Yumi Ken Winim Pait Bilong Daunim Ol Laik Nogut

1. Yumi olgeta i save wok strong long mekim wanem?

I GAT wanpela taim yu bin gat strongpela laik long mekim wanpela samting em Jehova i no orait long en? Sapos olsem, orait no ken bel hevi. Baibel i tok: “Ol traim i kamap long yupela ol i wankain olsem ol traim i save kamap long olgeta man.” (1 Kor. 10:13) Dispela i makim olsem wanem ol laik nogut em yu wok strong long daunim, ol narapela tu i wok strong long mekim olsem. Yu no stap wanpis, na Jehova i ken helpim yu long winim pait bilong daunim ol laik nogut.

2. Sampela Kristen na ol Baibel sumatin inap pilim hatwok long daunim wanem ol traim? (Lukim tu ol piksa.)

² Baibel i tok tu olsem: “Laik bilong bel bilong olgeta man wan wan i save traim ol, dispela laik i save giamanim ol na pulim ol.” (Jems 1:14) Yumi luksave olsem traim i painim wanpela man bai i no wankain long traim i painim narapela man. Olsem, traim inap painim sampela Kristen long mekim pasin pamuk wantaim wanpela man o meri. Na traim inap painim wanpela Kristen man long mekim pasin pamuk wantaim narapela man o wanpela Kristen meri long mekim pasin pamuk wantaim narapela meri. Ol lain em ol i bin lusim pasin bilong lukim ponografi, ol inap kisim gen strongpela laik long lukim ponografi. Wankain hevi inap painim ol narapela em ol i stop long kisim drak o dring spak. Dispela em sampela laik nogut em sampela Kristen na ol Baibel sumatin i save pilim hatwok long daunim. Ating sampela taim yumi inap pilim wankain olsem aposel Pol, em i tok: “Taim mi gat laik long mekim pasin i stret, pasin nogut i stap wantaim mi.”—Rom 7:21.

3. Sapos yu pilim hatwok long daunim wanpela laik nogut, dispela inap mekim yu pilim olsem wanem?

³ Sapos yu pilim hatwok long daunim wanpela laik nogut, dispela inap mekim yu pilim olsem yu no gat strong long sakim ol traim. Na tu, yu inap pilim olsem yu no gat hop, olsem Jehova i no inap orait long yu bikos yu gat dispela laik nogut. Tasol yu ken save tru olsem ol dispela kain tingting ol i no tru! Bilong stori gut long dispela, dispela atikol bai bekim 2-pela askim: (1) Husat i laik bai yumi kisim tingting olsem yumi no gat strong na yumi no gat hop? (2) Hau yu ken winim pait bilong daunim ol laik nogut?

“SATAN” I LAIK YUMI HOLIM WANEM TINGTING?

4. (a) Wai na Satan i laik bai yumi pilim olsem yumi no gat strong long daunim ol laik nogut? (b) Wai na yumi ken save tru olsem yumi ken winim pait bilong daunim ol laik nogut?

⁴ Satan i laik bai yumi pilim olsem yumi no gat strong long daunim ol laik nogut taim traim i painim yumi. Jisas i kamapim klia dispela samting taim em i skulim ol disaipel bilong em long beten olsem: “No ken larim mipela i pundaun long traim, tasol kisim bek mipela long han bilong Satan.” (Mat. 6:13) Satan i tok olsem ol man i no inap stap gut long Jehova taim traim i painim ol. (Jop 2:​4, 5) Wai na Satan i gat kain tingting olsem? Bikos em i larim laik nogut bilong em yet i pulim em long mekim pasin i no stret, na em i no redi long holimpas pasin bilong stap gut long Jehova. Olsem na em i ting yumi bai bihainim pasin bilong em long redi long lusim Jehova taim traim i painim yumi. Na tu, Satan i ting olsem Pikinini Bilong God em man i gutpela olgeta, em tu bai pundaun long traim! (Mat. 4:​8, 9) Tasol tingim dispela: Tru tru yumi no gat strong long winim pait bilong daunim ol laik nogut? Nogat tru! Yumi wanbel long tok aposel Pol i mekim, em i tok: “Long olgeta samting, mi gat strong long rot bilong dispela man husat i save givim pawa long mi.”—Fili. 4:13.

5. Hau na yumi save olsem Jehova i bilip tru olsem yumi ken sakim ol laik nogut?

⁵ Jehova i no holim wankain tingting olsem Satan, Em i bilip tru olsem yumi ken sakim ol laik nogut. Wai na yumi tok olsem? Bikos Jehova i tok profet olsem bikpela lain manmeri em ol i stap gut long em, ol bai abrusim bagarap long taim bilong traipela hevi tru. Tingim mining bilong dispela tok. Jehova em God bilong mekim tok tru tasol, em i tok bikpela lain manmeri, na i no sampela tasol, bai go insait long nupela taim em bai kamapim. Na ol bai stap klin long ai bilong Em bikos ol i “wasim longpela klos bilong ol long blut bilong Pikinini Sipsip na klos bilong ol i kamap waitpela.” (Rev. 7:​9, 13, 14) I klia tru olsem, Jehova i save olsem yumi gat strong long winim pait bilong daunim ol laik nogut.

6-7. Wanem narapela tingting Satan i laik bai yumi holim?

⁶ Satan i laik bai yumi pilim olsem yumi no gat strong long daunim ol laik nogut. Narapela tingting Satan i laik bai yumi holim em olsem, Jehova i no inap orait long yumi bikos yumi gat ol laik nogut. Tasol tingim, wai na Satan i laik bai yumi holim kain tingting olsem? Bikos em i no gat hop. Jehova i skelim em pinis olsem em i no inap kisim laip oltaim, em bai bagarap na pinis olgeta. (Stt. 3:15; Rev. 20:10) Olsem na Satan i laik bai yumi tu i pilim olsem yumi no gat hop. Tasol tru tru, yumi gat hop. Yumi bilip na wet long kisim laip oltaim, em blesing Satan i lus long kisim. Baibel i tok olsem Jehova i laik helpim yumi na em i no laik bai bagarap i painim yumi. Em “i no laik bai wanpela i kisim bagarap. Em i laik bai olgeta i tanim bel.”—2 Pita 3:9.

⁷ Olsem na sapos yumi ting olsem yumi no gat strong long daunim ol laik nogut o Jehova i no inap orait long yumi bikos yumi gat ol laik nogut, orait yumi holim tingting em Satan i laik bai yumi gat. Taim yumi kliagut long dispela, yumi bai strongim tingting long sanap strong na sakim em.—1 Pita 5:​8, 9.

SIN INAP MEKIM YUMI HOLIM WANEM TINGTING?

8. Sin i makim ol pasin i no stret, na em i makim tu wanem narapela samting? (Buk Song 51:5) (Lukim tu “Mining Bilong Tok.”)

⁸ I gat narapela samting tu inap mekim yumi pilim olsem yumi no gat strong long daunim ol laik nogut na Jehova i no orait long yumi bikos yumi gat ol laik nogut. Em wanem samting? Em sin yumi kisim long namba wan tumbuna papamama bilong yumi.a—Jop 14:4; ritim Buk Song 51:5.

9-10. (a) Adam na Iv i pilim olsem wanem taim ol i mekim sin? (Lukim tu piksa.) (b) Yumi bon wantaim sin na dispela i mekim yumi pilim olsem wanem?

⁹ Tingim samting Adam na Iv i pilim taim tupela i mekim sin. Bihain long ol i sakim tok bilong Jehova, ol i haitim ol yet na traim long karamapim bodi bilong ol. Buk Insight on the Scriptures i stori long dispela olsem: “Ol i mekim sin, olsem na bel i kotim ol, ol i tingting planti na pret, na ol i sem.” Adam na Iv i no inap tru long pas gut gen wantaim Jehova. Maski ol i mekim wanem samting, oltaim bel bai kotim ol, ol bai tingting planti, na ol bai sem, long wanem, sin i stap long ol.

¹⁰ Yumi no wankain olsem Adam tupela Iv. Pe bilong baim bek man i opim rot long God i ken fogivim ol sin bilong yumi na maus bilong bel bilong yumi i stap klin. Tasol dispela ofa i no karamapim sin bilong Adam na Iv. (1 Kor. 6:11) Maski i olsem, yumi kisim sin long tupela. Olsem na yumi tu i save pilim olsem bel i kotim yumi, yumi tingting planti na pret, na yumi save sem. Baibel i tokaut klia olsem sin i wok yet long holimpasim ol man. Na em i holimpasim tu “ol lain em ol i no mekim wankain sin olsem Adam i bin mekim.” (Rom 5:14) Dispela inap mekim yumi bel hevi, tasol i no olsem yumi no gat strong long daunim ol laik nogut o God bai i no orait long yumi, nogat. Yumi inap sakim ol kain tingting kranki olsem. Hau yumi ken mekim olsem?

11. (a) Yumi mas mekim wanem taim yumi pilim olsem yumi no gat strong long daunim ol laik nogut? (b) Bilong wanem yumi mas mekim olsem? (Rom 6:12)

¹¹ Taim yumi pilim olsem yumi no gat strong long daunim ol laik nogut, yumi mas save olsem sin i mekim na yumi kisim kain tingting olsem, na yumi mas hariap long sakim dispela tingting. Bilong wanem? Long wanem, Baibel i skulim yumi olsem yumi no ken larim sin i wok yet long “stap olsem king” na bosim yumi. (Ritim Rom 6:12.) Yumi yet i ken makim olsem yumi bai sakim ol laik nogut bilong yumi, o nogat. (Gal. 5:16) Jehova i save tru olsem yumi inap sakim ol traim i painim yumi, olsem na em i tokim yumi long mekim olsem. (Lo 30:​11-14; Rom 6:6; 1 Tes. 4:3) Tru tumas, yumi gat strong bilong winim pait bilong daunim ol laik nogut.

12. (a) Yumi mas mekim wanem taim yumi pilim olsem Jehova i no inap orait long yumi bikos yumi gat ol laik nogut? (b) Bilong wanem yumi mas mekim olsem?

¹² Taim yumi pilim olsem Jehova i no inap orait long yumi bikos yumi gat ol laik nogut, orait yumi mas tingim olsem sin i mekim na yumi kisim kain tingting olsem, na yumi mas hariap long sakim dispela tingting. Bilong wanem? Long wanem, Baibel i tokaut klia olsem Jehova i save olsem yumi gat sin. (Sng. 103:​13, 14) Em “i save long olgeta samting” long yumi; em i save tu long olsem wanem sin yumi kisim long Adam na Iv i stiaim yumi long kisim ol laik nogut. (1 Jon 3:​19, 20) Tasol sapos yumi no larim ol laik nogut i pulim yumi long mekim sin, orait yumi inap stap klin long ai bilong Jehova. Wai na yumi ken bilip tru long dispela?

13-14. Yu ting Jehova i no inap orait long yumi sapos yumi gat ol laik nogut? Stori long dispela.

¹³ Baibel i soim klia olsem pasin bilong mekim rong i no wankain long taim man i gat laik long mekim rong. Yumi no inap stopim ol laik nogut long kamap long bel, tasol yumi inap bosim bel na yumi no larim ol dispela laik nogut i pulim yumi long mekim rong. Tingim ol Kristen long Korin long taim bilong ol aposel. Pastaim, sampela i bin insait long pasin bilong man i slip wantaim man na meri i slip wantaim meri. Pol i tok: “Sampela bilong yupela i bin i stap kain man olsem.” Tasol yu ting dispela i makim olsem ol i no kisim gen laik nogut long mekim dispela pasin? I no stret long yumi ting olsem, long wanem, dispela kain strongpela laik em samting i save pas strong tru long bel bilong man. Tasol ol Kristen em ol i kisim pasin bilong bosim bel na ol i sakim pasin bilong bihainim ol laik nogut bilong ol, Jehova i orait long ol. Long ai bilong em, ol i “kamap klin pinis.” (1 Kor. 6:​9-11) Na em inap holim wankain tingting long yu tu.

¹⁴ Maski yu pilim hatwok long daunim wanpela laik nogut, yu ken winim pait bilong daunim dispela laik nogut. Ating yu no inap rausim na pinisim olgeta dispela laik nogut long kamap long bel, tasol yu ken kisim pasin bilong bosim bel na bai yu no ‘mekim ol samting em bodi na tingting bilong yu i laikim.’ (Efe. 2:3) Hau yu inap mekim olsem na bai yu ken winim pait bilong daunim ol laik nogut?

ROT BILONG WINIM DISPELA PAIT

15. Sapos yumi laik winim pait bilong daunim ol laik nogut, wai na yumi mas onest long yumi yet?

¹⁵ Sapos yu laik winim pait bilong daunim ol laik nogut, orait yu mas onest long yu yet na luksave long wanem ol pasin yu pilim hatwok long lusim. Yu mas was gut na no ken larim “tingting giaman” i giamanim yu. (Jems 1:22) Sapos yu givim eskius olsem, ‘Ol narapela i save dring planti alkohol moa winim mi,’ o yu sutim tok long ol narapela olsem, ‘Mi no inap pundaun long traim bilong lukim ponografi sapos meri bilong mi i soim olsem em i laikim mi,’ orait em bai isi tru long yu pundaun long ol traim. So no ken traim long givim eskius long pasin i no stret yu mekim na ol tingting kranki yu gat. Tokaut stret olsem yu gat asua long rong yu bin mekim.—Gal. 6:7.

16. Olsem wanem yu ken strongim tingting long bihainim pasin i stret?

¹⁶ Yu mas onest long yu yet, na tu, yu mas strongim tingting long sakim ol laik nogut i kamap long bel. (1 Kor. 9:​26, 27; 1 Tes. 4:4; 1 Pita 1:​15, 16) Luksave long wanem ol samting i save traim yu na wanem taim dispela traim i save kamap. Ating traim i kamap long yu taim yu lukim sampela kain piksa o yu harim musik, o ating em wanpela taim bilong de we em isi long yu pundaun long traim. Olsem wanem? Em isi long yu pundaun long traim taim yu taiet tru o long biknait tru? Redim yu yet long rot bilong tingim hau dispela traim inap kamap na samting yu inap mekim long sakim dispela traim. Gutpela taim long mekim olsem em paslain long traim i kamap.—Prov. 22:3.

17. Yumi inap kisim wanem skul long stori bilong Josep? (Stat 39:​7-9) (Lukim tu ol piksa.)

¹⁷ Tingim samting Josep i mekim taim meri bilong Potifa i traim long pulim em long slip wantaim em. Wantu tasol, Josep i sakim em na em i no holim tupela tingting long disisen em i mekim. (Ritim Stat 39:​7-9.) Dispela i kamapim klia wanem samting? Paslain long meri bilong Potifa i traim long pulim Josep long slip wantaim em, Josep i save pinis olsem i no stret long kisim meri bilong narapela man. Olsem tasol, yu ken strongim tingting bilong yu long mekim samting i stret paslain long wanpela traim i painim yu. Long dispela rot, taim traim i kamap, em bai isi moa long yu bihainim disisen em yu mekim pinis.

“OLTAIM YUPELA I MAS SKELIM YUPELA YET”

18. Hau yu ken winim pait bilong daunim ol laik nogut? (2 Korin 13:5)

¹⁸ Bilong winim pait bilong daunim ol laik nogut, ‘oltaim yu mas skelim’ yu yet, olsem skelim yu wanem kain man o meri tru. (Ritim 2 Korin 13:5.) Sampela taim, i gutpela long skelim gen ol tingting na pasin bilong yu na mekim ol senis em yu mas mekim. Olsem, sapos yu sanap strong na sakim pinis wanpela traim, orait askim yu yet olsem: ‘Hamas haptaim i lus long mi sakim dispela traim?’ Sapos yu luksave olsem yu no bin hariap long mekim olsem, orait no ken bel hevi long yu yet. Tingim ol samting yu inap mekim bilong sakim dispela traim sapos em i kamap gen. Askim yu yet olsem: ‘Mi inap hariap long rausim wanpela tingting nogut mi kisim? Ol samting mi lukim, ritim, na harim i mekim na em hatwok long mi sakim dispela traim? Mi save hariap long rausim ai bilong mi na bai mi no ken lukim ol piksa nogut? Mi kliagut long risen na oltaim mi mas bihainim ol lo bilong Jehova, maski sampela taim i hatwok long mekim olsem?’—Sng. 101:3.

19. Olsem wanem ol liklik disisen inap mekim na yumi pilim hatwok long daunim ol laik nogut?

¹⁹ Taim yu skelim yu yet, no ken kisim pasin bilong mekim ol eskius. Baibel i tok: “Bel bilong ol man i save tingting oltaim long mekim pasin giaman, na tingting bilong man em i nogut tru.” (Jer. 17:9) Jisas i tok bel i save kamapim “ol tingting nogut.” (Mat. 15:19) Olsem, wanpela husat i stop long lukim ponografi, bihain long sampela haptaim em inap ting olsem hevi i no inap kamap sapos em i lukim ol piksa i no soim ol man i stap skin nating, tasol ol dispela piksa i mekim bel bilong em i kirap. O em inap ting olsem, ‘I no gat rong long mi piksaim long tingting olsem mi inapim ol laik nogut bilong mi sapos tru tru mi no mekim ol dispela pasin.’ Sapos wanpela i kisim kain tingting olsem, i olsem em i “tingting long ol laik bilong bodi [em] i laik inapim long bihain.” (Rom 13:14) Hau yu ken sakim dispela pasin? Yu mas was gut na no ken mekim ol liklik disisen em yu no tingting gut na mekim. Dispela inap kirapim yu long mekim ol bikpela disisen i no stret, olsem yu inap pundaun long mekim pasin i no stret.b Na tu, yu mas sakim olgeta kain tingting o “ol tingting nogut” we inap kirapim yu long mekim ol eskius long ol pasin i no stret yu mekim.

20. (a) Yumi luk fowed long wanem samting? (b) Yumi kisim wanem helpim long nau?

²⁰ Olsem yumi lainim pinis, Jehova i strongim yumi na bai yumi inap sakim ol traim. Na tu, yumi tenkyu olsem pasin marimari bilong Em i opim rot long yumi inap bilip na wet long stap laip oltaim long nupela taim long bihain. Yumi luk fowed long dispela taim we yumi bai amamas tru long lotuim Jehova wantaim klinpela bel na tingting! Tasol long nau yet, yumi ken save tru olsem Jehova i strongim yumi long winim pait bilong daunim ol laik nogut, na maski ol laik nogut inap kamap long bel, Jehova inap orait yet long yumi. Jehova bai blesim ol samting yumi mekim na bai yumi ken winim dispela pait!