“Yupela i Mas Makim Wanem God Yupela Bai Lotuim”

1. Yumi mas mekim wanem bilong stap amamas tru, na bilong wanem? (Aisaia 48:​17, 18)

PAPA bilong yumi long heven i laikim yumi tru, na em i laik bai yumi enjoim laip long nau na long bihain tu. (Ekl. 3:​12, 13) Em i wokim yumi wantaim save bilong mekim ol narakain samting, tasol em i no givim yumi save bilong bosim gut yumi yet o long putim ol lo bilong yumi yet long wanem pasin i stret na wanem pasin i no stret. (Ekl. 8:9; Jer. 10:23) Em i save olsem bilong yumi ken stap amamas tru, yumi mas lotuim em na bihainim ol lo bilong em.—Ritim Aisaia 48:​17, 18.

2. Satan i laik yumi bilipim wanem tok giaman, na Jehova i mekim wanem long dispela tok giaman?

² Satan i laik bai yumi bilip olsem yumi inap stap amamas sapos yumi no lotuim Jehova; em i laik bai yumi ting olsem yumi ol man inap bosim gut yumi yet. (Stt. 3:​4, 5) Jehova i larim ol bikhet manmeri i bosim ol yet inap sampela haptaim bilong kamapim klia olsem Satan em i man bilong giaman. Yumi ken lukim ol evidens i soim klia olsem ol man i no inap long bosim ol yet. Tasol Baibel i stori long eksampel bilong planti manmeri em ol i amamas tru taim ol i lotuim Jehova. Wanpela bilong ol em Jisas Krais, em i bin amamas tru long lotuim Jehova. Long dispela atikol, pastaim yumi bai kisim skul long as na Jisas i makim olsem em bai lotuim Jehova. Na bihain, yumi bai skelim as na i stret long yumi lotuim Papa bilong yumi long heven. Laspela samting, yumi bai skelim as na yumi mekim disisen long lotuim Jehova.

AS NA JISAS I MAKIM OLSEM EM BAI LOTUIM JEHOVA

3. Satan i laik givim wanem samting long Jisas, na Jisas i mekim wanem disisen?

³ Taim Jisas i stap long graun, em i mas mekim disisen long em bai lotuim husat. Bihain liklik long Jisas i kisim baptais, Satan i laik givim em olgeta kingdom bilong graun sapos em i brukim skru na lotu long Satan wanpela taim tasol. Jisas i bekim tok olsem: “Satan, yu klia! Rait Holi i tok: ‘Yu mas lotu long Jehova, God bilong yu, na yu mas mekim wok bilong em wanpela tasol.’” (Mat. 4:​8-10) Wai na Jisas i mekim disisen long lotuim Jehova? Yumi ken stori long sampela risen na em i mekim olsem.

4-5. I gat wanem sampela risen na Jisas i makim olsem em bai lotuim Jehova?

⁴ Nambawan risen na Jisas i makim olsem em bai lotuim Jehova em pasin laikim—Jisas i laikim tru Papa bilong em na dispela pasin laikim i strong tru. (Jon 14:31) Na tu, Jisas i lotuim Jehova bikos i stret long em i mekim olsem. (Jon 8:​28, 29; Rev. 4:11) Em i save olsem Jehova em i As bilong laip, em i save truim ol tok promis bilong em, na em i save givim planti gutpela samting long yumi. (Sng. 33:4; 36:9; Jems 1:17) Oltaim Jehova i save mekim tok tru long Jisas na givim em olgeta samting em i gat. (Jon 1:14) Tasol Satan i no wankain long Jehova; em i bringim sin na dai long ol manmeri. Em i man bilong giaman na em i gat pasin gridi na em i save tingim em yet tasol. (Jon 8:44) Jisas i save long ol dispela samting, olsem na i no gat wanpela taim em i bin tingting long bihainim pasin bilong Satan long bikhet long Jehova, nogat tru.—Fili. 2:​5-8.

⁵ Narapela risen na Jisas i makim olsem em bai lotuim Jehova em bikos em i tingim ol gutpela samting inap kamap taim em i mekim olsem. (Hib. 12:2) Em i save olsem sapos em i stap gut yet long Jehova, em bai mekim holi nem bilong Papa bilong em na opim rot long olgeta pen na hevi em Satan i bin kamapim i pinis olgeta.

AS NA I STRET YUMI LOTUIM JEHOVA

6-7. Wai na planti man long nau i no lotuim Jehova, tasol wai na i stret yumi mas lotuim em?

⁶ Planti man long nau i no lotuim Jehova bikos ol i no kisim save yet long ol naispela pasin bilong em, na ol i no save long olgeta samting em i bin mekim bilong helpim ol. Ol dispela manmeri i wankain long ol manmeri em Pol i bin autim tok long ol long Atens, em ol i no bin save long God.—Apo. 17:​19, 20, 30, 34.

⁷ Pol i tokim ol manmeri long Atens olsem God tru “i givim laip na win na olgeta samting long olgeta manmeri.” Em i tok moa olsem: “Long rot bilong em yumi gat laip na yumi inap wokabaut na stap.” God em i Krieta na “long rot bilong wanpela man em i kamapim olgeta lain man,” olsem na i stret long yumi mas lotuim em.—Apo. 17:​25, 26, 28.

8. Jehova bai no inap tru long mekim wanem? Stori long dispela.

⁸ Jehova em i Krieta na King bilong heven na graun, olsem na em inap long subim ol manmeri long lotuim em. Tasol Jehova bai no inap tru long mekim olsem. Em i kamapim planti evidens i soim olsem em i stap tru tru na em i laikim tru yumi olgeta wan wan. Em i laik bai planti manmeri moa i stap pren bilong em inap oltaim. (1 Tim. 2:​3, 4) Em as na Jehova i trenim yumi long skulim ol narapela long ol samting em i tingting pinis long mekim na tokim ol long ol gutpela samting em bai mekim long olgeta manmeri long bihain. (Mat. 10:​11-13; 28:​19, 20) Em i oganaisim yumi na putim yumi long ol kongrigesen na em i stretim rot long ol gutpela wasman i ken lukautim yumi.—Apo. 20:28.

9. Olsem wanem pasin laikim bilong Jehova i stap ples klia?

⁹ Pasin laikim bilong Jehova i stap ples klia long pasin em i mekim long ol man em ol i no bilip long em. Tingim dispela: Long bipo yet na i kam inap nau, planti bilion manmeri i makim olsem ol bai bihainim ol lo ol yet i putim long wanem pasin i stret na wanem pasin i no stret. Maski i olsem, Jehova i mekim gutpela pasin long ol na em i givim ol samting ol i nidim bilong i stap laip na enjoim laip. (Mat. 5:​44, 45; Apo. 14:​16, 17) Em i opim rot long ol i ken i gat ol famili na ol pren i laikim ol, ol i ken mekim bikpela long ol pikinini, ol i ken wok, na amamas long ol gutpela samting i kamap long wok ol i mekim. (Sng. 127:3; Ekl. 2:24) Ol dispela evidens i soim klia olsem Papa bilong yumi long heven i laikim tru olgeta manmeri. (Kis. 34:6) Orait nau yumi ken stori long sampela risen na yumi bin mekim disisen long lotuim Jehova na ol blesing em i givim long ol lain i lotuim em.

AS NA YUMI MEKIM DISISEN LONG LOTUIM JEHOVA

10. (a) Wanem nambawan risen na yumi lotuim Jehova? (Matyu 22:37) (b) Olsem wanem Jehova i soim pasin bilong i no les kwik long yu? (Buk Song 103:​13, 14)

¹⁰ Wankain olsem Jisas, nambawan risen na yumi lotuim Jehova em bikos yumi laikim em tru. (Ritim Matyu 22:37.) Yumi pilim olsem yumi go klostu moa long Jehova taim yumi kisim save long ol pasin bilong em. Olsem, tingim pasin bilong Jehova long i no les kwik long yumi. Taim lain Israel i bikhet long em, em i tokim ol olsem: “Yupela i mas lusim ol pasin nogut bilong yupela.” (Jer. 18:11) Jehova i save olsem yumi no gutpela olgeta, yumi i olsem das tasol. (Ritim Buk Song 103:​13, 14.) Taim yu tingim tingim long bel pasin bilong Jehova long i no les kwik na ol narapela gutpela pasin bilong em, dispela bai kirapim yu long lotuim em inap oltaim oltaim!

11. Wanem sampela narapela risen na yumi mekim disisen long lotuim Papa bilong yumi long heven?

¹¹ Narapela risen na yumi lotuim Jehova em bikos i stret long yumi mas mekim olsem. (Mat. 4:10) Na tu, yumi save olsem sapos yumi stap gut long Jehova na mekim wok bilong em, planti gutpela samting bai kamap long dispela. Pasin bilong yumi long stap gut long Jehova bai mekim holi nem bilong em na soim olsem Satan em i man bilong giaman, na tu, yumi bai amamasim Papa bilong yumi. Na long nau, sapos yumi mekim disisen long lotuim Jehova, orait rot bai op long yumi inap lotuim em inap oltaim oltaim!—Jon 17:3.

12-13. Yumi kisim wanem skul long ekspiriens bilong Jane na Pam?

¹² Taim yumi yangpela yet, yumi inap kisim pasin bilong laikim tru Jehova na dispela pasin laikim bai kamap strong moa long ol yia i kam bihain. Tingim eksampel bilong tupela susa wanblut em nem bilong ol Jane na Pam.a Jane i gat 11 krismas na Pam i gat 10-pela krismas taim tupela i kirap stadi long Baibel. Maski papamama bilong ol i no laik stadi long Baibel, ol i tok orait long Jane na Pam long bung wantaim ol Witnes sapos tupela i go lotu wantaim famili bilong ol long ol wiken. Jane i tok: “Ol tok bilong Baibel em ol Witnes i skulim mi long en i helpim mi long sakim presa ol wanlain i putim long mi long insait long pasin pamuk na kisim drak.”

¹³ Sampela yia bihain, Jane na Pam i kamap pablisa. Bihain, ol i kirap mekim wok painia na long wankain taim ol i lukautim papamama bilong ol em nau ol i lapun. Jane i tingim bek ol samting Jehova i mekim bilong helpim em na Pam, na em i tok: “Mi kisim skul olsem oltaim Jehova i save stap gut long ol pren bilong em na lukautim ol, na olsem 2 Timoti 2:19 i tok, ‘Jehova i save gut long ol manmeri bilong em yet.’” Tru tumas, Jehova i save lukautim ol man em ol i laikim em na lotuim em!

14. Olsem wanem toktok na pasin yumi mekim i ken difendim nem bilong Jehova long ol tok giaman Satan i sutim long em? (Lukim tu ol piksa.)

¹⁴ Yumi laik mekim olgeta samting bilong difendim nem bilong Jehova long ol tok giaman Satan i sutim long em. Tingim olsem yu gat wanpela pren husat i save mekim gutpela pasin na em i save givim ol samting long ol narapela, na em i gat pasin bilong lusim rong bilong ol narapela. Wanpela taim, yu harim wanpela man i sutim tok long pren bilong yu olsem em i gat hatpela pasin na em i save mekim pasin giaman. Yu bai mekim wanem? Yu bai difendim em, a? Olsem tasol, taim Satan na ol man i bihainim ol pasin bilong em i traim long bagarapim gutnem bilong Jehova long rot bilong mekim ol tok giaman long Em, yumi difendim nem bilong Jehova long rot bilong tokim ol narapela long tok i tru long Em. (Sng. 34:1; Ais. 43:10) Long bel olgeta yumi laik lotuim Jehova, na yumi kamapim klia dispela long rot bilong toktok na pasin yumi mekim.

15. Aposel Pol i kisim wanem ol blesing taim em i senisim ol mak em i laik winim? (Filipai 3:​7, 8)

¹⁵ Yumi redi long senisim ol mak yumi laik winim long laip na bai yumi ken amamasim Jehova na givim bel moa yet long mekim wok bilong em. Tingim aposel Pol, em i mekim disisen long lusim namba em i holim long komiuniti na bai em i ken kamap disaipel bilong Krais na lotuim Jehova. (Gal. 1:14) Dispela i opim rot long em i kisim bikpela amamas long mekim wok bilong Jehova na em i kisim tu blesing long mekim wok king wantaim Krais long heven. Pol i no bin rigret long disisen em i mekim long lotuim Jehova, na yumi tu i laik holim wankain tingting olsem Pol.—Ritim Filipai 3:​7, 8.

16. Yumi kisim wanem skul long stori bilong Julia? (Lukim tu ol piksa.)

¹⁶ Sapos yumi tingting strong olsem nambawan samting long laip bilong yumi em long lotuim Jehova, orait yumi bai stap amamas long nau na long bihain tu. Tingim stori bilong wanpela sista nem bilong em Julia. Paslain long em i lainim tok i tru, em i insait long wanpela singsing grup bilong lotu bilong em kirap long taim em i liklik gel yet. Wanpela opera singa i luksave long talent bilong Julia long singsing na em i trenim em. I no longtaim, Julia i kamap hapmeri bilong singsing na planti i save long em, na em i save singsing long ol bikpela haus tieta samting. Taim em i wok long i go long wanpela musik skul, wanpela wanklas bilong em i kirap long stori long em long God na em i tokim em olsem God i gat nem, em Jehova. I no longtaim, Julia i kirap stadi long Baibel tupela taim insait long wanpela wik. Bihain, em i mekim disisen long lusim wok bilong em olsem wanpela opera singa na em i putim tingting olgeta long lotuim Jehova. Em hatwok tru long mekim dispela disisen. Em i tok: “Planti man i tokim mi olsem mi westim talent bilong mi, tasol mi laik yusim gut laip bilong mi long lotuim Jehova.” Long nau, em i pilim olsem wanem long dispela disisen em i bin mekim winim 30 yia i go pinis? Em i tok: “Bel bilong mi i stap isi, na mi bilip tru olsem Jehova bai givim mi ol samting mi laikim long bihain.”—Sng. 145:16.

WOK YET LONG LOTUIM JEHOVA

17. Pinis i kam klostu, na dispela i mekim wanem long ol man i lotuim Jehova na ol man i no lotuim em?

¹⁷ Yumi stap long haptaim em klostu nau bai pinis. Aposel Pol i tok: “Yes, ‘i no longtaim’ na ‘dispela man i laik i kam, em bai kam na em bai kam kwiktaim.’” (Hib. 10:37) Dispela i mekim wanem long yumi? Yumi save olsem haptaim i stap yet long ol man i ken kirap long lotuim Jehova, dispela haptaim i sot pinis. (1 Kor. 7:29) Na sapos yumi wok long lotuim Jehova long nau, orait yumi save olsem yumi mas sanap strong na karim ol hevi, tasol “i no longtaim” na ol dispela hevi bai pinis olgeta.

18. Jisas na Jehova i laik yumi mas mekim wanem?

¹⁸ Jisas i kirapim ol disaipel bilong em long bihainim em, na ol i mas mekim olsem oltaim. (Mat. 16:24) So sapos yumi mekim wok bilong Jehova inap planti yia pinis, yumi mas tingting strong long mekim olsem yet na yumi no ken givap. Yumi mas wok strong long bihainim yet disisen yumi mekim long lotuim em. Ating em i no isi long mekim olsem, tasol yumi bai kisim ol blesing na stap amamas tru long nau sapos yumi wok yet long lotuim Jehova!—Sng. 35:27.

19. Yumi kisim wanem skul long ekspiriens bilong Gene?

¹⁹ Sampela i pilim olsem ol i mas lusim planti samting na bai ol i ken lotuim Jehova. Sapos yu wanpela yangpela, orait olsem wanem? Yu pilim olsem yu bai mis-aut long sampela samting sapos yu lotuim Jehova? Wanpela yangpela brata nem bilong em Gene, em i tok: “Mi pilim olsem mi no enjoim laip bilong mi taim mi stap wanpela Witnes Bilong Jehova. Mi lukim olsem planti yangpela em mi kamap bikpela wantaim ol, ol i enjoim laip olsem go long ol pati, ol i gat boipren na gelpren, o ol i pilaim ol vidio gem i gat vailens, tasol mi wok long yusim taim bilong mi long go long ol miting na autim tok.” Dispela kain tingting i mekim wanem long Gene? Em i tok: “Mi hait na insait long ol pasin i no stret, na inap liklik haptaim mi kisim amamas long dispela. Tasol mi no stap amamas tru, dispela amamas i pinis kwiktaim. Mi stat long tingim gen ol tok i tru bilong Baibel em mi bin givim baksait long ol, na mi mekim disisen long kirap gen long lotuim Jehova long bel olgeta. Stat long dispela taim na i kam, mi lukim olsem Jehova i bekim olgeta beten bilong mi.”

20. Yumi mas tingting strong long mekim wanem?

²⁰ Wanpela man bilong raitim song i tok olsem long Jehova: “Man yu makim na singautim long i kam klostu long yu, em i ken amamas long i stap long haus bilong yu.” (Sng. 65:4) Yes, yumi olgeta i ken mekim wankain tok em Josua i bin mekim, em i tok: “Mi wantaim famili bilong mi, mipela bai lotuim Jehova.”—Jos. 24:15.