Yu Save Long Dispela?

Yu ting ol Rom inap larim ol man i planim bodi bilong wanpela man, kain olsem Jisas, em ol i bin hangamapim em long diwai pos bilong kilim em i dai?

PLANTI man i save long stori Baibel i mekim long ol i bin hangamapim Jisas namel long tupela raskolman na kilim em i dai. (Mat. 27:35-38) Tasol i gat tok pait i kamap long tok Baibel i mekim olsem ol man i bin rausim bodi bilong Jisas long diwai na bihain putim marasin samting long en na planim long matmat.​—Mak 15:42-46.

Sampela saveman bilong Ol Gutnius i gat tupela tingting olsem tru tru ol Rom i larim ol man i kisim bodi bilong wanpela man ol i hangamapim long diwai i go planim long matmat o nogat. Ol dispela saveman i bilip olsem ol man em ol Rom i hangamapim long diwai, ol i no save planim gut bodi bilong ol. Wanpela man bilong raitim buk em Ariel Sabar, em i raitim wanpela atikol long magasin Smithsonian na em i eksplenim dispela tingting olsem: “Pasin bilong hangamapim man long diwai em panismen ol i save givim long ol man nogut insait long komiuniti, olsem na sampela saveman i ting dispela tingting olsem ol Rom inap larim ol man i planim bodi bilong wanpela man nogut long matmat em i no tru.” Ol Rom i laik semim nogut tru wanpela raskolman, olsem na planti taim ol i save larim bodi bilong man nogut i hangamap long diwai pos i stap na larim ol pisin i kam kaikai. Bihain long dispela, wanem hap bilong bodi i stap yet ol i save tromoi i go insait long matmat na karamapim graun.

Tasol lain akiolojis i painim ol bun bilong sampela Juda em ol i bin kilim ol i dai, na dispela i kamapim klia narapela samting. Long 1968, ol i painim ol bun bilong wanpela man em ol man i bin kilim em i dai long taim bilong Jisas. Ol i painim ol dispela bun long wanpela matmat bilong ol famili Juda klostu long Jerusalem. Ol dispela bun i stap insait long boks bilong bun. Wanpela bilong ol dispela bun em bun bilong lek daunbilo. Ol i bin yusim wanpela 11.5 sentimita ain nil long nilim dispela lek i go long wanpela diwai plang. Sabar i tok: “Dispela bun bilong lek daunbilo em bilong wanpela man nem bilong em Yehochanan, dispela em i evidens na i kamapim klia as na tok em Ol Gutnius i mekim olsem ol man i bin planim bodi bilong Jisas, ating em i tru.” I klia olsem, “lek bun bilong Yehochanan em wanpela eksampel bilong man em ol i bin hangamapim em long diwai long taim bilong Jisas we ol Rom i orait long ol man i ken bihainim kastam bilong ol Juda long planim em.”

Narapela samting em olsem, ol samting ol man i lukim long lek bun bilong Yehochanan i mekim na ol man i gat narapela narapela tingting long hau ol i bin hangamapim Jisas long diwai pos. Tasol wanpela samting i klia em olsem, ol man i planim bodi bilong sampela raskolman na ol i no tromoi nating tasol i go insait long matmat. So i klia tru olsem tok Baibel i mekim olsem ol man i bin planim bodi bilong Jisas long wanpela gutpela matmat, dispela tok em i tru na yumi ken bilip tru long en. I gat evidens i strongim dispela tok Baibel i mekim.

Bikpela samting moa em olsem, Jehova i bin tok profet olsem ol bai planim bodi bilong Jisas long matmat bilong wanpela maniman, na i no gat wanpela man inap pasim tok bilong God long kamap tru.​—Ais. 53:9; 55:11.