Gaden Iden​—Yu Ting Em Ples Bilong Ol Man Long Pastaim Tru?

PIKSAIM long tingting olsem yu stap long wanpela gutpela gaden. I no gat ol samting bilong pulim nabaut tingting bilong yu, na i no gat nois bilong ol ka na masin samting bilong biktaun. Dispela gaden i bikpela tru, na i no gat wanpela samting i bagarapim bel isi bilong en. Na gutpela samting moa, bel na tingting bilong yu i stap isi, na bodi bilong yu i strong, na i no gat sik na pen samting. Yu amamas tru long lukim ol gutpela samting.

Yu lukim ol gutpela kala bilong ol plaua, klinpela wara i lait gut taim san i kisim, na ol lip bilong ol diwai na gras samting i grin tru. Yu pilim gutpela win long skin bilong yu, na tu, yu pulim gutpela smel bilong ol plaua samting. Yu harim nois bilong ol lip i meknais, wara i kalap long ol ston, krai bilong ol pisin, na singaut bilong ol binatang i mekim wok. Taim yu piksaim ol dispela gutpela samting, ating bai yu gat laik tru long stap long dispela ples, a?

Ol manmeri long olgeta hap i bilip olsem namba wan man na meri i bin stap long kain ples olsem. Inap planti handet yia, ol i bin skulim ol lain bilong lotu Juda, lotu Kristen, na lotu Islam long gaden Iden, we God i bin putim Adam na Iv i stap long en. Baibel i tok, ol i bin stap bel isi na amamas. Ol yet i stap wanbel, na bel isi wantaim ol animal na wantaim God husat i bin givim rot long ol bilong i stap oltaim long dispela gutpela ples tru.​—⁠Stat 2:​15-24.

Ol Hindu tu i bilip long wanpela paradais i bin stap long bipo tru. Ol lain bilong lotu Buda i bilip olsem ol bikman bilong lotu, olsem ol Buda, ol i bin kamap long wanpela taim we graun i bin stap olsem wanpela ples paradais. Na planti lotu bilong Afrika i skulim ol man long ol stori i wankain long stori bilong Adam na Iv.

Dispela stori bilong wanpela paradais bilong bipo i bin stap long planti lotu na bilip bilong ol man. Wanpela man bilong raitim buk i tok: “Planti lain man i bilip long wanpela paradais i bin stap long bipo we ol samting i bin stap gutpela tru, ol man i bin stap fri, bel isi, amamas, ol i gat planti gutpela samting, na i no gat ol hevi, bel nogut, na pait. . . . Taim ol man i tingim olsem dispela paradais i lus, ol i no amamas na ol i gat laik tru olsem paradais i mas kamap gen.”

Yu ting olgeta dispela stori na bilip i gat wanpela as tasol? Yu ting samting i bin stap tru i kirapim planti man long kisim dispela bilip? Tru tru long bipo i gat gaden Iden na Adam na Iv?

Ol man i gat tupela tingting ol i tok bilas long dispela bilip. Nau long dispela taim bilong bikpela save bilong saiens, planti i ting kain stori olsem em i stori tumbuna na stori nating tasol. Yumi kirap nogut olsem ol man i gat lotu, ol tu i gat tupela tingting long dispela samting. Planti hetman bilong lotu i kirapim ol man long ol i no ken bilip long gaden Iden. Ol i tok, long bipo i no gat wanpela ples olsem, na dispela stori em i stori nating, stori tumbuna samting, na tok piksa tasol.

Tru tumas, Baibel i gat ol tok piksa. Jisas yet i bin kamapim ol tok piksa em planti man i save long ol. Tasol Baibel i stori long ol samting i bin kamap long gaden Iden olsem samting i bin kamap tru tru, na i no wanpela tok piksa tasol. Sapos ol samting yumi stori long en i no bin kamap tru, orait olsem wanem yumi inap bilip long ol narapela tok bilong Baibel? Orait, yumi ken skelim as na sampela i gat tupela tingting long gaden Iden, na yumi ken save olsem tingting bilong ol i stret o nogat. Bihain long dispela bai yumi kisim save long as na dispela stori i bikpela samting long yumi wan wan.

Tru Tru Long Bipo i Gat Gaden Iden?

YU SAVE long stori bilong Adam na Iv na gaden Iden? Planti man long olgeta hap bilong graun i save long dispela stori. I gutpela yu yet i ritim dispela stori. Em i stap long Stat 1:26–3:24. Em hia ol bikpela tok bilong dispela stori:

God Jehovaa i kisim graun na i wokim wanpela man, givim nem Adam long em, na putim em long wanpela gaden ol i kolim Iden. God yet i wokim dispela gaden. I gat ol gutpela wara, na planti gutpela diwai i karim kaikai. Long namel bilong gaden i gat wanpela “diwai bilong givim gutpela save long wanem samting i gutpela na wanem samting i nogut.” God i tambuim ol man long kaikai long dispela diwai, na em i tokim ol olsem sapos ol i sakim tok bilong em, ol bai i dai. Bihain, Jehova i kisim bun long banis bilong Adam na wokim wanpela poroman bilong em​—⁠em Iv. God i givim wok long tupela long lukautim gaden, na i tokim ol olsem ol i mas kamap planti na i go sindaun long olgeta hap bilong graun.

Taim Iv i stap wanpis, wanpela snek i toktok long em, na i kirapim em long kaikai prut tambu na i tok God i giamanim em na i pasim em long kisim gutpela samting, em samting bai mekim em i kamap olsem god. Iv i bihainim tok bilong snek, na kaikai prut tambu. Bihain, Adam i bihainim pasin bilong em na sakim tok bilong God. Jehova i lukim ol samting i bin kamap na em i tokaut long strafe bilong Adam, Iv, na snek. Orait em i rausim tupela long dispela gutpela gaden, na ol ensel i pasim rot i go insait long en.

Planti saveman long bipo ol i tok ol samting em Buk Stat long Baibel i stori long en i bin kamap tru long bipo. Long nau, planti man i gat tupela tingting long dispela samting. Wanem as na ol man i gat tupela tingting long stori bilong Buk Stat long Adam, Iv, na gaden Iden? Orait nau yumi ken skelim fopela samting ol man i gat tupela tingting long en.

1. Olsem wanem? Gaden Iden em wanpela ples i bin stap tru?

Bilong wanem ol man i gat tupela tingting long dispela samting? Ating tingting bilong ol saveman bilong dispela graun i stiaim tingting bilong ol. Inap planti handet yia, ol tisa bilong lotu i ting olsem dispela gaden bilong God i stap yet long wanpela hap. Tasol ol saveman Grik, olsem Pleto na Aristotal, ol i tok olsem i no gat wanpela samting long dispela graun i gutpela olgeta, na dispela i stiaim tingting bilong ol lotu. Ol i tok, long heven tasol ol samting i gutpela olgeta. Olsem na ol tisa bilong lotu i ting, Paradais bilong bipo i bin i stap klostu long heven.b Sampela i bin tok, dispela gaden i stap long wanpela maunten i antap tru na i longwe long ol samting nogut bilong dispela graun; sampela i tok em i stap long Not Pol o long Saut Pol; sampela narapela i tok, Paradais i stap long mun o i stap klostu long mun. Olsem na yumi no kirap nogut olsem dispela stori long gaden Iden i kamap olsem wanpela stori nating. Sampela saveman long nau i tok gaden Iden i no bin stap tru long graun.

Tasol Baibel i tok gaden Iden i bin stap tru. Long Stat 2:​8-14, yumi kisim save long sampela samting bilong dispela gaden. Em i bin stap long hap bilong sankamap long wanpela ples ol i kolim Iden. Dispela gaden i gat wanpela wara i bruk na i kamap fopela han wara. Baibel i kolim nem bilong olgeta fopela wara na i stori liklik long ron bilong ol. Dispela i bin kirapim tingting bilong ol saveman, em planti bilong ol i bin skelim gut dispela stori bilong Baibel bilong givim tingting long ol bambai ol i ken save dispela gaden bilong bipo i bin stap we. Tasol ol i kamapim planti narapela narapela tingting i pait wantaim. Olsem wanem? Dispela i makim olsem stori bilong gaden Iden, na ol wara bilong en, i no stret o i stori nating tasol?

Tingim: Ol samting long gaden Iden i bin kamap olsem 6,000 yia i go pinis. Ating Moses i bin raitim ol dispela stori, na em i bin kisim ol tok long rot bilong harim stori long ol dispela samting o long sampela rait i bin stori long en. Moses i raitim dispela stori inap olsem 2,500 yia bihain long ol dispela samting i bin kamap. Gaden Iden i bin stap pinis olsem samting bilong bipo. Olsem wanem? Yu ting insait long planti handet yia, ol mak bilong graun na wara inap senis? Antap bilong graun i save senis senis long olgeta taim. Na hap we gaden Iden i bin stap long en, em ples tru bilong graun i guria​—⁠em wanpela ples we 17 pesen bilong ol bikpela guria bilong olgeta hap i save kamap long en. Long kain ples olsem planti taim ol bikpela senis i save kamap. Na tu, Bikpela Tait long taim bilong Noa i bin senisim tru mak bilong graun na ol maunten samting, olsem na long nau yumi no inap save graun i bin luk olsem wanem long bipo.c

Tasol i gat sampela samting yumi save long en olsem: Stori bilong Buk Stat i toktok long wanpela gaden i bin stap tru tru. Tupela bilong dispela 4-pela wara em Baibel i stori long en​—⁠Yufretis na Taigris​—⁠ol i ron yet long nau, na sampela het bilong dispela tupela wara i kirap long wankain hap. Dispela stori i kolim tu nem bilong ol kantri we ol dispela wara i bin ron long en, na ol gutpela samting bilong graun bilong dispela hap. Long ol manmeri bilong Israel bilong bipo, husat i namba wan lain long ritim dispela stori, ol tok bilong en i givim save long ol.

Olsem wanem? Ol stori tumbuna na stori nating tu i save kolim stret ol samting i bin stap tru? Nogat. Ol i no save kolim nem bilong ol ples na taim samting, bambai ol man i ken skelim olsem tok bilong ol i stret o nogat. Planti stori nating i kirap olsem: “Wanpela taim bipo, long wanpela longwe ples.” Tasol long ol stori bilong ol samting i bin kamap tru, ol i save kolim stret taim, ples, na nem bilong ol man, olsem stori bilong gaden Iden i kamapim.

2. Olsem wanem? Yumi inap bilip olsem God i wokim Adam long graun na Iv long bun bilong banis bilong Adam?

Ol wok saiens bilong nau i kamapim klia olsem bodi bilong ol man i gat ol kemikal​—⁠olsem haidrojen, oksijen, na kabon​—⁠em ol samting i stap insait long graun. Tasol olsem wanem ol dispela kemikal i bung wantaim na i kamapim wanpela samting i gat laip?

Planti saientis i tok, laip i kamap long rot bilong em yet, pastaim i gat wanpela liklik samting nating na insait long planti milion yia em i senis senis na kamapim samting i gat laip. Tasol dispela tok “liklik samting nating” i no stret, long wanem, olgeta samting i gat laip​—⁠wanpela sel tu⁠—​i bikpela samting. I no gat as na yumi ken ting olsem laip i kamap nating, nogat. Olgeta samting i gat laip i kamapim olsem i gat wanpela man i gat bikpela save tru i bin wokim, save bilong em i winim tru save bilong yumi ol man.d​—⁠Rom 1:⁠20.

Olsem wanem? Taim yu harim wanpela gutpela musik, o lukim wanpela naispela piksa, o amamas long wanpela nupela masin samting, bai yu tok strong olsem i no gat man i bin wokim ol dispela samting? Ating nogat, a? Tasol ol dispela samting i no winim tru bodi bilong man i gutpela na i narakain olgeta. Olsem wanem yumi ken ting i no gat Man i bin wokim? Na tu, stori bilong Buk Stat i kamapim olsem long olgeta samting i stap long graun na i gat laip, God i wokim ol man tasol i kamap olsem em yet. (Stat 1:26) Olsem na ol man tasol i kisim dispela laik bilong God long wokim ol samting, olsem ol gutpela musik, ol naispela piksa, na ol nupela masin samting. Olsem wanem? Yumi kirap nogut taim yumi lukim olsem God i save gut moa long wokim ol samting, winim yumi man?

Yu ting i hatwok long God i wokim meri long bun bilong banis bilong man?e God inap wokim meri long narapela rot, tasol taim em i mekim olsem, dispela i gat bikpela mining bilong en. Em i laik bai man na meri i marit na pas gut wantaim, olsem kamap “wanpela bodi tasol.” (Stat 2:24) Pasin bilong man na meri long pas gut wantaim na narapela i helpim gut narapela, dispela i kamapim klia olsem Man Bilong Wokim ol em i gat savetingting na pasin laikim, a?

Na tu, ol dokta i tokaut olsem olgeta manmeri bilong dispela graun i kamap long wanpela man na meri tasol. Sapos olsem, yu ting stori bilong Buk Stat em i stori nating tasol?

3. Olsem wanem? Diwai bilong givim gutpela save na diwai bilong givim laip i stori nating tasol?

Buk Stat i no stori olsem dispela tupela diwai yet i gat narapela kain strong, nogat. Ol i diwai tru tru em God i bin putim na ol i makim sampela samting.

Ating sampela taim ol man i save mekim wankain tok olsem, a? Olsem: Wanpela jas inap givim tok lukaut olsem ol man i no ken sakim kot. Taim jas i tok olsem, dispela i no makim olsem man i sakim ol samting bilong haus kot yet, olsem ol sia na tebol samting, nogat, dispela i makim olsem man i mas bihainim na rispektim tok bilong kot. Na tu, planti king i yusim stik na hat king bilong makim namba ol i holim.

Olsem na dispela tupela diwai i makim wanem samting? Ol man i bin kamapim kain kain tingting long dispela. Bekim tru bilong dispela askim i no hatwok, tasol i gat bikpela mining bilong en. Diwai bilong givim gutpela save long wanem samting i gutpela na wanem samting i nogut, i makim wanpela samting em God tasol i holim​—⁠em i gat rait long tokaut long wanem samting i gutpela na wanem samting i nogut. (Jeremaia 10:23) Olsem na taim man i stil long dispela diwai, em i brukim lo! Diwai bilong givim laip i makim wanpela presen em God tasol inap givim​—⁠em laip oltaim.​—⁠Rom 6:⁠23.

4. Wanpela snek i toktok i olsem samting bilong ol stori nating.

Tru, yumi inap tingting planti long dispela stori bilong Buk Stat, na moa yet sapos yumi no tingim ol narapela stori bilong Baibel. Tasol Baibel i kamapim klia insait bilong dispela stori.

Husat o wanem samting i mekim na i olsem dispela snek i toktok? Lain Israel bilong bipo i save long sampela narapela samting i kamapim klia wok bilong dispela snek. Olsem: Ol i save olsem maski ol animal i no save toktok, wanpela spirit inap mekim na i luk olsem wanpela animal i toktok. Na tu, Moses i bin raitim stori bilong Balam; God i salim wanpela ensel i kam na mekim donki bilong Balam i toktok olsem wanpela man.​—⁠Namba 22:​26-31; 2 Pita 2:​15, 16.

Olsem wanem? Ol narapela spirit, na ol spirit em ol i birua bilong God, ol tu inap wokim ol mirakel? Moses i bin lukim ol glasman bilong Isip i wokim sampela mirakel i wankain olsem ol mirakel bilong God, olsem ol i tromoi stik wokabaut na stik i tanim i kamap olsem snek. Strong bilong wokim ol kain mirakel olsem i kam long ol birua bilong God, em ol spirit nogut.​—⁠Kisim Bek 7:​8-12.

Na tu, holi spirit i bin kirapim Moses long raitim Buk Jop. Dispela buk i skulim yumi long planti samting long nambawan birua bilong God, Satan, husat i bin giaman na tok olsem olgeta wokboi bilong Jehova bai i no inap stap gut long Em. (Jop 1:​6-11; 2:​4, 5) Olsem wanem? Lain Israel bilong bipo i ting Satan i stiaim dispela snek long Iden na i mekim olsem em i toktok na i giamanim Iv, na Iv i no stap gut moa long God? Ating yumi ken tok ol i ting olsem, a?

Olsem wanem? Satan i mekim na snek i toktok? Bihain Jisas i tok long Satan olsem em i “man bilong tok giaman, na em i papa tru bilong pasin bilong tok giaman.” (Jon 8:44) Olsem na yu ting ‘papa tru bilong tok giaman’ em i bin kamapim namba wan tok giaman? Namba wan tok giaman i stap long ol tok em snek i bin mekim long Iv. God i tok olsem sapos ol i kaikai prut tambu ol bai dai, tasol tok Satan i mekim i pait wantaim dispela tok, em i tok: “Yutupela i no inap i dai.” (Stat 3:⁠4) Jisas i save olsem Satan i bin stiaim dispela snek. Ol tok bilong Buk Kamapim Tok Hait em Jisas i bin givim long aposel Jon i kamapim klia husat i dispela snek, em i kolim Satan olsem “dispela snek bilong bipo yet.”​—⁠KTH 1:1; 12:⁠9.

Yu ting i hatwok long yumi bilip olsem wanpela spirit i gat bikpela strong inap stiaim wanpela snek na mekim olsem snek i toktok? Ol man tu, maski ol i no gat bikpela strong olsem ol spirit, ol inap tromoi tok long maus bilong ol doli samting na mekim olsem doli i toktok.

Nambawan As na Yumi Ken Bilip Long En

Ating bai yu wanbel long tok olsem i no gat as na ol man i gat tupela tingting long ol stori bilong Buk Stat, a? Tasol i gat planti samting i kamapim ples klia olsem ol samting Buk Stat i stori long en i bin kamap tru long bipo.

Olsem: Baibel i kolim Jisas Krais olsem ‘man bilong tok “I tru” long olgeta tok na promis bilong God, na em i save autim stret olgeta tok bilong God.’ (KTH 3:14) Jisas em i man i gutpela olgeta, na i no gat tru wanpela taim em i mekim tok giaman. Na tu, em i skulim ol man olsem em i bin stap paslain tru long em i kam long graun olsem wanpela man​—⁠tru tumas, em i bin stap wantaim Papa bilong em, Jehova, “taim graun i no kamap yet.” (Jon 17:⁠5) Olsem na em i bin stap pinis taim God i wokim ol samting i gat laip long graun. Orait, dispela man husat i bin lukim olgeta samting i kamap, em i tok wanem?

Jisas i stori long Adam na Iv olsem ol i man na meri i bin stap tru. Taim em i toktok long lo bilong Jehova long wanpela man i maritim wanpela meri, em i stori long marit bilong Adam na Iv. (Matyu 19:​3-6) Sapos ol i no bin stap tru, na gaden em ol i bin stap long en i olsem stori nating, orait wanpela i bin giamanim Jisas o em yet i man bilong giaman. Tasol dispela i no stret! Jisas i bin stap long heven, na em i lukim hevi i bin kamap long gaden Iden. Olsem na yumi ken bilip tru long ol tok bilong em long dispela samting.

Tru tumas, sapos yumi no bilip long stori i stap long Buk Stat, orait yumi no inap bilip long Jisas. Na tu, bai yumi no inap kliagut long ol bikpela tok bilong Baibel na ol gutpela promis bilong en. Orait nau yumi ken skelim dispela samting.

[Ol Futnot]

As na Gaden Iden i Bikpela Samting Long Yu

WANPELA tok sampela saveman i bin kamapim bilong strongim tok olsem stori bilong gaden Iden i no stret, em olsem: Ol i tok ol narapela buk bilong Baibel i no stori long dispela. Paul Morris, wanpela profesa long ol samting bilong lotu, em i tok: “Ol buk bilong Baibel i stap bihain long Buk Stat i no gat stori long gaden Iden.” Ating sampela narapela “saveman” i wanbel long tok bilong em, tasol dispela tok i no stret liklik wantaim ol samting i stap tru.

Planti taim Baibel i stori long gaden Iden, Adam, Iv, na snek.a Tasol tingting kranki bilong sampela saveman i olsem samting nating taim yumi skelim wantaim samting em planti man i bilip long en. Taim ol hetman bilong lotu na ol man bilong sutim tok long ol tok bilong Baibel i tok olsem stori bilong Buk Stat long gaden Iden i no tru, i olsem ol i tok Baibel olgeta i no tru. Olsem wanem i olsem?

Sapos yumi kliagut long ol samting i kamap long gaden Iden, dispela bai helpim yumi long kliagut long ol narapela tok bilong Baibel. Olsem: Baibel inap helpim yumi long painim bekim bilong ol bikpela askim em ol man i save tingting planti long en. Ol samting i kamap long gaden Iden, planti taim dispela samting i insait long bekim em Baibel i givim long ol dispela askim. Tingim sampela askim olsem:

● Bilong wanem yumi save go lapun na dai? Adam na Iv inap i stap laip oltaim sapos ol i bihainim tok bilong Jehova. Sapos ol i sakim tok bilong Jehova, ol bai i dai. Long de ol i sakim tok bilong Jehova, ol i kirap long dai. (Stat 2:​16, 17; 3:​18, 19) Tupela i no gutpela olgeta moa, na ol i givim sin long ol pikinini bilong ol. Olsem na Baibel i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”​—⁠Rom 5:⁠12.

● Bilong wanem God i larim pasin nogut i stap? Long gaden Iden, Satan i tok God i save giaman na i no larim ol man long kisim ol samting bilong helpim ol. (Stat 3:​3-5) Long dispela rot Satan i tokaut olsem pasin bilong Jehova long bosim ol man i no stret. Adam na Iv i makim olsem ol i laik bihainim Satan; olsem na ol tu i sakim wok bos bilong Jehova, na i olsem ol i tok ol man yet i ken makim wanem samting i gutpela na wanem samting i nogut. Jehova i gat stretpela pasin na savetingting, na em i save olsem i gat wanpela rot tasol bilong stretim dispela tok ol i sutim long em​—⁠em i mas larim sampela haptaim i lus na givim rot long ol man long bosim ol yet. Planti pasin nogut i kamap long dispela, na wanpela as bilong en em Satan i wok long stiaim ol man, na dispela i kamapim klia wanpela bikpela tok olsem: Ol man i no inap sakim God na bosim wokabaut bilong ol yet.​—⁠Jeremaia 10:⁠23.

● I gat wanem as na God i wokim dispela graun? Jehova i putim gaden Iden olsem piksa bilong soim olsem em i laik graun olgeta i mas luk olsem wanem. Em i tokim Adam na Iv long kamapim pikinini na go sindaun long olgeta hap bilong graun na “bosim olgeta samting,” bambai ol i ken mekim graun olgeta i luk naispela tru olsem gaden Iden. (Stat 1:28) Olsem na God i laik dispela graun olgeta i kamap wanpela ples paradais we ol tumbuna pikinini bilong Adam na Iv em ol i gutpela olgeta na i stap wanbel, ol i ken sindaun long en. Planti tok bilong Baibel i stori long rot God i makim bilong inapim dispela laik bilong em.

● Bilong wanem Jisas Krais i kam long graun? Pasin bikhet long gaden Iden i kamapim indai long Adam na Iv na olgeta pikinini bilong ol, tasol long gutpela pasin God i givim rot long ol man long wetim gutpela samting bai kamap bihain. Em i salim Pikinini bilong em i kam long graun bilong givim laip bilong em bilong baim bek ol manmeri. (Matyu 20:28) Wanem samting i kamap long dispela? Orait, Jisas em i olsem “Adam i kamap bihain tru,” na em i mekim ol samting em Adam i no bin mekim. Long rot bilong bihainim tok bilong Jehova, Jisas i holimpas pasin bilong i stap gutpela olgeta olsem wanpela man. Bihain em i givim laip bilong em olsem ofa na em i opim rot bambai God i ken lusim sin bilong ol gutpela man na bai ol i ken kisim dispela laip em Adam na Iv i bin i gat long gaden Iden paslain long ol i mekim sin. (1 Korin 15:​22, 45; Jon 3:16) Samting Jisas i bin mekim i stretim rot na laik bilong Jehova long kamapim wanpela ples paradais olsem Iden bai kamap tru long dispela graun.b

Samting God i tingting pinis long mekim dispela i no stap hait, na tu, em i no olsem wanpela bilip bilong lotu i hatwok long kisimgut. Em samting tru. Wankain olsem gaden Iden em wanpela ples i bin stap tru long graun we ol animal na ol man i bin stap long en, olsem tasol tok promis bilong God long ol samting bai kamap bihain, em i tru, na klostu nau bai kamap. Bai yu stap long dispela ples? Samting yu mekim bai makim olsem yu bai stap long en o nogat. God i laik bai planti manmeri tru​—⁠ol sinman tu​—⁠ol i ken insait long dispela gutpela samting bai kamap bihain.​—⁠1 Timoti 2:​3, 4.

Taim Jisas i hangamap long diwai, em i toktok long wanpela man nogut. Dispela man i bin mekim pasin nogut na em i save olsem i gat as na ol i laik kilim em i dai. Tasol em i toktok long Jisas bambai Jisas i mekim gut bel bilong em. Jisas i tok wanem? Em i tok: “Yu bai stap wantaim mi long Paradais.” (Luk 23:​43, NW ) Sapos Jisas i laik dispela man nogut i kirap bek na stap oltaim long Paradais, ating em i laik yu tu i ken kisim dispela gutpela blesing, a? Yes, em i laik yu mas kisim dispela gutpela blesing, na Papa bilong em tu i laik yu mas kisim! Sapos yu laik kisim dispela gutpela samting long bihain, yu mas wok strong tru long kisim save long God husat i bin wokim dispela gaden Iden.

[Ol Futnot]

[Blok/Ol Piksa long pes 10]

WANPELA TOK PROFET I BUNGIM OL TOK BILONG BAIBEL WANTAIM

“Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai ol i krungutim het bilong yu, na bai yu kaikaim lek bilong ol.”​—⁠Stat 3:⁠15.

Dispela em i namba wan tok profet long Baibel em God i bin tokaut long en long gaden Iden. Husat dispela meri, lain bilong meri, snek, na lain bilong snek? Olsem wanem i gat pasin “birua” i stap namel long ol?

SNEK

Satan, em Man i Save Kotim Olgeta Manmeri.​—⁠KTH 12:⁠9.

MERI

Oganaisesen bilong Jehova long heven em lain ensel i insait long en. (Galesia 4:​26, 27) Aisaia i tok profet long “meri,” na em i tok dispela meri bai kamapim wanpela lain manmeri bilong spirit.​—⁠Aisaia 54:1; 66:⁠8.

LAIN BILONG SNEK

Em ol lain husat i bihainim laik bilong Satan.​—⁠Jon 8:⁠44.

LAIN BILONG MERI

Nambawan em Jisas Krais, husat i bin kamap long oganaisesen bilong Jehova long heven. Na ol brata bilong Krais husat bai mekim wok king wantaim em long heven, ol tu i insait long dispela “lain.” Ol dispela manmeri God i makim long holi spirit ol i insait long lain bilong spirit, em “lain Israel tru bilong God.”​—⁠Galesia 3:​16, 29; 6:16; Stat 22:⁠18.

KAIKAIM LEK

Mesaia i kisim bikpela pen, tasol dispela pen i no stap oltaim. Satan i mekim na ol i kilim i dai Jisas hia long graun. Tasol Jisas i kirap bek.

KRUNGUTIM HET

Satan bai pinis olgeta. Jisas bai bagarapim Satan na inap oltaim oltaim em bai i no stap moa. Paslain long Jisas i mekim olsem, em bai pinisim olgeta samting nogut em Satan i bin kamapim kirap long gaden Iden.​—⁠1 Jon 3:8; KTH 20:⁠10.

Bilong save gut long nambawan bikpela tok em Baibel i kamapim, lukim buklet The Bible​—What Is Its Message?, em ol Witnes Bilong Jehova i wokim.

[Piksa long pes 11]

Adam na Iv i karim ol bikpela hevi em sin i kamapim