Pas i Kam Long Rasia

Mipela i Go Raun Long Longwe Ples

LIKLIK balus bilong mipela i lusim Yakutsk na isi isi balus i ron i go antap long ples daun bilong Tuymaada. Mipela i abrusim planti bikpela na liklik raunwara em ais i karamapim. Balus i ron antap long Verkhoyanskiy, em ol maunten sno i karamapim het bilong ol na i wait gut tru long lait bilong san. Mipela i raun inap 900 kilomita na nau mipela i pundaun long ples Deputatskiy.

Em kirap bilong ol raun bilong mi long Ripablik Saka, ol i kolim tu olsem Yakutia, em naispela ples tru tasol em i kol nogut tru. Em i bikpela kantri winim sais bilong Westen Yurop olgeta. Long taim bilong san, ples i save hat nogut tru inap olsem 40 digri Selsias, na long taim bilong kol, ples i save kol nogut tru (-70 digri Selsias). Na insait long graun i gat ol bun bilong ol traipela animal i bin i stap bipo, tasol nau ol i no stap moa. Mi bin mekim laspela raun bilong mi long dispela ples inap sampela yia i go pinis, tasol mi ken tingim gut yet ol liklik taun em bikpela smok i karamapim, na ol lait bilong hap not long skai i gat kain kain naispela kala, na ol lain Yakut em ol i gat pasin bilong amamas.

Mipela i no tingting long raun long Deputatskiy tasol, nogat. Mi na poroman bilong mi bai i go raun long sampela narapela ples tu. Namba wan ples em Khayyr, em i longwe moa inap 300 kilomita long hap not, klostu long solwara Laptev, long noten Saibiria. Bilong wanem mipela i go long dispela ples? Bipo, wanpela Witnes Bilong Jehova i bin kam long ol dispela ples na em i bungim planti man em ol i laik kisim save long tok bilong Baibel. Mipela i stap long Yakutsk, em 1,000 kilomita samting longwe long ol, na i no gat ol narapela Witnes i stap klostu long ol! Olsem na mipela i pilim olsem mipela i mas helpim na strongim ol dispela man.

Taim mipela i kamap long Deputatskiy, mipela i bungim wanpela man husat i laik draiv i go long Khayyr, na em i tok mipela i ken kalap wantaim em na givim liklik pe tasol. Mipela i gat tupela tingting taim mipela i lukim ka bilong em​—em olpela ka tru ol i bin wokim long taim gavman Soviet i bin bosim dispela hap, na ka i smel long petrol. Tasol mipela i kalap tasol na i go wantaim em long dispela nait. Mipela i no save wanem samting bai painim mipela.

Ol sia insait long ka i kol nogut tru olsem ais long ausait, na i no longtaim mipela i save olsem ol sia bai stap kol tasol. Olsem na mipela i askim draiva long stop na mipela i go painim ol kolsiot insait long ol bek na pasim antap long ol narapela klos mipela i werim. Tasol kol i mekim save yet long mipela.

Dispela draiva em i man bilong ples kol, na em i gat pasin bilong amamas. Wantu em i askim, “Olsem wanem? Yupela i bin lukim pinis ol lait bilong hap not?” Mi no bin lukim, olsem na em i stopim ka, na mipela i go ausait. Long dispela haptaim, mi lusim tingting olgeta long kol. Mi sanap tasol na amamas tru long lukim ol dispela gutpela lait long skai i gat kain kain kala, em ol i luk olsem ol keten long skai i wok long muv. Em narapela kain samting tru na i olsem ol dispela lait i stap klostu tru na mipela inap long holim.

Long bikmoning tru taim ples i tudak yet, ka i pas long bikpela hip sno long wanpela hap. Mipela i helpim draiva long rausim ka long hip sno​—mipela i mekim olsem sampela taim moa bihain long dispela​—taim mipela i ron i go long Khayyr long ol rot ol man i bin katim long bikpela sno. Taim tulait i bruk, mi luksave olsem ol dispela “rot” em ol wara i bin kamap ais! Mipela i bin lusim Deputatskiy na raun inap 16 aua pinis, na nau long belo mipela i kamap long Khayyr. Mipela i ting mipela bai sik, long wanem, mipela i bin raun long bikpela kol nogut tru inap longpela taim, tasol taim mipela i kirap long moningtaim mipela i pilim orait. Tasol ating ais i bin kukim skin bilong ol pinga bilong lek bilong mi na i olsem ol pinga i dai. Ol asples i givim mi gris bilong bea na mi rapim long en.

Mipela i save go long ol haus bilong ol man na autim gutnius long ol. Tasol long Khayyr, taim ol man i harim olsem mipela i kamap, ol yet i kam painim mipela! Long olgeta de, inap tupela wik na hap, mipela i wok long mekim Baibel stadi wantaim ol asples, sampela taim mipela i kirap long moning i go inap long biknait. Em gutpela samting tru long bungim planti man i gat laik long lainim tok bilong God em ol i gat pasin bilong mekim gut long ol man. Sampela lapun meri Yakut i tokim mipela: “Mipela i bilip long God. Na taim yupela i kam long hia, long dispela longwe ples, dispela i soim olsem i gat God!”

Mipela i kirap nogut long pasin bilong ol asples. Olsem: Ol i save hipim ol hap ais olsem paiawut klostu long haus. Na taim ol i laikim wara, ol i go kisim wanpela hap ais na sanapim insait long ketel antap long paia na ais i kamap wara. Ol asples i wokim wanpela gutpela kaikai long pis bilong Aktik ol i kolim chir, em nais tru long kaikai olsem stroganina, ol asples i save laikim tru. Taim ol i kisim pis, ol i save mekim i kamap ais, bihain ol i katim i go liklik, putim i go insait long sol na pepa ol i miksim, na kaikai wantu. Ol asples i amamas long tokim mipela long ol bun bilong ol animal, olsem ol bikpela tit bilong mamot, na ol diwai bilong bipo bipo i bin kamap olsem ston, em ol i save painim long dispela hap.

Mi stap long Khayyr na raun i go longwe inap planti handet kilomita, planti taim mi save raun long balus bilong i go lukim ol man long ol narapela narapela ples long Yakutia, em ol i laik lainim tok bilong Baibel. Ol dispela man i gat gutpela pasin tru! Wanpela taim mi bungim wanpela liklik mangi, na em i bin kisim save olsem mi save pret long raun long balus. Bilong strongim mi, em i wokim wanpela kat bilong mi. Em i droim tupela liklik pisin na wanpela liklik balus na em i raitim tok olsem: “Sasha, taim yu raun long balus, no ken pret olsem balus bai pundaun. Matyu 10:29.” Mi pilim tru tok bilong em taim mi ritim dispela skripsa! Dispela ves i kamapim tok bilong Jisas long ol liklik pisin: “Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun.”

Mi stori long sampela tasol bilong ol gutpela samting mi bin amamas tru long en long Yakutia. Dispela ples i kol nogut tru bai kirapim mi long tingim yet ol dispela gutpela lain em ol i sindaun long dispela longwe ples.

[Ol Piksa long pes 25]

Mipela i lukim olsem ol Yakut i gat pasin bilong mekim gut long ol man