Yu Save Long Dispela?

Wai na Jehova i orait long ol Israel i ken givim wel pisin balus na yangpela pisin balus wantaim olsem ofa?

ANINIT long Lo, Jehova i orait long ol i ken givim wel pisin balus na yangpela pisin balus wantaim olsem ofa. Planti taim ol tok bilong lo i stori long ol ofa, lo i save kolim dispela tupela pisin wantaim. (Wkp. 1:14; 12:8; 14:30) Wai na dispela em i gutpela? Wanpela risen em bikos planti taim i hatwok long painim ol wel pisin balus. Wai na i olsem?

Ol wel pisin balus i save lusim Israel long taim bilong kol, na long ol mun we san i hat ol i save kam stap long Israel. Long Oktoba, ol i save go long hap saut long ol kantri we ples i hat, na ol i save kam bek long Israel long taim bilong san. (Sol. 2:11, 12; Jer. 8:7) Long Israel bilong bipo, dispela i makim olsem i hatwok long givim ol wel pisin balus olsem ofa long taim bilong winta.

Tasol ol yangpela pisin balus, ol i no save lusim kantri, olsem na long olgeta yia ol i save stap long Israel. Na tu, ol man i save lukautim ol yangpela pisin balus. (Skelim Jon 2:14, 16.) Buk Bible Plants and Animals, i tok: “Olgeta viles na ol taun long Palestain i gat ol yangpela pisin balus em ol man i save lukautim ol. Long olgeta wan wan haus bilong ol man, ol i wokim hul long wol bilong haus we ol pisin i ken stap long en.”​—Skelim Aisaia 60:8.

Jehova i soim olsem em i gat pasin laikim na em i save bihainim gutpela tingting taim em i orait long ol i givim ol pisin olsem ofa—em ol pisin we i save stap long Israel long yia olgeta.