Jon Bilong Baptais Em Husat?

Bekim Bilong Baibel

Jon Bilong Baptais em wanpela profet bilong God. (Luk 1:76) Em i bon paslain liklik long Jisas i bon na em i stap laip long taim bilong Jisas. God i givim wok long em long redim rot bilong Mesaia, o Krais. Jon i mekim dispela wok taim em i autim tok bilong God long lain bilong em, lain Juda, bambai ol inap tanim bel na lotuim God.—Mak 1:1-4; Luk 1:13, 16, 17.

Tok bilong Jon bai helpim ol gutpela man long luksave long Jisas bilong Nasaret olsem em dispela Mesaia God i bin tok promis long salim i kam. (Matyu 11:10) Jon i kirapim ol manmeri long tanim bel na lusim ol sin bilong ol na kisim baptais bilong soim olsem ol i tanim bel pinis. (Luk 3:3-6) Jon i baptaisim planti manmeri, olsem na ol i kolim em Jon Bilong Baptais. Taim Jon i baptaisim Jisas, dispela em nambawan spesel baptais Jon i bin mekim.a—Mak 1:9.

Long dispela atikol

Wanem samting i mekim na Jon Bilong Baptais i narapela kain?

Baibel i tok profet long wok em bai mekim: Taim Jon i mekim wok autim tok, em i truim tok profet olsem man bilong bringim tok bilong Jehova. (Malakai 3:1; Matyu 3:1-3) Em i kamapim klia olsem em i dispela man bai “redim wanpela lain manmeri bilong Jehova”—olsem, em i redim rot bilong lain Juda long kisim tok bilong God Jehova long rot bilong Jisas Krais, em nambawan mausman bilong God.—Luk 1:17.

Ol Wok Jon i Bin Mekim: Jisas i tok olsem “i no gat wanpela [man] . . . i winim Jon Bilong Baptais. Tasol man i stap liklik tru long Kingdom bilong heven, em i winim Jon.” (Matyu 11:11) Jon i mekim wok profet, na tu, em i dispela “man bilong bringim tok” em Baibel i tok profet long en, olsem na i no gat wanpela wokman bilong God i stap paslain long Jon i winim em. Tok bilong Jisas i soim tu olsem Jon bai i no inap stap long Kingdom bilong heven.b Dispela gutpela profet i dai paslain long Krais i opim rot long ol man inap kisim laip long heven. (Hibru 10:19, 20) Maski i olsem, Jon bai kisim laip long graun aninit long Kingdom Bilong God, na em stap laip oltaim long Paradais.—Buk Song 37:29; Luk 23:43.

Papamama bilong Jon Bilong Baptais ol i husat?

Papamama bilong Jon em tupela marit nem bilong ol Sekaraia na Elisabet. Sekaraia em wanpela pris bilong Juda. Taim Elisabet i karim Jon, dispela em wanpela mirakel bikos Elisabet i no inap karim pikinini. Na tu, Elisabet na Sekaraia “tupela wantaim i lapun pinis.”—Luk 1:5-7, 13.

Husat i mekim na ol i kilim i dai Jon Bilong Baptais?

King Herot Antipas i givim tok orait long katim het bilong Jon. Em i mekim olsem bikos meri bilong em, Herodias, i kirapim em long mekim dispela samting. Herodias i heitim Jon bikos Jon i tokim Herot olsem marit bilong em wantaim Herodias i no stret aninit long lo bilong Juda. Herot, em wanpela Juda long skin tasol.—Matyu 14:1-12; Mak 6:16-19.

Yu ting Jon Bilong Baptais na Jisas i birua long narapela narapela?

I no gat wanpela tok long Baibel i soim olsem Jon na Jisas i bin birua long narapela narapela. (Jon 3:25-30) Jon i bin tokaut stret olsem em wok bilong em long redim rot bilong Mesaia, na i no long resis wantaim em. Jon i tok: “Mi kam baptaisim ol man long wara bilong helpim ol Israel long luksave long dispela man.” Na em i tok moa: “Dispela man em i Pikinini Bilong God.” (Jon 1:26-34) So Jon i amamas tru long harim stori bilong wok autim tok bilong Jisas.

a Jisas “i no bin mekim sin.” (1 Pita 2:21, 22) Olsem na taim em i kisim baptais, dispela i no makim olsem em i mas tanim bel, nogat, dispela i makim olsem em i givim em yet long mekim laik bilong God. Dispela i makim tu laip bilong em we em i bin givim bilong helpim yumi.—Hibru 10:7-10.

b Lukim atikol “Husat Bai Go Long Heven?”