Inap olsem tu tausen yia i go pinis, Jisas Krais i lainim ol man long wokabaut long pasin i narapela kain na i no putim hevi long ol. Tok em i lainim ol man long en i gat wanpela bikpela tok i tru. Em i tok: “Ol man i hangre long kisim save long God, ol i ken amamas.” (Matyu 5:​3, NW ) Em nau, Jisas i kirapim ol man long tingim nambawan bikpela samting ol i mas kisim​—⁠em tok i tru bilong Man Bilong Wokim yumi na ol i mas save long samting Em i tingting pinis long mekim.

Olsem stori i kamap bihain long dispela i soim, dispela tok i tru inap helpim yumi long luksave long wanem samting i bikpela samting tru, na dispela bai mekim na yumi stap amamas moa na i stap bilong yumi i gat as tru bilong en. Na tu, dispela tok i tru i mekim na yumi inap wetim gutpela samting bai kamap bihain.

Resepi Bilong Stap Amamas Tru

I MAS i gat gutpela resepi na gutpela kuk bilong kukim gutpela kaikai! Na i wankain liklik long pasin bilong stap amamas. I no wanpela samting tasol i mekim na man i stap amamas, nogat, planti samting long laip i kamapim amamas. Olsem wok, pilai, stap wantaim famili na ol pren, na ol wok bilong lotu. Tasol i gat ol narapela samting tu i kamapim amamas, olsem tingting na laik bilong man, na ol mak em i laik winim.

Gutpela tru na i no olsem yumi yet i mas painim resepi, olsem rot bilong stap amamas tru. Bilong wanem? Long wanem, Man Bilong Wokim yumi i bin givim wanpela gutpela buk i soim rot long yumi, em Baibel. Dispela buk o hap bilong en i stap nau long 2,377 tok ples​—⁠i no gat narapela buk ol i bin wokim long planti tok ples olsem!

Ol i bin tilim planti Baibel long planti tok ples tru, na dispela i soim olsem God i laik bai olgeta man i stap amamas na i pas gut wantaim em. (Aposel 10:​34, 35; 17:​26, 27) God i tok: “Mi . . . save skulim yupela na soim yupela long ol stretpela pasin yupela i mas bihainim na bai yupela i stap gut.” Sapos yumi bihainim ol lo bilong em, em i promis olsem bai yumi stap gut na bel isi “olsem wara i ran oltaim na i no save pinis.”​—⁠Aisaia 48:​17, 18.

Dispela tok promis i kirapim yumi long tingim tok bilong Jisas i stap long stori i kamap paslain long dispela. Em i tok: “Ol man i hangre long kisim save long God, ol i ken amamas.” (Matyu 5:​3, NW ) Pasin bilong kisim save long God em dispela ves i tok long en, i no makim pasin bilong lotu long skin tasol. Nogat. Em i stiaim olgeta wokabaut bilong yumi. Em i kamapim laik bilong yumi long amamas long harim tok bilong God na larim em i skulim yumi, long wanem, yumi save em i save gut long yumi, winim yumi yet. Errol i stadi long Baibel winim 50 yia pinis, em i tok: “Wanpela samting i kirapim mi long bilip tru olsem Baibel em i buk bilong God, em olsem taim mi bihainim ol tok bilong en, dispela i helpim mi tru long stap gut!”