Risen Woa na Pait i Stap Yet

SIN

God i wokim namba wan papamama bilong yumi, Adam na Iv, olsem em yet. (Stat 1:27) Dispela i makim olsem ol inap kamapim ol gutpela pasin bilong God, olsem bel isi na pasin laikim. (1 Korin 14:33; 1 Jon 4:8) Tasol Adam na Iv i sakim tok bilong God na ol i mekim sin. Long dispela rot, yumi olgeta i kisim sin na dai. (Rom 5:12) Sin yumi kisim long ol, planti taim i stiaim yumi long pait na mekim ol samting nogut.—Stat 6:5; Mak 7:​21, 22.

GAVMAN BILONG OL MAN

God i no wokim yumi bilong bosim yumi yet. Baibel i tok: “Man i no gat rait long stiaim wokabaut bilong em yet.” (Jeremaia 10:23) Long dispela as, ol gavman bilong ol man i no inap pinisim ol woa na pait.

SATAN NA OL SPIRIT NOGUT

Baibel i kamapim olsem “dispela graun olgeta i stap long han bilong Satan.” (1 Jon 5:19) Satan, dispela Devil, em man bilong kilim man i dai. (Jon 8:44) Em wantaim ol narapela spirit nogut—em yumi no lukim ol—i stiaim ol man long kirapim ol woa, pait na bagarapim ol man.—Revelesen 12:​9, 12.