Baibel i Tok Wanem?

Pasin Bilong Bilasim Skin i Bikpela Samting Long God?

“Olsem lista bilong ol bikpela tok i stap insait long wanpela buk i helpim man long save long tok bilong buk, . . . olsem tasol pasin na klos bilong man o meri i helpim yumi long save long tingting bilong em.”—Em tok bilong Philip Massinger, wanpela man bilong Inglan i save raitim ol stori.

LONG yia 200 samting, wanpela man bilong raitim ol tok bilong lotu, em Taitus Klemens, em i raitim wanpela longpela lista i gat planti lo i bosim pasin bilong ol man long bilasim skin na stretim gut gras. I tambu long ol i pasim ol bis samting na ol gutpela gutpela laplap o laplap i gat kala kala. Ol meri i no ken penim gras bilong ol, o ‘penim pes bilong ol.’ Na ol man i mas katim gras bilong het, long wanem, ‘sotpela gras i makim olsem man i tingting gut,’ tasol ol i no ken sevim mausgras, long wanem, ‘mausgras i mekim na man i luk olsem em i gat nem na namba olsem wanpela papa.’a

Sampela handet yia bihain, wanpela bikman bilong lotu Talatala, em Jon Kalvin, em i kamapim ol lo i makim kala na stail bilong klos ol man i bihainim em ol i ken pasim. Ol man i no orait tumas long bis na naispela laplap, na meri inap go kalabus sapos em i pasim gras bilong em i go antap tumas.

Inap planti yia, ol bikman bilong lotu i bin holim kain strongpela tingting olsem, olsem na planti manmeri i gat gutpela bel i askim olsem: Klos mi putim i bikpela samting long God? God i no orait long sampela klos i gat stail o long pasin bilong penim pes? Baibel i tok wanem?

Samting Bilong Wan Wan Yet

Long Jon 8:​31, 32, Jisas i tokim ol disaipel bilong em olsem: “Sapos yupela i holim strong tok bilong mi, . . . yupela bai i save long tok tru, na tok tru bai i mekim yupela i kamap fri.” Tru tumas, ol tok i tru Jisas i lainim ol man long en, em bilong mekim ol man i kamap fri long ol bikpela hevi pasin bilong tumbuna na ol bilip giaman i save putim long ol. Ol dispela tok i tru i bilong givim nupela strong long ol man “i save hatwok tru na i karim ol bikpela hevi.” (Matyu 11:28) Jisas na Papa bilong em, God Jehova, ol i no gat laik long bosim i stap bilong ol man bambai ol man yet i no inap kirap na skelim ol samting ol i laik mekim, nogat. Jehova i laik ol man i kisim tingting olsem bilong ol man i bikpela pinis, em ol man “i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.”​—⁠Hibru 5:⁠14.

Olsem na Baibel i no gat planti lo long pasin bilong bilasim skin na stretim gut gras o long penim pes samting. Lo Bilong Moses i kolim tasol sampela kain klos ol Juda i mas pasim, na dispela bai makim ol i narapela kain long ol narapela lain klostu long ol na ol dispela lain i no ken bagarapim ol long pasin nogut bilong ol. (Namba 15:38-41; Lo 22:⁠5) Pasin bilong bilasim skin na gras em samting bilong wan wan Kristen yet.

Tasol dispela i no makim olsem God i no tingim klos yumi pasim o maski yumi putim wanem kain klos o bilas, em i orait long en. Nogat tru. Baibel i gat ol gutpela tok bilong stiaim yumi na i kamapim tingting bilong God long pasin bilong bilasim skin na stretim gut gras.

Bihainim Gutpela Tingting

Aposel Pol i tok, ol meri Kristen i mas “putim ol gutpela klos samting, inap tasol long ol. Ol i no ken hambak na bilasim gras na skin bilong ol long ol kain kain bis na bilas gol na ol klos i dia tumas. Nogat.” Na Pita tu i tok, ol meri i “no ken bilasim skin ausait tasol, long pasin bilong bilasim gras na putim bilas gol.”​—⁠1 Timoti 2:9; 1 Pita 3:⁠3.

Olsem wanem? Pita na Pol i tok ol man na meri Kristen i no ken mekim gut skin bilong ol? Nogat, ol i no tok olsem! Baibel i stori long ol gutpela man na meri i bin pasim bis samting o ol i welim skin bilong ol long wel na sanda i gat gutpela smel. Taim Esta i no go yet long King Serksis bilong toktok wantaim em, inap longpela taim ol meri i welim skin bilong Esta long wel i gat gutpela smel, na ol i rapim skin bilong em bilong mekim gut skin bilong em. Na ol i putim naispela klos long Josep na pasim wanpela sen gol long nek bilong em.​—⁠Stat 41:42; Kisim Bek 32:​2, 3; Esta 2:​7, 12, 15.

Dispela tok ‘stretpela tingting’ Pol i kolim, em i helpim yumi long pilim dispela tok bilong helpim yumi. Long tok Grik dispela tok i makim olsem pasin isi na pasin bilong bosim skin. Na i makim olsem man i gat stretpela tingting long em yet, na em i no laik pulim ai bilong ol narapela man. Sampela narapela Baibel i raitim dispela tok olsem ‘gutpela tingting,’ ‘gutpela pasin,’ o ‘bosim gut skin.’ Dispela em i wanpela bikpela pasin ol elda Kristen i mas bihainim.​—⁠1 Timoti 3:⁠2.

Olsem na taim Baibel i tok, yumi mas bilas long pasin i stret, Baibel i strongim yumi long sakim klos i narapela kain stret na em inap bagarapim bel bilong ol narapela na bagarapim gutnem bilong yumi na bilong kongrigesen Kristen tu. Ol manmeri i tok ol i daun long God, ol i no ken bilasim skin bilong pulim ai bilong ol narapela, ol i mas tingting gut na wok strong long ‘bilasim insait bilong ol long olkain bilas i no inap long bagarap. Dispela kain bilas em pasin bilong i stap belgut na i stap bel isi.’ Pita i tok, dispela “em i gutpela moa yet long ai bilong God.”​—⁠1 Pita 3:⁠4.

Ol Kristen ‘i stap long ai bilong olgeta manmeri,’ olsem na ol i mas tingim pasin ol i mekim long ai bilong ol man. Ol i gat wok bilong autim gutnius, olsem na ol i mas tingim moa yet pasin bilong ol. (1 Korin 4:9; Matyu 24:14) Olsem na ol i no laik wanpela samting​—⁠pasin bilong bilasim skin na stretim gut gras tu​—⁠i pulim tingting bilong ol man na ol i no harim dispela bikpela tok.​—⁠2 Korin 4:⁠2.

Long narapela narapela kantri ol manmeri i gat narapela narapela kain klos na bilas bilong ol, tasol Baibel i givim ol gutpela tok bilong stiaim olgeta man wan wan inap long ol i ken skelim gut ol klos na bilas ol i laik pasim. Long gutpela pasin sori God i larim ol manmeri long bihainim laik bilong ol yet long bilasim skin, tasol taim ol i mekim olsem ol i mas bihainim tok bilong Baibel.

[Futnot]