“Olgeta Manmeri Em Bel Bilong Ol i Gutpela” Bai Amamas Long Harim Tok i Tru

1. Ol manmeri inap mekim wanem taim yumi autim gutnius long ol? (Aposel 13:​47, 48; 16:​14, 15)

LONG taim bilong ol aposel, kwiktaim planti man i bilip long tok i tru taim ol Kristen i autim gutnius long ol long Krais. (Ritim Aposel 13:​47, 48; 16:​14, 15.) Olsem tasol, long nau tu sampela i save amamas taim ol i harim gutnius long fes taim. Na ol manmeri em pastaim ol i no laik harim gutnius, ating bihain ol bai amamas long harim gutnius. Yumi mas mekim wanem taim yumi autim tok na painim ol manmeri em “bel bilong ol i gutpela”?

2. Wai na wok bilong kamapim disaipel i wankain long wok bilong man i planim gaden?

² Tingim dispela tok piksa. Wok bilong kamapim disaipel i wankain long wok bilong man i planim gaden. Sapos prut bilong wanpela diwai i mau, ating em bai kamautim dispela prut maski em i wok yet long digim na stretim graun o planim ol sid long narapela hap bilong gaden. Olsem tasol, taim yumi painim wanpela husat i amamas long putim yau long tok yumi autim, orait kwiktaim yumi laik helpim em long kamap wanpela disaipel bilong Krais. Long wankain taim, yumi wok yet long helpim ol lain em ol i nidim sampela moa taim long luksave olsem i gutpela long ol i lainim ol tok i tru bilong Baibel. (Jon 4:​35, 36) Pasin bilong skelim gut ol samting bai helpim yumi long save long wanem rot yumi inap helpim ol kain lain olsem. Yumi ken stori nau long samting yumi ken mekim long fes taim yumi toktok wantaim ol manmeri em ol i gat gutpela bel. Yumi bai stori tu long hau yumi inap helpim ol long wok yet long strongim pasin pren bilong ol wantaim Jehova.

TAIM OL MAN I LAIK HARIM GUTNIUS

3. Yumi ken mekim wanem taim yumi painim ol man i laik harim gutnius? (1 Korin 9:26)

³ Taim yumi painim ol man i laik harim gutnius, kwiktaim yumi laik helpim ol long kirap wokabaut long rot i go long laip. Long ol kain taim olsem, yumi ken tokim ol olsem yumi laik stadi long Baibel wantaim ol na invaitim ol long kam long ol miting bilong yumi long fes taim yumi toktok wantaim ol.—Ritim 1 Korin 9:26.

4. Stori long ekspiriens bilong wanpela meri em kwiktaim em i redi long stadi long Baibel.

⁴ Tokim ol olsem yu laik stadi wantaim ol. Sampela em yumi stori wantaim ol, kwiktaim ol i redi long stadi long Baibel. Olsem, long wanpela Fonde, wanpela yangpela meri long Kanada i go long wanpela litresa kat na em i kisim kopi bilong buklet Stap Amamas Oltaim! Sista i sanap long kat i tokim em olsem yumi save yusim dispela buklet long mekim fri Baibel stadi wantaim ol manmeri. Em i laik stadi so em i givim kontek infomesen bilong em long dispela sista. Bihain long dispela seim de, dispela yangpela meri i salim teks mesis long sista na askim em long wanem taim ol i ken kirap long stadi. Sista i laik go lukim em long wiken, tasol dispela yangpela meri i askim em olsem: “Na tumora olsem wanem? Mi fri.” So tupela i kirap stadi long neks de, em long Fraide. Dispela yangpela meri i go long fes miting bilong em long dispela wiken na kwiktaim em i mekim ol samting bilong pas gut wantaim Jehova.

5. Hau yumi ken skelim gut ol samting taim yumi laik tokim wanpela olsem yumi laik stadi long Baibel wantaim em? (Lukim tu ol piksa.)

⁵ Em tru olsem yumi no gat kain tingting olsem olgeta manmeri yumi autim tok long ol, kwiktaim ol bai laik long stadi long Baibel olsem dispela yangpela meri i bin mekim. Ating sampela i nidim sampela moa taim long pilim tru ol tok ol i harim. Ating pastaim yumi mas stori wantaim ol long wanpela topik em ol i laik save long en. Maski i olsem, sapos yumi holim yet stretpela tingting na soim olsem yumi tingim ol, bihain long liklik haptaim ating yumi inap kirapim Baibel stadi wantaim ol. Yumi ken mekim wanem tok taim yumi laik stadi wantaim ol? Ol i givim dispela askim long sampela bratasista em ol i save gut long pasin bilong kirapim ol Baibel stadi.

6. Yumi ken mekim wanem ol tok long wanpela bilong kirapim em long stadi long Baibel?

⁶ Ol pablisa na ol painia em ol i askim ol long hau ol i save kirapim ol stadi, ol i tok long sampela kantri em i gutpela long abrusim ol kain tok olsem “stadi,” “Baibel kos,” o “skulim yu” taim yu laik tokim ol narapela long Baibel stadi. Ol i luksave olsem i gutpela moa long yusim ol kain tok olsem “toktok wantaim,” “stori wantaim,” na “save long tok bilong Baibel.” Taim yupela i stori wantaim, yu inap kirapim em long stori gen wantaim yu long narapela taim sapos yu mekim kain tok olsem, “Em narakain tru olsem Baibel i bekim ol bikpela askim bilong laip em yumi gat, a?” o “Baibel i no wanpela lotu buk tasol, em i save helpim yumi long planti rot.” Na yu ken tok moa olsem: “Insait long sotpela haptaim olsem 10 i go 15 minit samting, yu inap lainim wanpela tok we inap helpim yu long laip bilong yu.” Yumi laik abrusim ol kain tok olsem “apoinmen” o “long olgeta wik” we inap mekim man i pilim presa olsem oltaim em i mas bung wantaim yumi.

7. Wanem taim em fes taim sampela i luksave long tok i tru bilong Baibel? (1 Korin 14:​23-25)

⁷ Invaitim ol i kam long miting. I luk olsem long taim bilong aposel Pol, fes taim sampela i luksave long tok i tru bilong Baibel em taim ol i go long wanpela miting Kristen. (Ritim 1 Korin 14:​23-25.) Wankain samting i save kamap long nau. Planti nupela i save kamap strong long bilip kwiktaim long taim ol i kirap long kam long ol miting. Wanem taim yu ken invaitim ol nupela long kam long miting? Long lesen 10 bilong buk Stap Amamas Oltaim!, i gat wanpela invatesen bilong singautim sumatin i kam long miting. Tasol i no olsem yu mas wet inap yupela i stadi long dispela lesen na yu invaitim em, nogat. Kirap long fes taim yu bungim em, yu ken invaitim em long kam long miting long wiken, na ating yu ken kolim het tok bilong pablik tok o kolim wanpela poin bilong Stadi Wastaua bilong dispela wik.

8. Yumi ken stori long wanem ol samting long ol miting bilong yumi taim yumi laik invaitim wanpela? (Aisaia 54:13)

⁸ Taim yumi laik invaitim wanpela i amamas long harim tok long kam long miting, yumi ken stori olsem ol miting bilong yumi i no wankain long ol bung bilong lotu em i save go long en. Long fes taim wanpela Baibel sumatin i kam long Wastaua Stadi, em i askim tisa bilong em olsem, “Kondakta i save long nem bilong olgeta?” Stadi tisa bilong em i tokim em olsem yumi olgeta i save traim long save long nem bilong ol narapela insait long kongrigesen, wankain olsem yumi save long nem bilong ol wanfamili bilong yumi. Dispela sumatin i kirap nogut long dispela bikos ol i no save mekim olsem long lotu bilong em. Na tu, planti i no klia long as na yumi save mekim ol miting Kristen. (Ritim Aisaia 54:13.) Yumi save bung wantaim bilong lotuim Jehova, kisim skul long em, na strongim narapela narapela. (Hib. 2:12; 10:​24, 25) Em as na ol miting bilong yumi i save ron gut na yumi no bihainim nating olkain pasin na kastam bilong ol lotu. (1 Kor. 14:40) Na tu, ol miting bilong yumi i no gat planti bilas pasin long en na em isi long yumi lainim ol tok bilong Baibel. Na yumi no save sapotim wanpela laik politik bikos yumi no insait long wok politik, na yumi no save insait long ol tok pait long ol samting bilong dispela graun. Na tu, yumi ken soim sumatin dispela vidio Wanem Samting i Save Kamap Long Haus Kingdom? paslain long em i kam long miting. So taim em i kam long miting, em bai i no inap kirap nogut.

9-10. Taim yumi invaitim wanpela long kam long miting, hau yumi ken helpim em long save olsem yumi no inap subim em long joinim o insait long lotu bilong yumi? (Lukim tu piksa.)

⁹ Sampela i surik long kam long miting bikos ol i pret olsem yumi bai askim ol long joinim lotu bilong yumi. Tokim man yumi invaitim olsem yumi save amamas long ol visita i kam na yumi no inap subim ol long joinim o insait long lotu bilong yumi. Yumi welkamim ol famili na ol famili i gat ol liklik pikinini tu. Long ol miting bilong yumi, yumi no save seperetim ol pikinini long ol papamama. Ol papamama i sindaun wantaim ol pikinini na kisim skul long tok bilong Baibel. Long dispela rot, ol papamama i no tingting planti olsem ol pikinini i stap wantaim husat na ol i wok long lainim wanem samting. (Lo 31:12) Yumi no save kolektim mani o salim ol pas bilong askim long donesen. Yumi bihainim tok bilong Jisas olsem: “Yupela i kisim fri, olsem na yupela i mas givim fri.” (Mat. 10:8) Na tu, yu inap tokim em olsem i no olsem em i mas werim ol klos i gat bikpela pe taim em i kam long miting. God i save lukluk long bel bilong man, na em i no save skelim lukluk bilong em.—1 Sml. 16:7.

¹⁰ Sapos man o meri yu invaitim i kam, orait mekim ol samting bilong mekim em i pilim welkam. Introdusim em long ol elda na ol narapela pablisa. Sapos em i pilim olsem em i welkam, em bai amamas long kam bek. Long taim bilong miting, sapos em i no gat Baibel, orait yu ken serim Baibel bilong yu wantaim em na helpim em long kliagut long tok brata i mekim o long tok bilong stadi yumi skelim.

TAIM YUMI KIRAPIM BAIBEL STADI

11. Hau yu ken soim rispek long taim na sediul bilong Baibel stadi bilong yu?

¹¹ Yumi mas tingim wanem ol poin taim yumi stadi long Baibel wantaim wanpela? Rispektim taim na sediul bilong em. Olsem, sapos yu mekim wanpela apoinmen, go long taim stret maski ol manmeri long ples yu stap long en i no tingim pasin bilong bihainim stret taim olsem bikpela samting. Na tu, i gutpela long mekim fes stadi bilong yupela insait long sotpela haptaim tasol. Sampela pablisa i gat ekspiriens i tok i gutpela long pinisim stadi paslain long taim yupela i makim long pinis, maski sumatin i laik stadi yet. Na no ken toktok planti. Larim sumatin i kamapim tingting bilong em.—Prov. 10:19.

12. Taim yumi kirap stadi long Baibel wantaim wanpela, yumi mas putim wanem mak?

¹² Taim yu kirap stadi wantaim wanpela long fes taim, yu mas putim mak long helpim sumatin bilong yu long kisim save long Jehova na Jisas na laikim ol tru. Yu ken mekim olsem long rot bilong stiaim ol i go long Tok Bilong God na i no long yu yet na save bilong yu long Baibel. (Apo. 10:​25, 26) Planti taim aposel Pol i save skulim ol man long Jisas Krais, em man Jehova i salim i kam bilong helpim yumi long kisim save long Em na laikim Em. (1 Kor. 2:​1, 2) Na tu, Pol i kamapim klia olsem em i bikpela samting long helpim ol nupela disaipel long kisim ol gutpela pasin i wankain olsem gol, silva, na ol ston i dia tumas. (1 Kor. 3:​11-15) Ol kain gutpela pasin olsem em bilip, savetingting, pasin bilong skelim gut ol samting, na pasin bilong pret long Jehova. (Sng. 19:​9, 10; Prov. 3:​13-15; 1 Pita 1:7) Bihainim pasin bilong Pol long skulim ol man long rot bilong helpim ol sumatin bilong yu long kisim strongpela bilip na pasin bilong pas gut tru wantaim gutpela Papa bilong ol long heven.—2 Kor. 1:24.

13. Hau yumi ken soim pasin bilong i no les kwik na pasin bilong kliagut taim yumi helpim ol man i gat gutpela bel? (2 Korin 10:​4, 5) (Lukim tu piksa.)

¹³ Bihainim pasin bilong Jisas long skulim ol man long rot bilong soim pasin bilong i no les kwik na pasin bilong kliagut long ol samting. No ken givim ol askim we bai mekim man i pilim nogut. Sapos em i pilim hatwok long kliagut long sampela poin yupela i stori long en, orait larim ol dispela poin i stap na stori long ol narapela samting na bihain yupela i ken stori gen long ol dispela poin. No ken traim long fosim em long bilip long wanpela tok bilong Baibel sapos em i no redi long mekim olsem, larim sampela haptaim i lus na bai tok i tru i go daun long bel bilong em. (Jon 16:12; Kol. 2:​6, 7) Baibel i tok ol bilip giaman i olsem wanpela haus i gat strongpela banis em yumi laik daunim. (Ritim 2 Korin 10:​4, 5; lukim stadi nout long “overturning strongly entrenched things” long Study Bible.) Yumi laik helpim sumatin long kisim pasin bilong trastim Jehova olsem Ples Hait bilong em na i no ol bilip giaman.—Sng. 91:9.

TAIM OL NUPELA LAIN I KAM LONG OL MITING

14. Yumi mas mekim wanem pasin long ol nupela lain em ol i kam long ol miting bilong yumi?

¹⁴ Jehova i laik bai yumi mekim wankain pasin long ol nupela lain maski ol i bilong wanem kalsa, bekgraun, o ples. (Jems 2:​1-4, 9) So hau yumi ken soim pasin laikim long ol nupela lain i kam long ol miting bilong yumi?

15-16. Hau yumi ken helpim ol nupela long pilim welkam long ol miting bilong yumi?

¹⁵ Ating sampela i kam long ol miting bilong yumi bikos ol i laik save long hau yumi save mekim ol bung bilong lotu, o ating wanpela i stap long narapela hap i kirapim ol long kam long miting. So yumi no ken surik long toktok wantaim ol kain lain olsem taim ol i kam long miting. Welkamim ol na no ken askim planti kwesten o toktok planti tumas. Invaitim ol long sindaun wantaim yu. Serim wantaim ol Baibel bilong yu na ol pablikesen yumi stadi long en, o givim ol kopi bilong ol yet. Na tu, tingim hau ol i pilim. Wanpela man husat i visitim wanpela Haus Kingdom i tokim brata husat i welkamim em olsem em i no pilim gut tumas bikos em i werim ol klos bilong raun. Brata i helpim em long no ken tingting planti taim em i stori long em olsem ol Witnes Bilong Jehova ol i wankain long ol narapela manmeri. Dispela man em bihain em i winim ol mak na kisim baptais, em i no lusim tingting long tok em dispela brata i bin mekim. Tasol was gut olsem, taim yu toktok wantaim ol visita paslain long miting i kirap o bihain long miting i pinis, soim olsem yu tingim ol, tasol no ken askim ol long ol pesenel samting bilong ol.—1 Pita 4:15.

¹⁶ Na tu, yumi ken mekim ol visita bilong yumi i pilim welkam taim yumi soim pasin rispek long ol stori bilong yumi, ol bekim bilong yumi na ol tok yumi mekim we i stori long ol lain i no Witnes o long ol bilip bilong ol. No ken mekim ol tok we inap mekim ol i pundaun o mekim ol i pilim nogut. (Tai. 2:8; 3:2) Olsem, yumi no laik daunim bilip bilong ol lain em ol i no gat wankain bilip olsem yumi. (2 Kor. 6:3) Em as na ol brata i mekim pablik tok i mas was gut long ol tok ol i mekim. Na tu, ol i soim olsem ol i tingim ol lain i no Witnes i stap long odiens taim ol i eksplenim mining bilong ol tok em ol i no inap kliagut long en.

17. Yumi putim wanem mak taim yumi autim tok na bungim ol man em “bel bilong ol i gutpela”?

¹⁷ Taim i sot pinis, olsem na wok bilong kamapim disaipel em i nambawan bikpela wok yumi mas mekim long olgeta de, na yumi wok yet long painim ol man em “bel bilong ol i gutpela long kisim laip oltaim.” (Apo. 13:48) Taim yumi mekim olsem, yumi no ken surik long tokim ol olsem yumi laik stadi long Baibel wantaim ol o invaitim ol i kam long ol miting bilong yumi. Long dispela rot, yumi inap helpim ol long kirap wokabaut long rot “i go long laip.”—Mat. 7:14.