Ol Papamama—Helpim Ol Pikinini Bilong Yupela Long Strongim Bilip Bilong Ol

1-2. Ol papamama i mas mekim wanem taim pikinini i gat ol askim long ol bilip bilong yumi em Baibel i as bilong en?

PLANTI papamama bai wanbel long tok olsem em i bikpela wok tru long mekim bikpela long ol pikinini. Sapos yu wanpela papa o mama na yu gat liklik pikinini, orait mipela i laik tok amamas long yu wok hat long helpim pikinini bilong yu long i gat strongpela bilip. (Lo 6:​6, 7) Taim pikinini bilong yu i kamap bikpela, ating em bai gat sampela bikpela askim long ol bilip bilong yumi em Baibel i as bilong en, olsem lo bilong Baibel long stretpela pasin.

² Pastaim ating yu inap tingting planti long ol askim em pikinini i gat. Na yu inap ting olsem ol kain askim em i givim i soim olsem em i no bilip long God na long Baibel. Tasol tru tru, taim ol pikinini i kamap bikpela, em gutpela long ol i givim ol askim na bai ol i ken strongim bilip bilong ol. (1 Kor. 13:11) So no ken tingting planti. Yu ken tingim ol askim em pikinini i gat long ol bilip bilong yumi olsem rot bilong helpim em long kisim pasin bilong wokim gut tingting.

3. Yumi bai stori long wanem ol samting long dispela atikol?

³ Long dispela atikol, yumi bai stori long hau ol papamama i ken helpim ol pikinini bilong ol long (1) kisim pasin bilong bilip strong long God na long Baibel, (2)  bihainim lo bilong Baibel long stretpela pasin, na (3) sambai long ol bilip bilong ol. Yumi bai stori tu long wai em i gutpela long ol pikinini i givim ol askim, na sampela samting ol papamama i ken mekim wantaim ol pikinini na bai rot i op long ol i ken stori wantaim ol long ol bilip Kristen bilong yumi.

HELPIM PIKININI LONG KISIM PASIN BILONG BILIP STRONG LONG GOD NA LONG BAIBEL

4. Ol pikinini inap i gat wanem ol askim, na bilong wanem?

⁴ Ol papamama Kristen i luksave olsem maski ol i bilip long God, dispela i no makim olsem ol pikinini bilong ol bai i gat wankain bilip, nogat. Yumi no bon wantaim pasin bilong bilip long Jehova. Na dispela i wankain tu long ol pikinini bilong yumi. Taim pikinini i go bikpela, em inap givim ol kain askim olsem: ‘Hau mi ken save tru olsem God i stap tru? Mi inap bilipim tru tok Baibel i mekim?’ Baibel i kirapim yumi long mekim wok long “gutpela tingting” yumi gat na “skelim olgeta samting, bai [yumi] ken save olsem ol i stret o nogat.” (Rom 12:1; 1 Tes. 5:21) Tasol hau yu ken helpim pikinini bilong yu long strongim bilip bilong em?

5. Ol papamama i ken mekim wanem bilong helpim pikinini bilong ol long kisim pasin bilong bilip long tok bilong Baibel? (Rom 12:2)

⁵ Kirapim pikinini bilong yu long pruvim long em yet olsem tok bilong Baibel i tru. (Ritim Rom 12:2.) Taim pikinini i givim yu ol askim, yu inap soim em hau long painim ol bekim long rot bilong yusim ol tul bilong mekim wok painimaut, olsem Watch Tower Publications Index na Risets Gaid Bilong Ol Witnes Bilong Jehova. Yu ken kirapim em long painim ol atikol na ol vidio we inap helpim em long pruvim olsem Baibel em i no wanpela buk nating em ol man i bin raitim, nogat. Em i “tok bilong God.” (1 Tes. 2:13) Olsem, em inap mekim wok painimaut long Ninive, em wanpela taun bilong Asiria bilong bipo. Long bipo, sampela saveman bilong Baibel i tok olsem taun Ninive i no bin stap tru. Tasol long yia 1850 samting, ol saveman i digim graun na ol i painim ol hap hap bilong dispela taun i stap yet, na dispela i soim olsem stori Baibel i mekim long Ninive em i stori tru. (Sef. 2:​13-15) Bilong pikinini i ken kisim save long olsem wanem bagarap bilong taun Ninive i truim tok profet Baibel i mekim, em i ken lukim dispela atikol “Yu Save Long Dispela?” long Wastaua bilong Novemba 2021. Taim em i skelim ol tok em i lainim long ol pablikesen bilong yumi wantaim ol tok em i lainim long ol buk ensaiklopidia na ol narapela buk em ol saveman i bin raitim, dispela bai strongim bilip bilong em long tok Baibel i mekim.

6. Hau ol papamama i ken helpim ol pikinini long lukim ol evidens i soim olsem tok bilong Baibel i tru? Stori long wanpela eksampel. (Lukim tu piksa.)

⁶ Helpim pikinini long lukim ol evidens i soim olsem tok bilong Baibel i tru. I gat planti narapela narapela rot em ol papamama inap yusim bilong stori wantaim ol pikinini long tok bilong Baibel o long pasin bilong bilip long God. Yu inap stori wantaim pikinini long ol dispela samting taim yupela i visitim wanpela musium, o wanpela gaden o pak, o wanpela displei long wanpela brens ofis bilong ol Witnes Bilong Jehova. Olsem, yu inap soim pikinini long wanpela tul samting ol man i yusim long bipo o wanpela samting i kamap long bipo em Baibel i stori long en, na dispela inap helpim pikinini long luksave olsem ol tok Baibel i mekim i tru. Olsem wanem? Pikinini bilong yu i save olsem nem bilong God i stap long wanpela hap ston em ol i kolim olsem Ston Bilong Ol Moap na dispela ston i bin stap inap 3,000 yia? Dispela Ston Bilong Ol Moap i stap long wanpela musium long Paris long Frans. Na tu, ol i wokim wanpela ston i wankain olsem Ston Bilong Ol Moap na em i stap long “The Bible and the Divine Name” displei long Wol Hetkota bilong ol Witnes Bilong Jehova long Warwick, New York. Ol rait i stap long Ston Bilong Ol Moap i stori olsem King Mesa bilong Moap i bin bikhet long lain Israel. Na ol dispela tok i stret wantaim stori i stap long Baibel. (2 Kin. 3:​4, 5) Taim pikinini bilong yu i lukim ol evidens i soim olsem tok bilong Baibel i tru na i stret, bilip bilong em bai kamap strong moa.—Skelim 2 Stori 9:6.

7-8. (a) Yumi inap kisim wanem skul long ol naispela peten na seip bilong ol samting God i wokim? Stori long wanpela eksampel. (Lukim tu piksa.) (b) Wanem ol askim i ken helpim pikinini bilong yu long strongim bilip bilong em olsem i gat Krieta i stap?

⁷ Kirapim pikinini long tingim ol samting i gat laip em Jehova i bin wokim. Taim yu na pikinini i wokabaut long wanpela naispela pak o yupela i wok gaden wantaim, kirapim em long lukim ol kain kain seip na peten long kriesen. Bilong wanem? Taim yu mekim olsem, yu helpim pikinini long luksave olsem wanpela Man i gat bikpela save i disainim ol dispela seip na peten. Olsem, inap planti yia ol saientis i stadim ol spairol seip o spairol peten i stap long ol samting i gat laip. Wanpela saientis nem bilong em Nicola Fameli i tok taim yu kaunim namba bilong sampela spairol peten i stap long ol samting i gat laip, yu bai lukim olsem ol namba i gat wankain peten. Ol i kolim peten bilong ol dispela namba olsem Fibonasi sikwens. Yumi inap lukim ol spairol peten long planti samting, olsem long seip bilong sampela galaksi, long peten bilong wanpela kain sel bilong solwara, long ol lip bilong ol diwai na plaua, na long het bilong ol sanplaua.a

⁸ Taim pikinini bilong yu i kisim save moa long saiens klas long skul, em bai luksave olsem i gat ol lo i stiaim ol peten o seip bilong planti samting i gat laip. Olsem, planti diwai i gat wanpela peten we i save ripitim em yet. Namel bilong diwai i save bruk na kamapim ol bikpela brens, na bihain ol bikpela brens i save bruk na kamapim ol liklik brens. Ol i kolim dispela kain peten olsem frektol peten. Tasol husat i kamapim ol lo i bosim ol dispela naispela peten? Husat i kamapim ol dispela naispela disain long ol samting i gat laip? Taim pikinini i wok long tingim ol kain askim olsem, dispela bai helpim em long kisim pasin bilong i gat strongpela bilip olsem God i bin wokim olgeta samting i gat laip. (Hib. 3:4) Taim pikinini i kamap bikpela, yu inap askim em olsem, “Sapos God i wokim yumi, orait yu ting i stret long em i putim ol lo bilong stretpela pasin em yumi mas bihainim na bai yumi ken stap amamas?” Na bihain yu ken tokim em olsem ol kain gutpela tok bilong stiaim yumi i stap long Baibel.

NASA, ESA, and the Hubble Heritage (STScl/AURA)-ESA/Hubble Collaboration

HELPIM PIKININI LONG BIHAINIM LO BILONG BAIBEL LONG STRETPELA PASIN

9. Wai na ol pikinini inap i gat ol askim long lo bilong Baibel long stretpela pasin?

⁹ Sapos pikinini bilong yu i gat ol askim long risen na yumi mas bihainim lo bilong Baibel long stretpela pasin, orait traim long kliagut long wai na em i askim olsem. Yu ting em i no wanbel long lo bilong Baibel long stretpela pasin, o ating em i no save long wanem tok em bai mekim long sambai long ol bilip Kristen bilong em? Maski i gat wanem risen na pikinini i gat ol askim, yu ken helpim em long kliagut long risen na em i mas bihainim lo bilong Baibel long stretpela pasin long rot bilong stadi wantaim em long buk Stap Amamas Oltaim!b

10. Hau yu ken helpim pikinini long tingim pasin pren bilong em wantaim Jehova olsem samting i dia tumas?

¹⁰ Helpim pikinini long tingim pasin pren bilong em wantaim Jehova olsem samting i dia tumas. Taim yu stadi long Baibel wantaim pikinini bilong yu, mekim wok long ol askim na ol piksa i stap long buk Stap Amamas Oltaim! na bai yu ken kliagut long tingting i stap long bel bilong em. (Prov. 20:5) Olsem, lesen 8 i tok Jehova i olsem wanpela gutpela pren husat i save mekim ol gutpela tok bilong kirapim gen tingting bilong yumi na dispela i lukautim na helpim yumi. Bihain long yupela i stori long 1 Jon 5:​3, yu ken askim pikinini olsem, “Yumi save olsem Jehova em i wanpela gutpela Pren tru, so yumi mas mekim wanem long ol gutpela tok em i givim long yumi?” Dispela em wanpela simpol askim, tasol em inap helpim pikinini long tingim olsem ol lo God i givim yumi i kamapim klia olsem em i laikim yumi tru.—Ais. 48:​17, 18.

11. Hau yu ken helpim pikinini long kliagut olsem i stret long em i bihainim ol stiatok bilong Baibel? (Provep 2:​10, 11)

¹¹ Stori wantaim pikinini olsem taim yumi bihainim ol stiatok bilong Baibel, dispela i save helpim yumi. Taim yu ritim Baibel o teks bilong de wantaim pikinini, stori long olsem wanem ol stiatok bilong Baibel i bin helpim famili bilong yupela. Olsem, helpim em long luksave olsem gutpela samting i save kamap taim yumi givim bel long mekim ol wok na oltaim bihainim onest pasin. (Hib. 13:18) Na tu, yu inap tokim em olsem taim yumi bihainim ol stiatok bilong Baibel, yumi bai lukautim helt bilong yumi na bel na tingting bilong yumi bai stap isi. (Prov. 14:​29, 30) Taim yu stori wantaim pikinini long hau ol stiatok bilong Baibel inap helpim yumi, dispela inap kirapim em long bihainim ol tok bilong Baibel.—Ritim Provep 2:​10, 11.

12. Hau wanpela papa i helpim pikinini man bilong em long luksave long gutpela samting i kamap taim em i bihainim ol stiatok bilong Baibel?

¹² Steve em wanpela papa long Frans, em i stori long hau em na meri bilong em i helpim tineja pikinini man bilong tupela, Ethan, long luksave long olsem wanem ol lo bilong Jehova i soim klia pasin laikim bilong em. Steve i tok: “Mipela i save askim em olsem, ‘Wai na Jehova i laik bai yumi mas bihainim dispela stiatok? Hau dispela stiatok i soim olsem Em i laikim yumi? Wanem samting inap kamap sapos yu no bihainim dispela stiatok?’” Long dispela rot, ol i helpim Ethan long trastim tru lo bilong Jehova long stretpela pasin. Steve i tok moa olsem: “Mipela i putim mak long helpim Ethan long luksave olsem savetingting bilong Baibel i winim tru savetingting bilong ol man bilong graun.”

13. Hau ol papamama i ken trenim pikinini long bihainim ol stiatok bilong Baibel? Stori long wanpela eksampel.

¹³ Trenim pikinini bilong yu long bihainim ol stiatok bilong Baibel. Wanpela rot yu ken mekim olsem em taim pikinini i kisim skul projek long ritim wanpela buk. Ating dispela buk inap stori long ol manmeri i mekim olkain pasin pamuk na kros pait na i kirapim ol yangpela long bihainim pasin bilong ol. Yu ken kirapim pikinini bilong yu long skelim pasin bilong ol dispela manmeri em buk i stori long ol wantaim ol stiatok bilong Baibel. (Prov. 22:​24, 25; 1 Kor. 15:33; Fili. 4:8) Dispela inap redim em long autim tok long tisa na ol wanklas bilong em taim ol i stori long dispela buk long taim bilong klas.

REDIM PIKININI LONG SAMBAI LONG OL BILIP BILONG EM

14. Wanpela yangpela Kristen inap pilim hatwok long stori long wanem topik, na bilong wanem?

¹⁴ Sampela taim, ol yangpela Kristen inap surik long sambai long ol bilip bilong ol. Ol inap pret o pilim sem long stori long tingting ol i gat long bilip bilong evolusen taim tisa i skulim ol long dispela topik. Bilong wanem? Ating tisa bilong ol inap tok olsem bilip bilong evolusen em i tru, na i no wanpela stori nating. Sapos yu wanpela papa o mama, hau yu ken helpim pikinini bilong yu long sanap strong na sambai long ol bilip bilong em?

15. Wanem samting i ken helpim wanpela yangpela Kristen long sanap strong na sambai long ol bilip bilong em?

¹⁵ Helpim pikinini long sanap strong na sambai long ol bilip bilong em. Pikinini bilong yu i no ken sem long bilip bilong em olsem i gat Krieta i stap. (2 Tim. 1:8) Wai na yumi tok olsem? Bikos planti saientis tu ol i bilip olsem ol samting i gat laip i no kamap nating, nogat. Ol i lukim ol evidens i soim olsem wanpela Man i gat bikpela save tru i bin wokim olgeta samting i gat laip em ol i narakain tru. Olsem na ol dispela saientis i no wanbel long bilip bilong evolusen em planti skul long graun olgeta i skulim ol sumatin long en. Pikinini bilong yu i ken strongim ol bilip bilong em long rot bilong tingim wanem samting i bin kirapim planti bratasista long bilip tru olsem God i bin wokim olgeta samting i gat laip.c

16. Hau ol papamama i ken helpim ol pikinini long sambai long bilip bilong ol long Krieta? (1 Pita 3:15) (Lukim tu piksa.)

¹⁶ Redim pikinini long sambai long bilip bilong em olsem i gat Krieta i stap. (Ritim 1 Pita 3:15.) Yu na pikinini bilong yu i ken skelim wantaim ol atikol bilong dispela siris “Young People Ask—Creation or Evolution?” i stap long jw.org. Bihain pikinini bilong yu i ken makim stori we em i pilim olsem em isi moa long eksplenim long ol narapela bilong helpim ol long luksave olsem i gat Krieta i stap, na yutupela i ken mekim prektis long en. Helpim em long tingim olsem i no gat wok long em i tok pait wantaim ol wanskul bilong em. Kirapim em long mekim ol simpol tok we inap helpim wanskul long wokim gut tingting long ol tok em i mekim. Olsem, sapos wanskul i tok: “Mi bilip tasol long ol samting mi inap lukim, na mi no bin lukim God.” Orait wanpela yangpela Kristen i ken tok olsem: “Piksaim long tingting olsem yu wokabaut long bikbus na yu no lukim wanpela man. Tasol yu wokabaut i go na yu lukim wanpela naispela haus i sanap i stap. Bai yu kisim wanem tingting? Yu bai save olsem wanpela man i gat save i wokim dispela haus. Olsem tasol, yunives na olgeta samting i stap long en i soim klia olsem wanpela Man i gat bikpela save i wokim olgeta dispela samting!”

17. Hau ol papamama i ken kirapim pikinini bilong ol long painim ol rot bilong stori wantaim ol narapela long tok i tru bilong Baibel? Stori long dispela.

¹⁷ Kirapim pikinini long painim ol rot bilong stori wantaim ol narapela long tok i tru bilong Baibel. (Rom 10:10) Tingim olsem pasin bilong skulim narapela long tok bilong Baibel i wankain long pasin bilong lain long pilaim wanpela musik instramen. Pastaim, man i lain long pilaim musik, em bai pilaim ol simpol melodi o song. Tasol isi isi bihain long sampela haptaim i lus, nau em inap pilaim gut musik. Olsem tasol, pastaim wanpela yangpela Kristen inap yusim ol simpol wei bilong autim tok long ol narapela. Olsem, em inap askim wanpela wanskul olsem: “Yu save olsem ol ensinia i save bihainim disain bilong ol samting i gat laip long wokim ol nupela samting? Mi laik soim yu wanpela naispela vidio.” Bihain long em i soim wanpela vidio bilong siris Yu Ting Wanpela i Bin Wokim?, em i ken tok: “Sapos wanpela saientis i kisim biknem bikos em i bihainim disain bilong ol samting i gat laip long wokim wanpela nupela samting, orait husat i mas kisim biknem long wokim ol samting i gat laip?” Kain ol simpol tok olsem inap kirapim tingting bilong wanskul na em bai i gat laik long kisim sampela save moa.

WOK YET LONG HELPIM PIKININI LONG STRONGIM BILIP BILONG EM

18. Hau ol papamama i ken wok yet long helpim ol pikinini long strongim bilip bilong ol long God?

¹⁸ Yumi stap namel long ol manmeri em ol i no bilip long Jehova. (2 Pita 3:3) Olsem na ol papamama, taim yupela i stadi long Baibel wantaim ol pikinini, kirapim ol long painim ol topik we bai helpim ol long rispektim tru Tok Bilong God na lo bilong Baibel long stretpela pasin. Helpim em long wokim gut tingting na strongim bilip bilong em long rot bilong stori gut wantaim em long kriesen bilong Jehova we i nambawan tru. Na helpim em long kliagut long ol narakain tok profet bilong Baibel em ol i kamap tru pinis. Na bikpela samting moa, beten wantaim em, na tu, beten askim Jehova long helpim em. Taim yu mekim olsem, yu ken save tru olsem Jehova bai givim gutpela pe long yu long wok yu mekim bilong helpim pikinini bilong yu long strongim bilip bilong em.—2 Sto. 15:7.