Wok Rilif Long Graun Olgeta Long Taim Bilong Pendemik

Long Mas 2020, taim World Health Organization i tokaut olsem COVID-19 em i wanpela pendemik, planti i no bin ting olsem dispela sik bai stap yet long olgeta hap bilong graun winim 1-pela yia bihain. Planti milion manmeri, na tu, ol Witnes Bilong Jehova, i karim hevi long dispela pendemik long sait bilong bodi, bel na tingting, na long sait bilong mani. Ol Witnes Bilong Jehova i mekim wanem bilong oganaisim gut na givim helpim long dispela taim bilong pendemik?

Helpim Ol Lain i Nidim Helpim

Aninit long daireksen bilong Komiti Bilong Ol Kodineta bilong Gavening Bodi bilong Ol Witnes Bilong Jehova, winim 950 Disasta Rilif Komiti (DRC) i kamap long graun olgeta bilong givim helpim long ol lain i bungim hevi long COVID-19. Sampela taim ol i stretim rot na bai ol manmeri long komiuniti i givim helpim, na ol narapela taim, Ol Witnes i kisim helpim long gavman. Na tu, ol DRC i oganaisim ol bikpela rilif wok.

Tingim samting i bin kamap long Paragwai. Wanpela nuispepa i tok pendemik i kamapim bikpela hevi long sait bilong mani, olsem na “planti lain Paragwai i no gat inap kaikai.” Tasol DRC long Paragwai i kirap pinis long givim helpim—ol i givim ol beg saplai long ol famili i gat 4-pela manmeri na ol dispela saplai i bilong 2-pela wik. Ol i givim ol kaikai, ol klining saplai, na ol sop samting bilong klinim bodi. Olgeta wan wan bilong ol dispela beg saplai em inap olsem 30 US dola.

Hau ol lain i mekim rilif wok i lukautim ol yet na ol narapela na ol i no kisim sik COVID? Ol i werim ol mask na stap longwe long narapela narapela inap olsem 1 mita samting. Na tu, ol i save sekim olsem ol kampani i saplaim kaikai i redim ol kaikai long ol ples i klin. Dispela i makim olsem olgeta lain husat i redim ol beg saplai i mas werim ol klos i protektim ol, ol i mas klinim na spreim marasin long kar bilong ol, na putim ol beg saplai long ol ples we ol i spreim marasin long en. Na tu, ol lain i bringim ol beg saplai i mas stap longwe inap olsem 1 mita samting long ol brata i pikim ol saplai.

Yusim Gut Ol Donesen

Stat long Janueri 2021, Komiti Bilong Kodineta i tok orait long tromoi winim 25 milion US dola long mekim rilif wok bilong COVID-19. Ol brens na ol DRC i yusim gut ol donesen na ol i wok hat long kisim gutpela diskaun long ol samting ol i nidim. Long Sili, ol brata i oganaisim rilif wok i laik baim 750 kilogram bilong ol lentil. Tasol pe bilong ol lentil i dabol insait long 1-pela mun! Tupela aua bihain long ol i wanbel long baim ol lentil long pe i antap tru, man i salim ol lentil i tokim ol brata olsem narapela man i givim bek oda bilong em. So dispela man i no salim ol lentil long bikpela pe, em i salim ol lentil em narapela man i bringim bek na em i salim long nomol prais olsem bilong laspela mun!

Tasol taim ol brata i go bilong pikim ap ol lentil, man bilong salim lentil i laik kenselim oda bilong ol, na em i tok ol i no givim ol kaikai long pasin fea olsem ol narapela oganaisesen i mekim. Bihain long ol brata i mekim sotpela beten long tingting, wanpela brata bilong yumi i tokim em olsem ol i mekim wok painimaut pinis long olgeta wan wan kongrigesen bilong save husat i nidim tru ol lentil. Ol brata i eksplenim tu olsem bikos kalsa na bekgraun bilong ol manmeri i narapela narapela, wan wan beg saplai i gat ol samting em wan wan famili i nidim na i stret long kalsa na bekgraun bilong ol. Na tu, ol i tokim em olsem olgeta donesen na helpim ol Witnes Bilong Jehova i kisim em long rot bilong volantia. Dispela man i kirap nogut tru. Olsem na em i wanbel long daunim prais, na tu, em i donetim 400 kilogram bilong ol lentil long neks oda bilong ol brata.

“Pruvim Olsem Ol i Gat Pasin Laikim Tru”

Lusu em wanpela lapun wido long Laibiria, na em i stap wantaim 5-pela famili memba bilong em. Wanpela moning, ol i kaikai brekfas na skelim Baibel teks bilong de, na tumbuna pikinini man bilong em husat i gat 7-pela krismas i luksave olsem ol i no gat moa kaikai long haus. Em i askim olsem, “Yumi bai kaikai wanem samting?” Lusu i tokim em olsem em i beten pinis na em i bilip olsem Jehova bai givim ol kaikai ol i nidim. Long dispela seim apinun, Lusu i kisim fon kol long ol elda long kongrigesen bilong em na ol i invaitim em long kisim sampela kaikai. Lusu i tok: “Tumbuna pikinini man bilong mi i tok nau em i save olsem Jehova i ken harim na bekim ol beten bikos Jehova i bekim beten bilong mi.”

Wanpela meri long Demokratik Ripablik Bilong Kongo i stap neks dua long wanpela Witnes famili. Bihain long em i lukim dispela famili i kisim kaikai long ol wanbilip bilong ol, em i tok: “Bihain long pendemik, mipela bai kamap Ol Witnes Bilong Jehova bikos ol i lukautim ol brata na sista bilong ol long dispela taim bilong hevi.” Man bilong em i askim em: “Yu bai kamap wanpela Witnes Bilong Jehova bikos long wanpela beg rais?” Em i tok: “Nogat, tasol dispela beg rais i pruvim olsem ol i gat pasin laikim tru.”

Ol Witnes Bilong Jehova i redi tasol long givim helpim long ol bratasista long dispela taim bilong pendemik bikos long ol donesen yupela i givim. Tenkyu long ol kontribiusen yupela i mekim long rot bilong donate.jw.org.