Yu “Lain Pinis” Long Amamas Long Ol Samting Yu Gat Pinis?

1. Dispela tok amamas long ol samting yu gat pinis i makim wanem samting, na em i no makim wanem samting?

YU SAVE amamas o belgut long ol samting yu gat pinis? Man husat i save amamas long ol samting em i gat pinis, em i save stap amamas na bel isi na putim tingting long ol blesing em i kisim long nau. Em i no save bel nogut o belhat long ol samting em i no gat. Tasol pasin bilong amamas long ol samting yumi gat pinis i no ken pasim yumi long mekim bikpela wok moa bilong Jehova. Olsem, wanpela Kristen i mas wok strong long painim rot bilong mekim bikpela wok moa bilong Jehova. (Rom 12:1; 1 Tim. 3:1) Maski i olsem, sapos em i no kisim wanpela asainmen em i gat laik long en, dispela i no save pinisim amamas bilong em.

2. Wanem hevi inap kamap sapos yumi no gat pasin bilong amamas long ol samting yumi gat pinis?

² Sapos yumi no gat pasin bilong amamas long ol samting yumi gat pinis, dispela inap kamapim planti hevi. Ol man husat i no amamas long ol samting bilong skin ol i gat, ol i save lusim planti aua tru long wok mani bilong kisim ol samting em tru tru ol i no nidim. Sori tru, sampela Kristen i bin stilim mani na ol narapela samting em ol i laikim. Ating ol i tokim ol yet olsem, ‘I stret mi kisim,’ ‘Mi wet inap longpela taim pinis,’ o ‘Mi bai bekim dispela mani bihain.’ Tasol tingim, Jehova i no save amamas long pasin bilong stil na dispela i daunim nem bilong em. (Prov. 30:9) Ol narapela i bel hevi olsem ol i no kisim wok em ol i laikim insait long kongrigesen, dispela i mekim na ol i givap na lusim Jehova olgeta. (Gal. 6:9) Hau na wanpela wokman bilong Jehova husat i dediket pinis long em inap mekim kain samting olsem? As bilong dispela hevi em olsem: Dispela man o meri i lusim pinis pasin bilong amamas long ol samting em i gat pinis.

3. Yumi kisim save long wanem tok i tru i stap long Filipai 4:​11, 12?

³ Yumi olgeta i ken kisim pasin bilong amamas long ol samting yumi gat pinis. Aposel Pol i tok: “Mi lain pinis olsem maski mi stap olsem wanem, samting mi gat em inap long mi.” (Ritim Filipai 4:​11, 12.) Em i raitim ol dispela tok taim em i stap long kalabus. Maski i olsem, em i no lusim amamas bilong em. Em i “lain pinis long samting wan wan man tasol i save long en” em long amamas long ol samting em i gat pinis. Sapos yumi hatwok long amamas long ol samting yumi gat pinis, orait ol tok na ekspiriens bilong Pol i ken helpim yumi long kisim dispela pasin. Yumi no ken ting em isi long kisim pasin bilong amamas long ol samting yumi gat pinis, nogat. Yumi mas lain long kisim dispela pasin. Hau yumi ken mekim olsem? Yumi bai stori long ol pasin we bai helpim yumi long lain long amamas long ol samting yumi gat pinis.

KISIM PASIN BILONG SOIM TENKYU

4. Olsem wanem pasin bilong soim tenkyu inap helpim yumi long amamas long ol samting yumi gat pinis? (1 Tesalonaika 5:18)

⁴ Man i gat pasin bilong soim tenkyu, em i save amamas long ol samting em i gat pinis. (Ritim 1 Tesalonaika 5:18.) Olsem, taim yumi gat pasin bilong soim tenkyu long ol bikpela samting bilong laip, yumi no inap wari tumas long ol samting yumi laikim em yumi no gat. Taim yumi soim tenkyu long ol wok bilong Jehova yumi mekim long nau, yumi bai tingting strong long mekim gut ol dispela wok na yumi no inap tingting oltaim long kisim nupela wok. Em as na Baibel i kirapim yumi long mekim ol beten bilong tok tenkyu long Jehova! Pasin bilong soim tenkyu bai helpim yumi long kisim “dispela bel isi bilong God i winim tru tingting bilong man.”—Fili. 4:​6, 7.

5. I gat wanem ol risen na lain Israel i ken soim tenkyu bilong ol? (Lukim tu piksa.)

⁵ Tingim samting i painim lain Israel. Planti taim ol i komplein long Jehova olsem ol i sot long ol kaikai em ol i save enjoim long Isip. (Nam. 11:​4-6) Em tru olsem laip long ples drai nating em i no isi. Wanem samting inap helpim ol long amamas long ol samting ol i gat pinis? I gutpela ol i tingim na tenkyu long ol samting Jehova i mekim pinis bilong helpim ol. Long Isip, ol bosman i paitim ol na mekim nogut tru long ol olsem ol wokboi nating, tasol Jehova i kamapim 10-pela bikpela hevi na kisim bek ol. Bihain long ol i kamap fri, ol “i kisim olgeta gutpela samting bilong ol Isip” olsem ol bilas gol, silva, na ol klos samting. (Kis. 12:​35, 36) Taim ol Isip i ranim ol Israel i go kamap long arere bilong Solwara Retsi, Jehova i wokim mirakel na brukim solwara i go long tupela hap. Na taim ol i raun long ples drai nating, Jehova i givim mana long ol long olgeta de. So wai na lain Israel i komplein long kaikai? Ol i komplein bikos ol i no gat pasin bilong soim tenkyu long ol samting ol i gat pinis, na i no bikos ol i sot long kaikai, nogat.

6. Wanem sampela rot yumi ken kisim pasin bilong soim tenkyu?

⁶ Hau yumi ken kisim pasin bilong soim tenkyu? Namba 1, makim taim long olgeta de bilong tingim ol gutpela samting em yu enjoim. Yu ken raitim tupela o tripela samting em yu tenkyu long en. (Kra. 3:​22, 23) Namba 2, soim tenkyu bilong yu. Go pas long tok tenkyu long ol narapela long ol samting ol i mekim bilong helpim yu. Na bikpela samting moa, tok tenkyu long Jehova long olgeta taim. (Sng. 75:1) Namba 3, kisim ol gutpela pren em ol i gat pasin bilong soim tenkyu. Sapos yu poroman wantaim wanpela i gat pasin bilong tok tenkyu, yu tu bai kisim dispela pasin, na em wankain tu long pasin bilong amamas long ol samting yu gat pinis. (Lo 1:​26-28; 2 Tim. 3:​1, 2, 5) Taim yumi tingting oltaim long soim tenkyu bilong yumi, yumi bai no gat taim bilong wari long ol samting em yumi no gat.

7. Amelia i mekim wanem bilong soim tenkyu bilong em, na wanem gutpela samting i kamap?

⁷ Tingim samting i kamap long Amelia,a em i save stap long Indonesia. Em i tok: “Long taim bilong COVID-19 pendemik, mi wok long skelim i stap bilong mi wantaim i stap bilong ol wanbilip bilong mi. Dispela i mekim na mi bel hevi.” (Gal. 6:4) Wanem samting i helpim em long senisim tingting bilong em? Amelia i tok: “Mi wok long tingim ol blesing mi kisim long olgeta wan wan de, na planti gutpela samting mi kisim taim mi stap insait long oganaisesen bilong God. Na mi tenkyu long Jehova long ol dispela samting. Dispela i mekim na mi amamas long ol samting mi gat pinis.” Sapos yu pilim olsem ol tingting kranki i daunim yu tru, orait yu ting yu inap mekim wankain samting bilong kisim pasin bilong soim tenkyu?

PUTIM TINGTING LONG WANPELA SAMTING NA DAUNIM YU YET

8. Wanem samting i kamap long Baruk?

⁸ Baruk em sekreteri bilong Jeremaia, wanpela taim em i no amamas long ol samting long laip bilong em. Baruk i kisim wanpela asainmen i hatwok long mekim, em long sapotim Jeremaia na autim strongpela tok bilong God long lain Israel em ol i no gat pasin bilong soim tenkyu bilong ol. Wanpela taim Baruk i lusim pasin bilong putim tingting long wanpela samting tasol. Em i no tingim ol samting Jehova i laik em i mekim, nogat, em i putim laik bilong em yet i go pas na ol samting em i tingting long mekim. Long rot bilong Jeremaia, Jehova i tokim Baruk olsem: “Yu laik kisim ol gutpela samting. Yu mas lusim dispela pasin bilong laik kisim ol gutpela samting.” (Jer. 45:​3-5) I olsem Jehova i tokim em: “Amamas long ol samting yu gat pinis.” Baruk i kisim ol dispela tok bilong stretim em na em i pas gut yet wantaim Jehova.

9. Olsem 1 Korin 4:​6, 7 i kamapim, pasin daun bai helpim yumi long luksave long wanem samting? (Lukim tu ol piksa.)

⁹ Sampela taim wanpela Kristen inap pilim olsem em i gat rait long kisim wanpela asainmen. Ating em i gat skil na save, em i save wok strong, em i gat bikpela ekspiriens, o ating olgeta tripela samting wantaim. Tasol ol narapela i kisim dispela asainmen em i laikim. Em inap i gat wanem tingting long dispela? Em i ken tingim tok bilong aposel Pol i stap long 1 Korin 4:​6, 7. (Ritim.) Olgeta asainmen yumi kisim na olgeta skil o save yumi gat i kam long Jehova. Em i no givim yumi ol dispela presen bikos yumi spesel moa long ol narapela, nogat. Jehova i givim yumi ol dispela presen bikos long bikpela pasin helpim bilong em.—Rom 12:​3, 6; Efe. 2:​8, 9.

10. Yumi ken mekim wanem bilong kisim pasin daun?

¹⁰ Yumi ken kisim pasin daun taim yumi tingim tingim long bel gutpela eksampel bilong Jisas. Tingim ol samting i bin kamap long nait em Jisas i wasim lek bilong ol aposel bilong em. Aposel Jon i tok: “Jisas i save olsem (1) Papa i bin putim olgeta samting long han bilong em, na (2) em i save tu olsem God i bin salim em i kam na (3) em bai go long God,” tasol em i go het na “stat long wasim lek bilong ol disaipel” bilong em. (Jon 13:​3-5) Jisas inap pilim olsem em i spesel na i stret ol disaipel i wasim lek bilong em. Tasol long laip bilong em long graun, em i no gat tingting long helpim em yet o i gat gutpela sindaun, nogat. (Luk 9:58) Jisas i save daunim em yet na amamas long ol samting em i gat pinis. Em i stap gutpela eksampel tru long yumi.—Jon 13:15.

11. Olsem wanem pasin daun i helpim Dennis long amamas long ol samting em i gat pinis?

¹¹ Dennis i save stap long Netelan, em i traim long bihainim pasin daun bilong Jisas, tasol i no isi long mekim olsem. Em i tok: “Sampela taim mi save bel hevi taim wanpela i kisim asainmen mi laikim, bikos mi pilim olsem mi mas kisim dispela asainmen. Taim dispela samting i kamap, mi save stadi long hau mi ken kisim pasin daun. Long JW Library^® ap, mi save tegim sampela skripsa i stori long pasin daun na bai mi ken painim hariap na ritim ol gen. Mi daunlodim tu sampela tok i stori long pasin daun long fon bilong mi na mi save harim ol planti taim.b Mi lain olsem olgeta wok yumi mekim em bilong givim glori long Jehova na i no long yumi yet. Yumi olgeta i mekim wan wan liklik wok bilong inapim ol wok bilong Jehova, tasol em yet i mekim ol dispela wok i kamap gutpela.” Sapos yu no amamas long ol samting long i stap bilong yu, mekim sampela samting bilong kisim pasin daun. Dispela bai strongim pasin pren bilong yu wantaim Jehova na helpim yu long stap belgut.—Jems 4:​6, 8.

TINGIM LONG BEL OL SAMTING YU BILIP LONG EN

12. Yumi bilip na wet long wanem ol samting bai kamap bihain na dispela i mekim yumi belgut? (Aisaia 65:​21-25)

¹² Yumi stap belgut taim yumi tingim tingim long bel ol gutpela samting yumi bilip na wet long ol bai kamap bihain. Ol tok bilong Jehova em profet Aisaia i bin raitim i tokim yumi olsem laip long nau bai i gat ol hatwok bilong en na ol i mekim gut bel bilong yumi olsem Jehova bai rausim ol dispela hevi bilong yumi. (Ritim Aisaia 65:​21-25.) Yumi bai sindaun long ol naispela haus na pilim seif tru. Yumi bai gat ol gutpela wok bilong mekim na planti naispela kaikai. Yumi no inap wari gen olsem hevi bai painim yumi na ol pikinini bilong yumi. (Ais. 32:​17, 18; Ese. 34:25) Yumi ken amamas tru olsem gutpela samting bai painim yumi long bihain.

13. Wai na yumi mas putim tingting olgeta long ol gutpela samting yumi bilip na wet long ol bai kamap bihain?

¹³ Long nau, winim long bipo, yumi mas putim tingting olgeta long ol gutpela samting yumi bilip na wet long ol bai kamap bihain. Wai? Bikos yumi stap long “taim bilong las de” na i gat planti hevi i “givim hatwok” long yumi. (2 Tim. 3:1) Long olgeta de, Jehova i save helpim yumi long karim hevi long rot bilong stiaim, strongim, na sapotim yumi. (Sng. 145:14) Na tu, ol bilip Kristen bilong yumi i ken strongim yumi long taim bilong hevi. Ating yu hatwok long lukautim famili long sait bilong kaikai, klos, na ples slip samting. Yu ting dispela i makim olsem oltaim yu bai sot long ol samting yu nidim? Nogat tru! Jehova i promis long givim yu olgeta samting yu nidim, na planti samting moa long Paradais. (Sng. 9:18; 72:​12-14) Ating yu wok long karim hevi bilong wanpela pen i save stap oltaim long bodi, sik dipresen, o ol narapela sik samting. Yu ting dispela sik bai stap wantaim yu oltaim na yu no inap kamap orait long en? Nogat tru. Bai i no gat sik na dai moa long nupela taim God bai kamapim. (Rev. 21:​3, 4) Dispela bilip i helpim yumi long stap belgut long nau na yumi no bel hevi o belhat. Yumi ken stap belgut taim yumi karim hevi bilong pasin i no stret, sik, dai, o ol narapela hevi. Bilong wanem? Long wanem, maski yumi karim ol bikpela hevi long nau, “ol pen na hevi yumi karim ol i bilong sotpela taim” tasol na long nupela taim God i kamapim, olgeta dispela hevi bai pinis olgeta.—2 Kor. 4:​17, 18.

14. Yumi ken mekim wanem bilong strongim bilip bilong yumi?

¹⁴ Bilip bilong yumi em i bikpela samting bilong helpim yumi long stap belgut, so hau yumi ken strongim bilip bilong yumi? Wankain olsem man i mas putim aiglas bilong lukim klia ol samting i stap longwe, yumi tu i mas mekim ol samting bilong strongim bilip bilong yumi na bai yumi ken lukim klia long ai bilong tingting dispela Paradais em God i promis long kamapim. Taim yumi wari olsem yumi no gat inap mani bilong lukautim yumi yet, yumi ken tingim nupela taim we bai yumi no nidim mani, no gat dinau, na i no gat man bai stap rabis. Sapos yumi wari olsem yumi no kisim wanpela asainmen yumi laikim, orait yumi ken tingim olsem dispela em bai liklik samting tasol taim yumi kamap gutpela olgeta na mekim wok bilong Jehova inap planti tausen yia. (1 Tim. 6:19) Yumi inap wari long planti samting long nau, na dispela inap mekim na i hatwok long tingim ol gutpela samting Jehova i promis long kamapim long bihain. Sapos oltaim yumi tingim ol promis bilong Jehova long bihain, dispela inap mekim yumi stap bel isi long nau.

15. Yu inap kisim wanem skul long tok bilong Christa?

¹⁵ Skelim hau bilip i bin helpim Christa, em meri bilong Dennis em yumi kamapim tok bilong em long paragraf i go pinis. Em i tok: “Mi gat wanpela sik we ol masol bilong mi i no gat strong, so mi save yusim wilsia na planti taim mi slip tasol long bet. Long olgeta de mi save pilim pen tasol. Dokta bilong mi i tokim mi olsem sik bilong mi i no inap kamap orait. Tasol wantu mi kisim tingting olsem, ‘Em i no gat wankain bilip olsem mi long ol samting bai kamap bihain.’ Mi putim tingting olgeta long ol gutpela promis bilong God na dispela i givim bel isi long mi. Long dispela haptaim bilong nau mi karim planti hevi, tasol mi bai amamas tru long nupela taim!”

“OL MANMERI I PRET LONG EM, OL I NO SAVE SOT LONG WANPELA SAMTING”

16. Wai na King Devit inap tok olsem ol manmeri i pret long Jehova, “ol i no save sot long wanpela samting”?

¹⁶ Wanpela wokman bilong Jehova inap stap belgut, tasol em inap karim yet ol hevi. King Devit i karim hevi long dai bilong 3-pela pikinini bilong em. Sampela i bin sutim tok long em, givim baksait long em, na ranim em inap planti yia bilong kilim em i dai. Maski i olsem, taim em i wok long karim wanpela bikpela hevi, em i tok long Jehova olsem: “Ol manmeri i pret long em, ol i no save sot long wanpela samting.” (Sng. 34:​9, 10) Wai na em inap tok olsem? Bikos yumi ol wokman bilong Jehova bai karim yet ol hevi long laip, tasol yumi ken save tru olsem yumi no inap sot long wanpela samting yumi nidim. (Sng. 145:16) Na yumi ken bilip na wet long Jehova i helpim yumi long olgeta hevi yumi karim. Yumi ken stap belgut.

17. Wai na yumi mas lain long amamas long ol samting yumi gat pinis?

¹⁷ Jehova i laik yu amamas long ol samting yu gat pinis. (Sng. 131:​1, 2) So wok strong long lain long amamas long ol samting yu gat pinis. Sapos yu wok strong long kisim pasin bilong soim tenkyu, putim tingting long wanpela samting tasol, na daunim yu yet, na strongim bilip bilong yu, orait yu inap long tok olsem: “Tru tumas, mi amamas long ol samting bilong mi.”—Sng. 16:​5, 6.