Pas Gut Wantaim Narapela Narapela—Dispela i Gutpela Long Yumi!

1-2. Wanem samting i bikpela samting long Jehova, na em i laik yumi mas mekim wanem?

OL PASIN yumi mekim long ol narapela em i bikpela samting tru long Jehova. Jisas i skulim yumi olsem yumi mas laikim tru ol narapela wankain olsem yumi laikim yumi yet. (Mat. 22:​37-39) Dispela i makim tu olsem yumi mas mekim gutpela pasin long ol arapela husat i no wanbilip bilong yumi. Taim yumi mekim kain gutpela pasin olsem, yumi bihainim pasin bilong God Jehova, em i save “mekim san bilong em i kam antap long ol man nogut na ol gutpela man, na em i save mekim ren i kam daun long ol stretpela man na ol man i no mekim stretpela pasin.”—Mat. 5:45.

² Em tru olsem Jehova i laikim olgeta manmeri, tasol em i laikim moa ol manmeri i bihainim stretpela pasin. (Jon 14:21) Em i laik bai yumi bihainim pasin bilong em. Em i kirapim yumi long “laikim tru” ol bratasista bilong yumi na soim ol olsem yumi “sori na laikim tumas” ol. (1 Pita 4:8; Rom 12:10) Dispela kain pasin laikim yumi gat long ol i wankain long pasin laikim yumi gat long wanpela wanfamili em yumi pas gut wantaim em o wanpela gutpela pren bilong yumi.

3. Yumi mas tingim wanem samting long pasin laikim?

³ Yumi mas mekim ol samting bilong strongim pasin laikim bilong yumi, wankain olsem yumi save givim wara na lukautim gut wanpela plent na bai em inap gro i go bikpela. Aposel Pol i tokim ol Kristen olsem: “Wok yet long laikim ol arapela olsem ol i brata bilong yupela.” (Hib. 13:1) Jehova i laik bai yumi mas wok yet long kisim pasin bilong laikim ol narapela. Dispela atikol bai stori long risen na yumi mas pas gut moa wantaim ol wanbilip bilong yumi na hau yumi ken wok yet long mekim olsem.

AS NA YUMI MAS PAS GUT MOA WANTAIM OL NARAPELA

4. Olsem Buk Song 133:1 i tok, hau yumi ken soim yet olsem yumi amamas long pasin wanbel i stap namel long yumi? (Lukim tu ol piksa.)

⁴ Ritim Buk Song 133:1. Yumi wanbel long tok em man bilong raitim song i mekim olsem i “gutpela tru” long yumi stap pren tru bilong ol lain i laikim Jehova. Tingim dispela: I gat wanpela naispela diwai i sanap i stap, na long olgeta de wanpela man i save lukim dispela diwai, tasol em i no lusim haptaim long tingim olsem dispela diwai i luk nais olsem wanem. Olsem tasol, em isi long yumi lusim tingting olsem pasin wanbel i stap namel long yumi ol bratasista Kristen em i gutpela samting tru. Yumi save bung wantaim ol bratasista planti taim insait long wanpela wik. Olsem na hau yumi ken soim yet olsem yumi amamas long ol? Pasin bilong yumi long laikim ol bratasista bai kamap strong moa sapos yumi lusim sampela haptaim long tingim hau wan wan bratasista i dia tumas long kongrigesen na long yumi tu.

5. Pasin laikim namel long yumi ol bratasista inap mekim wanem long ol narapela?

⁵ Sampela man husat i go long miting long fes taim, ol i pilim tru pasin bilong yumi long laikim narapela narapela. Ating dispela tasol i mekim na ol i luksave olsem ol i painim pinis tok i tru. Jisas i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Skelim ekspiriens bilong Chaithra, em i wanpela yunivesiti sumatin husat i stadi wantaim ol Witnes Bilong Jehova. Em i ekseptim invatesen long go long wanpela rijinel kibung. Bihain long em i go long kibung long fes de, em i tokim Baibel tisa bilong em olsem: “I no gat wanpela taim papamama bilong mi i bin hagim mi. Tasol long kibung bilong yupela, ol i hagim mi 52 taim insait long wanpela de! Mi pilim tru pasin laikim bilong Jehova long rot bilong bikpela lain famili bilong em. Na mi laik stap insait long dispela famili.” Chaithra i wok yet long stadi long Baibel na mekim sampela senis long laip bilong em, na em i kisim baptais long 2024. Em tru olsem taim wanpela nupela man o meri i lukim ol gutpela wok yumi mekim na pasin laikim yumi soim long narapela narapela, planti taim dispela i save kirapim ol long lotuim Jehova.—Mat. 5:16.

6. Hau na pasin bilong pas gut moa wantaim ol bratasista bilong yumi inap lukautim yumi?

⁶ Taim yumi pas gut moa wantaim ol bratasista bilong yumi, dispela inap lukautim yumi. Pol i tokim ol wanbilip Kristen olsem: “Yupela i mas wok yet long strongim narapela narapela long olgeta wan wan de . . . nogut strong bilong sin long giamanim man i mekim na wanpela bilong yupela i pasim strong bel bilong em.” (Hib. 3:13) Sapos yumi bel hevi tru na dispela i mekim na isi isi yumi wok long lusim stretpela rot, orait Jehova inap kirapim wanpela wanbilip husat i luksave long dispela long helpim yumi. (Sng. 73:​2, 17, 23) Tru tumas, dispela kain helpim yumi kisim em i gutpela long yumi.

7. Olsem wanem pasin laikim i helpim yumi long stap wanbel wantaim? (Kolosi 3:​13, 14)

⁷ Yumi insait long bikpela lain famili em ol i wok strong long soim pasin laikim long narapela narapela, olsem na yumi kisim planti blesing. (1 Jon 4:11) Olsem, pasin laikim i kirapim yumi long “wok yet long karim hevi narapela i putim long [yumi],” na dispela i helpim yumi long stap wanbel wantaim ol wanbilip Kristen bilong yumi. (Ritim Kolosi 3:​13, 14; Efe. 4:​2-6) Olsem na long ol miting Kristen bilong yumi, yumi save amamas tru long bung wantaim ol wanbilip winim taim yumi bung wantaim ol narapela.

SOIM ONA LONG NARAPELA NARAPELA

8. Jehova i mekim wanem bilong helpim yumi long stap wanbel wantaim?

⁸ Long olgeta hap bilong graun, yumi stap wanbel wantaim na dispela em i wanpela mirakel. Jehova i helpim yumi long stap wanbel, maski yumi no gutpela olgeta. (1 Kor. 12:25) Baibel i tok olsem “God i skulim [yumi] long laikim narapela narapela.” (1 Tes. 4:9) Long rot bilong Baibel, Jehova i tokim yumi long ol samting yumi mas mekim bilong yumi ken pas gut moa wantaim narapela narapela. Taim yumi stadi long Tok Bilong God na bihainim ol dispela tok, long dispela rot yumi larim “God i skulim [yumi].” (Hib. 4:12; Jems 1:25) Na dispela em samting yumi ol Witnes Bilong Jehova i wok strong long mekim.

9. Yumi kisim wanem skul long tok bilong Rom 12:​9-13 long pasin bilong givim ona long narapela narapela?

⁹ Olsem wanem Tok Bilong God i skulim yumi long pas gut moa wantaim narapela narapela? Lukim tok Pol i mekim long dispela samting, olsem i stap long Rom 12:​9-13. (Ritim.) Yumi laik tingim gut dispela tok olsem, “yupela i mas go pas long givim ona long ol arapela wanbilip.” Wanem insait bilong dispela tok? Yumi mas go pas long “sori na laikim tumas” ol narapela long rot bilong fogivim ol, mekim gut long ol, givim ol samting long ol, na ol narapela samting. (Efe. 4:32) I no olsem yu mas wetim ol bratasista bilong yu long mekim ol samting bilong pas gut moa wantaim yu, nogat. Yu yet i ken “go pas” long mekim olsem. Na taim yu mekim olsem, yu bai lukim truim bilong tok Jisas i mekim olsem: “Amamas bilong givim samting i winim amamas bilong kisim samting.”—Apo. 20:35.

10. Hau yumi ken wok strong long “givim ona long ol arapela wanbilip”? (Lukim tu piksa.)

¹⁰ Pol i tok yumi mas go pas long givim ona long ol narapela wanbilip, na bihain em i kirapim yumi long “wok strong na no ken stap olsem lesman.” Man husat i save wok strong, em i save wok hat na givim bel tru long mekim ol wok. Taim em i kisim wanpela wok, em i save mekim gut dispela wok. Provep 3:​27, 28 i tok: “No ken holim bek ol samting long ol man i nidim samting sapos yu gat pawa long helpim ol.” Olsem na taim yumi lukim olsem wanpela i nidim helpim, kwiktaim yumi mas mekim samting bilong helpim em. Yumi no ken wet tasol o ting olsem ol narapela bai givim helpim long em, nogat, yumi mas i go pas long helpim em.—1 Jon 3:​17, 18.

11. Wanem samting inap helpim yumi long pas gut moa wantaim narapela narapela?

¹¹ Narapela rot yumi ken givim ona long ol narapela em taim yumi hariap long fogivim ol taim ol i rongim yumi. Efesus 4:26 i tok: “No ken larim san i go daun na yupela i belhat yet.” Bilong wanem? Long wanem, ves 27 i tok sapos yumi mekim olsem, yumi “opim rot long Devil.” Long rot bilong Baibel, planti taim Jehova i tokim yumi olsem yumi mas fogivim narapela narapela. Kolosi 3:13 i kirapim yumi long “wok yet long . . . amamas long fogivim narapela.” Taim yumi fogivim rong bilong ol narapela, dispela em i gutpela rot tru bilong helpim yumi long pas gut moa wantaim ol. Taim yumi mekim olsem, yumi “holimpas pasin wanbel bilong holi spirit na stap bel isi, em pasin i save bungim yumi wantaim.” (Efe. 4:3) I klia tru olsem taim yumi fogivim ol narapela, yumi strongim pasin wanbel na bel isi insait long lain bilong Jehova.

12. Hau Jehova i helpim yumi long kisim pasin bilong fogivim ol narapela?

¹² Em tru olsem yumi inap pilim hatwok long fogivim ol man em ol i bagarapim bel bilong yumi. Tasol holi spirit bilong God inap helpim yumi long fogivim ol. Baibel i kirapim yumi long “sori na laikim tumas ol arapela wanbilip” na “wok strong,” na bihain em i tok: “Larim holi spirit i kirapim yupela long givim bel tru long mekim wok.” Dispela i makim olsem holi spirit bilong God i ken helpim yumi long amamas na givim bel tru long mekim samting. So holi spirit bilong God i ken helpim yumi long sori na laikim tumas ol narapela na amamas long fogivim ol. Em as na yumi save beten strong na askim Jehova long helpim yumi.—Luk 11:13.

“YUPELA I NO KEN BRUK NABAUT”

13. Wanem samting inap mekim na yumi brukim lain namel long yumi yet?

¹³ Insait long kongrigesen i gat “olgeta kain man” na ol i bilong narapela narapela bekgraun. (1 Tim. 2:​3, 4) Sapos yumi no was gut, ol samting em yumi gat narapela narapela tingting long en inap brukim lain namel long yumi yet, olsem long sait bilong bilas na stretim bodi, helt-ke, na ol amamas yumi kisim. (Rom 14:4; 1 Kor. 1:10) “God i skulim [yumi] long laikim narapela narapela,” olsem na yumi mas was gut nogut yumi ting ol disisen bilong yumi i gutpela moa winim disisen bilong ol narapela.—Fili. 2:3

14. Oltaim yumi mas wok strong long mekim wanem, na bilong wanem?

¹⁴ Narapela rot yumi ken daunim pasin bilong brukim lain insait long kongrigesen em long oltaim wok strong long mekim ol gutpela tok bilong strongim ol narapela. (1 Tes. 5:11) Insait long ol yia i go pinis, planti bratasista em ol i bin lusim wok autim tok na miting o ol elda i bin seperetim ol long kongrigesen, nau ol i kam bek. Yumi mekim gutpela pasin long ol na welkamim ol bek! (2 Kor. 2:8) Lukim samting i kamap long wanpela sista husat i kam bek long Haus Kingdom bihain long em i lusim miting na wok autim tok inap 10-pela yia. Em i tok: “Olgeta i smail long mi na ol i sekanim han bilong mi.” (Apo. 3:19) Em i pilim olsem wanem long gutpela pasin ol i mekim long em? Em i tok: “Mi pilim olsem Jehova i stiaim mi na helpim mi long stap amamas gen.” Taim yumi strongim ol narapela, yumi opim rot long Krais i ken yusim yumi long givim nupela strong long ol man em ol i “hatwok nating na karim ol bikpela hevi.”—Mat. 11:​28, 29.

15. Wanem narapela rot yumi ken helpim kongrigesen long i stap wanbel wantaim? (Lukim tu piksa.)

¹⁵ Narapela rot yumi ken strongim pasin wanbel em long rot bilong ol tok yumi mekim. Jop 12:11 i tok: “Tang bilong yumi i save teistim kaikai bilong painimaut sapos kaikai i gutpela o nogat. Olsem tasol, yau bilong yumi i save harim ol toktok na skelim gut ol dispela tok.” Wankain olsem man bilong kukim kaikai bai teistim kaikai bilong lukim sapos kaikai i teis gut o nogat paslain long em i givim long ol narapela, i gutpela yumi skelim gut ol tok paslain long yumi mekim ol dispela tok. (Sng. 141:3) Oltaim yumi laik tingim olsem ol tok yumi mekim i mas gutpela na i “bilong strongim ol man taim ol i no gat strong.”—Efe. 4:29.

16. Husat i mas wok strong moa long mekim ol tok bilong strongim ol narapela?

¹⁶ Ol maritman na ol papamama i mas wok strong moa long skelim gut ol tok ol bai mekim na bai ol i ken mekim ol tok bilong strongim ol narapela. (Kol. 3:​19, 21; Tai. 2:4) Ol elda i stap olsem wasman bilong ol sipsip bilong Jehova, olsem na ol tu i mas mekim ol tok bilong givim nupela strong na mekim isi bel bilong lain sipsip bilong God. (Ais. 32:​1, 2; Gal. 6:1) Wanpela savetok bilong Baibel i tok olsem: “Taim man i mekim tok long taim stret bilong en—em i gutpela tumas!”—Prov. 15:23.

SOIM PASIN LAIKIM “LONG OL SAMTING YUMI MEKIM NA LONG PASIN I TRU”

17. Hau yumi ken save olsem pasin laikim yumi gat long ol bratasista em pasin laikim tru?

¹⁷ Aposel Jon i tok yumi “no ken kamapim pasin laikim long tok o long maus tasol, nogat, yumi mas kamapim tu long ol samting yumi mekim na long pasin i tru.” (1 Jon 3:18) Yumi laik pilim tru long bel pasin laikim em yumi soim long ol bratasista bilong yumi. Hau yumi ken mekim olsem? Taim yumi lusim bikpela haptaim moa long bung wantaim ol bratasista bilong yumi, yumi bai pas gut moa wantaim narapela narapela na strongim moa yet pasin laikim i stap namel long yumi. So painim ol rot bilong lusim haptaim long bung wantaim ol narapela olsem long taim bilong miting na autim tok. Lusim haptaim long visitim ol narapela. Taim yumi mekim olsem, yumi soim olsem yumi larim “God i skulim [yumi] long laikim narapela narapela.” (1 Tes. 4:9) Na yumi yet bai lukim olsem “em i gutpela tru long ol brata i sindaun gut wantaim na i stap wanbel!”—Sng. 133:1.