Redim Bel Bilong Yu

Taim yumi stadi long Baibel, yumi laik bai ol tingting bilong Jehova i stiaim tingting, filings, na ol laik bilong yumi. Esra i soim gutpela eksampel long dispela taim em i “redim bel bilong em long kisim save long Lo Bilong Jehova.” (Esra 7:10) Olsem wanem yumi tu i ken redim bel bilong yumi?

Beten. Beten paslain long yu mekim stadi bilong yu. Askim Jehova long helpim yu long kliagut na bihainim wanem samting yu lainim.—Sng. 119:​18, 34.

Kisim pasin daun. God i save haitim tok i tru long ol man i litimapim nem bilong ol yet na ting olsem ol i no nidim helpim bilong em long kliagut long tok bilong Baibel. (Luk 10:21) Abrusim pasin bilong mekim wok painimaut bikos yu laik soim ol narapela long save yu gat. Daunim yu yet na redi long senisim tingting bilong yu taim em i no stret wantaim tingting bilong God.

Harim wanpela Kingdom song. Musik I gat strong long mekim yumi pilim samting long bel, em i save redim bel bilong yumi long lotuim Jehova. Taim yu harim wanpela Kingdom song paslain long yu kirap mekim pesenel stadi bilong yu, dispela inap helpim yu long redim bel bilong yu.