Han Bilong Jehova i No Save Sot

1. Hau Moses i soim olsem em i trastim Jehova taim em i lidim lain Israel i kam ausait long Isip?

BUK HIBRU i stori long planti bilipman na wanpela bilong ol em Moses, em i bin gat strongpela bilip. (Hib. 3:​2-5; 11:​23-25) Em i soim olsem em i gat strongpela bilip taim em i lidim lain Israel i kam ausait long Isip. Em i no larim pasin bilong pret long Fero na lain ami bilong em i pasim em long mekim asainmen bilong em, nogat. Em i trastim Jehova na em i lidim lain Israel i go brukim Solwara Retsi na bihain em i lidim ol i go long ples drai nating. (Hib. 11:​27-29) Planti insait long lain Israel i lusim pasin bilong bilip long strong bilong Jehova long lukautim ol, tasol Moses i wok yet long trastim God bilong em. Pasin bilong Moses long bilip i no lus nating bikos God i wokim mirakel na em i givim kaikai na wara bilong lukautim lain bilong em taim ol i stap long ples drai nating.a—Kis. 15:​22-25; Sng. 78:​23-25.

2. Wai na God i askim Moses olsem: “Yu ting han bilong Jehova i sot, a”? (Namba 11:​21-23)

² Moses i gat strongpela bilip, tasol wanpela yia samting bihain long Jehova i wokim mirakel na kisim bek lain Israel long han bilong ol Isip, Moses i gat tupela tingting olsem Jehova bai givim mit long lain bilong em, o nogat. Long tingting bilong Moses, em i ting olsem Jehova bai no inap long givim inap mit bilong fidim planti milion man na meri na ol pikinini em ol i wokim kem long ples drai nating. Olsem na Jehova i askim Moses olsem: “Yu ting han bilong Jehova i sot, a?” (Ritim Namba 11:​21-23.) Long hia, dispela tok “han bilong Jehova” i makim holi spirit bilong God, o strong bilong em long mekim samting. I olsem Jehova i askim Moses olsem, ‘Yu ting tru tru mi no inap mekim samting em mi tok mi bai mekim, a?’

3. Bilong wanem stori bilong Moses na lain Israel i bikpela samting long yumi?

³ Olsem wanem? Yu save tingting planti olsem tru tru Jehova bai lukautim yu na famili bilong yu long ol samting bilong skin em yupela i nidim? Maski yu gat kain tingting olsem o nogat, yumi ken skelim stori bilong Moses na lain Israel, em ol i no bilip long strong bilong God long lukautim ol long ol samting ol i nidim. Ol stiatok bilong Baibel em yumi bai stori long en bai helpim yumi long strongim pasin bilong yumi long bilip tru olsem han bilong Jehova i no save sot.

KISIM SKUL LONG MOSES NA LAIN ISRAEL

4. Ating wanem samting i kirapim planti long lain Israel long holim tupela tingting olsem Jehova i no inap lukautim ol?

⁴ Tingim samting i kamap. Lain Israel na “planti kain kain lain manmeri” em ol i no bilong Israel, ol i stap long ples drai nating inap sampela taim namel long haptaim we ol i lusim Isip na ol i laik go long Graun Bilong Promis. (Kis. 12:38; Lo 8:15) Ol dispela manmeri em ol i no bilong Israel, ol i kirap long komplein long Moses na planti long lain Israel tu i mekim olsem. (Nam. 11:​4-6) Ol i laikim tumas ol kaikai em ol i bin kisim taim ol i stap long Isip. Ol i putim bikpela presa long Moses na dispela i mekim na em i ting olsem em yet i mas painim kaikai bilong givim long ol.—Nam. 11:​13, 14.

5-6. Planti long lain Israel i bihainim tingting na pasin bilong ol man bilong ol arapela kantri, na dispela i givim wanem skul long yumi?

⁵ Ol manmeri bilong ol arapela kantri i no amamas long ol samting Jehova i givim ol, na sampela manmeri bilong lain Israel i bihainim tingting na pasin bilong ol. Yumi tu inap bihainim pasin bilong ol narapela em ol i no gat pasin bilong tok tenkyu na yumi komplein long ol samting Jehova i givim long yumi. Dispela samting inap kamap sapos yumi tingim bek ol samting yumi bin gat long pastaim o yumi jeles long ol narapela long ol samting ol i gat. Tasol yumi bai amamas moa sapos yumi kisim pasin bilong amamas long ol samting yumi gat pinis, maski yumi gat wanem kain sindaun.

⁶ I gutpela ol Israel i tingim olsem God i bin tokim ol olsem taim ol i kamap long nupela ples ol bai stap long en, ol bai kisim ol samting ol i nidim, olsem haus na kaikai samting. Truim bilong dispela tok promis bai kamap taim ol i stap long Graun Bilong Promis, na i no long taim ol i raun long ples drai nating. Olsem tasol, yumi no ken putim tingting long ol samting em yumi no gat long nau, i gutpela yumi tingim tingim ol samting em Jehova i tok promis long givim long yumi long nupela taim. Na tu, yumi ken tingim tingim long bel ol skripsa we inap helpim yumi long strongim pasin bilong yumi long trastim Jehova.

7. Wai na yumi ken bilip tru olsem han bilong Jehova i no save sot?

⁷ Yu inap tingting olsem wai na God i askim Moses olsem: “Yu ting han bilong Jehova i sot, a?” Ating Jehova i laik helpim Moses long luksave olsem Em i gat olgeta strong na em inap yusim strong bilong em long helpim ol man i stap long olgeta hap. God inap givim planti mit long lain Israel, maski ol i stap long ples drai nating we i stap longwe tru. “Long bikpela strong bilong em,” God i soim olsem em inap helpim lain bilong em maski ol i stap long wanem wanem hap. (Sng. 136:​11, 12) So taim yumi karim ol hevi, oltaim yumi mas bilip tru olsem han bilong Jehova i no inap sot long helpim yumi.—Sng. 138:​6, 7.

8. Hau yumi ken abrusim pasin bilong mekim wankain rong em planti long ples drai nating i bin mekim? (Lukim tu piksa.)

⁸ I no longtaim na Jehova i givim planti mit long ol manmeri olsem em i bin tok promis long mekim. Tasol lain Israel i no tok tenkyu long God long dispela mirakel em i wokim. Planti bilong ol i gat pasin gridi. Inap wan na hap de, ol i wok long bungim planti pisin kweil. Jehova i belhat nogut tru long ol manmeri em ol “i bin komplein long kisim kaikai ol i laikim tumas,” na em i kilim ol i dai. (Nam. 11:​31-34) Yumi inap kisim skul long pasin bilong ol. Yumi mas was gut nogut yumi tu i kisim pasin gridi. Maski yumi gat planti mani kago o nogat, yumi mas putim tingting olgeta long bungim “ol gutpela gutpela samting . . . long heven” long rot bilong strongim pasin pren bilong yumi wantaim Jehova na Jisas. (Mat. 6:​19, 20; Luk 16:9) Taim yumi mekim olsem, yumi ken bilip tru olsem Jehova bai givim yumi ol samting yumi nidim.

9. Yumi ken bilip tru long wanem samting?

⁹ Oltaim Jehova i redi long helpim lain bilong em long nau. Tasol dispela i no makim olsem yumi bai no inap lusim ol samting yumi gat olsem klos na haus samting, o yumi bai no inap hangre, nogat.b Ol dispela hevi inap kamap, tasol oltaim Jehova i stap redi long helpim yumi. Em bai sambai long yumi long olgeta kain hevi yumi karim. Hau yumi ken soim olsem yumi bilip tru olsem Jehova bai givim yumi ol samting yumi nidim? Yumi ken stori long tupela samting: (1) taim yumi bungim hevi bilong mani na (2) taim yumi plenim hau yumi bai lukautim yumi yet long bihain.

TAIM YUMI BUNGIM HEVI BILONG MANI

10. Wanem ol samting inap mekim na yumi bungim hevi bilong mani?

¹⁰ Haptaim bilong nau bai klostu tru pinis, so yumi save olsem hevi bilong mani bai i go bikpela moa. Ol gavman i wok long senis, ol woa, na ol netrol disasta o ol nupela pendemik inap kamap na dispela i mekim na yumi spendim moa mani em yumi no bin tingting long spendim, o yumi lusim wok mani bilong yumi, ol samting yumi gat, o haus bilong yumi. Ating yumi mas painim nupela wok mani long ples yumi stap long en, o ating yumi tingting long kisim famili bilong yumi na i go sindaun long narapela hap na bai yumi ken lukautim ol long ol samting ol i nidim. Wanem samting i ken helpim yumi long mekim ol disisen i soim olsem yumi trastim Jehova olsem han bilong em i no sot long helpim yumi?

11. Wanem samting i ken helpim yu long karim ol hevi bilong mani? (Luk 12:​29-31)

¹¹ Em i bikpela samting long yu mas tokim Jehova long ol wari bilong yu, dispela em i gutpela rot bilong kisim helpim. (Prov. 16:3) Askim em long givim yu savetingting na bai yu inap mekim ol gutpela disisen, na tu, askim em long givim yu bel isi na bai yu no “tingting planti” long hevi i painim yu. (Ritim Luk 12:​29-31.) Beten oltaim na askim em long helpim yu long kisim pasin bilong amamas long ol samting yu gat pinis, em ol samting yu nidim tru. (1 Tim. 6:​7, 8) Mekim wok painimaut long ol pablikesen bilong yumi na bai yu save long samting yu inap mekim taim yu karim hevi bilong mani. Planti i bin kisim helpim long ol atikol na vidio samting i stap long jw.org we i stori long hau yu ken karim hevi bilong mani.

12. Wanem ol askim i ken helpim wanpela Kristen long mekim ol gutpela disisen bilong helpim famili bilong em?

¹² Rot i op long sampela i kisim wok mani long narapela hap na lusim famili bilong ol na i go stap long dispela hap, tasol planti i bin mekim olsem na bihain ol i luksave olsem dispela em i no gutpela disisen. Paslain long yu kisim nupela wok mani, i gutpela long skelim hamas mani yu bai kisim, na tu, skelim sapos disisen yu mekim bai helpim yu na famili bilong yu long pas gut wantaim Jehova, o nogat. (Luk 14:28) Askim yu yet olsem: ‘Marit bilong mi bai stap olsem wanem sapos mi lusim poroman marit bilong mi na i go stap long narapela hap? Mi bai go long olgeta miting, go autim tok, na bung wantaim ol bratasista?’ Sapos yu gat ol pikinini, orait yu mas askim yu yet dispela bikpela askim olsem: ‘Sapos mi no stap wantaim ol pikinini bilong mi, hau bai mi mekim bikpela long ol “na trenim ol olsem Jehova i makim, na putim tingting bilong em long bel bilong ol?”’ (Efe. 6:4) Larim tingting bilong God i stiaim yu, na no ken larim tingting bilong ol wanfamili o ol pren em ol i no bihainim ol stiatok bilong Baibel i stiaim yu.c Tony i save stap long hap wes bilong Esia, na planti taim rot i op long em inap kisim wok mani long ol narapela kantri. Tasol bihain long em i beten na toktok wantaim meri bilong em long dispela samting, em i mekim disisen olsem em bai no inap kisim ol dispela wok, na em i tingting long hau famili bilong ol inap lusim pasin bilong tromoi planti mani long baim ol samting. Tony i tingim dispela samting i bin kamap, na em i tok: “Mi kisim blesing long helpim sampela manmeri long kisim save long Jehova, na ol pikinini bilong mipela i laikim tru tok i tru. Famili bilong mipela i luksave olsem sapos mipela i bihainim stiatok bilong Matyu 6:​33, Jehova bai lukautim mipela.”

PLENIM HAU LONG LUKAUTIM YUMI YET LONG BIHAIN

13. Yumi inap mekim wanem ol samting long nau na bai yumi gat inap mani taim yumi kamap lapun?

¹³ Taim yumi tingim laip bilong yumi bai olsem wanem long bihain taim yumi kamap lapun, dispela tu inap traim pasin bilong yumi long trastim Jehova. Baibel i kirapim yumi long givim bel long mekim wok long nau na bai yumi gat inap mani bilong lukautim yumi yet long bihain. (Prov. 6:​6-11) Sapos yu inap mekim olsem, em i gutpela tingting long seivim sampela mani long nau na bai yu inap yusim dispela mani long lukautim yu yet long bihain. Em tru olsem mani i save lukautim yumi. (Ekl. 7:12) Tasol yumi no ken putim pasin bilong bungim mani kago i stap nambawan samting long laip bilong yumi.

14. Wai na yumi mas skelim tok bilong Hibru 13:5 taim yumi plenim hau yumi bai lukautim yumi yet long bihain?

¹⁴ Tok piksa bilong Jisas i soim olsem em longlong pasin long wanpela man i seivim planti mani, tasol em i stap “rabis long ai bilong God.” (Luk 12:​16-21) Yumi no save long wanem samting bai kamap long tumora. (Prov. 23:​4, 5; Jems 4:​13-15) Olsem ol disaipel bilong Krais, i gat wanpela samting em yumi inap pilim hatwok long mekim. Jisas i tok yumi mas redi long “lusim ol samting” yumi gat long kamap ol disaipel bilong em. (Luk 14:33) Long taim bilong ol aposel, ol Kristen long Judia i redi long lusim ol samting ol i gat bilong mekim olsem. (Hib. 10:34) Long nau, planti bratasista i redi long lusim mani kago o wok mani bilong ol bikos ol i no laik sapotim wanpela lain politik. (Rev. 13:​16, 17) Wanem samting i helpim ol long mekim olsem? Ol i bilip tru long tok promis bilong Jehova olsem: “Mi no inap tru long lusim yu, na mi no inap givim baksait long yu.” (Ritim Hibru 13:5.) Yumi mekim ol samting bilong plenim hau yumi bai lukautim yumi yet long bihain, tasol sapos sampela samting i kamap em yumi no ting bai kamap, yumi bilip tru olsem Jehova bai lukautim yumi.

15. Ol papamama Kristen i mas holim wanem stretpela tingting long ol pikinini bilong ol? (Lukim tu piksa.)

¹⁵ Long sampela kalsa, ol marit i kamapim ol pikinini bikos ol i tingting olsem ol pikinini bai lukautim ol long sait bilong mani taim ol i kamap lapun. Ol i plenim pinis hau ol bai lukautim ol yet long bihain na ol pikinini i insait long dispela plen. Baibel i tok ol papamama i mas lukautim ol pikinini long ol samting ol i nidim. (2 Kor. 12:14) Em tru olsem ol papamama i mas kisim sampela helpim taim krismas bilong ol i go antap, na planti pikinini i amamas long lukautim ol papamama bilong ol long ol samting ol i nidim. (1 Tim. 5:4) Tasol ol papamama Kristen i luksave olsem ol inap kisim bikpela amamas moa long helpim ol pikinini long kamap ol wokman bilong Jehova, na i no long mekim bikpela long ol pikinini na tingting tasol long kisim helpim long ol long sait bilong mani, nogat.—3 Jon 4.

16. Hau ol papamama i ken redim ol pikinini long lukautim ol yet long sait bilong mani long bihain? (Efesus 4:28)

¹⁶ Long rot bilong eksampel bilong yu, skulim ol pikinini long trastim Jehova taim yu redim ol long lukautim ol yet long bihain. Stat long taim ol i liklik yet, skulim ol olsem gutpela samting i save kamap taim ol i wok hat na mekim gut ol wok. (Prov. 29:21; ritim Efesus 4:28.) Taim ol i wok long kamap bikpela, helpim ol long mekim gut long skul. Ol papamama Kristen i ken mekim ol wok painimaut na bihainim ol stiatok bilong Baibel long helpim ol pikinini long mekim ol gutpela disisen long wanem kain ediukesen ol bai kisim. Dispela bai redim ol pikinini bilong ol long lukautim ol yet long bihain na givim bel long wok autim tok.

17. Yumi ken bilip tru long wanem samting?

¹⁷ Ol gutpela wokman bilong Jehova i ken bilip tru olsem Em i gat strong na em i gat laik long lukautim ol long ol samting ol i nidim, olsem kaikai na haus samting. Pinis bilong haptaim bilong nau i wok long i kam klostu tru, so yumi mas save olsem ol samting bai kamap na i traim pasin bilong yumi long trastim Jehova. Maski wanem samting i kamap, yumi mas tingting strong long trastim Jehova olsem em bai yusim strong bilong em long lukautim yumi long ol samting bilong skin em yumi nidim. Yumi ken bilip tru olsem han bilong Jehova bai no inap sot na oltaim em bai helpim yumi, maski yumi stap long wanem wanem hap.