Ripot Long Wok Bilong Kingdom
Ol i Tingim “Ol Lain i Bin Kisim Hevi Ol Man i Lusim Tingting Long Ol”
LONG kirap bilong 2001, Haykaz, em wanpela Witnes Bilong Jehova i gat 15 krismas, i go raun lukim wanpela so long “Ol Lain i Bin Kisim Hevi Ol Man i Lusim Tingting Long Ol,” long Bern, Swiselan. So i kamapim stori bilong ol Witnes Bilong Jehova em ol Natsi i bin mekim nogut long ol. Long pinis bilong raun bilong em, Haykaz i tok: “Mi bin harim stori long ol hevi nogut tru ol Witnes Bilong Jehova i kisim long han bilong ol Natsi, tasol dispela em namba wan taim mi lukim ol pepa na piksa bilong dispela taim stret ol samting i bin kamap. Ol samting mi lukim long so, ol ripot bilong ol man i bin lukim stret long ai ol samting i bin kamap, na ol tok sampela man bilong raitim stori bilong bipo i kamapim, ol dispela samting i kirapim tru tingting na bel bilong mi.”
Bihain, taim tisa i makim Haykaz long raitim wanpela ripot long ol wanskul bilong em long haiskul, Haykaz i makim dispela het tok “Ol Witnes Bilong Jehova—Ol Lain i Bin Kisim Hevi Long Han Bilong Ol Natsi Ol Man i Lusim Tingting Long Ol.” Tisa i orait long dispela stori, tasol em i tokim Haykaz, taim em i kamapim sampela tok bilong ol buk, em i mas mekim wok tu long ol buk i no bilong ol Witnes. Haykaz i orait long mekim olsem. Em i tok: “Mi raitim sotpela stori bilong sampela buk mi bin ritim i stori long ol Witnes Bilong Jehova long taim bilong Natsi. Mi kamapim tu tingting bilong mi yet long dispela so ‘Ol Lain i Bin Kisim Hevi Ol Man i Lusim Tingting Long Ol.’ Mi raitim dispela ripot long 43 pes, wantaim ol piksa na ol poto.”
Long Novemba 2002, Haykaz i kamapim ripot bilong em long ol wanskul, ol tisa, ol famili, na ol pren. Bihain long dispela, i gat haptaim bilong givim askim na em i bekim, rot i op long em i kamapim ol tok bilong Baibel i as bilong ol bilip bilong em. Taim wanpela yangpela meri long odiens i askim bilong wanem em i makim dispela het tok, Haykaz i tok planti buk bilong stori long ol samting bilong bipo, ol i no save stori long ol Witnes Bilong Jehova, olsem na em i laik bai ol man i ken save ol Witnes i bin sanap strong tru na holimpas bilip Kristen bilong ol. Wanem samting i kamap long dispela?
Haykaz i tok: “Ol wanskul bilong mi i kirap nogut tru. Ol i no save olsem ol man i bin mekim nogut tru long ol Witnes Bilong Jehova olsem wanpela lain. Na tu, planti i no save olsem ol Witnes Bilong Jehova i bin stap long ol banis kalabus nogut bilong ol Natsi ol i gat wanpela mak long klos bilong ol—em pepol traiengol.”
Bihain long em i kamapim stori bilong em, Haykaz i gat rot long toktok wantaim ol wanskul na kamapim ol tok bilong Baibel i as bilong bilip bilong ol Witnes long blut, alkohol, na long stretpela pasin man i mas bihainim. Haykaz i tok: “No gat wanpela wanskul i tok bilas long mi.” Na tu, nau ol i putim ripot bilong em long laibreri bilong skul. Dispela bai mekim wok bilong helpim ol man na ol i no ken lusim tingting long pasin bilong ol Witnes Bilong Jehova long sanap strong tru na holimpas bilip.