Samting i Stret na i No Stret: Samting i Stiaim Planti Man

Klostu olgeta man bai wanbel long tok olsem i gat sampela pasin em klia tru olsem i stret long mekim o i no stret long mekim. Olsem, long olgeta hap ol man i no orait long ol pasin olsem, kilim man i dai, reip, na mekim pasin sem long ol pikinini, tasol ol i orait long pasin i fea, pasin helpim, na pasin bilong pilim hevi bilong ol narapela. Tasol i gat ol narapela samting long laip em ol man i mas wokim disisen long en—na tu long sait bilong maritpasin, onest pasin, o wok bilong ol papamama long mekim bikpela long ol pikinini—planti man i bilip olsem i no gat wanpela pasin i stret o i no stret. Ol i ting wanem pasin ol i laik bihainim em orait tasol. Planti taim ol man i save tingim filings bilong ol yet na bilong famili na ol pren bilong ol long wanpela samting na mekim disisen bilong ol long en. Yu ting dispela em gutpela tingting?

BIHAINIM FILINGS BILONG YUMI

Planti taim filings bilong yumi, o tingting i stap long bel we i save helpim yumi long skelim wanem samting i stret na wanem samting i no stret, em ol i kolim maus bilong bel, i save stiaim yumi. (Rom 2:​14, 15) Ol pikinini tu, taim ol i liklik yet, ol inap luksave long pasin i fea na pasin i no fea, na bel i save kotim ol taim ol i mekim rong. Taim yumi wok long kamap bikpela, famili bilong yumi, ol wankrismas, ol tisa, komiuniti, lotu, na kalsa bilong yumi inap stiaim maus bilong bel bilong yumi. Taim yumi mekim ol disisen, maus bilong bel bilong yumi bai tokim yumi olsem ol disisen bilong yumi i stret wantaim ol samting yumi bin lainim olsem em samting i stret o i no stret long mekim.

Tingting bilong yumi long wanem samting i stret na i no stret, bai kirapim yumi long pilim hevi bilong narapela, soim tenkyu, mekim pasin fea, na sori long ol narapela. Em inap pasim yumi tu long mekim ol samting we inap bagarapim bel bilong ol man yumi laikim, o pasim yumi long mekim samting inap semim yumi yet, na bel i kotim yumi.

Yu ting oltaim yumi ken trastim filings bilong yumi long stiaim yumi? Yangpela man, Garrick, i bihainim ol pasin we em i tok, “Wanem samting mi laik mekim, mi mekim tasol.” Tasol em i luksave olsem, samting em i bin ting i stret long mekim na em i mekim, dispela i no kamapim gutpela samting. Em i stori long laip bilong em olsem ‘em laip i no gat amamas long en bikos em i insait long pasin pamuk, kisim drak, spak, pait, na bagarapim man.’

BIHAINIM FILINGS BILONG OL NARAPELA

Yumi save bihainim ol filings bilong yumi yet, na tu, planti taim yumi tingim filings bilong ol narapela taim yumi wokim ol disisen. Dispela i mekim na yumi inap kisim helpim long ekspiriens ol i gat na savetingting bilong ol. Ol famili bilong yumi, ol pren, na lain long komiuniti bai rispektim yumi sapos yumi mekim samting ol i ting i stret long mekim.

Yu ting oltaim yumi ken trastim filings bilong ol narapela long stiaim yumi? Yangpela meri, Priscila, i save mekim wankain pasin olsem ol wankrismas bilong em, na em i save slip wantaim kain kain man. Tasol em i luksave olsem, taim em i mekim samting em ol narapela i ting i stret long mekim, em i no amamas. Em i tok: “Mi mekim pasin ol narapela i save mekim, tasol mi no pilim gutpela. Dispela i stiaim mi long mekim ol samting we i no gutpela na i givim hevi long mi.”

YU TING I GAT GUTPELA ROT BILONG WOKIM DISISEN?

Taim yumi laik wokim disisen long wanem samting i stret na i no stret, filings bilong yumi yet na bilong ol narapela i bikpela samting. Tasol dispela tasol i no inap kamapim gutpela samting long olgeta taim. Sampela taim yumi inap givim hevi long yumi yet o ol narapela bikos yumi no luksave long wanem samting bai kamap long ol disisen yumi wokim. (Provep 14:12) Maski samting yumi na ol narapela i ting i gutpela, em inap givim hevi long yumi na dispela tingting inap senis. Sampela pasin em bipo ol man i ting i no stret long mekim nau ol i orait long en, na sampela pasin em bipo ol man i tingim olsem i stret long mekim nau ol i ting i no stret long mekim.

Yu ting i gat wanpela samting bilong stiaim yumi long makim wanem samting i stret na wanem samting i no stret? Yu ting i gat wanpela samting inap soim yumi gutpela rot long bihainim long nau na i no inap givim hevi long yumi long bihain?

Yes, i gat wanpela samting em tok bilong en i no save senis na yumi inap trastim, na em i save helpim olgeta manmeri long olgeta hap. Neks atikol bai stori long yumi inap painim we ol tok yumi ken trastim tru bilong stiaim yumi long makim wanem samting i stret na wanem samting i no stret.