Husat Bai Go Long Heven?
Bekim bilong Baibel
God i makim liklik lain Kristen em taim ol i dai ol bai kirap bek na i go long heven. (1 Pita 1:3, 4) Ol i mas wok yet long bihainim tok bilong God na holimpas strong bilip bilong ol na bai ol inap kisim laip long heven.—Efesus 5:5; Filipai 3:12-14.
Lain i go long heven bai mekim wanem?
Ol bai wok wantaim Jisas olsem king na pris inap 1,000 yia. (Revelesen 5:9, 10; 20:6) Ol bai kamapim “nupela skai,” o gavman long heven, na dispela gavman bai bosim “nupela graun,” o ol manmeri i stap long graun. Ol dispela king na pris long heven bai helpim olgeta manmeri long graun long kisim gutpela sindaun gen olsem God i bin laikim long pastaim tru.—Aisaia 65:17; 2 Pita 3:13.
Hamas lain bai kisim laip long heven?
Baibel i soim olsem 144,000 manmeri bai kirap bek na i stap long heven. (Revelesen 7:4) Long visen i stap long Revelesen 14:1-3, aposel Jon i lukim “Pikinini Sipsip i sanap antap long Maunten Saion, na 144,000 manmeri i sanap wantaim em.” Long dispela visen, “Pikinini Sipsip” i makim Jisas bihain long em i kirap bek. (Jon 1:29; 1 Pita 1:19) “Maunten Saion” i makim biknem em Jisas na lain 144,000 i kisim bilong mekim wok king long heven.—Song 2:6; Hibru 12:22.
Lain “em God i bin singautim na makim ol” long mekim wok king wantaim Krais long Kingdom, Baibel i kolim ol olsem “liklik lain sipsip.” (Revelesen 17:14; Luk 12:32) Dispela i soim olsem namba bilong ol bai liklik tru taim yumi skelim wantaim namba bilong olgeta lain sipsip bilong Jisas.—Jon 10:16.
Ol tingting kranki ol man i gat long lain i go long heven
Tingting kranki: Olgeta gutpela manmeri i go long heven.
Tok i tru: God i tok promis olsem planti gutpela manmeri bai kisim laip oltaim long graun.—Song 37:11, 29, 34.
Jisas i tok: “I no gat wanpela man i bin i go antap long heven, nogat.” (Jon 3:13) Olsem na em i kamapim klia olsem ol gutpela manmeri i bin dai paslain long em, kain olsem Abraham, Moses, Jop, na Devit, ol i no go long heven. (Aposel 2:29, 34) Ol dispela man i bin bilip olsem ol bai kirap bek na kisim laip long graun.—Jop 14:13-15.
Ol manmeri em ol i kirap bek na kisim laip long heven, Baibel i kolim dispela olsem “namba 1 kirap bek.” (Revelesen 20:6) Dispela i makim olsem bai i gat narapela kirap bek. Em kirap bek bilong ol manmeri hia long graun.
Baibel i tok taim Kingdom Bilong God i mekim wok bos, “bai i no gat dai moa.” (Revelesen 21:3, 4) Dispela tok promis i makim samting bai kamap long graun, long wanem, dai em samting we i no bin kamap long heven.
Tingting kranki: Olgeta man wan wan i makim olsem ol bai kisim laip long heven o kisim laip long graun.
Tok i tru: God yet i makim ol Kristen em ol bai kisim “dispela prais em singaut bilong i go antap,” em laip long heven. (Filipai 3:14) Yumi yet i no inap makim olsem yumi bai mekim wok bilong God long heven o hia long graun.—Matyu 20:20-23.
Tingting kranki: Ol man i no gat nem na ol i no fit long go long heven, ol bai kisim laip oltaim long graun.
Tok i tru: God i kolim ol manmeri bai kisim laip oltaim long graun olsem “ol manmeri bilong mi,” “ol manmeri mi bin makim,” na “lain Jehova i bin blesim ol.” (Aisaia 65:21-23) Ol bai inapim laik bilong God long pastaim tru—olsem ol manmeri bai no gat sin na ol bai stap laip oltaim long paradais long graun.—Stat 1:28; Song 115:16; Aisaia 45:18.
Tingting kranki: Namba 144,000 long Revelesen em tok piksa, na em i no namba tru tru.
Tok i tru: Em tru olsem planti namba long Revelesen em tok piksa, tasol sampela namba em namba tru tru. Olsem, em i tok long “nem bilong 12-pela aposel bilong Pikinini Sipsip.” (Revelesen 21:14) Yumi ken skelim evidens i kamapim klia olsem namba 144,000 em namba tru tru na i no tok piksa.
Revelesen 7:4 i tok long “namba bilong ol dispela wokboi em ol i kisim mak [o, ol bai kisim laip long heven], olsem 144,000.” Ves i kamap bihain liklik i stori long namba tu lain olsem: “bikpela lain manmeri, em ol man i no inap kaunim namba bilong ol.” God bai kisim bek tu dispela “bikpela lain manmeri.” (Revelesen 7:9, 10) Sapos namba 144,000 em i no namba tru tru, na em i makim olgeta manmeri God bai kisim bek, orait em bai i no stret long stori long narapela lain manmeri em “ol man i no inap kaunim namba bilong ol.”a
Na tu, Baibel i kolim lain 144,000 olsem lain em “God i bin baim bek ol namel long ol manmeri na ol i stap olsem namba 1 kaikai i redi long gaden.” (Revelesen 14:4) Dispela hap tok, “namba 1 kaikai i redi long gaden,” i makim liklik lain em ol i stap olsem mausman bilong ol narapela. Em i makim ol Kristen bai mekim wok king wantaim Krais long heven na ol bai bosim ol manmeri long graun em i no gat man inap kaunim namba bilong ol.—Revelesen 5:10.
a Profesa Robert L. Thomas i stori long namba 144,000 long Revelesen 7:4 na em i tok: “Dispela ves i stori long wanpela lain i gat namba stret bilong en na long 7:9, ves i stori long wanpela lain i no gat namba stret bilong en. Sapos yumi tok dispela namba em i tok piksa tasol, orait yumi mas tok i no gat wanpela namba long dispela buk em i namba tru tru.”—Revelation 1-7: An Exegetical Commentary, pes 474.