Askim Bilong Ol Rida

Wai na sampela manmeri inap ting olsem tok bilong Buk Song 12:7 i makim ol “tok bilong Jehova” (ves 6), tasol long Baibel Nupela Taim Trenslesen dispela tok i makim ‘ol manmeri em ol man i mekim nogut long ol’ (ves 5)?

Tok i stap paslain na bihain long dispela ves i soim olsem dispela tok i makim ol manmeri.

Long Buk Song 12:​1-4, yumi ritim tok olsem: “Ol man em ol arapela i ken trastim, ol i no stap moa.” Nau skelim tok bilong Buk Song 12:​5-7, em ol ves em askim i kolim.

Ves 5 i stori long samting God bai mekim long ol manmeri em ol arapela i “mekim nogut long ol.” Em bai kisim bek ol.

Ves 6 i tok moa olsem, “tok bilong Jehova i klin olgeta,” ‘em i olsem silva i klin olgeta.’ Yumi ol Kristen tru i wanbel long dispela tok.—Sng. 18:30; 119:140.

Nau yumi ken skelim neks ves, em Buk Song 12:​7, em i tok: “Jehova, yu bai was gut long ol; na bai yu lukautim olgeta wan wan bilong ol na ol man nogut bilong dispela taim i no ken bagarapim ol.” Dispela tok “ol” i makim husat?

Ves 6 i stori long “ol tok bilong Jehova,” olsem na sampela man inap ting dispela tok “ol” long ves 7 i makim ol tok bilong God. Yumi save olsem God i bin lukautim gut Baibel, maski ol birua i traim long tambuim Baibel na bagarapim na pinisim olgeta.—Ais. 40:8; 1 Pita 1:25.

Tasol yumi save tu olsem Jehova i save lukautim ol manmeri em ves 5 i stori long ol. Oltaim Jehova i save helpim “ol man i gat hevi” na ol manmeri em “ol man i mekim nogut long ol.”—Jop 36:15; Sng. 6:4; 31:​1, 2; 54:7; 145:20.

So dispela tok “ol” long ves 7 i makim wanem?

Taim yumi skelim gut dispela hap bilong Buk Song, yumi save dispela tok “ol” i makim ol manmeri.

Tok bilong Buk Song 12:​1, 2 i soim olsem sampela man i mekim ol tok giaman long “ol man em ol arapela i ken trastim” ol. Bihain long en, yumi ritim olsem Jehova bai bekim pe nogut long ol dispela man i mekim ol tok giaman. Buk Song sapta 12 i helpim yumi long save olsem yumi ken trastim tru God olsem em bai kisim bek ol manmeri bilong em bikos tok bilong em i klin o i stret olgeta.

So tok bilong ves 7 i kamapim klia olsem Jehova bai was gut na lukautim “ol,” em ol manmeri em ol man nogut i daunim ol.

Long ol kopi bilong Ol Skripsa Hibru em ol Masoret i bin raitim, ol i yusim dispela tok “ol” long ves 7. Na long Baibel Grik Septuagint, inap tupela taim long ves 7 ol i yusim dispela tok “yumi” we i makim lain bilong God em ol man i mekim nogut long ol na ol i karim pen na hevi. Na tu, ves 7 i tok God bai lukautim “olgeta wan wan” wokman bilong em long “ol man nogut bilong dispela taim,” em ol man i orait long ol pasin nogut. (Sng. 12:​7, 8) Long rait Aramaic Targums, ves 7 i tok: “O Bikpela, yu bai lukautim ol stretpela man, yu bai was gut long ol na ol man nogut bilong dispela taim i no ken bagarapim ol.” Dispela tu em evidens olsem tok bilong Buk Song 12:7 i no makim ol tok bilong God.

Olsem na tok bilong dispela ves i ken strongim “ol man em ol arapela i ken trastim,” olsem God bai kisim bek ol.