Olsem Wanem Sakrifais Jisas i Givim i ‘Baim Bek Planti Man’?
Bekim bilong Baibel
Sakrifais Jisas i givim em rot bilong God i kisim bek, o sevim, ol man long sin na dai. Baibel i tok long blut bilong Jisas i bin kapsait olsem pe bilong baim bek ol man. (Efesus 1:7; 1 Pita 1:18, 19) Olsem na Jisas i tok em i kam bilong “givim laip bilong em . . . bilong baim bek planti manmeri.”—Matyu 20:28.
Wai na i mas i gat “pe bilong baim bek planti manmeri”?
God i wokim fes man, Adam, i gutpela olgeta, o em i no gat sin. Em inap stap laip oltaim oltaim tasol em i lusim dispela laip bikos em i wokim disisen long sakim tok bilong God. (Stat 3:17-19) Taim em i gat ol pikinini, em i givim hevi bilong sin long ol. (Rom 5:12) Em risen na Baibel i kamapim olsem Adam i salim em yet na ol pikinini bilong em long stap wokboi bilong sin na dai. (Rom 7:14) Ol i gat sin, olsem na no gat wanpela bilong ol inap baim bek samting Adam i bin lusim.—Buk Song 49:7, 8.
God i sori long ol tumbuna pikinini bilong Adam bikos ol i stap nogut na ol i no gat hop. (Jon 3:16) Olsem na God i bihainim stretpela lo bilong em na em i no inap lukluk tasol o larim nating sin bilong ol na i no gat gutpela risen, nogat. (Buk Song 89:14; Rom 3:23-26) God i laikim ol manmeri, so em i stretim rot bilong fogivim ol sin bilong ol long nau, na long bihain, em bai helpim ol na ol i no inap mekim sin gen. (Rom 5:6-8) Pe bilong baim bek man em wanpela rot tasol long God inap fogivim yumi.
Pe bilong baim bek man i gat wanem wok?
Long Baibel, dispela tok “pe bilong baim bek man” i makim dispela tripela samting:
Em pe bilong baim wanpela samting.—Namba 3:46, 47.
Em i opim rot long man i kamap fri, o kisim bek man.—Kisim Bek 21:30.
Em pe i stret long pe bilong samting i bagarap, o i karamapim.a
Skelim hau ol dispela samting i stret long pe bilong baim bek man Jisas Krais i givim olsem sakrifais.
Pe bilong baim wanpela samting. Baibel i tok long ol Kristen olsem “God i baim yupela long bikpela pe.” (1 Korin 6:20; 7:23) Dispela bikpela pe em blut bilong Jisas, we em i “baim bek ol manmeri bilong givim long God, [em i] baim ol long olgeta traib na olgeta tokples na olgeta lain pipol na olgeta kantri.”—Revelesen 5:8, 9.
Man i kamap fri. Sakrifais Jisas i givim olsem pe bilong baim bek ol man i opim rot long “ol i ken kamap fri” long sin.—1 Korin 1:30; Kolosi 1:14; Hibru 9:15.
Pe i stret long pe bilong samting i bagarap. Sakrifais bilong Jisas i stret long samting Adam i bin lusim—laip bilong wanpela man i gutpela olgeta. (1 Korin 15:21, 22, 45, 46) Baibel i tok: “Wanpela man [Adam] i bin sakim tok na long dispela pasin planti manmeri i kamap sinman. Olsem tasol, wanpela man [Jisas Krais] i bin bihainim tok, na long dispela pasin planti manmeri i kamap stretpela manmeri.” (Rom 5:19) Dispela i kamapim klia hau dai bilong wanpela man inap baim bek planti sinman. Tru tumas, sakrifais bilong Jisas em “pe i stret bilong baim bek olgeta man” husat i mekim ol samting bambai dispela pe i helpim ol.—1 Timoti 2:5, 6.
a Long Baibel, tok Hibru em ol tanim olsem “pe bilong baim bek man” i kamapim kain aidia bilong wanpela prais, o samting i gat bikpela pe, em man i givim olsem pe. Olsem, long tok Hibru dispela tok ka·pharʹ i min olsem “karamapim.” Planti taim dispela tok i makim karamapim sin. (Buk Song 65:3) Narapela tok i wankain liklik koʹpher i makim pe man i givim bilong karamapim pe bilong wanpela samting o kisim bek. (Kisim Bek 21:30) Olsem tasol, tok Grik lyʹtron, em ol i save tanim olsem “pe bilong baim bek man,” em inap makim tu pe o wok bilong mekim man i kamap fri. (Matyu 20:28; The New Testament in Modern Speech, by R. F. Weymouth) Ol man i save raitim tok Grik i yusim dispela tok bilong makim pe man i givim olsem pe bilong baim bek wanpela kalabusman bilong pait o lusim wanpela sleiv i kamap fri.