STADI ATIKOL 19
SINGSING 22 King i Redi—Em Mas i Kam!
Yumi Save Long Wanem Samting Long Kot Bilong Jehova Bai Kamap Bihain?
“Jehova . . . i no laik bai wanpela i kisim bagarap.”—2 PITA 3:9.
SKUL YUMI BAI KISIM
Yumi ken save tru olsem ol kot bilong Jehova bai kamap bihain, em bai mekim long stretpela pasin na pasin i fea.
1. Wai na yumi ken tok olsem yumi stap long wanpela narakain taim tru?
YUMI stap long wanpela narakain taim tru! Long olgeta wan wan de, yumi wok long lukim truim bilong ol tok profet bilong Baibel. Olsem, yumi lukim “king bilong not” na “king bilong saut” i wok long resis long stap nambawan na bosim graun olgeta. (Dan. 11:40, ftn.) Yumi lukim wok bilong autim gutnius bilong Kingdom Bilong God i wok long i go long olgeta hap bilong graun, na planti milion manmeri moa i kirap long lotuim Jehova. (Ais. 60:22; Mat. 24:14) Na yumi wok long kisim planti kaikai bilong strongim bilip long “taim stret” bilong en.—Mat. 24:45-47.
2. Yumi ken save tru long wanem samting, tasol yumi mas luksave tu long wanem samting?
2 Jehova i wok yet long helpim yumi long kliagut moa long ol bikpela samting i laik kamap klostu taim. (Prov. 4:18; Dan. 2:28) Yumi ken save tru olsem klostu long kirap bilong traipela hevi tru, yumi bai save pinis long olgeta samting yumi gat wok long save long en bambai yumi ken sanap strong na stap gut yet long Jehova long dispela taim nogut. Tasol yumi mas luksave tu olsem i gat sampela samting bai kamap klostu taim em yumi no save long en. Long dispela atikol, pastaim yumi bai stori long risen na yumi mekim senis long ol save yumi holim pinis long sampela bilong ol dispela samting bai kamap. Na bihain yumi bai stori long sampela samting yumi save long en long ol samting bai kamap bihain na ol samting Papa bilong yumi long heven bai mekim.
SAMTING YUMI NO SAVE LONG EN
3. Long pastaim, yumi bin tok wanem samting bai painim ol man i no lotuim Jehova taim traipela hevi tru i kirap, na wai na yumi tok olsem?
3 Pastaim yumi bin tok olsem taim traipela hevi tru i kirap, ol man i no lotuim Jehova bai i no gat rot moa long kisim save long em na ol bai i no inap abrusim Armagedon. Yumi bin tok olsem bikos yumi ting olsem ol samting i kamap long taim bilong Bikpela Tait i olsem tok profet na i makim ol samting bai kamap long bihain. Olsem, Jehova i bin pasim dua bilong sip paslain long Bikpela Tait i bin kirap. Olsem tasol, pastaim yumi bin kisim tingting olsem long kirap bilong traipela hevi tru, i olsem God bai pasim dua bilong ol manmeri bilong dispela graun bilong Satan, na ol bai i no gat rot bilong kisim laip.—Mat. 24:37-39.
4. Yu ting ol samting i bin kamap long taim bilong Bikpela Tait i olsem tok profet na i makim ol samting bai kamap long bihain? Stori long dispela.
4 Yu ting yumi mas ting olsem ol samting i bin kamap long taim bilong Bikpela Tait i olsem tok profet na i makim ol samting bai kamap long bihain? Nogat. Wai na yumi tok olsem? Bikos Baibel yet i no mekim wanpela tok bilong sapotim dispela tingting.a Em tru olsem Jisas i tok “taim bilong Noa” bai wankain long taim em i kam i stap. Tasol em i no tok olsem Bikpela Tait em wanpela tok profet na olgeta man na olgeta samting long dispela stori, olsem God i pasim dua bilong sip, i makim ol samting bai kamap bihain, nogat. Tasol dispela i no makim olsem yumi no inap kisim skul long stori bilong Noa na Bikpela Tait, nogat, yumi inap kisim sampela skul long dispela stori.
5. (a) Noa i bin mekim wanem samting paslain long Bikpela Tait? (Hibru 11:7; 1 Pita 3:20) (b) Olsem wanem wok autim tok bilong yumi long nau i wankain long wok autim tok Noa i bin mekim?
5 Taim Noa i kisim tok lukaut i kam long Jehova, em i soim olsem em i gat bilip taim em i wokim sip. (Ritim Hibru 11:7; 1 Pita 3:20.) Long wankain pasin, ol manmeri em ol i harim gutnius bilong Kingdom Bilong God, ol i mas bihainim ol tok ol i harim. (Apo. 3:17-20) Pita i tok Noa em “man bilong tokaut long stretpela pasin.” (2 Pita 2:5) Tasol olsem yumi stori long atikol i go pinis, yumi no save sapos Noa i bin autim tok long olgeta wan wan manmeri i stap long graun long dispela taim paslain long Bikpela Tait. Long nau, yumi traim long autim tok long ol manmeri i stap long olgeta hap bilong graun na yumi givim bel tru long mekim olsem. Maski i olsem, yumi no inap autim gutnius long olgeta wan wan man i stap long graun paslain long pinis i kamap. Wai na yumi tok olsem?
6-7. Wai na yumi ken tok olsem yumi no inap autim gutnius long olgeta wan wan man i stap long graun paslain long pinis i kamap? Stori long dispela.
6 Skelim tok Jisas i mekim long wok autim tok bilong yumi bai go bikpela olsem wanem. Em i tok profet olsem bai yumi autim gutnius “long olgeta hap bilong graun na bai olgeta lain man i ken harim.” (Mat. 24:14) Dispela tok profet i kamap tru long nau winim olgeta taim bipo. Yumi kamapim ol buk na nius i stori long gutnius bilong Kingdom long winim 1,000 tokples na long rot bilong jw.org websait, planti manmeri moa long graun olgeta inap kisim save long en.
7 Tasol Jisas i tokim ol disaipel bilong em olsem ol bai i no inap “pinisim wok bilong raun long olgeta taun,” o autim tok long olgeta manmeri paslain long em i kam. (Mat. 10:23; 25:31-33) Tok bilong Jisas bai i stret long yumi long nau tu. Planti milion manmeri i sindaun long ol kantri we i gat strongpela tambu long wok autim tok bilong yumi. Na tu, planti handret bebi i wok long bon long olgeta minit. Yumi traim bes long autim gutnius long ol manmeri bilong “olgeta kantri, long olgeta traib, [na] long olgeta tokples.” (Rev. 14:6) Tasol tru tru em olsem yumi no inap autim gutnius long olgeta wan wan manmeri i stap long graun olgeta paslain long pinis i kamap.
8. Yumi inap i gat wanem askim long ol kot bilong Jehova bai kamap long bihain? (Lukim tu ol piksa.)
8 Yumi inap askim olsem: Olsem wanem long ol manmeri em ol i no gat rot long save long gutnius paslain long traipela hevi tru i kirap? Jehova na Pikinini bilong em, em man Em i makim bilong mekim wok jas, ol bai mekim wanem long ol? (Jon 5:19, 22, 27; Apo. 17:31) Tim skripsa bilong dispela atikol i tok olsem Jehova “i no laik bai wanpela i kisim bagarap,” nogat. “Em i laik bai olgeta i tanim bel.” (2 Pita 3:9; 1 Tim. 2:4) Tru yumi save long dispela samting, tasol Jehova i no tokim yumi yet long hau em bai skelim ol manmeri em ol i no gat rot bilong save long gutnius. Tru tumas, i no gat wok long em i tokim yumi long ol samting em i mekim pinis o em bai mekim long bihain.
Jehova bai mekim wanem long ol manmeri em ol i no gat rot long kisim save long gutnius paslain long traipela hevi tru i kirap? (Lukim paragraf 8)c
9. Long Baibel, Jehova i kamapim klia wanem samting long yumi?
9 Long Baibel, Jehova i kamapim klia long yumi sampela bilong ol samting em bai mekim. Olsem, Baibel i tokim yumi olsem Jehova bai kirapim bek “ol man nogut” i dai pinis, em ol manmeri husat i no gat rot bilong harim gutnius na senisim pasin bilong ol. (Apo. 24:15; Luk 23:42, 43) Dispela inap mekim na yumi inap i gat ol narapela bikpela askim.
10. Yumi inap i gat wanem ol narapela askim?
10 Olgeta manmeri em ol i dai long taim bilong traipela hevi tru, yu ting ol bai dai inap oltaim na ol bai no gat rot bilong kirap bek? Baibel i kamapim klia olsem long Armagedon, Jehova wantaim lain ami bilong em bai bagarapim ol man i sakim wok bos bilong em, em ol dispela manmeri em ol bai no inap kirap bek. (2 Tes. 1:6-10) Tasol olsem wanem long ol narapela, olsem ol man i dai long rot bilong sik, ol netrol disasta samting, ol eksiden, o ol narapela i kilim ol i dai? (Ekl. 9:11; Sek. 14:13) Yu ting sampela bilong ol dispela manmeri bai insait long kirap bek bilong “ol man nogut” long nupela taim? Yumi no save.
SAMTING YUMI SAVE LONG EN
11. Jisas bai skelim wanem samting bilong kotim ol manmeri long Armagedon?
11 Yumi save long sampela samting bai kamap long bihain. Olsem, yumi save olsem long Armagedon Jisas bai skelim pasin ol manmeri i bin mekim long ol brata bilong Krais na em bai kotim ol long dispela. (Mat. 25:40) Ol manmeri em Jisas i skelim ol olsem ol sipsip, em ol manmeri husat i bin sapotim ol Kristen God i bin makim na Krais. Yumi save tu olsem sampela brata bilong Krais bai stap yet long graun taim traipela hevi tru i kirap, na ol bai i no inap go yet long heven inap long liklik haptaim paslain long Armagedon i kirap. Taim ol brata bilong Krais i stap yet long graun, rot i op long ol manmeri i gat gutpela bel i ken sapotim ol na ol wok ol i mekim. (Mat. 25:31, 32; Rev. 12:17) Wai na ol samting nau yumi stori long en ol i bikpela samting?
12-13. Sampela manmeri bai mekim wanem taim ol i lukim “Bikpela Babilon” i bagarap? (Lukim tu ol piksa.)
12 Bihain long traipela hevi tru i kirap, sampela manmeri em ol i lukim “Bikpela Babilon” i bagarap, ol bai tingim olsem inap planti yia pinis ol Witnes Bilong Jehova i bin tokaut long dispela samting bai kamap. Yu ting sampela manmeri husat i lukim ol dispela samting i kamap, ol bai tanim bel na bilip long Jehova?—Rev. 17:5; Ese. 33:33.
13 Sapos ol i mekim olsem, em bai wankain long samting i bin kamap long Isip long taim bilong Moses. Tingim olsem “planti kain kain lain manmeri” i bin joinim lain Israel taim ol i lusim Isip. Ating sampela bilong ol dispela manmeri i kirap long bilip long Jehova taim ol i lukim tok lukaut bilong Moses long Tenpela Bikpela Hevi i kamap tru. (Kis. 12:38) Sapos wankain samting i kamap bihain long Bikpela Babilon i bagarap na pinis olgeta, yu ting yumi bai bel hevi olsem ol manmeri i joinim yumi insait long liklik haptaim tasol paslain long pinis i kamap? Nogat, yumi no inap pilim olsem! Yumi laik bihainim pasin bilong Papa bilong yumi long heven, “em God i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru.”b—Kis. 34:6.
Sampela manmeri bai lukim “Bikpela Babilon” i bagarap na ol bai tingim olsem inap planti yia pinis ol Witnes Bilong Jehova i bin tokaut long dispela samting bai kamap (Lukim paragraf 12-13)d
14-15. Yu ting wanem taim man i dai na wanem ples man i stap long en bai makim olsem em bai kisim laip oltaim o nogat? Stori long dispela. (Buk Song 33:4, 5)
14 Sampela taim, yumi inap harim wanpela i tok, “Em gutpela sapos wanblut bilong mi i dai paslain long taim bilong traipela hevi tru i kirap, na bai em i gat rot bilong kirap bek.” I gat gutpela risen na wanpela i mekim kain tok olsem. Tasol wanem taim man i dai, dispela i no inap makim olsem em bai stap laip oltaim long bihain o nogat. Jehova em Jas i gutpela olgeta, so em i save mekim ol disisen we i stret na i fea. (Ritim Buk Song 33:4, 5.) Yumi ken bilip tru olsem “Jas bilong graun olgeta” bai mekim stretpela pasin.—Stt. 18:25.
15 Na tu, i stret long tok olsem wanem ples man i stap long en, dispela bai i no makim olsem em bai stap laip oltaim o nogat. Planti milion manmeri i stap long ol kantri we i no gat rot long ol i harim gutnius bilong Kingdom, olsem na Jehova bai i no inap kolim ol nating olsem “ol meme.” (Mat. 25:46) Stretpela Jas bilong graun olgeta i tingim tru olgeta wan wan bilong ol dispela manmeri, winim tingting yumi gat long ol. Yumi no save long hau Jehova bai stiaim ol samting i kamap long taim bilong traipela hevi tru. Ating sampela bilong ol dispela manmeri bai i gat rot bilong kisim save long Jehova, bilip long em, na ol bai sanap long sait bilong em taim em i mekim holi nem bilong em long ai bilong olgeta manmeri long graun.—Ese. 38:16.
Bihain long traipela hevi tru i kirap, . . . yu ting sampela manmeri husat i lukim ol dispela samting i kamap, ol bai tanim bel na bilip long Jehova?
16. Yumi save long wanem samting long Jehova? (Lukim tu piksa.)
16 Yumi stadi long Baibel na yumi kisim save olsem Jehova i save tingim tru laip bilong ol manmeri. Em i givim laip bilong Pikinini bilong em olsem ofa bambai yumi olgeta i gat rot bilong stap laip oltaim. (Jon 3:16) Yumi olgeta i pilim tru pasin bilong Jehova long sori na laikim yumi. (Ais. 49:15) Em i save long nem bilong yumi olgeta wan wan. Tingim, em i save gut long yumi olgeta wan wan, so sapos yumi dai, em i ken wokim gen olgeta liklik hap bilong bodi bilong yumi na em i ken givim bek olgeta memori yumi bin gat long laip bilong yumi taim yumi bin stap laip! (Mat. 10:29-31) Tru tumas, i gat gutpela risen na yumi ken bilip tru olsem gutpela Papa bilong yumi long heven bai skelim olgeta wan wan manmeri long stretpela pasin, pasin i fea, na long pasin marimari.—Jems 2:13.
Yumi ken bilip tru olsem Jehova bai skelim olgeta wan wan manmeri long stretpela pasin, pasin i fea, na long pasin marimari (Lukim paragraf 16)
17. Bai yumi stori long wanem samting long neks atikol?
17 Ol dispela nupela save yumi kisim i mekim wok autim tok bilong yumi i stap olsem bikpela samting tru long nau winim ol narapela taim bipo. Wai na yumi tok olsem? Na wanem samting i ken kirapim yumi long givim bel olgeta long autim gutnius na yumi no lusim dispela wok? Yumi bai stori gut long bekim bilong ol dispela askim long neks atikol.
SINGSING 76 Yu Pilim Amamas
a Bilong kisim save long risen na mipela i mekim dispela senis, lukim atikol, “Dispela i Stret Wantaim Laik Bilong Yu” long Wastaua bilong Mas 15, 2015, p. 7-11.
b Bihain long Bikpela Babilon i bagarap, lain Gok Bilong Magok bai pait long ol wokman bilong Jehova na dispela bai traim ol tru. Dispela bai traim tu ol manmeri husat i joinim lain bilong God bihain long Bikpela Babilon i bagarap.
c STORI BILONG PIKSA: Tripela piksa i soim risen na sampela manmeri i no gat rot bilong harim tok yumi autim long olgeta hap bilong graun: (1) Wanpela meri i stap long kantri we bikpela lotu bilong kantri i mekim na em i no seif long ol Witnes long autim tok long hap, (2) tupela marit i stap long kantri we gavman inap arestim ol Witnes na mekim nogut long ol sapos ol i autim tok long hap, na (3) wanpela man i stap long bus ples we i longwe tru long taun na i hatwok long ol Witnes i go autim tok long hap.
d STORI BILONG PIKSA: Wanpela yangpela meri husat i bin lusim tok i tru i tingim gen ol tok em i bin lainim long “Bikpela Babilon” bai bagarap. Em i tanim bel na kam bek long Jehova na long papamama Kristen bilong em. Sapos kain samting i kamap, yumi laik bihainim pasin marimari na pasin sori bilong Papa bilong yumi long heven na amamas taim wanpela sinman i tanim bel na kam bek.