Go Klostu Long God

Em i Save Tingim Mak Bilong Yumi Wan Wan

Wok Pris 5:​2-​11

WANPELA meri husat i save wok strong long mekim ol samting bilong amamasim God, em i tok: “Mi wok strong tru, tasol mi save pilim olsem dispela i no inap.” Olsem wanem? Jehova i save orait long hatwok em ol wokman bilong em i mekim? Yu ting em i save tingim samting ol inap mekim na samting ol i no inap mekim? Bilong bekim ol dispela askim, i gutpela yumi skelim ol tok i stap long Lo Bilong Moses long ol narapela narapela ofa ol man i mas givim long Jehova. Dispela tok i stap long Wok Pris 5:​2-​11.

Aninit long Lo, God i tok ol man i mas mekim ol narapela narapela ofa bilong tekewe sin. Olsem ol tok i stap long ol dispela ves i kamapim, man i no tingting gut na em i mekim sin. (Wok Pris sapta 5Ves 2-4) Taim man i luksave olsem em i mekim sin, em i mas tokaut long sin bilong em na mekim ofa bilong tekewe sin​​—“wanpela sipsip meri o meme meri.” (Wok Pris sapta 5Ves 5, 6) Tasol olsem wanem sapos em i rabisman na em i no gat sipsip o meme bilong ofaim? Yu ting Lo i tok em i mas kisim kain animal olsem dinau, na bihain em i gat wok long bekim dinau bilong em? Yu ting em i mas wok bilong kisim mani inap long baim dispela animal, na long dispela rot em i surikim taim bilong mekim ofa?

Lo i kamapim klia pasin bilong Jehova long tingim ol man, na i tok: “Sapos man i asua pinis em i sot long mani na em i no inap long baim sipsip o meme, em i mas kisim tupela pisin ol i kolim balus na bringim i kam long Bikpela bilong pinisim asua bilong en.” (Wok Pris sapta 5Ves 7) Sapos wanpela Israel i stap rabis tru na em i no inap baim wanpela sipsip, orait God i amamas long samting em man inap long givim​​—em tupela pisin balus.

Olsem wanem sapos man i sot tru na em i no inap baim tupela pisin? Lo i tok: “Orait em i mas kisim wanpela kilogram gutpela plaua na bringim i kam . . . [olsem] ofa bilong rausim sin.” (Wok Pris sapta 5Ves 11) Jehova i tingim ol man i stap rabis tru na em i orait long ol i ken mekim ofa i no gat blut long en bilong tekewe sin.a Long Israel, pasin bilong stap rabis tru i no pasim wanpela long insait long dispela gutpela samting bilong mekim ofa bilong tekewe sin na kamap wanbel wantaim God.

Yumi kisim wanem skul long Jehova long lo bilong mekim ofa bilong tekewe sin bilong ol manmeri? Em i wanpela God i gat pasin sori, na em i save tingim tru mak bilong ol wokman bilong em. (Song 103:14) Em i laik yumi go klostu long em na pas gut wantaim em, maski yumi gat ol hatwok olsem go lapun, sik, wok bilong famili o ol narapela samting yumi mas mekim. Taim yumi save olsem God Jehova i amamas long yumi mekim ol samting inap long mak bilong yumi, dispela inap mekim gut bel bilong yumi.

[Futnot]