Yu Ting Jisas i Toktok Long Helpaia?

SAMPELA man husat i bilip long helpaia ol i save kamapim tok bilong Jisas long Mak 9:​48 (o Mak sapta 9 ves 44, 46). Long dispela ves, Jisas i stori long ol liklik snek i no inap pinis na long paia i no inap pinis. Sapos wanpela i askim yu long mining bilong dispela tok, bai yu tok wanem?

Long sampela Baibel, Mak sapta 9 ves 44, 46, na Mak sapta 9 ves 48 i gat wankain tok long en, olsem na ating man i mekim dispela askim em i ritim Mak sapta 9 ves 44, 46, o Mak sapta 9 ves 48.a Baibel New World Translation i tok: “Sapos ai bilong yu i mekim yu pundaun, kamautim na tromoi i go. Mobeta yu gat wanpela ai na yu go insait long kingdom bilong God. Nogut yu gat tupela ai na ol i tromoi yu i go long Gehena, we i gat ol liklik snek i no save dai na paia i no save pinis.”​​—Mk. 9:​47, 48.

Sampela man i tok dispela tok bilong Jisas i strongim dispela tingting olsem taim man nogut i dai pinis, spirit bilong en i save kisim pen i stap inap oltaim oltaim. Olsem: Wanpela Baibel long tok Spen, Baibel Sagrada Biblia bilong University of Navarre, i tok: “Bikpela bilong yumi i kolim [dispela tok] bilong makim bikpela pen tru ol man long hel i save kisim. Planti man i ting ‘liklik snek i no save dai’ i makim bikpela bel hevi i no gat pinis bilong en em ol man long hel i save pilim; na ‘paia i no save pinis’ i makim bikpela pen em skin i pilim.”

Tasol skelim tok bilong Jisas long Mak 9:48 wantaim laspela ves bilong sapta 66 bilong tok profet bilong Aisaia.b Em i klia tru olsem Jisas i tingim ol tok bilong dispela ves long Buk Aisaia. Long dispela ves, profet Aisaia i toktok long ol man i lusim “Jerusalem na i go long Ples Daun Bilong Hinom (Gehena), em hap bipo ol i save kilim ol pikinini olsem ofa (Jer. 7:​31) na bihain em i kamap ples bilong tromoi pipia.” (The Jerome Biblical Commentary) Aisaia 66:24 i no stori long ol man i karim bikpela pen i stap, nogat; em i stori long ol bodi bilong ol man i dai pinis. Samting em dispela ves i tok i no inap pinis, o dai, em ol liklik snek​—i no ol man i stap laip yet o spirit bilong ol. Orait, wanem mining bilong dispela tok bilong Jisas?

Wanpela buk bilong lotu Katolik (El evangelio de Marcos. Análisis lingüístico y comentario exegético, Volium 2) i stori long Mak 9:​48 olsem: “Dispela tok i kam long Aisaia (66:24). Long dispela ves, profet Aisaia i kolim 2-pela rot we bodi bilong daiman i save bagarap: long rot bilong larim bodi i sting, na long rot bilong paia i kukim . . . Dispela tupela samting wantaim, liklik snek na paia, i strongim dispela tingting bilong samting i bagarap na pinis olgeta. . . . Long dispela stori bilong Aisaia, dispela tupela samting i no gat pinis bilong en (“i no inap pinis”). Ol samting i no bagarap, em ol dispela liklik snek na paia​—i no ol man​—na dispela tupela samting i save bagarapim na pinisim tru olgeta samting i go stap long en. Olsem na dispela tok bilong Aisaia i no stori long man i karim pen oltaim oltaim, nogat. Em i stori long man i dai na i pinis olgeta na i no inap kirap bek. Olsem na paia em i piksa tasol na i makim man i dai na i pinis olgeta.”

Olgeta man husat i save olsem trupela God em i man bilong pasin laikim na stretpela pasin, ol inap save olsem dispela mining bilong tok bilong Jisas em i stret. Jisas i no tok ol man nogut bai kisim pen inap oltaim oltaim, nogat. Em i laik tok olsem ol bai pinis olgeta na i no gat rot long ol i kirap bek.

[Ol Futnot]