Askim Bilong Ol Rida
Taim Jisas i mekim Kaikai Bilong Bikpela, ol 70 disaipel em i bin salim ol i go autim tok, ol i stap we? Ol i bin lusim em?
Yumi no ken kisim kain tingting olsem ol 70 disaipel i no stap long taim Jisas i mekim Kaikai Bilong Bikpela na dispela i makim olsem Jisas i no orait long ol o ol i lusim Jisas, nogat. Jisas i laik kisim dispela haptaim bilong stap wantaim ol aposel bilong em.
Em i orait long 12-pela aposel na ol 70 disaipel tu wantaim. Pastaim Jisas i makim 12-pela man namel long ol disaipel bilong em na kolim ol olsem ol aposel. (Luk 6:12-16) Em i stap long Galili taim em i “singautim 12-pela aposel i kam” na em i “salim ol i go bilong autim tok bilong Kingdom Bilong God na long oraitim ol man.” (Luk 9:1-6) Bihain, taim Jisas i stap long Judia, em i “makim 70 arapela na salim ol i go 2-pela 2-pela.” (Luk 9:51; 10:1) So Jisas i gat ol disaipel long narapela narapela hap em ol i autim tok bilong em.
Ol Juda em ol i kamap ol disaipel bilong Jisas, ol bai mekim yet bung bilong Pasova long olgeta yia na ating ol bai mekim olsem wantaim famili bilong ol. (Kis. 12:6-11, 17-20) Taim bilong Jisas long dai i kam klostu, olsem na em i go long Jerusalem wantaim ol aposel bilong em. Tasol em i no mekim bikpela bung bilong Pasova na singautim olgeta disaipel bilong em long Judia, Galili, na Perea long i kam, nogat. I klia tru olsem Jisas i laik mekim dispela bung wantaim ol aposel bilong em tasol. Em i tokim ol: “Mi bin i gat laik tru long kaikai dispela Pasova wantaim yupela paslain long mi karim pen na hevi.”—Luk 22:15.
I gat gutpela risen na em i mekim olsem. Klostu nau Jisas bai dai olsem “Pikinini Sipsip Bilong God husat i tekewe sin bilong olgeta manmeri!” (Jon 1:29) Dispela samting i mas kamap long Jerusalem em hap we ol i save mekim ol ofa i go long God inap planti yia. Dai bilong Jisas bai helpim ol man long kamap fri long kalabus bilong sin na dai winim pikinini sipsip bilong Pasova em lain Israel i save kaikai long nait bilong Pasova bilong tingim God i bin kisim bek ol long Isip. (1 Kor. 5:7, 8) Samting Jisas i mekim bai opim rot long ol 12-pela aposel long kamap hap bilong faundesen bilong kongrigesen Kristen. (Efe. 2:20-22) Buk Revelesen i tok olsem Jerusalem em taun holi, em i gat “12-pela ston faundesen” na “nem bilong 12-pela aposel bilong Pikinini Sipsip i stap long ol dispela ston faundesen.” (Rev. 21:10-14) Yes, ol dispela gutpela aposel bai mekim bikpela wok moa bilong truim ol samting God i tingting pinis long mekim. So em risen na Jisas i laik ol i stap wantaim em long dispela laspela Pasova na samting bai kamap bihain stret long en—em Kaikai Bilong Bikpela.
Dispela 70 disaipel na ol narapela i no stap wantaim Jisas long dispela kaikai. Maski i olsem, olgeta disaipel husat i stap gut long Jisas ol bai kisim helpim long dispela bung Jisas i bin kamapim—em Kaikai Bilong Bikpela. Na bihain, ol Kristen em God i makim long holi spirit, ol bai insait long kontrak bilong Kingdom em Jisas i bin tokim ol aposel long en long dispela nait.—Luk 22:29, 30.