Baibel i Tok Wanem Long Pasin Bilong Putim Meikap na Nekles Samting?
Bekim bilong Baibel
Baibel i no stori planti long dispela samting, na tu em i no tambuim pasin bilong putim meikap, nekles, na ol narapela samting bilong bilas. Maski i olsem, no ken tingting tumas long lukluk bilong yu, Baibel i tok long “bilasim insait bilong [yu] long pasin isi na bel isi.”—1 Pita 3:3, 4
No gat tambu long pasim kain kain bilas
Ol bilipmeri long bipo i save pasim kain kain Bilas. Rebeka, meri i maritim Aisak em pikinini man bilong Abraham, i werim gol ring long nus, ol gol bengol, na ol narapela samting i gat bikpela pe we em i kisim olsem presen long papa bilong man em i laik maritim. (Stat 24:22, 30, 53) Na tu, Esta i orait long ol i “welim na bilasim em” bilong redim em na bai em i ken kisim wok olsem kwin bilong Persia. (Esta 2:7, 9, 12) I luk olsem ol samting ol i yusim i makim “kosmetik,” o “ol kain kain meikap.”—New International Version; Easy-to-Read Version.
Baibel i yusim ol tok piksa long nekles na iaring samting bilong makim gutpela samting. Olsem, wanpela man husat i save givim gutpela edvais i olsem “gol iaring” bilong “man i redi long putim yau.” (Provep 25:12) Olsem tasol, God yet i skelim ol samting em i mekim long lain Israel olsem wanpela man marit i givim ol gutpela samting long meri bilong em olsem ol bengol, nekles, na iaring. Ol dispela samting i mekim lain Israel i “naispela tumas.”—Esekiel 16:11-13.
Tingting kranki long meikap na nekles samting
Tingting kranki: Long 1 Pita 3:3, Baibel i tambuim pasin bilong “pasim gras long kain kain stail o putim kain kain bilas gol.”
Tok tru: Ol tok i stap paslain na bihain i soim olsem Baibel i kamapim klia olsem em i bikpela samting long kisim ol gutpela pasin, na gutpela lukluk o ol bilas i no bikpela samting. (1 Pita 3:3-6) Ol dispela wankain tok tu i stap long ol narapela hap bilong Baibel.—1 Samuel 16:7; Provep 11:22; 31:30; 1 Timoti 2:9, 10.
Tingting kranki: Pasin bilong penim ai, em kwin nogut Jesebel i putim i soim olsem i no stret long putim meikap.—2 King 9:30.
Tok tru: Jesebel, em meri i save tokaut long ol samting bai kamap bihain na em i save kilim i dai ol man, ol i skelim em long ol pasin nogut bilong em, na i no lukluk bilong em.—2 King 9:7, 22, 36, 37.