Yupela i No Ken Pundaunim “Ol Dispela Man i No Gat Nem”

1. Jehova i mekim wanem bilong helpim yumi wan wan?

JEHOVA yet i kirapim yumi wan wan long i go klostu long em. (Jon 6:44) Tingim dispela. Jehova i skelim gut pasin bilong planti bilion manmeri long dispela graun, na em i lukim wanpela gutpela samting long yu—em i luksave olsem yu inap kisim pasin bilong laikim em. (1 Sto. 28:9) Jehova i save long yu, em i kliagut long yu, na em i laikim yu tru. Dispela inap mekim isi bel bilong yu!

2. Long tok piksa bilong Jisas, olsem wanem em i soim olsem Jehova i save tingim tru olgeta wan wan sipsip bilong em?

² Jehova i save tingim tru yu, na tu, em i tingim olgeta bratasista bilong yu. Bilong kamapim klia dispela samting, Jisas i tok Jehova i olsem wanpela wasman bilong sipsip. Sapos wanpela wasman bilong sipsip i gat 100 sipsip na wanpela sipsip i lus, orait em bai mekim wanem? “Bai em i lusim ol 99 sipsip i stap long maunten na i go painim dispela wanpela sipsip i lus.” Taim em i go painim dispela sipsip pinis, em bai no inap belhat long dispela sipsip. Em bai amamas. Yumi kisim wanem skul? Olgeta wan wan sipsip i dia tumas long Jehova. Jisas i tok: “Papa bilong mi long heven i no laik bai wanpela bilong ol dispela man i no gat nem i lus.”—Mat. 18:12-14.

3. Yumi bai stori long wanem samting long dispela atikol?

³ Yumi no laik tru long mekim wanpela samting bilong pundaunim ol bratasista bilong yumi. Olsem wanem yumi inap abrusim pasin bilong pundaunim ol? Na yumi ken mekim wanem sapos narapela i mekim yumi bel hevi? Yumi bai kisim bekim bilong ol dispela askim long dispela atikol. Tasol pastaim, yumi bai kisim sampela save moa long “ol dispela man i no gat nem” em Matyu sapta 18 i stori long ol.

HUSAT “OL DISPELA MAN I NO GAT NEM”?

4. Husat “ol dispela man i no gat nem”?

⁴ “Ol dispela man i no gat nem,” ol i disaipel bilong Jisas na ol i gat narapela narapela krismas. Maski ol i gat hamas krismas, ol i “olsem ol liklik pikinini” bikos ol i laik bai Jisas i skulim ol. (Mat. 18:3) Maski ol i bilong narapela narapela bekgraun na kalsa, na ol i gat ol narapela narapela tingting na ol pasin, olgeta bilong ol i bilip long Krais. Olsem na Jisas i laikim tru ol.—Mat. 18:6; Jon 1:12.

5. Jehova i pilim olsem wanem taim wanpela i pundaunim o bagarapim bel bilong wanpela wokman bilong em?

⁵ “Ol dispela man i no gat nem,” ol i dia tumas long Jehova. Bilong kliagut long tingting bilong Jehova, yumi ken skelim tingting yumi gat long ol pikinini. Ol i dia tumas long yumi. Yumi laik lukautim ol bikos ol i no gat strong, ekspiriens, na savetingting olsem ol man i gat bikpela krismas i gat. Yumi no save amamas taim yumi lukim wanpela i bagarapim bel bilong narapela, tasol yumi save bel hevi moa yet taim wanpela i bagarapim bel bilong wanpela liklik pikinini. Olsem tasol, Jehova i laik lukautim yumi. Em i save bel hevi tru taim wanpela i pundaunim o bagarapim bel bilong wanpela wokman bilong em!—Ais. 63:9; Mak 9:42.

6. Olsem 1 Korin 1:26-29 i kamapim, ol man i holim wanem tingting long ol disaipel bilong Jisas?

⁶ Long wanem narapela rot ol disaipel bilong Jisas ol i olsem ol “man i no gat nem”? Tingim dispela, ol man bilong graun i save tingim tru husat lain? Ol i save tingim tru ol maniman, ol man em planti i save long ol, na ol man i gat bikpela namba. Tasol ol i tingim ol disaipel bilong Jisas olsem samting nating, olsem ol “man i no gat nem.” (Ritim 1 Korin 1:26-29.) Tasol Jehova i no holim wankain tingting olsem ol i gat.

7. Jehova i laik bai yumi holim wanem tingting long ol bratasista bilong yumi?

⁷ Jehova i laikim tru olgeta wokman bilong em, maski ol i mekim wok bilong em inap planti yia o ol i nupela long tok i tru. Olgeta bratasista bilong yumi ol i dia tumas long Jehova, so yumi tu mas holim wankain tingting long ol. Yumi mas “laikim tru olgeta wanbilip bilong [yumi],” na yumi no ken laikim sampela wanbilip tasol. (1 Pita 2:17) Yumi mas redi long mekim olgeta samting yumi ken mekim bilong tingim tru ol na lukautim ol. Sapos yumi save olsem yumi mekim wanpela i bel hevi, yumi no ken tingim dispela olsem liklik samting na tok, ‘Em i mas fogivim mi na lusim tingting long dispela samting.’ Wai na sampela Kristen inap bel hevi long pasin ol narapela i mekim? Ating sampela i kamap bikpela long ol famili we ol i tingim ol yet olsem ol lain i no gat nem. Ol narapela ol i nupela long tok i tru, so ol i no lain yet long fogivim ol narapela long ol pasin kranki bilong ol. Maski sapos yumi mekim ol narapela i bel hevi o yumi yet i bel hevi, yumi mas mekim ol samting bilong kamapim bel isi. Na tu, Kristen husat i save larim ol pasin kranki bilong ol narapela i mekim em i bel hevi, em i mas luksave olsem dispela pasin i no stret na em i mas lusim. Taim em i mekim olsem, em bai kisim bel isi na em bai pas gut wantaim ol bratasista bilong em.

TINGIM OLSEM OL NARAPELA I WINIM YU

8. Ol disaipel bilong Jisas i bin holim wanem tingting em planti man i gat?

⁸ Wai na Jisas i stori long “ol dispela man i no gat nem”? Ol disaipel bilong em i bin askim em olsem: “Husat tru i stap nambawan winim ol arapela long Kingdom bilong heven?” (Mat. 18:1) Long taim bilong Jisas, planti Juda i tingim biknem na namba olsem bikpela samting. Wanpela saveman i tok: “Ol man i bin dai bilong kisim ona na biknem, na ol i laik bai planti man i ken save long ol na rispektim ol.”

9. Ol disaipel bilong Jisas i mas mekim wanem?

⁹ Jisas i save olsem planti Juda i ting olsem em i bikpela samting long winim ol narapela, so ol disaipel bilong em i mas wok hat long rausim kain tingting olsem long bel bilong ol. Jisas i tokim ol: “Man i stap nambawan namel long yupela na i winim ol arapela, em i mas stap olsem man em krismas bilong em i liklik moa long ol arapela. Na man i go pas long yupela i mas stap olsem wokman bilong helpim ol arapela.” (Luk 22:26) Yumi mekim pasin wankain olsem “man em krismas bilong em i liklik moa long ol arapela” taim yumi “tingim olsem ol arapela i winim [yumi].” (Fili. 2:3) Taim yumi wok strong long holim kain tingting olsem, yumi bai abrusim pasin bilong pundaunim ol narapela.

10. Pol i bin mekim wanem tok kaunsel em yumi mas bihainim?

¹⁰ Ol bratasista bilong yumi i winim yumi long sampela pasin ol i save mekim. Yumi inap luksave long dispela taim yumi tingim ol gutpela pasin bilong ol. Yumi mas bihainim tok kaunsel em aposel Pol i mekim long ol Kristen long Korin. Em i tok: “Wanem samting i mekim na yu winim narapela? Yu gat wanem samting em narapela i no bin givim yu? Na sapos wanpela i bin givim long yu, wai na yu apim nem bilong yu yet olsem yu no bin kisim long wanpela?” (1 Kor. 4:7) Yumi mas sakim kain tingting olsem ol narapela i mas givim biknem long yumi o ting olsem yumi winim ol narapela. Sapos wanpela brata i save mekim ol gutpela tok o wanpela sista i save gut long kirapim ol Baibel stadi, orait dispela brata na sista i mas givim olgeta glori i go long Jehova.

“LONG BEL” YUPELA I MAS FOGIVIM OL NARAPELA

11. Yumi kisim wanem skul long tok piksa bilong Jisas long king na wokboi?

¹¹ Bihain long Jisas i givim tok lukaut long ol disaipel long ol i no ken pundaunim ol narapela, em i mekim tok piksa long wanpela king na wokboi bilong em. Dispela king i lusim bikpela dinau bilong wokboi bikos em i no inap bekim. Tasol bihain, dispela wokboi i no laik lusim liklik dinau em wanwok bilong em i gat long em. Dispela wokboi i no mekim gutpela pasin, olsem na king i putim em long kalabus. Yumi kisim wanem skul? Jisas i tok: “Papa bilong mi long heven bai mekim wankain pasin long yupela sapos long bel yupela i no fogivim ol brata bilong yupela.”—Mat. 18:21-35.

12. Sapos yumi no laik fogivim wanpela, wanem samting inap kamap?

¹² Pasin bilong dispela wokboi i mekim em yet i bel hevi na i mekim ol narapela tu i bel hevi. Em i no sori long wanwok bilong em, na em i “tokim ol man long kalabusim wanwok bilong em inap long em i bekim dinau bilong em.” Na tu, em i mekim ol narapela i bel hevi. “Taim ol arapela wanwok bilong dispela wokboi i lukim dispela samting i kamap, ol i bel hevi.” Olsem tasol, pasin bilong yumi inap mekim ol narapela i bel hevi. Sapos wanpela wanbilip i rongim yumi na yumi no laik fogivim em, wanem samting inap kamap? Namba 1: Yumi bai mekim em i bel hevi taim yumi no fogivim em, toktok wantaim em, na soim pasin laikim long em. Namba 2: Yumi mekim ol narapela insait long kongrigesen i bel hevi taim ol i lukim olsem yumi no stap wanbel wantaim dispela wanbilip.

13. Yu kisim wanem skul long ekspiriens bilong wanpela painia?

¹³ Taim yumi fogivim ol bratasista bilong yumi, yumi helpim yumi yet na yumi helpim ol narapela tu. Dispela samting i bin kamap long wanpela painia sista, nem bilong em Crystal. Wanpela sista long kongrigesen i mekim em i bel hevi. Crystal i tok: “Sampela taim, em i no save mekim ol gutpela tok na mi save pilim olsem wanpela i katim mi long naip. Long taim bilong autim tok, mi no laik tru long stap long seim grup wantaim em. Mi no amamas moa na mi no laik autim tok moa.” Crystal i pilim olsem i gat as na em i bel hevi. Tasol em i no larim pasin bilong bel kros o bel hevi i daunim em. Long pasin daun, em i bihainim stiatok bilong Baibel i stap long dispela atikol, “Lusim Tru Rong Ol Narapela i Mekim Long Yu” long Wastaua bilong Oktoba 15, 1999. Em i fogivim dispela sista. Crystal i tok: “Nau mi luksave olsem yumi olgeta i wok strong long kisim nupela pasin, na olgeta de Jehova i save redi long fogivim yumi. Mi kisim bikpela bel isi tru. Nau mi kisim bek amamas bilong mi.”

14. (a) Olsem Matyu 18:21, 22 i kamapim, aposel Pita i karim wanem hevi? (b) Yumi ken mekim wanem sapos yumi karim wankain hevi?

¹⁴ Yumi save olsem yumi mas fogivim ol narapela na i stret long yumi mekim olsem. Tasol yumi inap pilim hatwok long mekim olsem. Ating aposel Pita tu i bin pilim olsem sampela taim. (Ritim Matyu 18:21, 22.) Wanem samting i ken helpim yumi long fogivim ol narapela? Namba 1: Tingim tingim long bel olsem wanem Jehova i fogivim yu. (Mat. 18:32, 33) Yumi no gutpela inap long em i ken fogivim yumi, tasol em i save redi long mekim olsem. (Sng. 103:8-10) Olsem na “yumi tu i gat wok long laikim narapela narapela.” Yumi mas fogivim ol narapela; em samting yumi mas mekim. Yumi gat wok long fogivim ol bratasista bilong yumi. (1 Jon 4:11) Namba 2: Traim long tingim ol gutpela samting we inap kamap taim yumi fogivim wanpela wanbilip. Olsem: Yumi inap helpim em, strongim pasin wanbel insait long kongrigesen, lukautim pasin pren bilong yumi wantaim Jehova, na yumi inap kisim bikpela bel isi. (2 Kor. 2:7; Kol. 3:14) Namba 3: Yumi mas beten long God husat i laik bai yumi mas fogivim ol narapela. No ken larim Satan i pinisim bel isi i stap namel long yu na ol wanbilip bilong yu. (Efe. 4:26, 27) Yumi nidim helpim bilong Jehova na bai yumi ken abrusim trap bilong Satan.

NO KEN LARIM OL NARAPELA I PUNDAUNIM YU

15. Olsem Kolosi 3:13 i kamapim, yumi ken mekim wanem sapos pasin bilong wanpela wanbilip i mekim yumi bel hevi?

¹⁵ Sapos pasin bilong wanpela wanbilip i mekim yu bel hevi, orait yu ken mekim wanem? Mekim olgeta samting yu inap mekim bilong larim bel isi i stap yet. Beten long Jehova na kamapim bel na tingting bilong yu long em. Askim em long blesim dispela brata o sista husat i mekim yu bel hevi, na helpim yu long lukim ol gutpela pasin bilong em—em ol pasin Jehova i laikim long em. (Luk 6:28) Sapos yu no inap lusim tingting long rong em dispela brata o sista i mekim long yu, orait skelim olsem wanem yu inap toktok gut wantaim em. Oltaim em i gutpela long holim kain tingting olsem dispela brata o sista i no min long mekim yu bel hevi. (Mat. 5:23, 24; 1 Kor. 13:7) Taim yu toktok wantaim em, no ken holim tingting kranki long em. Olsem wanem sapos em i no laik kamapim bel isi namel long yutupela? ‘Yu mas wok yet long karim hevi em i putim long yu.’ No ken givap long brata o sista bilong yu. (Ritim Kolosi 3:13.) Na bikpela samting moa, no ken holim yet bel kros long em bikos dispela inap bagarapim pasin pren bilong yu wantaim Jehova. No ken larim wanpela samting i pundaunim yu. Long dispela rot, yu soim olsem yu laikim tru Jehova winim olgeta narapela samting.—Sng. 119:165.

16. Yumi olgeta wan wan i gat wanem wok long mekim?

¹⁶ Yumi amamas tru olsem yumi stap wanbel wantaim ol wanbilip na yumi lotuim Jehova olsem “wanpela lain sipsip i gat wanpela wasman”! (Jon 10:16) Long pes 165 bilong buk Oganaisesen Bilong Mekim Laik Bilong Jehova, em i tok: “Dispela pasin wanbel i helpim yu olsem na yu gat wok long lukautim.” Olsem na yumi mas “lainim yumi yet long tingim ol brata na ol sista bilong yumi olsem Jehova i save tingim ol.” Long ai bilong Jehova, yumi olgeta i olsem ol “man i no gat nem” na yumi dia tru long em. Yu holim wankain tingting olsem long ol bratasista bilong yu? Jehova i lukim na em i pilim tru olgeta samting yu mekim bilong helpim ol na lukautim ol.—Mat. 10:42.

17. Yumi mas tingting strong long no ken mekim wanem?

¹⁷ Yumi laikim tru ol bratasista bilong yumi. So yumi “no ken mekim wanpela samting i pundaunim wanpela brata o mekim em i lusim bilip.” (Rom 14:13) Yumi tingim olsem ol bratasista bilong yumi ol i winim yumi, na long bel yumi laik fogivim ol. Yumi no ken larim ol pasin kranki bilong ol narapela i pundaunim yumi. I gutpela moa long yumi “wok strong long mekim ol samting i save kamapim bel isi na ol samting i save strongim ol arapela.”—Rom 14:19.