Wok Yet Long Kisim Skul Long Ol Bikpela Tok Bilong Baibel

1. Taim yu lainim tok i tru long fes taim, olsem wanem ol tok bilong Baibel i helpim yu?

OL BIKPELA tok bilong Baibel i senisim tru laip bilong yumi. Olsem, taim yumi kisim save olsem nem bilong God em Jehova, em fes samting yumi mekim long kamap pren bilong em. (Ais. 42:8) Taim yumi kisim save long samting i painim ol man i dai pinis, yumi no wari moa olsem ol pren na ol wanfamili bilong yumi i dai pinis i karim pen na hevi. (Ekl. 9:10) Na taim yumi kisim save long tok promis bilong God olsem Paradais bai kamap long graun, yumi no wari moa long wanem samting bai painim yumi long bihain. Yumi bilip tru olsem yumi bai stap laip oltaim, na yumi no inap stap sotpela taim olsem 70 o 80 yia tasol, nogat.—Sng. 37:29; 90:10.

2. Olsem 2 Pita 1:​12, 13 i kamapim, olsem wanem ol strongpela Kristen tu i save kisim helpim long ol bikpela tok i tru bilong Baibel?

² Yumi no ken ting olsem ol bikpela tok bilong Baibel i no bikpela samting moa. Aposel Pita i raitim namba 2 pas bilong em i go long ol Kristen em ol “i stap strong long tok i tru.” (Ritim 2 Pita 1:​12, 13.) Tasol long dispela taim, i gat sampela samting inap bagarapim bilip bilong ol insait long kongrigesen, olsem ol giaman tisa na ol man i no stap gut long God. (2 Pita 2:​1-3) Pita i laik strongim ol bratasista bilong em na bai ol i ken sakim ol dispela samting. Bilong mekim olsem, em i kirapim ol long tingim sampela tok i tru em ol i lainim pinis. Ol dispela tok i tru bai helpim ol long stap gut yet long God i go inap long pinis.

3. Wai na olgeta Kristen i mas wok yet long tingim long bel ol bikpela tok bilong Baibel? Stori long tok piksa.

³ Taim yumi wok long kamap strong long bilip, yumi inap kisim ol nupela skul long ol bikpela tok bilong Baibel. Tingim dispela tok piksa: Wanpela saveman bilong kukim kaikai na wanpela husat i lain long kukim kaikai, tupela wantaim inap yusim ol seim ingridien long redim wanpela kaikai. Tasol inap sampela haptaim, dispela saveman bilong kukim kaikai i lain pinis long hau em i ken yusim ol dispela seim ingridien long kukim ol narapela kaikai we i teis nais tru. Wankain olsem, ol wokman bilong Jehova em ol i stap longpela taim long tok i tru na ol nupela Baibel sumatin, ol inap kisim narapela narapela skul long ol bikpela tok i tru bilong Baibel. Ating sindaun bilong yumi o wok bilong Jehova yumi mekim i senis kirap long taim yumi kisim baptais. Taim yumi tingim ol tok bilong Baibel em yumi bin kisim save long en longtaim i go pinis, yumi inap luksave long ol nupela rot yumi ken bihainim ol dispela tok long nau. Yumi ken stori long hau ol strongpela Kristen i ken kisim skul long 3-pela bikpela tok bilong Baibel.

JEHOVA EM I KRIETA

4. Yumi kisim save olsem Jehova em i Krieta na dispela i mekim wanem long yumi?

⁴ “Man i bin wokim olgeta samting em God.” (Hib. 3:4) Yumi save olsem Krieta em Man i gat olgeta savetingting na strong na em i wokim graun na olgeta samting i gat laip long en. Em i bin wokim yumi, so em i save gut tru long yumi. Na bikpela samting moa, em i tingim tru yumi. Em i save long ol samting we inap helpim yumi. Yumi save long dispela tok i tru olsem Jehova em i Krieta na dispela i mekim bikpela samting tru long yumi na i mekim na laip bilong yumi i gat as bilong en.

5. Wanem tok i tru inap helpim yumi long kisim pasin daun? (Aisaia 45:​9-12)

⁵ Dispela tok i tru olsem Jehova em i Krieta inap skulim yumi long kisim pasin daun. Jop i bin tingim tumas em yet na ol tok ol narapela i mekim long em, olsem na Jehova i kirapim em long tingim olsem Em i Krieta i gat olgeta strong. (Jop 38:​1-4) Jop i luksave olsem ol pasin bilong God i antap moa winim ol pasin bilong ol man. Dispela i stret wantaim tok bilong profet Aisaia olsem: “I stret long graun i tokim Man Bilong Wokim Sospen Graun: ‘Yu mekim wanem samting?’”—Ritim Aisaia 45:​9-12.

6. Wanem taim i gutpela long tingim bikpela namba Jehova i gat olsem Krieta bilong yumi? (Lukim tu ol piksa.)

⁶ Taim wanpela Kristen i mekim wok bilong Jehova inap planti yia, em inap kirap long bilip long save bilong em yet na em i no larim Jehova na tok bilong Baibel i stiaim em. (Jop 37:​23, 24) Tasol olsem wanem sapos em i tingim bikpela savetingting na namba bilong Krieta bilong em? (Ais. 40:22; 55:​8, 9) Dispela bikpela tok i tru bai helpim em long mekim yet pasin daun na tingim olsem ol tingting bilong Jehova i bikpela samting moa winim ol tingting bilong em.

7. Rahela i mekim wanem long bihainim senis i kamap insait long oganaisesen?

⁷ Rahela i stap long Slovenia, em i luksave olsem taim em i tingim Krieta bilong em, dispela i helpim em long bihainim senis i kamap insait long oganaisesen. Em i tok: “Sampela taim, em i no isi long mi bihainim ol disisen ol brata i go pas i mekim. Olsem, mi bin lukim 2023 Gavening Bodi Apdeit #8 pinis, tasol mi kirap nogut yet taim mi lukim wanpela brata i gat mausgras i mekim tok. So mi beten long Jehova i ken helpim mi long redi long bihainim dispela senis.” Rahela i luksave olsem Jehova em i Krieta bilong heven na graun, olsem na em i save long gutpela rot bilong stiaim oganaisesen bilong em. Sapos yu pilim hatwok long kliagut long wanpela nupela save o long bihainim wanpela nupela daireksen, i gutpela yu daunim yu yet na tingim bikpela savetingting na strong bilong Krieta bilong yumi.—Rom 11:​33-36.

AS NA GOD I LARIM PEN NA HEVI I STAP

8. Taim yumi kisim save long as na God i larim pen na hevi i stap, olsem wanem dispela i helpim yumi?

⁸ Wai na God i larim pen na hevi i stap? Sampela em ol i no save long bekim bilong dispela askim, ol i belhat long God o ol i ting olsem God i no stap tru! (Prov. 19:3) Tasol yu no olsem ol, yu kisim save olsem sin yumi kisim long Adam i mekim na yumi karim pen na hevi, na Jehova em i no as bilong ol pen na hevi yumi karim. Na tu, yu save olsem Jehova i no les kwik long ol man na dispela i opim rot long planti milion manmeri inap kisim save long em na save tu long hau Jehova bai pinisim pen na hevi olgeta. (2 Pita 3:​9, 15) Ol dispela tok i tru i strongim yu na helpim yu long i go klostu moa long em.

9. Long wanem ol taim i gutpela long yumi tingim ol risen na Jehova i larim pen na hevi i stap?

⁹ Yumi save olsem yumi no ken les kwik taim yumi wet long Jehova i pinisim ol pen na hevi. Tasol taim yumi yet o wanpela yumi laikim tru i bel hevi, karim hevi bilong pasin i no stret, o hevi bilong wanpela i dai, yumi inap tingting olsem wai na Jehova i no mekim samting hariap long pinisim ol dispela hevi. (Hab. 1:​2, 3) Long ol kain taim olsem, i gutpela yumi tingim ol risen na Jehova i larim ol stretpela man i karim pen na hevi.a (Sng. 34:19) Na tu, yumi ken tingim samting em i tingting pinis long mekim, em long pinisim pen na hevi olgeta.

10. Wanem samting i mekim isi bel bilong Anne taim mama bilong em i dai?

¹⁰ Yumi save long as na pen na hevi i stap, na dispela inap helpim yumi long sanap strong na karim hevi. Anne i stap long ailan Mayot long Solwara India, na em i tok: “Sampela yia i go pinis mama bilong mi i dai, na dispela i mekim mi bel sori tru. Tasol oltaim mi save tingim olsem Jehova em i no as bilong ol pen na hevi yumi karim. Em i laik tru long pinisim olgeta kain pen na hevi na kirapim bek ol pren na famili bilong yumi em ol i dai pinis. Taim mi tingim tingim long bel ol dispela tok i tru, dispela i mekim isi bel na tingting bilong mi.”

11. Yumi save long ol risen na Jehova i larim pen na hevi i stap, na hau dispela i strongim yumi long autim tok yet?

¹¹ Yumi save long ol risen na God i larim pen na hevi i stap, na dispela inap strongim yumi long wok yet long autim tok. Bihain long Pita i tokim ol Kristen olsem Jehova i no les kwik bikos em i laik kisim bek ol man i tanim bel, em i tok: “Yupela i mas tingting long pasin yupela i mas bihainim. Yupela i mas wokabaut long pasin i holi na bihainim pasin bilong givim bel tru long God.” (2 Pita 3:11) Wok autim tok em wanpela wok yumi mekim bilong soim olsem yumi “givim bel tru long God.” Wankain olsem Papa bilong yumi, yumi laikim ol manmeri. Yumi laik bai ol i stap long nupela taim em God bai kamapim we i gat stretpela pasin tasol. Jehova i no les kwik na em i givim rot long ol man i stap long ples bilong yu long kirap lotuim em. Em gutpela blesing tru yu kisim long stap olsem wanwok bilong God na helpim planti manmeri moa long kisim save long em paslain long pinis i kamap!—1 Kor. 3:9.

YUMI STAP LONG “TAIM BILONG LAS DE”

12. Yumi kisim save olsem yumi stap long “taim bilong las de,” na hau dispela i helpim yumi?

¹² Baibel i tok profet long pasin ol man bai bihainim long “taim bilong las de.” (2 Tim. 3:​1-5) Yumi lukim truim bilong dispela tok profet long hap yumi stap long en. Taim yumi lukim pasin bilong ol man i go nogut moa, dispela i strongim tru bilip bilong yumi olsem yumi ken trastim Tok Bilong God.—2 Tim. 3:​13-15.

13. Taim yumi skelim tok piksa bilong Jisas long Luk 12:​15-21, yumi inap givim wanem ol askim long yumi yet?

¹³ Yumi save olsem yumi stap long taim bilong las de na yumi save taim i sot pinis, olsem na yumi putim tok i tru i stap nambawan samting long laip bilong yumi. Yumi ken lainim sampela samting long tok piksa bilong Jisas olsem taim i sot pinis long Luk 12:​15-21. (Ritim.) Wai na Baibel i kolim dispela maniman olsem “longlong man”? Em i no mekim dispela tok bikos dispela man i gat planti mani kago, nogat. Dispela man i no putim ol bikpela samting i stap nambawan samting long laip bilong em. Em i bungim “ol gutpela samting bilong em yet, tasol em i stap rabis long ai bilong God.” Wai na em i bikpela samting long em i mas yusim gut taim bilong em? God i tokim dispela man olsem: “Nau long dispela nait ol bai tekewe laip bilong yu.” Long nau, pinis bilong dispela haptaim i wok long i kam klostu tru, so yumi ken askim yumi yet olsem: ‘Ol mak mi putim i soim olsem mi yusim gut taim bilong mi? Mi helpim ol pikinini bilong mi long putim wanem kain ol mak? Mi yusim strong, taim, na mani kago bilong mi long bungim ol gutpela samting bilong mi yet o bungim ol gutpela samting long heven?’

14. Olsem stori bilong Miki i kamapim, wai na em i bikpela samting long tingim tok bilong Baibel olsem yumi stap long taim bilong las de?

¹⁴ Ol samting yumi putim olsem bikpela samting long laip bilong yumi inap senis taim yumi tingim olsem tru tru yumi stap long taim bilong las de. Dispela em samting i painim wanpela sista nem bilong em Miki. Em i tok: “Taim mi grediuet long skul, mi laik tru long kisim wok mani we mi inap stadim ol animal. Na mi putim mak tu long mekim wok painia oltaim na mekim wok long hap i sot long ol pablisa. Ol pren i strong long bilip i kirapim mi long skelim gut olsem tru tru mi inap wok mani na long wankain taim winim ol mak bilong bilip o nogat. Ol i kirapim mi long tingim olsem klostu nau haptaim bilong nau bai pinis. Tasol long nupela taim, mi bai stap laip oltaim na stadim planti animal tru. So mi makim wanpela sotpela kos we mi lainim sampela skil. Na nau mi inap painim wok mani i sapotim mi long mekim wok painia na bihain mi muv i go long Ekwado, em hap i sot long ol pablisa.” Nau Miki na man bilong em i mekim wok sekit long dispela kantri.

15. Wai na yumi no ken givap long autim gutnius long ol man i no laik putim yau long tok yumi autim? Stori long wanpela eksampel. (Lukim tu ol piksa.)

¹⁵ Yumi no ken bel hevi sapos pastaim ol man i no laik putim yau long gutnius yumi autim. Ol man inap senis. Tingim stori bilong Jems, em hap brata bilong Jisas. Em i lukim Jisas i go bikpela, kamap Mesaia, na skulim gut ol manmeri winim olgeta narapela man. Tasol inap planti yia Jems i no kamap wanpela disaipel bilong Jisas. Bihain long Jisas i kirap bek, Jems i kamap wanpela disaipel husat i givim bel tru long mekim wok!b (Jon 7:5; Gal. 2:9) Gutpela samting inap kamap taim yu no givap long ol wanblut em pastaim ol i no laik putim yau long yu o autim tok gen long ol lain em pastaim ol i no laik harim gutnius bilong Kingdom. Yumi mas tingim olsem yumi stap long taim bilong las de, olsem na wok autim tok em i bikpela samting tru. Ol tok yu mekim long ol long nau inap mekim sampela samting long ol long bihain, ating bihain long traipela hevi tru i kirap.c

WOK YET LONG AMAMAS LONG OL TOK BILONG JEHOVA

16. Ol tok bilong Jehova i helpim yu olsem wanem? (Lukim tu blok “Yusim Long Helpim Ol Narapela.”)

¹⁶ Sampela ol tok bilong strongim bilip ol i redim em bilong helpim ol lain em ol i no save long ol bikpela tok i tru bilong Baibel. Olsem, ol pablik tok i save kamap long olgeta wik, sampela atikol na ol vidio long jw.org, na ol pablik magasin em ol i wokim bilong helpim ol lain i no Witnes. Maski i olsem, yumi tu i save kisim helpim long ol dispela tok. Ol i strongim pasin bilong yumi long laikim Jehova, strongim bilip bilong yumi long Baibel, na helpim yumi long skulim gut ol narapela long ol bikpela tok i tru.—Sng. 19:7.

17. Long wanem ol taim yu inap tingim ol bikpela tok i tru bilong Baibel?

¹⁷ Yumi ol Witnes Bilong Jehova i save amamas tru taim yumi kisim nupela save long wanpela tok i tru bilong Baibel. Tasol yumi amamas tu long ol bikpela tok i tru bilong Baibel em yumi kisim save long ol long fes taim na ol i bringim yumi i kam insait long tok i tru. Sapos yumi kisim daireksen i kam long oganaisesen bilong Jehova, tasol yumi laik bihainim tingting bilong yumi yet, orait i gutpela yumi daunim yumi yet na tingim olsem Krieta bilong yumi i gat bikpela savetingting na strong i wok long stiaim dispela oganaisesen. Taim yumi yet o wanpela yumi laikim tru i sanap strong na karim hevi, yumi no ken les kwik na yumi mas tingim risen na Jehova i larim pen na hevi i stap. Na taim yumi laik wokim disisen long yusim taim na ol samting yumi gat, yumi mas tingim olsem yumi stap long taim bilong las de na taim i sot pinis. Ol tok bilong Jehova i ken wok yet long strongim yumi, kirapim yumi long mekim samting, na helpim yumi long bihainim savetingting.