Bikpela Babilon Em Wanem Samting?

Bekim bilong Baibel

Buk Revelsen i stori long “wanpela meri,” em i wanpela “pamukmeri” na em i gat wanpela nem, dispela nem em i “wanpela tok hait, em olsem: ‘Bikpela Babilon.’” (Revelesen 17:1, 3, 5) Dispela meri i makim olgeta lotu giaman, em ol lotu i “lusim tok tru bilong God na senisim na kisim tok giaman.”a (Rom 1:25, BB.) Ol dispela lotu i no wankain, tasol olgeta i stiaim ol manmeri i go longwe long God tru, em Jehova.​—Lo 4:35.

Ol mak i makim Bikpela Babilon

1. Bikpela Babilon em wanpela tok piksa tasol. Ol tok bilong Buk Revelesen i kamapim “ol piksa,” so i stret yumi ken tok olsem Bikpela Babilon em wanpela tok piksa, na em i no wanpela meri tru tru. (Revelesen 1:1) Na tu, dispela meri “i sindaun antap long planti wara,” wara i makim “olgeta lain pipol, na ol bikpela lain manmeri, na ol manmeri bilong ol kantri na bilong ol tokples.” (Revelesen 17:1, 15) Wanpela meri tru tru i no inap mekim olsem.

2. Bikpela Babilon em wanpela oganaisesen i stap long olgeta hap bilong graun. Ol i kolim dispela meri olsem “bikpela taun i gat wanpela kingdom i bosim olgeta king bilong dispela graun.” (Revelesen 17:18) Olsem na em i bosim na stiaim ol wok samting long olgeta hap bilong graun.

3. Bikpela Babilon em wanpela oganaisesen bilong lotu, em i no oganaisesen bilong politik o bisnis. Ol Babilon bilong bipo ol i lain bilong tingim tru lotu, so ol manmeri i save mekim “ol wok marila” na ol “wok posin.” (Aisaia 47:1, 12, 13; Jeremaia 50:1, 2, 38) Ol manmeri bilong dispela taun i save mekim ol lotu giaman na ol i birua long God tru, Jehova. (Stat 10:8, 9; 11:2-4, 8) Ol king bilong Babilon i save hambak na apim nem bilong ol yet, na ol i daunim nem bilong Jehova na lotu bilong em. (Aisaia 14:4, 13, 14; Daniel 5:2-4, 23) Olsem tasol, Bikpela Babilon i gat nem long “mekim wok long ol samting bilong ol spirit nogut.” Dispela i kamapim klia olsem em i wanpela oganaisesen bilong lotu.​—Revelesen 18:23.

   Bikpela Babilon i no wanpela oganaisesen bilong politik, bikos “ol king bilong graun” i krai long em taim em i bagarap. (Revelesen 17:1, 2; 18:9) Na tu, em i no wanpela oganaisesen bilong ol wok bisnis, bikos Baibel i kamapim klia olsem Bikpela Babilon em i narapela long “ol bisnisman bilong graun.”​—Revelesen 18:11, 15.

4. 

   Photograph taken by courtesy of the British Museum

   Bikpela Babilon em wanpela tok piksa i makim stret lotu giaman. Lotu giaman i no skulim ol manmeri long i go klostu long God tru, Jehova, nogat, ol stiaim ol manmeri long lotuim ol narapela god. Baibel i kolim dispela pasin olsem “pasin pamuk long sait bilong lotu.” (Wok Pris 20:6, ftn.; Kisim Bek 34:15, 16) Ol lotu giaman i wok yet long skulim ol manmeri long ol bilip bilong Babilon bilong bipo, na tu, bilip bilong god triwan, man i gat wanpela spirit i no inap dai na i stap yet taim man i dai pinis, na lotuim ol imis. Ol dispela lotu i bungim lotu bilong ol wantaim pasin bilong laikim ol samting bilong dispela graun. Baibel i tok dispela kain pasin bilong i no stap gut long God i olsem ol i mekim pasin adaltri long sait bilip.​—Jems 4:4.

   Pasin bilong lotu giaman long hambak long mani kago bilong ol, dispela i stret wantaim stori Baibel i mekim long Bikpela Babilon, husat i “werim pepol klos na retpela klos” na “bilas long gol na ol ston i dia tumas na ol pel.” (Revelesen 17:4) Bikpela Babilon i as bilong “olgeta stingpela samting bilong graun,” ol tok ol i skulim ol man long en na pasin ol i mekim i bagarapim nem bilong God. (Revelesen 17:5) Ol lain i insait long lotu giaman em “olgeta lain pipol, na ol bikpela lain manmeri, na ol manmeri bilong ol kantri na bilong ol tokples” husat i sapotim Bikpela Babilon.​—Revelesen 17:15.

Bikpela Babilon i gat asua long dai “bilong olgeta manmeri em ol birua i bin kilim ol i dai long graun.” (Revelesen 18:24) Kirap long bipo yet na i kam inap long nau, lotu giaman i as bilong ol woa na ol i strongim pasin teroris, na tu, ol i no skulim stret ol manmeri long Jehova, God bilong pasin laikim, em i wanem kain man tru. (1 Jon 4:8) Ol i no skulim ol man long tok i tru, so dispela tu i as na blut bilong planti man i bin kapsait.

God i gat wanem tingting long Bikpela Babilon?

Long ai bilong God, “ol sin bilong [Bikpela Babilon] i hip i go antap olgeta long heven.” (Revelesen 18:4, 5) God i belhat long lotu giaman bikos ol i no skulim ol man long tok i tru long God em i husat tru na ol i mekim nogut long lain bilong em.

Wanem samting bai painim Bikpela Babilon?

Baibel i tok olsem God i bin tokaut olsem em bai “givim panismen” long Bikpela Babilon. (Revelesen 18:20) Long rot bilong tok piksa, Baibel i tok profet olsem God bai pinisim olgeta lotu giaman. (Revelesen 18:8) God bai kirapim retpela wel animal—i makim strongpela oganaisesen bilong politik—long tanim long lotu giaman na bagarapim na pinisim em olgeta. (Revelesen 17:16, 17) “Olsem tasol kwiktaim tru ol bai tromoi bikpela taun Babilon i go daun, na ol man bai i no inap lukim em moa.” (Revelesen 18:21) So i gat gutpela risen long ol man husat i laik amamasim God, ol i mas “lusim” lotu giaman na stap longwe long en.​—2 Korin 6:14-17.