1921 Wan Handret Yia I Go Pinis

“YUMI ken luk fowed long wanem wok bai kamap long dispela yia?” Dispela askim i kamap long Watch Tower bilong Janueri 1, 1921, bilong kirapim Ol Sumatin Bilong Baibel. Nius Watch Tower i kamapim tok bilong Aisaia 61:1, 2 bilong bekim dispela askim na kirapim ol long tingim wok bilong ol long autim tok. Em i tok: “Jehova i bin makim mi long autim gutnius long ol man i daunim ol yet . . . , bilong autim tok long yia bilong Jehova i mekim gut long ol manmeri, na de bilong God bilong yumi long bekim rong.”

OL I STRONGIM BEL NA AUTIM TOK

Bilong inapim wok bilong ol long autim tok, Ol Sumatin Bilong Baibel i mas strongim bel. Ol bai “autim gutnius” long ol man i gat pasin daun, na tu, ol bai autim tok long “de bilong . . . bekim rong” long ol man nogut.

Brata J. H. Hoskin, i bin stap long Kanada, na em i bin strongim bel na autim tok, maski i gat pasin birua. Long 1921, em i bungim wanpela wokman bilong lotu Metodis. Brata Hoskin i kirapim toktok na em i tok: “Yumi ken stori gut long Baibel. Na maski mitupela i no wanbel long sampela samting, yumi ken toktok gut yet long bel isi olsem ol pren.” Tasol dispela samting i no kamap. Brata Hoskin i tok: “Mitupela i toktok sampela minit tasol na em i paitim dua strong tru na mi ting bikpela glas bilong dua bai pundaun i go daun long plua.”

Na dispela wokman bilong lotu Metodis i bikmaus na tok: “Yu go long ol man em ol i no Kristen na autim tok long ol!” Brata Hoskin i no bekim tok, tasol taim em i go em i tingting, ‘Em i mekim pasin olsem em i no wanpela Kristen!’

Long neks de, taim dispela wokman bilong lotu Metodis i autim tok long sios bilong em, em i mekim ol stori giaman long Brata Hoskin. Brata Hoskin i tok: “Em i givim tok lukaut long ol manmeri bilong em na em i tokim ol olsem, long dispela taun mi hapman tru bilong tok giaman na ol i mas kilim mi i dai.” Brata Hoskin i no larim bel hevi i daunim em, nogat, em i wok yet long autim tok na gutpela samting i kamap. Em i tok: “Mi amamas tru long autim tok long dispela hap. Sampela manmeri i amamas na tok, ‘Mi save yu wokman bilong God!’ na ol i laik givim mi ol samting em mi nidim.”

PESENEL STADI NA FAMILI STADI

Bilong helpim ol man i gat laik long kisim save long kamap strong long bilip, Ol Sumatin Bilong Baibel i pablisim ol Baibel stadi program long nius The Golden Age.a Long Juvenile Bible Study program i gat ol askim bilong ol papamama long skelim wantaim ol pikinini bilong ol. Ol papamama i mas “givim ol dispela askim long ol pikinini bilong ol na helpim ol long painia ol bekim long Baibel.” Sampela askim olsem, “Hamaspela buk i stap long Baibel?,” i helpim ol long lainim ol bikpela samting long Baibel. Ol narapela askim olsem, “Yu ting olgeta Kristen i mas redi long karim hevi?,” i helpim ol yangpela long strongim bel long autim tok.

Na program Advanced Studies in the Divine Plan of the Ages i gat ol askim na bekim bilong ol man em ol i gat planti save pinis long Baibel. Ol inap painim ol bekim long volium 1 bilong buk Studies in the Scriptures. Planti tausen manmeri i kisim helpim long ol dispela program, tasol nius The Golden Age bilong Disemba 21, 1921 i tokaut olsem ol bai stopim ol dispela program. Wai na senis i kamap hariap?

WANPELA NUPELA BUK!

Buk *The Harp of God*

Kat i gat asainmen bilong ritim

Kat i gat ol askim

Ol brata i go pas i luksave olsem ol man i mas kisim gut save long ol bikpela tok i tru bilong Baibel. Olsem na ol i rilisim buk The Harp of God long Novemba 1921. Ol man em ol i gat laik long kisim save long Baibel, ol i joinim The Harp Bible Study Course. Dispela stadi kos em ol yet inap mekim i helpim ol man i ritim dispela buk long skelim “samting God i tingting pinis long mekim bilong givim laip oltaim long ol manmeri.” Ol i mekim dispela kos olsem wanem?

Taim man i kisim kopi bilong dispela buk, em i kisim tu wanpela asainmen bilong ritim em ol i prinim long wanpela kat. Long wik bihain, em i kisim wanpela kat i gat sampela askim long samting em i bin ritim. Long pinis bilong kat i gat asainmen bilong ritim tok long wik i kamap bihain.

Long wan wan wik inap 12-pela wik, sumatin bai kisim wanpela nupela kat long kongrigesen i stap klostu. Planti taim, ol lapun bratasista long kongrigesen o ol bratasista i gat sik na ol i hatwok long go autim tok long ol haus, ol i save salim ol dispela kat i go long ol sumatin. Olsem, Anna K. Gardner, em i bilong Millvale, Pennsylvania, long Amerika, em i tok: “Taim ol i rilisim buk The Harp of God, dispela buk i helpim sista bilong mi Thayle long mekim planti wok bilong autim tok. Long olgeta wik em i save salim ol kat wantaim ol askim i go long ol sumatin.” Taim dispela kos i pinis, wanpela long kongrigesen i save go lukim sumatin bilong helpim em long kisim sampela save moa long Baibel.

Thayle Gardner i sindaun long wilsia bilong em

BIKPELA WOK I STAP YET

Long pinis bilong yia, Brata J. F. Rutherford i salim wanpela pas i go long olgeta klas. Em i tok: “Long dispela yia yumi bin mekim bikpela wok tru bilong autim tok bilong Kingdom na helpim planti manmeri moa winim ol yia i go pinis.” Bihain em i tok moa: “Yumi gat planti wok moa bilong mekim. Kirapim ol narapela long insait long dispela gutpela wok.” I klia tru olsem Ol Sumatin Bilong Baibel i bihainim dispela tok. Long 1922, ol i strongim bel na autim tok bilong Kingdom winim bipo.

Ol Pren i Gat Strongpela Bel

Ol Sumatin Bilong Baibel i soim pasin laikim long ol brata bilong ol long rot bilong helpim narapela narapela. Ol i stap olsem ol pren i gat strongpela bel “long taim bilong hevi” olsem dispela stori i kamapim.—Prov. 17:17.

Long Tunde, Me 31, 1921, ol i putim wanpela blakskin man long kalabus. Dispela man em i bilong Tulsa, Oklahoma, long Amerika. Ol i kalabusim em bikos ol i tok em i bin paitim wanpela waitskin meri. Bihain long dispela, winim 1,000 waitskin man i pait wantaim wanpela liklik grup bilong ol blakskin man. Pait i go bikpela hariap na spred i go long wanpela hap we planti blakskin manmeri i save stap long en, em ol i kolim Greenwood. Ol man i stilim ol samting long winim 1,400 haus na ol stua samting, na kukim ol dispela haus na ol stua long paia. Ol ripot i kamapim olsem 36 manmeri i dai, tasol tru tru ating olsem 300 manmeri i dai long dispela pait. Bihain ol i kolim dispela pait olsem Tulsa Race Massacre.

Brata Richard J. Hill, em blakskin na em wanpela Sumatin Bilong Baibel, na em i save stap long Greenwood, em i tok: “Long dispela nait, mipela i mekim Baibel stadi klas bilong mipela olsem oltaim mipela i save mekim. Bihain long klas i pinis, mipela i harim ol i wok long sutim gan long taun. Mipela i harim gan i sut yet taim mipela i slip.” Long Trinde moning, Jun 1, hevi i go nogut moa. Brata Hill i tok: “Sampela manmeri i tok sapos mipela i laikim proteksen, mipela i mas hariap i go long Convention Hall.” Brata Hill na meri bilong em na 5-pela pikinini bilong em i ranawe i go long Convention Hall long Tulsa. Long dispela hap, gavman i salim ami i go bilong lukautim inap olsem 3,000 blakskin manmeri i stap long dispela hap, na bilong stopim pait.

Long dispela taim, Brata Arthur Claus, em waitskin, em i strongim bel na mekim wanpela disisen. Em i tok: “Taim mi harim olsem ol paitman i wok long ran i go i kam long Greenwood na bagarapim na kukim ol haus, mi go sekim gutpela pren bilong mi, Brata Hill.”

Arthur Claus i yusim buk The Harp of God, na em i bin skulim wanpela stadi klas i gat 14 pikinini

Taim em i go kamap long haus bilong Brata Hill, em i lukim wanpela waitskin neiba bilong Brata Hill i holim gan na sanap i stap. Dispela neiba, em tu i wanpela pren bilong Brata Hill, em i ting olsem Arthur em wanpela bilong ol paitman. Em i singaut na tok: “Wai na yu kam long hia?”

Arthur i tok: “Sapos mi no givim gutpela bekim em inap kilim mi i dai. Mi tokim em olsem mi pren bilong Brata Hill na planti taim mi save kam long haus bilong em.” Arthur na dispela neiba i lukautim gut haus bilong Brata Hill na ol paitman i no bagarapim.

Bihain Arthur i harim olsem Brata Hill na famili bilong em i stap long Convention Hall. Em i harim olsem ol blakskin manmeri i mas kisim tok orait em Jeneral Barrett i sainim—em ofisa i go pas—na bai ol i ken lusim dispela ples. Arthur i tok: “Mi hatwok tru long toktok long jeneral. Taim mi tokim em olsem mi laik kisim Brata Hill na famili bilong em i go, em i askim mi olsem: ‘Yu bai lukautim dispela famili na lukautim ol long ol samting ol i nidim?’ Mi amamas na tok yes.”

Arthur i holim pepa i gat tok orait, na em i go long Convention Hall. Na em i givim pepa long wanpela ofisa na dispela ofisa i bikmaus na tok: “Jeneral i sainim dispela pepa! Yu save olsem yu fes man long kisim wanpela long dispela ples i go?” Bihain ol i painim Brata Hill na famili bilong em. Olgeta i kalap long kar bilong Arthur na ol i go long haus.

Brata Claus i mekim gut ol samting na bai Brata Hill na famili bilong em i stap seif. Pasin bilong em long strongim bel na soim pasin laikim long brata bilong em i strongim tru ol narapela. Arthur i tok: “Dispela neiba husat i bin helpim mi long lukautim haus bilong Brata Hill i rispektim Ol Witnes Bilong Jehova. Na planti manmeri i amamas long kisim save long tok i tru bikos ol i lukim olsem lain bilong God i no save skelim skin kala bilong narapela, bikos yumi stap wanbel olsem wanpela lain i dediket pinis long God.”

a Long 1937, ol i senisim nem bilong nius The Golden Age i go long Consolation, na long 1946, ol i senisim i go long Awake!