Yu Ting God i Stap Long Olgeta Hap?
Bekim bilong Baibel
God inap lukim olgeta samting na em inap mekim olgeta samting long wanem wanem hap em i laikim. (Provep 15:3; Hibru 4:13) Tasol Baibel i no tok God i stap long olgeta hap—olsem stap insait long olgeta samting, nogat. Baibel i tok em i wanpela man na em i stap long ples bilong en.
God i gat wanem kain bodi: God em i spirit. (Jon 4:24) Ol man i no inap lukim em. (Jon 1:18) Planti taim ol visen bilong Baibel we i stori long God i kamapim olsem em i stap long ples i narakain tru. I no gat wanpela taim Baibel i kamapim olsem em i stap long olgeta hap.—Aisaia 6:1, 2; Revelesen 4:2, 3, 8.
Ples God i stap long en: God i stap long ples spirit, em ples i narapela kain tru long olgeta narapela samting Em i bin wokim. Long dispela ples spirit, God i gat “ples bilong [em] long heven.” (1 King 8:30) Baibel i stori long wanpela taim we ol ensel “i kam bung long ai bilong Jehova,”a i olsem Baibel i tok, God i stap long wanpela ples stret bilong en.—Jop 1:6.
Sapos God i no stap long olgeta hap, em inap long tingim mi?
Yes. God i tingim tru olgeta wan wan man. Maski God i stap long ples spirit, em i lukim ol man long graun husat i laik tru long amamasim em, na em i mekim samting bilong helpim ol. (1 King 8:39; 2 Stori 16:9) Skelim hau Jehova i kamapim olsem em i tingim ol man i laik tru long lotuim em:
Taim yu beten: Jehova i ken harim beten bilong yu long dispela taim stret.—2 Stori 18:31.
Taim bel hevi i daunim yu tru: “Jehova i save stap klostu long ol manmeri em hevi i daunim tru ol; na em i save kisim bek ol manmeri bel bilong ol i bagarap.”—Buk Song 34:18.
Taim yu nidim tok bilong stiaim yu: Jehova bai “mekim yu kisim pasin bilong skelim gut ol samting na skulim yu” long rot bilong Tok bilong em, Baibel.—Buk Song 32:8.
Tingting kranki olsem God i stap long olgeta hap
Tingting kranki: God i stap long olgeta samting em i wokim.
Tok tru: God i no stap long graun o long ol samting long yunives we em i wokim. (1 King 8:27) Tru tumas, ol sta na ol narapela samting God i wokim “i tokaut long biknem bilong [em].” (Buk Song 19:1) Tasol God i no save stap long ol samting em i wokim, wankain olsem wanpela atis i no save stap long piksa em i peintim. Maski i olsem, wanpela piksa man i peintim i tokim yumi long sampela samting long dispela atis. Olsem tasol, ol samting yumi lukim em Krieta i wokim i tokim yumi long “ol pasin bilong em i stap hait,” olsem bikpela strong, savetingting, na pasin laikim bilong em.—Rom 1:20.
Tingting kranki: God i mas stap long olgeta hap na bai em i save long olgeta samting na em i gat olgeta strong.
Tok tru: Holi spirit bilong God, o strong bilong God, em strong em i save yusim long mekim wok. Long rot bilong holi spirit, God inap lukim na mekim olgeta samting, long kain kain ples, na long kain kain taim, na i no olsem em i mas stap long olgeta hap.—Buk Song 139:7.
Tingting kranki: Buk Song 139:8 i tok God i stap long olgeta hap taim em i tok: “Sapos mi go antap long heven, yu stap long hap, na sapos mi mekim bet bilong mi long Matmat, yu stap tu long dispela ples.”
Tok tru: Dispela skripsa i no stori long ples God i stap long en. Em i yusim tok piksa bilong skulim yumi olsem God i no stap longwe na em inap long mekim ol samting bilong helpim yumi.
a Jehova em nem bilong God olsem Baibel i kamapim.