Rot Em Woa na Pait Bai Pinis

GOD BAI PINISIM OL GAVMAN BILONG OL MAN

God bai pinisim ol gavman bilong ol man long rot wanpela pait em Baibel i kolim, Armagedon.a (Revelesen 16:16) Long dispela taim, “ol king bilong olgeta hap graun” bai bung wantaim bilong “pait long dispela bikpela de bilong God i Gat Olgeta Strong.” (Revelesen 16:14) Armagedon em woa bilong God long pinisim olgeta woa.

God bai pinisim ol gavman bilong ol man, na Kingdom, o gavman bilong em bai stap long heven na bosim graun, na dispela gavman i no inap bagarap. (Daniel 2:44) God i makim Pikinini Man bilong em, Jisas Krais, bilong stap King long dispela Kingdom. (Aisaia 9:​6, 7; Matyu 28:18) Dispela gavman em Kingdomb we Jisas i bin skulim ol disaipel long beten long en i mas i kam. (Matyu 6:​9, 10) Olgeta man bai stap wanbel aninit long wanpela gavman tasol bilong graun olgeta em Jisas i King bilong en.

Jisas i no olsem ol bikman bilong graun, em bai no inap yusim namba bilong em long inapim ol laik bilong em yet, nogat. Em bai mekim pasin i fea na stretpela pasin, olsem na i no gat wanpela man bai wari olsem Jisas i no tingim em bikos long skin kala, kantri, o bekgraun bilong em, nogat. (Aisaia 11:​3, 4) Na ol manmeri bai no gat wok long pait long raits bilong ol. Bilong wanem? Bikos Jisas bai lukautim olgeta wan wan man long ol samting ol nidim. “Em bai kisim bek ol rabisman i singaut long kisim helpim, na em bai helpim tu ol man i no gat nem na ol man i no gat wanpela bilong helpim ol. . . . Em bai kisim bek ol long han bilong ol man i mekim nogut long ol na long ol man i pait na bagarapim ol.”—Buk Song 72:​12-14.

Kingdom Bilong God bai pinisim olgeta wepen bilong pait long graun olgeta. (Maika 4:3) Em bai rausim tu ol man nogut husat no laik stop long pait o bagarapim bel isi bilong ol narapela. (Buk Song 37:​9, 10) Olgeta man, meri, na ol pikinini bai pilim seif long wanem wanem hap ol i raun long en long dispela graun.—Esekiel 34:28.

Ol manmeri bai enjoim gutpela sindaun taim gavman bilong God i bosim graun. Dispela gavman bai pinisim ol hevi we i as na ol man i save pait, olsem stap rabis, hangre, na no gat haus. Olgeta man bai gat planti gutpela kaikai na gutpela ples bilong stap long en.—Buk Song 72:16; Aisaia 65:​21-23.

Taim Kingdom Bilong God i bosim graun, em bai rausim ol samting nogut em ol woa i kamapim. Em bai oraitim bodi bilong ol man i kisim bagarap long ol woa, na tu, tingting, pen na bel hevi ol man i karim bikos long ol samting nogut i kamap long ol woa. Na tu, ol man husat i dai pinis ol bai kirap bek na kisim laip long graun. (Aisaia 25:8; 26:19; 35:​5, 6) Ol famili bai bung wantaim gen, na ol man i no inap tingim moa ol memori nogut bilong woa bikos ol “samting bilong bipo ol i pinis olgeta.”—Revelesen 21:4.

GOD BAI PINISIM SIN

Kingdom Bilong God bai bungim olgeta man long lotuim dispela wanpela God tru, Jehovac, em “God bilong pasin laikim na bel isi.” (2 Korin 13:11) Olgeta man bai lain long stap bel isi wantaim. (Aisaia 2:​3, 4; 11:9) Olgeta man i bihainim tok bilong God em bai tekewe ol long dispela kalabus bilong sin na ol i kamap fri.—Rom 8:​20, 21.

GOD BAI PINISIM SATAN NA OL SPIRIT NOGUT

Kingdom Bilong God bai bagarapim ol man husat i stiaim tingting bilong ol man long kirapim ol woa na pait, em Satan na ol spirit nogut bilong em. (Revelesen 20:​1-3, 10) Taim ol i no stap moa bilong givim ol tingting nogut long ol man, “bel isi bai i pulap long olgeta hap.”—Buk Song 72:7.

Yu ken bilip tru olsem tok promis bilong God long pinisim ol woa na pait bai kamap tru. Em i gat bikpela strong na bikpela laik long pinisim tru ol woa.

• God i gat savetingting na bikpela strong long pinisim ol woa na pait. (Jop 9:4) Taim em i laik mekim wanpela samting, i no gat wanpela samting inap pasim em.—Jop 42:2.

• God i nolaik tru long lukim ol man i karim pen na hevi. (Aisaia 63:9) Na tu, em i “heitim tru ol man i laikim pasin bilong pait na bagarapim man.”—Buk Song 11:5.

• Oltaim God i save truim tok bilong em; em i no inap giaman.—Aisaia 55:​10, 11; Taitus 1:2.