Wok Bilong Trensletim Program Bilong 2020 “Amamas Oltaim”! Rijinel Kibung

Long Julai na Ogas 2020, em festaim ol bratasista long olgeta hap bilong graun bai watsim program bilong rijinel kibung long seim taim. Bilong dispela samting i ken kamap, mipela i mas rekodim ol program na trensletim i go long winim 500 tokples. Mipela i save plenim na pinisim kain projek insait long wanpela yia o winim wanpela yia. Tasol bikos long Coronavirus pendemic, ol trensleta i mas pinisim wok bilong tanim ol tok bilong 2020 “Amamas Oltaim”! Rijinel Kibung insait long 4-pela mun.

Translation Services na Global Purchasing long Wol Hetkota bilong ol Witnes Bilong Jehova i helpim dispela bikpela projek. Translation Services i luksave olsem planti trenslesen tim i nidim planti moa ikuipmen long pinisim dispela wok, moa yet ol aikualiti maikrofon. Olsem na Global Purchasing i stretim rot long baim 1,000 maikrofon na ol i salim i go long 200 lokesen.

Bilong seivim mani, mipela i baim planti maikrofon, sipim i go long wanpela hap, na bihain pekim gen na sipim i go long ol lokesen i stap long olgeta hap bilong graun. Taim mipela i baim planti maikrofon, wan wan maikrofon i kostim olsem K570, dispela i makim tu pe bilong sipim—mipela i seivim moa long 20 pesen bilong mani em mipela bai tromoi long baim long stua.

Global Purchasing i mas baim ol dispela samting na stretim rot long sipim namel long mun Epril na Me 2020—em haptaim we planti bisnis i no mekim wok tumas bikos long dispela pendemic. Maski i olsem, long pinis bilong Me, planti rimot trenslesen ofis, ol brens ofis, na ol narapela trenslesen lokesen i kisim ol ikuipmen ol i nidim.

Jay Swinney, em ovasia bilong Global Purchasing, em i tok: “Ol Betel dipatmen na ol narapela kampani ausait i wok gut wantaim long dispela projek. Mipela inap mekim hariap dispela projek na yusim gut ol donesen na helpim ol bratasista bikos long holi spirit bilong Jehova.”

Nicholas Ahladis, em i save wok wantaim Translation Services, em i tok: “Ol trensleta em ol i stap long lokdaun long dispela taim i amamas tru long kisim dispela ikuipmen. Maski ol i stap longwe long ol narapela insait long trenslesen tim bilong ol, ol i wok gut wantaim long trensletim na rekodim ol tok, ol drama, na ol singsing long winim 500 tokples.”

Dispela em wanpela bilong planti projek mipela i pinisim bilong kamapim 2020 “Amamas Oltaim”! Rijinel Kibung bilong ol bratasista long olgeta hap bilong graun. Gutpela pasin bilong yupela long givim donesen long rot bilong donate.jw.org na long ol narapela rot i mekim na mipela inap baim ol dispela samting.