Wai na Ol Witnes Bilong Jehova i No Insait Long Wok Politik?
Ol Witnes Bilong Jehova i no save insait long wok politik bikos ol i bihainim bilip bilong ol em Baibel i as bilong en. Mipela i no save pulim tingting bilong ol lida bilong gavman, o vot long wanpela politikol pati o kendidet, o sanap long ileksen, o joinim ol bung o protes bilong senisim gavman. Mipela i bilip olsem Baibel i givim ol gutpela risen long wai na mipela i no mekim ol dispela samting:
Mipela i bihainim eksampel bilong Jisas—em i sakim wok politik. (Jon 6:15) Em i skulim ol disaipel bilong em olsem “ol i no bilong dispela graun,” olsem na ol i no ken sapotim ol wok politik.—Jon 17:14, 16; 18:36; Mak 12:13-17.
Mipela i stap gut long Kingdom Bilong God, em Jisas i bin toktok long en taim em i tok: “Ol bai autim dispela gutnius bilong Kingdom long olgeta hap bilong graun.” (Matyu 24:14) Mipela i stap olsem ol mausman bilong Kingdom Bilong God na mipela i gat wok long tokaut olsem Kingdom Bilong God bai kam, olsem na mipela i no insait long ol wok politik bilong olgeta kantri, na dispela i makim tu kantri mipela i stap long en.—2 Korin 5:20; Efesus 6:20.
Mipela i no insait long wok politik, olsem na mipela inap autim gutnius bilong Kingdom Bilong God long ol manmeri i holim kain kain tingting long sait bilong politik. Mipela i save mekim ol toktok na pasin we i kamapim klia bilip bilong mipela olsem Kingdom Bilong God bai stretim ol hevi bilong graun.—Buk Song 56:11.
Mipela i no stap long kain kain grup bilong wok politik, olsem na lain bilong mipela long olgeta hap bilong graun inap stap wanbel tru olsem wanpela lain brata. (Kolosi 3:14; 1 Pita 2:17) Tasol ol lotu husat i insait long wok politik, lain bilong ol i no stap wanbel.—1 Korin 1:10—1 Korin 1:10.
Rispektim ol gavman. Maski mipela i no insait long wok politik, mipela i rispektim wok bos bilong gavman long kantri mipela i stap long en. Dispela i stret wantaim tok bilong Baibel: “Olgeta man i mas aninit long ol gavman.” (Rom 13:1) Mipela i bihainim lo, baim takis, na wok gut wantaim ol samting gavman i mekim bilong lukautim ol sitisen bilong en. Mipela i no save joinim ol lain husat i laik daunim gavman, nogat, mipela i save bihainim tok bilong Baibel long mekim beten bilong helpim “ol king na ol man i holim wok bos,” na moa yet taim ol i laik mekim ol disisen we inap afektim pasin bilong stap fri long mekim lotu.—1 Timoti 2:1, 2, futnot.
Mipela i rispektim raits bilong ol narapela long mekim ol disisen bilong ol yet long sait bilong wok politik. Eksampel, mipela i no save bagarapim ron bilong ol ileksen o stopim ol man husat i laik vot.
Mipela i no save insait long wok politik, olsem na yu ting dispela pasin i kirap nau tasol? Nogat. Ol aposel na ol Kristen bilong pastaim i bin holim wankain tingting long wok bos bilong gavman. Buk Beyond Good Intentions i tok: “Ol Kristen bilong pastaim i save olsem ol i mas rispektim ol man i mekim wok bos insait long gavman, tasol ol i no tingting liklik long insait long wok politik.” Buk On the Road to Civilization i mekim wankain tok olsem, ol Kristen bilong pastaim “i no holim wanpela wok insait long wok politik.”
Mipela i no save insait long wok politik, olsem na yu ting dispela bai bagarapim seifti bilong kantri? Nogat. Mipela ol sitisen husat i laikim pasin bilong stap bel isi, olsem na mipela i no inap mekim ol samting we inap bagarapim seifti bilong ol narapela. Lukim wanpela ripot bilong 2001 em National Academy of Sciences of Ukraine i kamapim taim ol i skelim pasin bilong mipela long abrusim wok politik, na ripot i tok: “Long nau, ating sampela i no laikim dispela pasin bilong ol Witnes Bilong Jehova; dispela pasin em risen na hatpela gavman Natsi na lain Komiunis bilong bipo i bin sutim tok long ol.” Tasol maski gavman Soviet i daunim tru ol Witnes, ol “i stap yet olsem ol sitisen bilong bihainim lo. Ol i bihainim onest pasin na daunim laik bilong ol yet na wok long ol fam na ol faktori o woksop na ol i no kamapim hevi long lain Komiunis.” Olsem laspela tok bilong ripot i kamapim, long nau tu ol bilip na ol samting ol Witnes Bilong Jehova i mekim i no inap “bagarapim seifti bilong kantri na wok bilong gavman long lukautim kantri.”