Ol Witnes Bilong Jehova i Save Mekim Wok Misineri?

Yes. Maski wanem hap mipela i stap long en, olgeta Witnes Bilong Jehova i holim wankain tingting olsem man i mekim wok misineri, na oltaim mipela i save autim bilip bilong mipela long ol narapela.​—Matyu 28:19, 20.

Na tu, sampela Witnes i save visitim o muv i go long wanpela hap long kantri bilong ol we planti manmeri i no harim yet gutnius bilong Baibel. Sampela Witnes i save go sindaun long narapela kantri na bai ol inap mekim bikpela wok moa bilong autim tok. Ol i amamas long ol tu i mekim wok bilong truim dispela tok profet bilong Jisas: “Yupela bai stap witnes bilong mi . . . i go inap long olgeta hap bilong graun.”​—Aposel 1:8.

Long 1943, mipela i bin kamapim wanpela skul bilong givim trening long sampela misineri bilong mipela. Kirap long dispela taim na i kam, winim 8,000 Witnes i bin go long dispela skul, em Wastaua Baibel Skul Bilong Gileat.