Holimpas Pasin Laikim Yu Gat “Taim Yu Bilip Nupela”
“Samting yu holim, em yu mas holim strong.”—KTH 3:11.
1, 2. Yu bin pilim olsem wanem taim yu kirap bilip olsem ol samting yu lainim long Jehova em i tru?
OLSEM WANEM? Yu tingim yet namba wan taim yu bin kisim save long ol gutpela samting Jehova i bin tok promis long givim long ol manmeri i bihainim tok bilong em? Sapos bipo yu insait long narapela lotu, yu bin pilim olsem wanem taim wanpela i helpim yu long kisim save long ol tok bilong Baibel long ol samting God i tingting pinis long mekim o taim yu klia long ol bilip bilong Baibel em bipo yu hatwok long kliagut long ol? Ating yu luksave olsem ol i no bin skulim yu long tok i tru bilong God. Tasol nau yu amamas tru long yu bin kisim save long tok i tru! Sapos papamama Kristen i mekim bikpela long yu, yu tingim yet yu pilim olsem wanem taim yu bilip tru olsem ol samting yu lainim long Jehova em i tru, na yu pasim tok long bel olsem yu laik bihainim ol dispela tok?—Ro. 12:2.
2 Planti brata long kongrigesen bai stori long yu olsem ol i bin amamas tru, ol i pilim olsem ol i stap klostu long Jehova, na ol i tenkyu long Jehova i bin pulim ol i go long em. (Jo. 6:44) Amamas bilong ol i kirapim ol long insait long ol wok Kristen, na ol i laik tokim olgeta man long ol gutpela samting ol i kisim save long en. Olsem wanem? Dispela samting i painim yu tu?
3. Wanem samting i kamap long kongrigesen long Efesus taim Jisas i salim wanpela tok long ol?
3 Taim Jisas i givim tok long kongrigesen Kristen long Efesus bilong bipo, em i toktok long pasin laikim ol i gat long ‘taim ol i bilip nupela.’ Ol Efesus i gat planti gutpela pasin, tasol pasin bilong laikim tru Jehova ol i gat taim ol i bilip nupela, em i go liklik. Olsem na Jisas i tokim ol: “Mi save pinis long olgeta pasin yu save mekim, na long hatwok bilong yu. Na mi save, yu save sanap strong, na yu no laikim tru ol man nogut. Ol dispela man i bin tokim yu olsem, ‘Mipela i aposel tu.’ Tasol nogat, ol i no aposel. Na yu skelim pinis tok bilong ol, na yu painimaut olsem ol i man bilong giaman tasol. Ol man i lukim yu i holim nem bilong mi, na ol i save mekim nogut long yu. Tasol mi save olsem, yu save sanap strong na karim dispela hevi, na yu no bin les long dispela hatwok. ‘Tasol mi gat tok long yu olsem, taim yu bilip nupela, yu bin laikim mi tru, tasol nau nogat.’ ”—KTH 2:2-4.
4. Bilong wanem tok Jisas i bin givim long ol Efesus i stret long nau?
4 Tok Jisas i bin givim long ol Efesus na long sampela narapela kongrigesen em Buk Kamapim Tok Hait i stori long ol, dispela i stret long pasin i bin stap inap sampela haptaim bihain long 1914 namel long ol Kristen God i bin makim. (KTH 1:10) Tasol long nau tu sampela Kristen inap lusim pasin bilong laikim tru Jehova na tok i tru em ol i gat ‘taim ol i bilip nupela.’ Yumi tingim dispela, na nau yumi laik skelim olsem wanem long rot bilong tingim gen na skelim long bel ol samting i painim yumi, yumi inap holimpas na strongim gen pasin bilong laikim na givim bel long God na tok i tru, na em bai go bikpela winim bilong taim yumi bilip nupela.
Wanem Samting i Kirapim Yu Long Bilip Long Tok i Tru?
5, 6. (a) Olgeta Kristen i mas bilip long wanem samting? (b) Wanem samting i kirapim yu long bilip olsem ol Witnes Bilong Jehova i skulim ol man long tok i tru? (c) Wanem samting inap helpim man long strongim gen pasin laikim em i gat long taim em i bilip nupela?
5 Olgeta manmeri i dediket long Jehova, pastaim ol i mas “save tru” long “ol pasin i gutpela na long ol pasin God i laikim tumas na long ol pasin i inap tru na i stret olgeta.” (Ro. 12:1, 2) Wanpela rot bilong mekim olsem, em ol i mas lain long tok i tru bilong Baibel. Samting i kirapim wanpela man long bilip olsem ol Witnes Bilong Jehova i skulim ol man long tok i tru, ating dispela i narapela long ol samting i bin kirapim narapela man long bilip. Sampela i tingim yet olsem tingting bilong ol i bin senis tru taim ol i ritim nem bilong God long Baibel o ol i bin save long ol man i dai pinis ol i stap olsem wanem. (Sng. 83:18, NW; Sav. 9:4, 5, 10) Samting i kirapim tru tingting bilong sampela em pasin laikim i stap namel long lain bilong Jehova. (Jo. 13:34, 35) Sampela narapela i tingim mining bilong tok olsem yumi no ken insait long ol samting bilong dispela graun. Ol i tingim olsem ol Kristen tru i no inap insait long politik na ol woa.—Ais. 2:4; Jo. 6:15; 17:14-16.
6 Ol dispela tingting na sampela narapela tingting i bin kirapim planti manmeri long laikim tru God. Gutpela sapos yu lusim sampela hap taim bilong tingim gen wanem samting i bin kirapim yu long bilip long tok i tru. Yumi olgeta wan wan i gat narapela narapela sindaun na pasin, olsem na as tru na yu laikim tru Jehova na bilip long ol tok promis bilong em i narapela long ol narapela man. Na ating ol dispela as i bikpela samting long yu long nau olsem ol i bikpela samting long yu taim yu bin lainim ol. Tok i tru i no senis. Olsem na pasin bilong tingim gen ol dispela tingting na ol samting yu bin pilim inap strongim gen pasin bilong laikim tok i tru yu gat taim yu bilip nupela.—Ritim Song 119:151, 152; 143:5.
Strongim Pasin Laikim
7. Bilong wanem yumi mas strongim pasin bilong laikim tok i tru yumi gat taim yumi bilip nupela? Yumi inap mekim olsem wanem?
7 Ating planti samting i senis long laip bilong yu kirap long taim yu dediket long Jehova. Pasin bilong laikim tok i tru taim yu bilip nupela em i bikpela samting, tasol insait long ol yia i kam na i go, pasin laikim bilong yu i mas i go bikpela moa bilong winim ol nupela hevi i traim bilip bilong yu. Tasol Jehova i helpim yu. (1 Ko. 10:13) Olsem na ol samting i painim yu insait long ol dispela yia i go pinis i bikpela samting long yu. Ol dispela samting i bin helpim yu long strongim pasin laikim yu gat taim yu bilip nupela, na ol i narapela rot bilong helpim yu long save tru long ol pasin i gutpela na long ol pasin God i laikim tumas.—Jos. 23:14; Sng. 34:8.
8. Olsem wanem Jehova i kamapim em yet long Moses? Olsem wanem ol Israel i kisim save moa long God?
8 Olsem: Tingim samting i painim ol Israel taim Jehova i bin tokim ol olsem em bai kisim bek ol long kalabus long Isip. God i kamapim em yet long Moses, olsem: “Mi bai kamap wanem wanem kain mi laikim.” (Kis. 3:7, 8, 13, 14; NW) Dispela i makim olsem Jehova i tokim ol olsem em bai kamap wanem wanem samting em i mas kamap bilong helpim lain bilong em long kamap fri. Long ol samting i kamap bihain, ol Israel i lukim Jehova i kamapim kain kain pasin bilong em—em i kamap olsem God i Gat Olgeta Strong, Jas, Lida, Man Bilong Kisim Bek ol, Man Bilong Pait, Man Bilong Lukautim ol.—Kis. 12:12; 13:21; 14:24-31; 16:4; Neh. 9:9-15.
9, 10. Wanem samting inap helpim yumi long save long God? Bilong wanem i gutpela long tingim ol dispela samting?
9 I stap bilong yu i narapela kain long ol Israel bilong bipo. Tasol maski i olsem, ating ol samting i bin painim yu i mekim na yu bilip tru olsem God i tingim yu, na dispela i strongim bilip bilong yu. Ating long sampela kain rot Jehova i kamap Man Bilong Lukautim yu, o Man Bilong Mekim Gut Bel bilong yu, o Tisa. (Ritim Aisaia 30:20b, 21.) O yu luksave olsem Jehova i harim tru beten bilong yu. Ating wanpela hevi i bin painim yu, na long dispela taim wanpela wanbilip Kristen i helpim yu. O taim yu bin mekim stadi bilong yu yet, yu lukim wanpela skripsa i stret long hevi bilong yu.
10 Sapos yu stori long ol dispela samting long sampela narapela, ating sampela bai ting dispela i no bikpela samting, long wanem, ol dispela samting i no olsem wanpela mirakel. Tasol yu tingim ol dispela samting olsem bikpela samting. Tru tumas, Jehova i kamap man inap stret long helpim yu. Tingim ol yia yu bin stap long tok i tru. Yu inap tingim sampela taim we yu pilim olsem Jehova i bin lukautim yu? Sapos olsem, pasin bilong tingim ol dispela samting na ol i kirapim yu long pilim olsem wanem, dispela i ken kirapim bel bilong yu long laikim tru Jehova olsem bipo. Yu mas tenkyu long ol dispela samting. Gutpela yu tingim tingim ol dispela samting long bel. Ol dispela samting i kamapim klia olsem Jehova i save tingim yu, na i no gat wanpela i ken pasim yu long bilip olsem.
Skelim Yu Yet
11, 12. Sapos pasin bilong wanpela Kristen long laikim tru tok i tru i go liklik, wanem samting inap i stap olsem as bilong dispela? Jisas i givim wanem tok?
11 Sapos yu no laikim God na tok i tru olsem yu bin laikim long bipo, dispela i no olsem long wanem God i senis, nogat. Jehova i no save senis. (Mal. 3:6; Jem. 1:17) Em i bin tingim yu bipo, na em i save tingim yu long nau tu. Olsem na sapos wanpela samting i senis long pasin bilong yu long pas gut wantaim Jehova, em wanem samting? Ating yu pilim olsem yu gat planti hevi moa, na yu tingim moa ol hevi bilong laip? Bipo yu beten strong moa long Jehova, na yu stadi moa, na planti taim moa yu tingim tingim long bel ol dispela samting. Olsem wanem? Bipo yu givim bel tru long autim tok na go oltaim long ol miting bilong kongrigesen, na nau nogat?—2 Ko. 13:5.
12 Ating yu no lukim wanpela bilong ol dispela senis i kamap long yu, tasol sapos yu lukim, orait wanem samting i mekim na dispela i kamap? Ating pasin bilong lukautim famili na helt bilong yu, o kain samting olsem i mekim na yu no tingting strong olsem de bilong Jehova i kam klostu? Jisas i tokim ol aposel bilong em: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus, long wanem, dispela de bai i kamap long olgeta manmeri i stap long olgeta hap bilong graun. Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.”—Lu. 21:34-36.
13. Jems i tok Baibel i olsem wanem samting?
13 Jems, man bilong raitim Baibel, em i kirapim ol wanbilip long skelim ol yet wantaim Baibel. Jems i tok: “Tok yupela i kisim, em yupela i mas bihainim. Yupela i no ken harim nating tasol. Nogat. Sapos yupela i harim nating, orait yupela i giamanim yupela yet. Sapos wanpela man i harim nating tok bilong God, na em i no bihainim, em i olsem man i lukim pes bilong en long glas. Em i lukim pes bilong em yet, tasol em i go na kwiktaim em i lusim tingting long em i gat wanem kain pes. Tasol dispela lo i save brukim strong bilong sin na mekim yumi i stap fri, em i stret olgeta. Na sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru. Tasol em i no ken harim nating na lusim tingting hariap.”—Jem. 1:22-25.
14, 15. (a) Olsem wanem Baibel inap helpim yu long kamap strongpela Kristen moa? (b) Yu inap tingim tingim wanem ol askim?
14 Man inap mekim wok long wanpela glas bilong lukim olsem gras o klos bilong em i stret. Olsem: Sapos wanpela man i lukim olsem nektai bilong em i no stap stret, em inap stretim. Sapos wanpela meri i lukim olsem em i no komim gut gras, em inap stretim. Na olsem tasol, Baibel i helpim yumi long skelim yumi yet. Taim yumi skelim yumi yet wantaim ol pasin Baibel i tok yumi mas bihainim, orait nau yumi mekim wok long Baibel olsem wanpela glas. Tasol i no gat as long lukluk long glas sapos yumi no mekim wanpela samting bilong stretim samting i no stret, a? Yumi bihainim savepasin sapos yumi mekim ol samting em ‘lo i stret olgeta’ i soim yumi long en, na yumi “bihainim tru” ol tok bilong en. Olsem na olgeta man i lukim olsem ol i lusim pasin bilong laikim tru Jehova na tok i tru ol i gat taim ol i bilip nupela, ol i mas askim ol yet olsem: ‘Mi gat wanem ol hevi long laip bilong mi, na mi save mekim wanem bilong karim ol? Bipo mi mekim wanem taim hevi i kamap? Sampela samting i senis?’ Sapos pasin bilong skelim yu yet i kamapim olsem sampela samting i no stret, yu mas tingim dispela. Sapos yu mas stretim sampela samting, yu mas mekim hariap.—Hi. 12:12, 13.
15 Taim yu tingim tingim ol dispela samting long bel, em inap helpim yu long putim sampela mak i stret long skel bilong yu bilong kamap strongpela Kristen moa. Holi spirit i kirapim aposel Pol long givim gutpela tok long wanwok bilong em Timoti long mekim wok autim tok bilong em i kamap gutpela moa. Pol i tokim Timoti, husat i yangpela long em, olsem: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” I gutpela long yumi tu i tingim tingim tok bilong Baibel bilong save olsem wanem yumi ken mekim gut moa wok bilong yumi.—1 Ti. 4:15.
16. Yu mas tingim wanem samting taim yu skelim yu yet wantaim Baibel?
16 Taim yu skelim yu yet bai yu luksave long sampela pasin kranki bilong yu. Dispela inap mekim yu bel hevi, tasol no ken larim dispela i daunim yu. Tingim, as na yu skelim yu yet em bilong kisim save long yu mas stretim wanem pasin. Satan i laik bai ol Kristen i pilim olsem ol i samting nating, long wanem, ol i sinman. Wanpela man bilong bipo i bin tok God i nolaik tru long ol wok ol man i mekim bilong lotuim em. (Jop 15:15, 16; 22:3) Dispela tok em giaman na Jisas i tok i no stret liklik; God i save tingim yumi olgeta wan wan olsem yumi gutpela samting. (Ritim Matyu 10:29-31.) Taim yu save olsem yu gat sampela pasin kranki, long pasin daun yu mas wok strong long stretim ol wantaim helpim bilong Jehova. (2 Ko. 12:7-10) Sapos sik na lapun i pasim yu long mekim ol samting yu laik mekim, putim ol mak i stret long yu, tasol no ken givap na larim pasin laikim bilong yu i go liklik.
Planti Samting Bilong Tenkyu Long En
17, 18. Wanem gutpela samting i kamap sapos yu mekim pasin laikim yu gat taim yu bilip nupela i kamap strong moa?
17 Ol gutpela samting tru i kamap long pasin bilong wok yet long strongim pasin laikim yu gat taim yu bilip nupela. Yu ken kisim sampela save moa long God na pilim moa yet gutpela pasin bilong em long stiaim yu. (Ritim Sindaun 2:1-9; 3:5, 6.) Man bilong raitim song i tok: “Mi bihainim lo bilong yu, olsem na yu save mekim sindaun bilong mi i kamap gutpela tru. Tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save.” Na tu, “ol man i wokabaut stret na i no gat asua, na i save bihainim lo bilong Bikpela, ol i ken amamas.”—Sng. 19:7, 11; 119:1.
18 Ating bai yu wanbel long tok olsem yu gat planti gutpela samting yu inap tenkyu long en. Yu save long as na ol samting nogut i save kamap long dispela graun. Yu kisim helpim long ol gutpela samting bilong spirit em God i save givim lain bilong em long nau. Ating yu tenkyu tu long Jehova i bringim yu i kam long kongrigesen bilong em i stap long olgeta hap na em i larim yu i stap wanpela Witnes bilong em. Yu mas tenkyu tru long ol gutpela samting yu bin kisim! Sapos yu mekim wanpela lista long ol dispela samting, ating em bai longpela lista stret. Sapos yu mekim dispela samting sampela taim, dispela bai helpim yu long bihainim tok olsem: “Samting yu holim, em yu mas holim strong.”—KTH 3:11.
19. Yu mas tingim tingim long bel pasin bilong yu long pas gut wantaim God, na wanem bikpela samting moa inap helpim yu long stap strong long ol samting bilong spirit?
19 Pasin bilong tingim long bel olsem wanem bilip bilong yu i bin wok long kamap strong insait long ol yia i kam na i go pinis, dispela em wanpela rot bilong helpim yu long holimpas ol gutpela samting yu gat. Planti taim nius Wastaua i bin stori long sampela narapela bikpela samting em inap helpim yu long stap strong long ol samting bilong spirit. Sampela samting olsem em prea, pasin bilong go long ol miting Kristen na bekim tok, na givim bel long mekim wok autim tok. Ol dispela samting inap helpim yu long strongim pasin laikim yu gat taim yu bilip nupela na mekim dispela pasin i go bikpela moa.—Ef. 5:10; 1 Pi. 3:15; Ju. 20, 21.
Bai Yu Bekim Olsem Wanem?
• Olsem wanem ol samting i bin kirapim yu long laikim tru Jehova, em inap strongim yu long nau?
• Pasin bilong tingim ol samting i bin painim yu long ol yia i go pinis em inap strongim yu long wanem samting?
• Bilong wanem yu mas skelim gut pasin bilong yu long laikim tru God?
[Piksa long pes 23]
Wanem samting bilong tok i tru i bin kirapim yu long bilip?
[Piksa long pes 25]
Yu lukim sampela samting long yu em yu mas stretim?