nupela taim, wanem ol samting i no inap bagarapim moa ol man?
18 Na yu kirap nogut long lukim olgeta manmeri i gat bikpela strong na skin bilong ol i no les liklik, long wanem, nau skin na tingting bilong ol i kamap gutpela olgeta. I no gat sik, o pen, o dai moa. I no gat wanpela i sindaun long wilsia o i slip long haus sik. Dispela olgeta samting i pinis olgeta. (Aisaia 33:24; 35:5, 6) Na ol animal tu i no inap bagarapim ol man, long wanem, strong bilong God i mekim na nau ol i stap isi!—Aisaia 11:6-8; 65:25; Esekiel 34:25.
19. Bilong wanem olgeta wan wan de long dispela nupela taim bai i “gutpela tumas”?
19 Man! Ol lain i stap gut long God long dispela nupela taim ol i wokim ol gutpela samting tru bilong kamapim gutpela sindaun! Olgeta strong na save bilong ol, na olgeta gutpela samting bilong graun, ol i mekim ol gutpela wok long en bilong helpim sindaun bilong ol man, na i no bilong bagarapim ol; na ol i mekim wok long en bilong wok gut wantaim ol man—i no bilong resis wantaim ol. Na olgeta man yu bungim ol, yu inap bilip long ol, long wanem, olsem God i tok promis pinis, olgeta manmeri em ol lain Jehova yet i “skulim ol.” (Aisaia 54:13) Ol lo bilong God i bosim olgeta man, olsem na “olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:9) Tru tumas, olgeta wan wan de long dispela nupela taim em i wankain olsem Song 37:11 i tok—em i “gutpela tumas.”
God i Tok Promis Pinis Long Kamapim Gutpela Taim
20. Yumi mas mekim wanem na bihain bai yumi inap stap long taim bilong bel isi?
20 Yumi mas mekim wanem na bai yumi ken i stap long dispela gutpela taim bihain? Aisaia 55:6 i tokim yumi: “Nau Bikpela i stap klostu long yupela . . . , olsem na nau em i taim bilong yupela i mas beten long em na i go klostu long em.” Na taim yumi wok long painim Jehova, yumi mas i gat wankain tingting olsem Song 143:10 i tok long en: “Yu God bilong mi, mi laik yu skulim mi gut bai mi bihainim laik bilong yu.” Ol man i mekim dispela samting ol inap i stap olsem man i no gat asua long ai bilong Jehova nau long dispela taim bilong las de, na ol inap wetim gutpela taim tru bai kamap bihain. “Yu tingting long man i no gat asua long wanpela samting, na lukim stretpela man. Man i save sindaun isi wantaim ol arapela manmeri, lain bilong en bai i stap oltaim. Tasol Bikpela i save bagarapim tru ol man bilong mekim sin. Ol lain tumbuna pikinini bilong ol bai i lus olgeta.”—Song 37:37, 38.
21, 22. Long nau God i wok long kamapim wanem samting? Ol i kisim skul olsem wanem?
21 Nau long dispela taim stret, Jehova i wok long singautim ol man bilong olgeta lain i laik bihainim laik bilong em. Em i wok long bungim ol na bai ol i ken kamap olsem as bilong nupela lain bilong em long graun, olsem Baibel i tok profet long en: “Wanpela taim bai i kamap bihain [em dispela taim nau yumi stap long en] na . . . ol lain manmeri bilong olgeta hap bai i tok olsem, ‘Kam, yumi go long maunten . . . bilong Bikpela [olsem lotu tru bilong em] . . . bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ ”—Aisaia 2:2, 3.
22 Kamapim Tok Hait 7:9 i stori long ol dispela manmeri olsem “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” Ves 14 i tok: “Ol dispela manmeri ol i bin [“winim taim bilong bikpela hevi tru,” NW].” Ol i abrusim bagarap taim pasin bilong dispela graun i pinis. Dispela lain i as bilong nupela taim, nau ol i bikpela lain tru, klostu olsem 6 milion, na long olgeta yia i gat planti nupela manmeri ol i kam insait long dispela lain. Jehova i wok long skulim olgeta dispela gutpela wokboi bilong em long i stap oltaim oltaim long nupela taim em bai kamapim. Ol i lain long mekim ol wok bilong spirit na ol narapela wok tu bilong kamapim Paradais long olgeta hap bilong graun. Na ol i bilip tru olsem dispela Paradais bai kamap tru, long wanem, “olgeta samting God i tok pinis long mekim, tru tumas bai em i mekim.”—Hibru 10:23.
Sampela Tok Bilong Tingim Gen
◻ Long taim bilong ol aposel, wanem samting i painim ol man i no bilip?
◻ Ol wokboi bilong God inap bilip long em i go inap long wanem mak?
◻ Ol man i stap gut long God, bihain ol inap kisim wanem kain sindaun?
◻ Yumi mas mekim wanem na bai yumi inap kisim gutpela sindaun long nupela taim God bai kamapim?
[Piksa long pes 18]
Nau long dispela taim stret, Jehova i wok long singautim ol man na bai ol i ken kamap olsem as bilong nupela lain long graun