Jehova i Ting Olsem Wanem Long Mi?
1. Olsem wanem Baibel i olsem wanpela mira?
1 Hamas taim yu save lukluk long mira? Planti bilong yumi i save mekim olsem long olgeta de, na dispela i helpim yumi long luksave long sampela samting long skin em yumi mas stretim. Baibel i olsem wanpela mira. Taim yumi ritim Tok Bilong God em i helpim yumi long skelim yumi wanem kain man tru, em dispela kain man Jehova i save lukim. (1 Sml. 16:7; Jems 1:22-24) Baibel inap “kamapim klia tingting na laik i stap long bel bilong man.” (Hib. 4:12) Olsem wanem pasin bilong ritim na tingim tingim long bel ol tok bilong Baibel long olgeta de inap helpim yumi long luksave long ol samting yumi mas stretim na bai wok autim tok bilong yumi i kamap gutpela moa?—Sng. 1:1-3.
2. Olsem wanem Baibel inap helpim yumi long skelim yumi yet?
2 Yusim Baibel Olsem Mira: Stori bilong ol gutpela wokman bilong Jehova long Baibel i skulim yumi long ol gutpela pasin em Jehova i save laikim. Olsem, Devit i save givim bel tru long litimapim nem bilong God. (1 Sml. 17:45, 46) Aisaia i bin strongim bel na redi long autim tok long hap we i gat planti pasin birua. (Ais. 6:8, 9) Jisas i laikim tru Papa bilong em long heven na dispela i kirapim em long tingim wok autim i olsem wok i save givim em nupela strong na amamas, na i no givim hevi long em. (Jon 4:34) Na ol Kristen long taim bilong ol aposel i save givim bel tru long autim tok, wet long Jehova i helpim ol, na ol i wok strong na i no givap. (Apo. 5:41, 42; 2 Kor. 4:1; 2 Tim. 4:17) Taim yumi tingim tingim ol kain eksampel olsem, dispela i helpim yumi long senisim pasin bilong yumi long autim tok na mekim i kamap gutpela moa.
3. Bilong wanem yumi mas kirap nau long senisim pasin bilong yumi?
3 Senisim Ol Pasin i No Stret: Sapos yumi lukluk long mira na yumi lukim wanpela samting long skin tasol yumi no stretim, dispela i no stret. Yumi ken askim Jehova long helpim yumi long skelim ol pasin bilong yumi na senisim ol pasin yumi mas stretim. (Sng. 139:23, 24; Luk 11:13) Taim i sot pinis na laip bilong yumi inap lus, olsem na yumi mas kirap nau long senisim ol pasin bilong yumi we i no stret.—1 Kor. 7:29; 1 Tim. 4:16.
4. Wanem samting i kamap long man husat i lukluk o stadi gut, long tok bilong God na i bihainim dispela tok?
4 Man i stap wanem kain man tru long ai bilong Jehova, dispela i bikpela samting long Jehova winim skin na lukluk bilong man. (1 Pita 3:3, 4) Wanem samting i kamap long man husat i lukluk, olsem stadi gut, long Tok Bilong God na i kirap bihainim dispela tok? Em “bai amamas . . . long wanem, em i no man bilong harim nating tok na bihain lusim tingting long en, nogat. Em i kamap man bilong mekim wok.” (Jems 1:25) Tru tumas, bai yumi amamas na wok strong long autim tok, long wanem, yumi “stap olsem mira i kamapim glori bilong Jehova.”—2 Kor. 3:18.