ASKIM BILONG OL YANGPELA
Hau Bai Baibel Inap Helpim Mi?—Hap 1: Save Gut Moa Long Baibel Bilong Yu
“Mi traim long ritim Baibel, tasol em longpela tumas na mi pilim hatwok!”—Briana, 15.
Yu save pilim olsem? Dispela atikol inap helpim yu!
Wai na mi mas ritim Baibel?
Yu pilim olsem pasin bilong ritim Baibel em boring? Sapos yu pilim olsem, mipela klia long tingting bilong yu. Ating yu tingim Baibel olsem wanpela buk i gat planti tausen liklik pes na no gat ol piksa—i no olsem TV na ol vidio!
Tasol tingim dispela: Sapos yu painim wanpela bikpela boks bilong bipo we i gat ol samting i dia tumas long en, yu ting yu bai gat laik long save wanem samting i stap insait long en?
Baibel i kain olsem dispela boks i gat ol gutpela samting i dia tumas. Em i gat planti gutpela savetingting we inap helpim yu long
Mekim ol gutpela disisen
Pas gut wantaim papamama bilong yu
Painim ol gutpela pren
Karim hevi bilong presa
Hau bai dispela buk bilong bipo inap helpim yumi long nau? Em bikos “God em i as bilong olgeta tok i stap long Rait Holi.” (2 Timoti 3:16) Dispela i makim olsem ol edvais i stap long Baibel i kam long Man i gat bikpela savetingting tru long yunives.
Baibel i olsem wanpela boks i gat planti gutpela savetingting
Hau bai mi ritim Baibel?
Wanpela rot bilong ritim Baibel em yu ken ritim kirap long fes buk i go long laspela buk. Dispela bai helpim yu long kliagut long bikpela astok bilong Baibel. I gat planti wei bilong ritim Baibel. Skelim dispela tupela eksampel:
Yu inap ritim dispela 66 buk bilong Baibel kirap long fes buk na i go long laspela buk, olsem kirap long Buk Stat i go long Revelesen.
Yu ken ritim ol stori bilong Baibel long ol samting i kamap paslain na i go long ol samting i kamap bihain—kain olsem, ritim stori bilong ol bikpela samting i bin kamap paslain na ol narapela bikpela samting i kamap bihain long en.
Traim Dispela: Apendiks A7 long Baibel Nupela Taim Trenslesen i gat lista bilong ol bikpela samting long laip bilong Jisas taim em i stap long graun.
Namba 2 rot bilong ritim Baibel em makim wanpela stori we i stret long wanpela hevi yu wok long feisim. Olsem:
Yu laik painim ol gutpela pren em yu ken trastim ol? Ritim stori bilong Jonatan na Devit. (1 Samuel, sapta 18-20) Bihain yusim worksheet “How to Find Loyal Friends” bilong kisim ol gutpela skul long dispela stori we yu ken bihainim.
Yu laik strongim pasin bilong yu long sakim traim? Ritim stori bilong Josep long hau em i bin sakim traim. (Stat, sapta 39) Bihain yusim worksheets “How to Resist Temptation . . . Joseph—Part 1” na “Falsely Accused! Joseph—Part 2” bilong kisim ol gutpela skul long dispela stori we yu ken bihainim.
Yu laik kisim save long hau beten i ken helpim yu? Ritim stori bilong Nehemia. (Nehemia, sapta 2) Bihain yusim worksheet “God Answered His Prayer” bilong kisim ol gutpela skul long dispela stori we yu ken bihainim.
Traim Dispela: Taim yu ritim Baibel, stap long hap we i no gat nois so yu ken putim tingting olgeta long samting yu ritim.
Namba 3 rot bilong ritim Baibel, makim wanpela stori o wanpela hap bilong Buk Song, ritim, na bihain skelim hau dispela stori i stret long yu. Taim yu ritim pinis, givim ol dispela askim long yu yet:
Wai na Jehova i putim dispela stori long Baibel?
Dispela stori i kamapim wanem pasin bilong Jehova o wei bilong em long mekim ol samting?
Hau bai mi bihainim skul mi kisim long dispela stori long laip bilong mi?
Traim Dispela: Putim wanpela mak long winim! Raitim det em yu kirap long ritim Baibel long rot bilong yusim Baibel Ritim Sediul i stap long jw.org/tpi.