Askim

Bilong wanem ol Witnes Bilong Jehova i tok dispela namba 144,000 em Buk Kamapim Tok Hait i kolim, em i namba tru tru na em i no wanpela tok piksa tasol?

Aposel Jon i raitim tok olsem: “Mi harim ol i kolim namba bilong ol manmeri i kisim mak. Ol i putim mak long 144,000 manmeri.” (KTH 7:⁠4) Long Baibel, dispela tok “ol manmeri i kisim mak” em i makim wanpela lain manmeri God i bin makim ol namel long ol lain bilong graun bilong ol i ken mekim wok king wantaim Krais long heven na bosim Paradais em bai kamap long graun. (2 Korin 1:​21, 22; KTH 5:​9, 10; 20:⁠6) I gat sampela as na yumi ken ting dispela namba 144,000 em i namba tru tru. Wanpela as i stap long ol ves klostu long Kamapim Tok Hait 7:⁠4.

Taim aposel Jon i kisim tok long driman long dispela lain 144,000, em i lukim wanpela arapela lain. Em i kolim dispela namba tu lain olsem “planti manmeri tru” na “i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” Dispela bikpela lain em ol manmeri ol bai abrusim bagarap long taim bilong “bikpela hevi” tru klostu nau bai kamap, em bai pinisim pasin nogut nau i stap long graun.​—⁠KTH 7:​9, 14.

Tasol tok bilong Jon long ves 4 na 9 bilong Kamapim Tok Hait sapta 7 i narapela narapela kain. Em i tok dispela namba wan lain, em “ol manmeri i kisim mak,” em i gat namba stret bilong en. Tasol namba tu lain, em “planti manmeri tru,” i no gat namba stret bilong en. Olsem na i stret yumi ken ting dispela namba 144,000 em i namba tru tru. Sapos dispela namba 144,000 em i tok piksa tasol na i makim wanpela lain yumi no save long namba bilong ol, orait tok bilong tupela ves i no olsem narapela narapela kain, na tok bilong en i no gat strong. Olsem na ol ves i stap klostu long ves 4 i makim strong olsem yumi mas tingim dispela namba 144,000 olsem namba tru tru.

Sampela saveman bilong Baibel, long bipo na long nau, ol i bin kisim wankain tingting​—⁠olsem dispela namba em i namba tru tru. Olsem: Inap 100 yia i go pinis, wanpela saveman bilong Baibel, Ethelbert W. Bullinger bilong Inglan, em i bin mekim sampela tok long Kamapim Tok Hait 7:​4, 9, olsem: “Samting i kamap klia tru i olsem: Long dispela wanpela sapta yet, wanpela lain i gat namba stret bilong en na wanpela lain i no gat namba stret bilong en.” (Buk The Apocalypse or “The Day of the Lord,” pes 282) Na i no longtaim i go pinis, Robert L. Thomas, Jr., em profesa bilong Nupela Testamen long wanpela bikpela skul (The Master’s Seminary) long Amerika, em i tok: “I no gat as tru na yumi ken tok dispela namba em wanpela tok piksa tasol.” Na em i tok moa: “Em i wanpela namba stret [long KTH 7:4], tasol long 7:9 i no gat wanpela namba stret. Sapos yumi tok dispela namba em i tok piksa tasol, orait yumi mas tok i no gat wanpela namba long dispela buk em i namba tru tru.”​—⁠Buk Revelation: An Exegetical Commentary, Volium 1, pes 474.

Sampela i tok Buk Kamapim Tok Hait i gat planti tok piksa long en, olsem na yumi ken ting olgeta namba long dispela buk​—⁠namba 144,000 tu​—⁠em i tok piksa tasol. (KTH 1:​1, 4; 2:10) Tasol dispela tingting i no stret. Tru, planti namba long Kamapim Tok Hait em tok piksa bilong makim sampela samting, tasol i gat sampela namba long en i namba tru tru. Olsem: Jon i toktok long “nem bilong ol 12-pela aposel bilong Pikinini Sipsip.” (KTH 21:14) Em i klia tru olsem namba 12 long dispela ves em i namba tru tru na i no wanpela tok piksa. Na tu, aposel Jon i toktok long “1,000 yia” bilong Krais i stap King. Dispela namba em tu i namba tru tru, olsem yumi inap lukim sapos yumi skelim gut tok bilong Baibel.a (KTH 20:​3, 5-7) Olsem na bilong save olsem wanpela namba long Buk Kamapim Tok Hait em namba tru tru o em i wanpela tok piksa, yumi mas lukim ol ves i stap klostu.

Dispela tingting olsem namba 144,000 em i namba tru tru na i makim wanpela lain i gat namba stret bilong en, na em i liklik lain tasol taim yumi skelim wantaim dispela lain “planti manmeri tru,” dispela tok i stret wantaim sampela arapela ves bilong Baibel. Olsem: Long dispela piksa olsem driman aposel Jon i kisim, bihain liklik ol i tok long dispela lain 144,000 olsem “God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek.” (KTH 14:​1, 4) Dispela tok “namba wan lain” i toktok long wanpela liklik lain tasol em God i bin makim. Na tu, taim Jisas i stap long graun em i toktok long ol man em ol bai mekim wok king wantaim em long Kingdom bilong em long heven na em i kolim ol olsem “liklik lain.” (Luk 12:32; 22:29) Tru tumas, dispela lain God i kisim namel long ol manmeri bilong graun na ol bai stap king long heven, ol i liklik lain tasol taim yumi skelim wantaim ol lain manmeri husat bai stap long Paradais bihain bai kamap long graun.

Olsem na ol ves i stap klostu long Kamapim Tok Hait 7:4 na ol tok bilong dispela samting i stap long ol arapela hap bilong Baibel i kamapim klia olsem dispela namba 144,000 em i namba tru tru. Em i toktok long ol man husat bai stap king wantaim Krais long heven na bosim Paradais long graun i pulap long planti manmeri i no gat namba stret bilong ol, em ol i lotuim God Jehova na i stap amamas.​—⁠Song 37:⁠29.

[Futnot]

[Rait long pes 31]

Namba bilong lain bai stap king wantaim Krais long heven, em 144,000 tasol

[Piksa long pes 31]

Lain “planti manmeri tru” i no gat namba stret bilong en

[Piksa Kredit Lain long pes 31]

Stars: Courtesy of Anglo-Australian Observatory, photograph by David Malin