Yu Ting i Gat Wanpela Gavman Inap Stap Strong na Bosim Graun?—⁠Baibel i Tok Wanem?

Ol gavman long olgeta hap bilong graun i bungim planti bikpela hevi. Ol kantri we ol samting i save ron gut long en, nau gavman bilong ol i bungim hevi bilong ripot nogut bilong ol politisen, ol eleksen, politik i brukim lain, na ol bikhet pasin insait long kantri.

Baibel i tok i gat wanpela gavman tasol we i no gat wanpela samting bai bagarapim. Ating yu save pinis long dispela gavman. Jisas Krais i bin toktok long dispela gavman long beten em i skulim ol disapel long en.

“Yupela i mas beten olsem: ‘Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.’”—Matyu 6:9, 10.

Baibel i tok wanem long Kingdom?

Kingdom—wanpela gavman i stap strong

Kingdom i stap long heven na bosim graun.

Jisas i kolim dispela gavman olsem “Kingdom bilong heven.” (Matyu 4:17; 5:3, 10, 19, 20) Dispela em risen na Jisas i tok: “Kingdom bilong mi i no bilong dispela graun.”—Jon 18:36.

Kingdom bai kisim ples bilong ol gavman bilong ol man long graun.

Baibel i tok: “Dispela kingdom . . . bai brukbrukim i go liklik liklik na pinisim olgeta dispela kingdom [bilong ol man], na em wanpela tasol bai stap oltaim oltaim.”—Daniel 2:44.

Jisas Krais bai stap King long dispela Kingdom, na i go nat wanpela saming bai bagarapim dispela Kingdom.

Baibel i tok: “Wok bos bilong em i bilong oltaim oltaim na i no inap pinis, na kingdom bilong em i no inap bagarap.”—Daniel 7:13, 14.

Kingdom bai kamapim bel isi na gutpela sindaun long graun.

Baibel i tok: “Olgeta wan wan man bai i stap bel isi namel long ol gaden wain na ol diwai fik bilong ol, na i no gat man bai mekim ol i pret.”—Maika 4:4, Good News Translation.

Kisim sampela save moa long Kingdom

Taim Jisas i stap long graun, em i lusim bikpela haptaim long “autim gutnius bilong Kingdom.” (Matyu 9:35) Jisas i tok profet tu olsem:

“Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”—Matyu 24:14.

Tude, ol man i autim gutnius bilong Kingdom long winim 240 kantri. Mipela invaitim yu long kisim sampela save moa long dispela gavman na hau bai wok bos bilong en i helpim yu.

Plis watsim vidio Kingdom Em i Wanem Samting?