Yusim Gut Baibel Olsem Wanpela Mira

Disaipel Jems i tok Baibel i olsem wanpela mira we inap helpim yumi long luksave long yumi wanem kain man tru. (Jems 1:​22-25) Hau yumi ken yusim gut Baibel olsem wanpela mira?

Ritim gut. Sapos yumi lukim yumi yet long wanpela mira na rausim ai hariap, yumi no inap lukim sampela doti o pipia i stap long yumi. Wankain olsem, sapos yumi ritim Baibel hariap tasol, yumi no inap luksave long ol pasin em yumi mas stretim. Bilong mekim olsem, yumi mas ritim gut Baibel.

Luksave long ol samting yu inap stretim long yu yet na i no ol narapela. Taim yu holim mira long wanpela sait, yu inap lukim ol narapela na yu inap lukim sampela pipia o sampela samting i no stret long lukluk bilong ol. Wankain olsem, yumi inap yusim Baibel long luksave long ol popaia bilong ol narapela. Tasol dispela i no inap helpim yumi long stretim ol popaia bilong yumi yet.

Holim stretpela tingting. Taim yumi lukim mira na yumi lukluk tasol long ol doti o pipia i stap long yumi, yumi inap bel hevi. Tasol taim yumi ritim Tok Bilong God, yumi mas holim stretpela tingting, na yumi no laik ting olsem yumi mas kamap gutpela olgeta, long wanem, Jehova i no ekspektim yumi long kamap gutpela olgeta.—Jems 3:17.