Wokim Ol Vidio Bilong Program Bilong 2020 “Amamas Oltaim”! Rijinel Kibung

Ol vidio i save kamap long ol rijinel kibung bilong yumi i save strongim tru yumi na helpim yumi long kliagut moa long ol tok bilong Baibel. Long 2020 “Amamas Oltaim”! Rijinel Kibung, i gat 114 vidio, na tu, 43 tok em ol memba bilong Gavening Bodi na helpim bilong ol i mekim. Yu save long hamas taim na mani yumi yusim long wokim ol dispela vidio?

Klostu olsem 900 brata na sista long olgeta hap bilong graun i yusim taim na save bilong ol long helpim long wokim dispela program. Taim yumi bungim wantaim, ol i lusim olsem 100,000 aua na winim 2-pela yia long dispela projek. Dispela i makim tu 70,000 aua em ol i lusim bilong pinisim 76 minit Baibel drama, em nem bilong en Nehemia: “Amamas i Kam Long Jehova i Givim Yumi Strong.”

Na bikpela mani tu i go long lukautim ol volantia long kaikai na ples slip samting, na tu, ol teknikel samting, ikuipmen, na ol hap ol bai stap na pinisim dispela wok.

Jared Gossman, em i save wok wantaim Audio/Video Services, em i tok: “Teaching Committee bilong Gavening Bodi i laik tru olsem ol vidio i mas soim kain kain kalsa na ples. Ol i mekim olsem bikos ol bratasista bilong yumi i stap long olgeta hap bilong graun na ol i laik ba ol vidio i soim dispela. Bilong inapim dispela wok, 24 tim long 11-pela kantri i wok bung wantaim long dispela projek. Mipela i bin yusim gut mani, plenim gut wok, na stretim gut ol samting bambai planti manmeri i ken wok gut wantaim long olgeta hap bilong graun.”

Bilong wokim planti bilong ol vidio bilong yumi, mipela i nidim ol spesel ikuipmen na ol samting bilong wokim vidio. Olsem, vidio Nehemia: “Amamas i Kam Long Jehova i Givim Yumi Strong” ol i wokim insait long Mt. Ebo studio klostu long Patterson, New York, long Amerika. Bilong yusim gut ol donesen na long wankain taim wokim ol vidio i luk olsem ol i bilong bipo, ol brata i wokim ol wol we i no hevi tumas na bai em i luk olsem wol bilong Jerusalem bilong bipo. Wan wan wol i longpela inap olsem 6 mita, na ol i karamapim long samting i luk olsem matres na ol i penim na i luk olsem ston. Ol inap muvim ol dispela wol long rekodim ol narapela narapela hap bilong drama, dispela i mekim na ol i no nid long wokim planti wol. Maski i olsem, ol i spendim K340,000 long wokim ol wol na ol narapela samting bilong drama.a

Nau yumi save na pilim tru ol wok ol brata i mekim bilong kamapim program bilong rijinel kibung bilong dispela yia. Mipela i save tru olsem wok ol brata i mekim long wokim dispela program i opim rot long ol manmeri long olgeta hap i ken preisim Jehova. Tenkyu long donesen yupela i givim bilong helpim wok long olgeta hap bilong graun long rot bilong donate.jw.org na ol narapela rot.