Samting Bilong Traim Bilip

Abraham i skulim pikinini bilong em Aisak long laikim Jehova, na trastim olgeta tok promis bilong Jehova. Tasol taim Aisak i gat 25 krismas, Jehova i tokim Abraham long mekim wanpela samting i hatwok tru. Em wanem samting?

God i tokim Abraham: ‘Plis, kisim dispela wanpela pikinini bilong yu na go long wanpela maunten long graun bilong Moria, na givim em olsem ofa.’ Abraham i no save wai na Jehova i tokim em long mekim dispela samting. Tasol em i bihainim tok bilong Jehova.

Neks de long moning tru, Abraham i kisim Aisak na tupela wokman na go olsem long Moria. Bihain long 3-pela de, ol inap lukim ol maunten i stap klostu liklik. Abraham i tokim ol wokman long wet taim em na Aisak i go bilong mekim ofa. Abraham i givim paiawut long Aisak bilong karim, na Abraham i holim naip. Aisak i askim papa: ‘We stap dispela animal bai yumi mekim ofa long en?’ Abraham i bekim tok: ‘Pikinini, Jehova yet bai givim.’

Taim ol i kamap long maunten, ol i wokim alta. Bihain Abraham i pasim han na lek bilong Aisak na putim em antap long alta.

Abraham i apim naip i go antap. Long dispela taim stret, ensel bilong Jehova i singaut long heven: ‘Abraham! No ken kilim pikinini! Nau mi save yu bilip long God bikos yu redi long givim pikinini bilong yu olsem ofa.’ Orait Abraham i lukim pikinini sipsip em kom bilong en i pas long bus. Wantu em i rausim rop long Aisak na mekim ofa long pikinini sipsip.

Kirap long dispela taim, Jehova i kolim Abraham olsem pren bilong em. Yu save wai? Bikos Abraham i mekim olgeta samting Jehova i tokim em, maski em i no save wai na Jehova i tokim em long mekim.

Jehova i tokim gen Abraham long dispela promis: ‘Bai mi blesim yu, na bai mi mekim ol lain tumbuna pikinini bilong yu i kamap planti tru.’ Dispela i makim olsem Jehova bai blesim olgeta gutpela man long rot bilong famili bilong Abraham.