Buk Jop Inap Helpim Yu Taim Yu Karim Pen na Hevi

1-2. Wai na em i gutpela long yumi mas ritim Buk Jop?

YU BIN amamas long ritim Buk Jop? Wanpela man i bin raitim dispela buk inap 3,500 yia i go pinis, tasol planti man long nau i tingim dispela buk olsem wanpela bilong ol nambawan buk tru. Ol man i givim biknem long man i raitim dispela buk bikos em i yusim ol naispela tok na em isi long kliagut long en na ol dispela tok i gat strong. Moses em man husat i bin raitim dispela buk, tasol God Jehova em i As tru bilong ol tok bilong en.—2 Tim. 3:16.

² Buk Jop em wanpela buk bilong Baibel i gat ol bikpela tok long en. Em i kamapim klia wanpela bikpela tok em yumi olgeta man i insait long en, em long mekim holi nem bilong Jehova. Na tu, em i skulim yumi long ol naispela pasin bilong Jehova, olsem pasin laikim, savetingting, stretpela pasin, na strong bilong em. Olsem, Buk Jop i kolim Jehova olsem “God i Gat Olgeta Strong” inap 31 taim, na dispela i winim ol narapela skripsa long Baibel. Na tu, dispela buk i bekim planti askim bilong laip em yumi gat, na em i bekim tu dispela askim em planti man i tingting planti long en: Wai na God i larim pen na hevi i stap?

3. Yumi inap kisim wanem sampela helpim taim yumi stadi long Buk Jop?

³ Taim yumi sanap antap long het bilong wanpela maunten, yumi inap lukim olgeta samting i stap raunim yumi. Wankain olsem, Buk Jop inap helpim yumi long kliagut long ol hevi i painim yumi bikos em i kamapim tingting bilong Jehova, em tingting bilong em i antap moa long yumi. Yumi ken lukim hau Buk Jop inap helpim yumi taim yumi karim pen na hevi. Yumi bai stori long hau ol Israel inap kisim helpim long stori bilong Jop na hau yumi tu i ken kisim helpim long dispela stori. Na tu, yumi bai stori long hau yumi ken yusim dispela stori bilong Baibel long helpim ol narapela.

GOD I LARIM JOP I KARIM PEN NA HEVI

4. Wanem samting i no wankain long Jop na ol Israel long Isip?

⁴ Long dispela haptaim ol Israel i karim pen na hevi na stap olsem sleiv long Isip, wanpela man nem bilong em Jop em i stap long kantri Us, ating dispela hap i stap long hap is bilong Graun Bilong Promis long hap not bilong Arebia. Ol Israel i kirap long lotuim ol imis bilong Isip, tasol Jop i stap gut long Jehova. (Jos. 24:14; Ese. 20:8) Jehova i tok long Jop olsem: “I no gat wanpela man long graun i olsem em.”a (Jop 1:8) Jop i gat planti mani kago na em i gat biknem tru—winim olgeta man long hap Is. (Jop 1:3) Ating Satan i belhat nogut tru taim em i lukim dispela man i gat planti mani kago na biknem i lotuim God na em i stap gut long Em!

5. Wai na Jehova i larim Jop i karim pen na hevi? (Jop 1:​20-22; 2:​9, 10)

⁵ Satan i sutim tok olsem Jop bai lusim lotu i tru sapos em i karim pen na hevi. (Jop 1:​7-11; 2:​2-5) Jehova i laikim tru Jop, tasol tok bilong Satan i kamapim planti bikpela askim, olsem na Jehova i larim Satan i traim kamapim klia olsem tok bilong em i tru o nogat. (Jop 1:​12-19; 2:​6-8) Satan i kilim i dai ol sipsip, ol meme, na ol bulmakau bilong Jop na em i kilim i dai 10-pela pikinini bilong em, na em i mekim ol strongpela boil nogut i kamap long het bilong Jop i go daun long lek bilong em. Maski Satan i kamapim planti pen na hevi long Jop, em i wok yet long stap gut long Jehova. (Ritim Jop 1:​20-22; 2:​9, 10.) Bihain, Jehova i mekim na helt bilong Jop i kamap gutpela, em i kisim bek mani kago bilong em, gutnem bilong em, na God i givim 10-pela moa pikinini long Jop. Na tu, God i wokim mirakel na Jop i stap laip inap 140 yia, na em i lukim namba 4 jeneresen bilong ol tumbuna bilong em. (Jop 42:​10-13, 16) Olsem wanem dispela stori inap helpim ol lain long bipo, na hau em inap helpim yumi long nau?

6. Olsem wanem ol Israel inap kisim helpim taim ol i kliagut long risen na God i larim pen na hevi i stap? (Lukim tu piksa.)

⁶ Hau ol Israel inap kisim helpim. Laip bilong ol Israel i hatwok tru long Isip. Olsem, Josua na Kalep i mekim wok olsem sleiv taim ol i yangpela yet. Na inap 40 yia ol i raun long ples drai nating bikos sampela long lain Israel i sakim tok bilong Jehova. Sapos ol Israel i bin save long ol hevi i painim Jop na ol blesing em i kisim, ating dispela inap helpim ol, na tu, em inap helpim lain Israel i kamap bihain long kliagut long husat tru i as bilong ol pen na hevi ol i karim. Na ol inap kliagut tu long risen na God i larim pen na hevi i stap na ol inap save tu olsem em i tingim tru pasin bilong ol man long stap gut long em na mekim wok bilong em.

7-8. Olsem wanem Buk Jop inap helpim yumi ol lain i karim pen na hevi? Stori long wanpela ekspiriens.

⁷ Hau yumi ken kisim helpim. Sori tru olsem planti man long nau i no bilip moa long God bikos ol i no kliagut long risen na ol samting nogut i painim ol gutpela man. Tingim stori bilong Hazelb em i bilong Ruanda. Taim em i yangpela, em i bilip long God. Tasol bihain ol samting i senis. Papamama bilong em i divos, olsem na nupela man bilong mama bilong em i mekim bikpela long em, tasol em i no save mekim gut long em. Taim em i tineja, wanpela man i reipim em. Taim Hazel i go long haus lotu bilong kisim bel isi, em i no kisim bel isi. Bihain, em i raitim wanpela pas i go long God. Long dispela pas, em i tok: “God, mi beten long yu, mi traim long mekim gutpela pasin, tasol yu bekim pasin nogut long mi. Nau mi bai lusim yu, na mi plen long mekim ol samting i mekim mi amamas.” Yumi sori tru long ol lain olsem Hazel, em ol samting i kamap long laip bilong ol i mekim na ol i bilip olsem God i as bilong ol pen na hevi ol i karim!

⁸ Long stori bilong Buk Jop, yumi lainim olsem God i no as bilong ol pen na hevi yumi karim, Satan i as bilong ol! Na tu, yumi lainim olsem, yumi no ken ting olsem ol man i karim pen na hevi bikos ol i bin mekim ol pasin nogut. Baibel i tokim yumi olsem “taim nogut na ol samting we man i no ting inap kamap,” na dispela i save painim yumi long olgeta kain taim. (Ekl. 9:11; Jop 4:​1, 8) Na yumi lainim tu olsem taim yumi sanap strong na karim ol hevi, dispela i opim rot long Jehova inap bekim ol tok giaman bilong Satan. Na long dispela rot yumi sambai long gutnem bilong Em. (Jop 2:3; Prov. 27:11) Yumi amamas long ol save yumi kisim long Baibel, ol dispela save i helpim yumi long kliagut long risen na yumi yet na ol lain yumi laikim i karim pen na hevi. Bihain Hazel i stadi wantaim ol Witnes Bilong Jehova na em i kisim save olsem God i no as bilong ol pen na hevi em i karim. Em i tok: “Mi beten gen long God na mi kamapim stret ol samting mi pilim long bel. Mi tokim Jehova olsem, taim mi bin tokim em olsem mi bai lusim em, tru tru mi no bin lusim em. Long dispela taim, mi no bin save long em. Nau mi kliagut olsem Jehova i laikim mi. Na mi stap amamas na belgut.” Yumi amamas tru long save long risen na God i larim pen na hevi i stap! Nau yumi ken skelim olsem wanem stori bilong Jop inap helpim yumi wan wan taim hevi i painim yumi.

STORI BILONG JOP INAP HELPIM YUMI LONG SANAP STRONG

9. Jop i mekim wanem taim em i sindaun antap long ol sit bilong paia? (Jems 5:11)

⁹ Piksaim long tingting Jop i sindaun em yet antap long ol sit bilong paia na ol strongpela boil nogut i stap long olgeta hap bilong bodi bilong em na em i karim bikpela pen tru. Skin bilong em i go blak nogut tru na i wok long raus i go na em i go bun nating tru. Strong bilong Jop i pinis olgeta, na em i kisim ol hap sospen graun i bruk bilong sikirapim skin bilong em, tasol dispela i no helpim em, na em i wok long komplein long bikpela pen em i pilim. Maski Jop i karim bikpela pen na hevi tru, em i wok yet long sanap strong na karim ol dispela hevi. (Ritim Jems 5:11.) Wanem samting i helpim Jop long sanap strong na karim hevi?

10. Wanem samting i soim olsem Jop i pas gut wantaim Jehova? Stori long dispela.

¹⁰ Jop i kamapim bel na tingting bilong em long Jehova. (Jop 10:​1, 2; 16:20) Olsem, long sapta 3 yumi lainim olsem Jop i komplein nogut tru long ol pen na hevi em i karim, em i popaia na em i ting olsem Jehova i as bilong ol dispela hevi. Bihain, 3-pela pren bilong em i sutim tok long em olsem God i panisim em long ol sin bilong em, tasol Jop i mekim ol tok bilong difendim em yet olsem em i stap gut long God. Ol tok Jop i mekim i soim olsem inap liklik haptaim em i ting olsem em i stretpela man moa winim God. (Jop 10:​1-3; 32:​1, 2; 35:​1, 2) Tasol em i tokaut tu olsem sampela taim em i mekim “planti toktok nabaut” taim em i mekim ol tok bilong difendim em yet. (Jop 6:​3, 26) Long sapta 31, Jop i laik bai God i bekim tok bilong em na tokaut olsem i no stret long em i karim pen na hevi. (Jop 31:35) Tasol Jop i mekim rong taim em i askim God long bekim askim bilong em long risen na em i karim pen na hevi.

11. Jehova i mekim wanem taim Jop i tok em i stap gut long Em?

¹¹ Yumi luksave olsem pasin Jop i bihainim long toktok long Jehova, dispela i soim olsem em i pas gut wantaim Em, na em i bilip tru olsem Jehova bai skelim em long stretpela pasin. Taim Jehova i bekim tok bilong Jop long rot bilong wanpela traipela win, em i no kolim stret olgeta risen na Jop i karim pen na hevi. Na tu, em i no kros long Jop i komplein o strongim sait bilong em olsem em i no gat asua long ol hevi i painim em, nogat. Jehova i toktok gut long Jop olsem wanpela papa i toktok gut long pikinini. Na dispela em gutpela rot bilong helpim Jop. Olsem na Jop i daunim em yet na em i tokaut olsem em i no save long olgeta samting, na em i bel hevi long ol strongpela tok em i mekim. (Jop 31:6; 40:​4, 5; 42:​1-6) Olsem wanem dispela stori inap helpim ol lain long bipo, na hau em i ken helpim yumi long nau?

12. Olsem wanem stori bilong Jop inap helpim ol Israel?

¹² Hau ol Israel inap kisim helpim. Ol Israel inap kisim skul long samting i painim Jop. Tingim stori bilong Moses. Taim em i mekim wok olsem lida bilong lain Israel, em i karim planti hevi tru na pasin bilong ol i mekim em i bel hevi. Ol bikhet Israel i komplein na toktok planti long Jehova, tasol Moses i kamapim ol bel hevi bilong em long Jehova. (Kis. 16:​6-8; Nam. 11:​10-14; 14:​1-4, 11; 16:​41, 49; 17:5) Na tu, Moses i mas sanap strong na karim hevi taim Jehova i stretim em. Olsem, taim ol Israel i wokim kem long Kades, ating em long namba 40 yia taim ol i stap long ples drai nating, Moses i “mekim tok i no stret” na em i no givim glori long nem bilong Jehova. (Sng. 106:​32, 33) Olsem na Jehova i no larim Moses i go insait long Graun Bilong Promis. (Lo 32:​50-52) Ating dispela i bagarapim tru bel bilong Moses, tasol em i daunim em yet na kisim tok bilong stretim em. Stori bilong Jop inap helpim lain Israel i kamap bihain long sanap strong na karim ol hevi i painim ol. Taim ol i tingim tingim long bel dispela stori, em inap helpim ol Israel em ol i stap gut long Jehova long lain long kamapim bel na tingting bilong ol long Em na hau ol i ken abrusim pasin bilong strong olsem ol i bihainim stretpela pasin. Na tu, ol inap lain long daunim ol yet taim Jehova i stretim ol.

13. Olsem wanem stori bilong Jop inap helpim yumi long sanap strong na karim hevi? (Hibru 10:36)

¹³ Hau yumi ken kisim helpim. Yumi ol Kristen tu i mas sanap strong na karim hevi. (Ritim Hibru 10:36.) Olsem, sampela bilong yumi i karim hevi bilong ol bikpela sik, bel na tingting bilong yumi i bagarap, yumi gat hevi insait long famili, wanpela yumi laikim i dai, o yumi karim ol narapela bikpela hevi. Na sampela taim, ol tok na pasin bilong ol narapela inap mekim na yumi pilim hatwok moa long karim ol dispela hevi. (Prov. 12:18) Tasol Buk Jop i skulim yumi olsem yumi ken kamapim ol samting yumi pilim long bel long Jehova na bilip tru olsem em bai harim yumi. (1 Jon 5:14) Em i no inap krosim yumi sapos yumi autim ol wari bilong yumi na yumi “mekim planti toktok nabaut,” olsem Jop i bin mekim, nogat. God bai givim yumi strong na savetingting long sanap strong na karim ol hevi. (2 Sto. 16:9; Jems 1:5) Na tu, em inap stretim yumi inap long skel bilong yumi olsem em i bin mekim long Jop. Na Buk Jop i skulim yumi tu long sanap strong taim yumi kisim tok kaunsel o tok bilong stretim yumi i kam long Baibel, oganaisesen bilong Em, o ol pren i stap strong long bilip. (Hib. 12:​5-7) Wankain olsem Jop i kisim helpim taim em i daunim em yet na kisim ol tok bilong stretim em, yumi tu inap kisim helpim taim yumi redi long kisim ol tok bilong stretim yumi. (2 Kor. 13:11) Yumi kisim planti gutpela skul long Jop! Nau yumi ken stori long hau yumi ken yusim stori bilong Jop long helpim ol narapela.

YUSIM BUK JOP LONG HELPIM OL NARAPELA

14. Taim yumi autim tok, yumi inap stori olsem wanem long risen na pen na hevi i stap?

¹⁴ Taim yu autim tok, yu bin bungim wanpela husat i askim yu long risen na pen na hevi i stap? Yu bekim dispela askim olsem wanem? Ating yu kolim tok Baibel i mekim long samting i kamap long gaden Iden. Ating yu kirapim tok olsem Satan em wanpela spirit nogut i mekim tok giaman long namba wan man na meri na dispela i kirapim ol long bikhet long God. (Stt. 3:​1-6) Na bihain ating yu tokim em olsem Adam na Iv i bikhet long God, olsem na graun i pulap long pen na hevi na yumi save dai. (Rom 5:12) Na ating yu stori olsem God i larim haptaim i stap yet bilong kamapim klia olsem tok bilong Satan em i no tru, na tu, long larim ol man i autim gutnius long olgeta hap bilong graun olsem bihain ol man bai kamap gutpela olgeta. (Rev. 21:​3, 4) Dispela em gutpela rot bilong bekim dispela askim, na gutpela samting i ken kamap taim yu mekim olsem.

15. Hau yumi ken yusim Buk Jop long helpim wanpela i gat askim long wai na pen na hevi i stap? (Lukim tu ol piksa.)

¹⁵ Narapela rot em yu ken helpim ol man long save long risen na yumi karim pen na hevi em long tokim ol long stori bilong Jop. Bilong kirapim toktok, yu ken tok amamas long dispela man long em i gat kain gutpela askim olsem. Na bihain yu ken tokim em olsem, Jop em wanpela bilipman husat i bin karim planti hevi tru, na em i bin gat wankain askim olsem. Na Jop i bin ting olsem God i as bilong ol pen na hevi em i karim. (Jop 7:​17-21) Ating dispela man yu stori wantaim em, em inap kirap nogut olsem ol man long bipo tu i bin gat wankain tingting olsem em. Bihain, yu ken stori gut olsem God i no as bilong ol hevi i painim Jop, Satan i as bilong ol dispela hevi. Satan i kamapim ol dispela hevi long Jop bikos em i laik pruvim olsem ol man i lotuim God bikos ol i laik kisim ol gutpela samting long Em. Yu ken tok moa olsem God i no kamapim ol hevi i painim Jop, tasol em i larim Jop i karim pen na hevi bikos Em i bilip tru olsem taim ol man i stap gut long Em, ol bai pruvim olsem tok bilong Satan em i no tru. Na yu ken tokim em olsem, bihain long sampela haptaim i lus God i blesim Jop bikos em i bin stap gut long Em. So yumi ken mekim isi bel bilong ol taim yumi tokim ol olsem Jehova i no as bilong ol pen na hevi ol i karim.

16. Olsem wanem Buk Jop inap helpim wanpela husat i karim pen na hevi? Stori long wanpela ekspiriens.

¹⁶ Lukim olsem wanem Buk Jop i bin helpim Mario. Wanpela taim long 2021, wanpela sista i autim tok long rot bilong telefon. Long festaim em i ringim Mario, em i serim wanpela Baibel ves wantaim em na em i tokim em olsem God i save harim ol beten bilong yumi, na tu, em i tok promis long yumi olsem gutpela samting bai painim yumi long bihain. Taim em i askim Mario long tingting em i gat long dispela, Mario i tokim em olsem em i tingting long suasaid na em i wok long raitim wanpela pas i stap taim em i ringim em. Em i tok: “Mi bilip long God, tasol nau moning mi wok long tingting olsem ating God i no tingim mi.” Long nambatu taim em i ringim Mario, em i stori long Mario long pen na hevi Jop i bin karim. Mario i pilim olsem em i mas ritim Buk Jop olgeta. So sista bilong yumi i salim link bilong Nupela Taim Trenslesen Bilong Ol Skripsa Holi i go long em. Wanem gutpela samting i kamap? Mario i tok orait long stadi long Baibel na em i luk fowed long lainim planti samting moa long God i gat pasin laikim husat i tingim em tru.

17. Wai na yu amamas olsem Jehova i larim Buk Jop i stap long Baibel? (Jop 34:12)

¹⁷ I klia tru olsem Tok Bilong God i gat bikpela strong long helpim ol manmeri, dispela i makim tu ol man i karim pen na hevi. (Hib. 4:12) Yumi amamas tru olsem Jehova i larim stori bilong Jop i stap long Baibel! (Jop 19:​23, 24) Buk Jop i helpim yumi long save olsem “tru tumas, God i no save mekim pasin nogut.” (Ritim Jop 34:12.) Na tu, em i skulim yumi long risen na God i larim pen na hevi i stap na hau yumi ken sanap strong na karim ol hevi i painim yumi. Na em i helpim yumi long mekim isi bel bilong ol man i karim pen na hevi. Neks atikol bai stori long sampela bikpela tok i stap long Buk Jop long hau yumi ken givim gutpela tok kaunsel long ol narapela.